38
1 တုၤနုၤတစုယွၤကတိၤတၢ်ဒီးစီၤယိၤဘးလၢကလံၤသဝံး အပူၤလီၤ.
2 ယွၤစံးဝဲဒၣ်, လၢနကသးဒ့ဒီယတၢ်ကူၣ်တၢ်ကျဲၤအဂီၢ်ဒီး နဆိကမိၣ်လီၤနသးလၢနမ့ၢ်မတၤတဂၤလဲၣ်.
3 ဂဲၤဆၢထၢၣ်ခဲကနံၣ်အံၤဒ်ပှၤပိာ်ခွါတဂၤအသိးဒိးစံးဆၢတၢ် သံကွၢ်လၢယသံကွၢ်နၤန့ၣ်တက့ၢ်.
4 ဖဲယတ့လီၤဟီၣ်ခိၣ်န့ၣ်မ့ၢ်နအိၣ်ဖဲလဲၣ်. နမ့ၢ်သ့ၣ်ညါတၢ်အါမးဒီးတဲဘၣ်ယၤတက့ၢ်.
5 မ့ၢ်မတၤစံၣ်ညီၣ်တၢ်လၢဟီၣ်ခိၣ်အံၤကဘၣ်ဒိၣ်ဝဲထဲလဲၣ်ထဲလဲၣ်, ဒီးမ့ၢ်မတၤစၢၢ်ပျံၤလၢအဖီခိၣ်တဂၤလဲၣ်. မ့ၢ်နသ့ၣ်ညါတၢ် စံးဆၢခဲလၢာ်ဧါ.
6 တၢ်မနုၤဟံးဃာ်ထူၣ်တဖၣ်လၢအမၤကျၢၤဟီၣ်ခိၣ်န့ၣ်လဲၣ်. မ့ၢ်မတၤပာ်လီၤလၢၢ်သနၢၣ်လၢဟီၣ်ခိၣ်အဂီၢ်န့ၣ်လဲၣ်.
7 လၢမုၢ်နံၤအဝဲန့ၣ်ဖဲမုၢ်ဆ့ၣ်ထီၣ်ဂီၤဂီၤ, တၢ်ခံးဒံးဝဲအကတီၢ်န့ၣ် ဆၣ်တဖၣ်သးဝံၣ်သကိးတၢ်ဒီးယွၤကလူးတဖၣ်ကိးသတြီ ထီၣ်လၢတၢ်သးခုလီၤ.
8 ဖဲပီၣ်လဲၣ်အထံပုာ်ထီၣ်ယွၤလီၤလၢဟီၣ်ခိၣ်အဒၢလီၢ်ပူၤအကတီၢ် န့ၣ်မ့ၢ်မတၤကးတံၢ်တ့ၢ်တြဲၤတဖၣ်လၢကတြီအီၤလဲၣ်.
9 ယမ့ၢ်တ့ၢ်ပှၤလၢအလုၣ်ဘၢတ့ၢ်ပီၣ်လဲၣ်ဒီးတၢ်အၢၣ်တဖၣ် ဒီးဘိၣ်ဘံတ့ၢ်အီၤလၢတၢ်ခံးသူအပူၤလီၤ.
10 ယထိၣ်နီၣ်တ့ၢ်ပီၣ်လဲၣ်အဆၢဒီးပာ်လီၤတ့ၢ်အီၤလၢတြဲၤ ကးတံၢ်အသးလၢနီၣ်ဘိအလီၢ်ခံန့ၣ်လီၤ.
11 ဒီးယစံးဘၣ်အီၤ, “နလပီပာ်ကဖိအသးတဖၣ်ကဘၣ်အိၣ် ကတီၢ်ဖဲအံၤဒီးတဘၣ်လဲၤယံၤန့ၢ်အအံၤဘၣ်.”
12 စီၤယိၤဘးဧၢ, လၢကယဲၢ်နတၢ်အိၣ်မူအမုၢ်နံၤတဖၣ်အပူၤန့ၣ်, မ့ၢ်နမၤလိာ်တ့ၢ်မုၢ်တနံၤဒ်သိးကဆ့ၣ်ထီၣ်န့ၣ်ဧါ.
13 ဒ်သိးအကစှီၤတံၢ်ဟီၣ်ခိၣ်ဒီးတြုၤကွံာ်ပှၤတတီတလိၤလၢ အတၢ်အိၣ်ခူသူၣ်အလီၢ်တဖၣ်အပူၤအဂီၢ်န့ၣ်, မ့ၢ်နမၤ လိာ်တ့ၢ်မုၢ်ဆ့ၣ်ထီၣ်ဂီၤဂီၤတၢ်ခံးဒံးန့ၣ်ဧါ.
14 မုၢ်ဆါအတၢ်ကပီၤမၤဖျါထီၣ်ကစၢၢ်ကလိဒီးတၢ်လူၢ်တၢ်တြီၤ တဖၣ်ဒ်တၢ်ကူတၢ်သိးကပြုၢ်ကပြီၤထီၣ်အိၣ်ဖျါတြၢၤကလာ် လီၤဂာ်တၢ်စဲပနီၣ်လၢကပံာ်အလိၤန့ၣ်လီၤ.
15 မုၢ်ဆါအတၢ်ကပီၤန့ၣ်ကပီၤဆူၣ်ကဲၣ်ဆိးလၢပှၤတတီတလိၤ အဂီၢ်ဒီးတြီဃာ်အဝဲသ့ၣ်လၢကမၤတၢ်စုဆူၣ်ခီၣ်တကးအတၢ် မၤန့ၣ်လီၤ.
16 မ့ၢ်နလဲၤတုၤဘၣ်ဆူပီၣ်လဲၣ်ဖိအတၢ်ယိာ်ပူၤဧါ. မ့ၢ်နဟးဘၣ်တ့ၢ်လၢပီၣ်လဲၣ်မိၢ်ပှၢ်အခံဒးစ့ၢ်ကီးဧါ.
17 တၢ်သံအတြဲၤတဖၣ်ဘၣ်တၢ်လီၣ်ဖျါထီၣ်အီၤလၢနၤမ့ တမ့ၢ်နထံၣ်ဘၣ်တ့ၢ်တၢ်ခံးယိာ်အတြဲၤတဖၣ်စ့ၢ်ကီးဧါ.
18 ဟီၣ်ခိၣ်ဒိၣ်ဝဲလဲၢ်ဝဲဆံးအါဆံးအါန့ၣ်, နနၢ်ပၢၢ်တ့ၢ်အီၤဧါ. နမ့ၢ်သ့ၣ်ညါဒီးစံးဆၢယၤတက့ၢ်.
19 တၢ်ကပီၤဟဲဝဲဖဲလဲၣ်မ့ၢ်ဂ့ၤ, တၢ်ခံးတၢ်နၤအဂံၢ်ထံးမ့ၢ် တၢ်မနုၤမ့ၢ်ဂ့ၤနသ့ၣ်ညါဧါ.
20 နဒုးနဲၣ်အဝဲသ့ၣ်လၢကဘၣ်လဲၤဆံးယံၤမ့ၢ်ဂ့ၤ, ဆှၢကဒါက့ၤ အဝဲကဒီးအီၤမ့ၢ်ဂ့ၤသ့ဧါ.
21 နသ့ၣ်ညါသပှၢ်တၢၢ်သၢၣ်. အဂ့ၢ်ဒ်အံၤ, နသးပှၢ်တ့ၢ်လံ. ဒီးနအိၣ်ဖျဲၣ်တ့ၢ်လံဖဲဟီၣ်ခိၣ်ဘၣ်တၢ်တ့အီၤအကတီၢ်န့ၣ်လီၤ.
22 မ့ၢ်နလဲၤတုၤဘၣ်တ့ၢ်လံဆူတၢ်လီၢ်ဖဲယပၢၤဃးမူခိၣ်ဖီဒီးသူၣ် စ့ၢ်ကီးဧါ.
23 ယပၢၤဃာ်အီၤလၢတၢ်ကိၢ်တၢ်ဂီၤအကတီၢ်ဒီးလၢတၢ်ဒုးတၢ် ယၤအမုၢ်နံၤတဖၣ်အဂီၢ်န့ၣ်လီၤ.
24 မ့ၢ်နလဲၤတုၤဖဲမုၢ်ဟဲထီၣ်အလီၢ်မ့တမ့ၢ်မုၢ်ထီၣ်ကလံၤအူဝဲ အလီၢ်န့ၣ်စ့ၢ်ကီးဧါ.
25 မ့ၢ်မတၤခူၣ်ထံအကျိၤလၢမူခိၣ်ထံကယွၤလီၤအဂီၢ်ဒီးမၤပျီ တ့ၢ်ကလံၤမုၢ်အကျဲတဂၤန့ၣ်လဲၣ်.
26 မ့ၢ်မတၤဒုးဟဲစူၤလီၤမူခိၣ်လၢပှၤတအိၣ်နီတဂၤအလီၢ်န့ၣ် လဲၣ်.
27 မတၤမၤဘၣ်စီၣ်တၢ်ဖဲထံတအိၣ်ဒီးဃ့ထီအလီၢ်ဒ်သိးနီၣ်ဧိၤ မံၤဧိၤကမဲထီၣ်အဂီၢ်န့ၣ်လဲၣ်.
28 တၢ်စူၤမ့ၢ်ဂ့ၤပစီၤထံမ့ၢ်ဂ့ၤအပၢ်အိၣ်စ့ၢ်ကီးဧါ.
29 မတၤမ့ၢ်ထံလီၤသကၤဒီးနါဝာ်အမိၢ်,
30 လၢအဒုးကဲထီၣ်က့ၤထံဆူလၢၢ်ဒီးမၤလီၤသကၤပီၣ်လဲၣ် အမဲာ်ဖံးခိၣ်န့ၣ်လဲၣ်.
31 နစၢထီၣ်ဆၣ်ဒၢမုၢ်တပူၤဃီမ့ၢ်ဂ့ၤ, နဃ့ၢ်လီၤပျံၤလၢကစၢ ဃာ်ဆၣ်ယိးမါမ့ၢ်ဂ့ၤဘၣ်ကသ့ဧါ.
32 နဆှၢဆၣ်တဖၣ်လၢအကတီၢ်ဒၣ်ဝဲဒီးနဲၣ်ဆၣ်ကဆီဒီးအဖိ တဖၣ်အကျဲဘၣ်ကသ့ဧါ.
33 နသ့ၣ်ညါတၢ်သိၣ်တၢ်သီတဖၣ်လၢအပၢမူခိၣ်, ဒီးမ့ၢ်နဒုးဘၣ်ဃးအီၤလၢဟီၣ်ခိၣ်ချၢကပိာ်ထွဲအီၤအဂီၢ် ဘၣ်ကသ့ဧါ.
34 နထုထီၣ်နကလုၢ်ဆူတၢ်အၢၣ်ဒ်သိးထံအါကလုၣ်ဘၢနၤဘၣ် ကသ့ဧါ.
35 ဒီးနမ့ၢ်မၤလိာ်လီလၢကဝၢ်အဒံးဒီး, မ့ၢ်ကဟဲဆူနအိၣ်ဒီးစံး, ကွၢ်ကွၢ်, ပှၤလီၤ န့ၣ်ဧါ.
36 မတၤပာ်လီၤတ့ၢ်တၢ်ကူၣ်သ့လၢတၢ်အၢၣ်တဖၣ်အကျါ ဒီးမ့ၢ်မတၤဟ့ၣ်တၢ်သ့ၣ်ညါနၢ်ပၢၢ်ဆူဘှ့ၣ်မုၢ်ပစီၤန့ၣ်လဲၣ်.
37 မတၤမ့ၢ်ပှၤအိၣ်ဒီးတၢ်ကူၣ်သ့ထီၣ်ဘးတုၤကဂံၢ်တၢ်အၢၣ် တဖၣ်ဒီးဘိးဒ့ခံအီၤဒ်သိးအကဒုးစူၤလီၤတၢ်,
38 တၢ်စူၤထံလၢအဒုးကိၤထီၣ်ဖၣ်ကမူၣ်ဖၣ်ဆါဆူဟီၣ်ခိၣ်ကိၢ်လိၢ် န့ၣ်လဲၣ်.
39 နဃုန့ၢ်တၢ်အီၣ်လၢခ့ယုၢ်တဖၣ်ကအီၣ်ဝဲဒီးမၤသးမံခ့ယုၢ်ဖိ လၢအသၣ်ဝံၤ,
40 ဖဲအဝဲသ့ၣ်အိၣ်ခူသူၣ်လၢအလၢၢ်ကအိပူၤမ့ၢ်ဂ့ၤဖဲအမံ နီၤခိးတၢ်လၢအကဝၢမ့ၢ်ဂ့ၤန့ၣ်ဧါ.
41 မတၤဒုးအီၣ်စိးဝၣ်ဃးတဖၣ်လၢတၢ်အီၣ်ဖဲအဝဲသ့ၣ်ယူၤဝ့ၤဝီၤ လၢတၢ်သူၣ်ဝံၤသၣ်စ့ၤဒီးဖဲအဖိတဖၣ်ကိးထီၣ်ကစၢ်ယွၤ လၢတၢ်အီၣ်အဂီၢ်န့ၣ်လဲၣ်.