4
1 လၢတၢ်န့ၣ်အဃိဖဲကစၢ်ယွၤအတၢ်စံးပာ်ဘၣ်ဃးဒီးတၢ်လဲၤ နုာ်ဆူအတၢ်အိၣ်ဘှံးအပူၤအိၣ်ဒံးဝဲလၢပဂီၢ်အဖၢမုၢ်အံၤ, မ်ပကပလီၢ်ပသးဒ်သိးပသုတဘၣ်တၢ်ထံၣ်န့ၢ်ပှၤလၢပလီၤ တိၢ်ကွံာ်လၢတၢ်ဒိးန့ၢ်ဘၣ်တၢ်အိၣ်ဘှံးအဝဲန့ၣ်နီတဂၤတဂ့ၤ အဂီၢ်န့ၣ်တက့ၢ်.
2 အဂ့ၢ်ဒ်အံၤပဒိးန့ၢ်လံတၢ်သးခုကစီၣ်ဒ်အဝဲသ့ၣ်အသိးလီၤ. ဘၣ်ဆၣ်ဒီးတၢ်အကစီၣ်လၢအဝဲသ့ၣ်နၢ်ဟူဝဲန့ၣ်တကဲဘျုးလၢ အဝဲသ့ၣ်အဂီၢ်ဘၣ်. အဂ့ၢ်မ့ၢ်လၢအဝဲသ့ၣ်တတူၢ်လိာ်ဘၣ်ဝဲလၢတၢ်နာ်အပူၤ အဃိန့ၣ်လီၤ.
3 လၢတၢ်အံၤအဃိပဝဲလၢအအိၣ်ဒီးတၢ်နာ်တဖၣ်ကဒိးန့ၢ်ဘၣ်တၢ် အိၣ်ဘှံးလၢကစၢ်ယွၤစံးပာ်တ့ၢ်လံဝဲန့ၣ်လီၤ. တၢ်မၤအသးဒ် အစံးတ့ၢ်ဝဲအသိး,
“ယသးဒိၣ်ထီၣ်ဒီးဆိၣ်လီၤယသးသပှၢ်ကတၢၢ်လၢ,
‘အဝဲသ့ၣ်တလဲၤနုာ်ဘၣ်ဆူယတၢ်အိၣ်ဘှံးအပူၤလ့ၤတက့ၤဘၣ် န့ၣ်လီၤ.’ ”
တၢ်ဖံးတၢ်မၤဝံၤတ့ၢ်လံဝဲလၢအတ့လီၤဟီၣ်ခိၣ်အကတီၢ်လံၤလံၤ သနာ်က့စံးတ့ၢ်ဝဲတၢ်အံၤလီၤ.
4 အဂ့ၢ်ဒ်အံၤတၢ်ကွဲးအသးစီဆှံအိၣ်ဝဲတတီၤလၢအကတိၤ တၢ်ဘၣ်ဃးဒီးမုၢ်နွံနံၤတနံၤဒ်အံၤ, “ကစၢ်ယွၤအိၣ်ဘှံးတ့ၢ်ဝဲလၢမုၢ်နွံနံၤတနံၤလၢအတၢ်ဖံးတၢ် မၤခဲလၢာ်န့ၣ်လီၤ.”
5 တၢ်ဂ့ၢ်တမံၤဃီအံၤဘၣ်တၢ်စံးတ့ၢ်ကဒီးလၢအဂ့ၢ်, “အဝဲသ့ၣ်တလဲၤနုာ်ဘၣ်ဆူကီၢ်ဖဲယကဟ့ၣ်တ့ၢ်အဝဲသ့ၣ် လၢတၢ်အိၣ်ဘှံးန့ၣ်အပူၤနီတခီၣ်ဘၣ်.”
6 ပှၤလၢအနၢ်ဟူဆိတၢ်သးခုအကစီၣ်တဖၣ်န့ၣ်တဒိးန့ၢ်ဘၣ်တၢ် အိၣ်ဘှံးန့ၣ်ဘၣ်. အဂ့ၢ်မ့ၢ်လၢအတစူၢ်တနာ်တၢ်အဃိလီၤ. ပှၤအိၣ်ဒံးဝဲတနီၤလၢအဘၣ်တၢ်ဒုးနုာ်အီၤဆူတၢ်အိၣ်ဘှံး အံၤအပူၤလီၤ.
7 တၢ်အံၤအိၣ်ဖျါထီၣ်ခီဖျိကစၢ်ယွၤဃုထၢပာ်လီၤမုၢ်နံၤလီၤ ဆီလၢအဘၣ်တၢ်ကိးအီၤလၢ “မုၢ်တနံၤအံၤ”န့ၣ်လီၤ. အါနံၣ်အါလါဝံၤအလီၢ်ခံတၢ်ကတိၤလၢအဘၣ်တၢ်ယၢၤထီၣ် တ့ၢ်လံအံၤဘၣ်တၢ်စံးကတိၤအီၤခီဖျိစီၤဒၤဝံး,
“တၢ်တနံၤအံၤဖဲသုနၢ်ဟူအကလုၢ်ဒီး
မၤကိၤသုခိၣ်တဂ့ၤ.”
8 စီၤယိၤၡူမ့ၢ်ဟ့ၣ်တ့ၢ်လံအဝဲသ့ၣ်လၢတၢ်အိၣ်ဘှံးလၢ ကစၢ်ယွၤစံးပာ်တ့ၢ်လၢအဂ့ၢ်ဒီး, တမ့ၢ်လၢကစၢ်ယွၤကစံးကဒီးဘၣ်ထွဲဒီးမုၢ်နံၤအဂၤတနံၤ အဂ့ၢ်လၢၤဘၣ်လီၤ.
9 လၢတၢ်အံၤအဃိ, တၢ်အိၣ်ဘှံးဒ်လၢကစၢ်ယွၤအတၢ်အိၣ် ဘှံးလၢမုၢ်နွံနံၤတနံၤန့ၣ်, အိၣ်ဒံးဝဲလၢကစၢ်ယွၤအပှၤဂီၢ်မုၢ် အဂီၢ်လီၤ.
10 အဂ့ၢ်ဒ်အံၤ, ပှၤတဂၤလၢ်လၢ်လၢအဒိးန့ၢ်ဘၣ်တၢ်အိၣ်ဘှံးလၢ ကစၢ်ယွၤစံးပာ်န့ၣ်ကဆိကတီၢ်ကွံာ်လၢအတၢ်ဖံးတၢ်မၤဒ် ကစၢ်ယွၤအိၣ်ဘှံးက့ၤလၢတၢ်ဖံးတၢ်မၤအပူၤအသိးန့ၣ်လီၤ.
11 လၢတၢ်န့ၣ်အဃိမ်ပကကျဲးစၢးအဂ့ၤကတၢၢ်ဒ်သိးပကဒိး န့ၢ်ဘၣ်တၢ်အိၣ်ဘှံးအဝဲန့ၣ်, ဒ်သိးပသုတလီၤတဲာ်ကွံာ်ဒ်အဝဲသ့ၣ်အသိးလၢအတစူၢ် တနာ်တၢ်အဃိနီတဂၤတဂ့ၤအဂီၢ်န့ၣ်တက့ၢ်.
12 အဂ့ၢ်ဒ်အံၤယွၤအကလုၢ်ကထါန့ၣ်မူဝဲဒီးမၤတၢ်သ့ဒီး အကနၣ်အ့ၣ်န့ၢ်ဒံးနးလၢအကနၣ်အိၣ်ခံကပၤလၢာ်တက့ၢ် လီၤ. အဝဲဆဲးဖျိတၢ်ပၢၢ်တုၤတၢ်အကံၢ်အလဲဒီးနီၤဖးသး သမူဒီးနီၢ်သး, တၢ်အဆၢဒီးတၢ်အနူာ်ကံၢ်န့ၣ်လီၤ. အဝဲစံၣ်ညီၣ်ပဲာ်ဖးနီၤဖးပှၤကညီအသးအတၢ်ဆိကမိၣ်ဒီး အတၢ်ဆၢမိၣ်န့ၢ်သးလီတဖၣ်န့ၣ်လီၤ.
13 တၢ်ဘၣ်တ့အိၣ်ခူသူၣ်လၢကစၢ်ယွၤအမဲာ်ညါတသ့နီတမံၤ ဘၣ်. အိၣ်ဘ့ၣ်ဆ့လၢကစၢ်ယွၤလၢပကဘၣ်ဟ့ၣ်ထီၣ် က့ၤတၢ်စံးဆၢလၢပတၢ်ဖံးတၢ်မၤအဂီၢ်တဂၤအမဲာ်ညါခဲလၢာ်လီၤ.
14 ဒ်ပအိၣ်ဒီးပှၤလုၢ်တၢ်အခိၣ်အဒိၣ်ကတၢၢ်ယ့ၣ်ၡူးကစၢ်ယွၤ အဖိခွါတဂၤလၢအလဲၤခီဖျိတ့ၢ်မူခိၣ်, ယွၤအိၣ်တၢ်အလီၢ် အသိးန့ၣ်, မ်ပကဟံးဃာ်ဂၢၢ်ဂၢၢ်ကျၢၤကျၢၤပတၢ်စူၢ်တၢ်နာ် တက့ၢ်.
15 ပပှၤလုၢ်တၢ်အခိၣ်အဒိၣ်ကတၢၢ်အံၤ တမ့ၢ်ပှၤလၢအနၢ် ပၢၢ်စၢၤပတၢ်ဂံၢ်စၢ်ဘါစၢ်တသ့ဘၣ်တဂၤန့ၣ်ဘၣ်. မ့ၢ်ပှၤတဂၤလၢအဘၣ်တၢ်လ့ပစီအီၤလၢကျဲကိးဘိဒဲးဒ်ပဝဲဒၣ် အသိးဘၣ်ဆၣ်အတၢ်ဒဲးဘးတအိၣ်ဘၣ်.
16 လၢတၢ်န့ၣ်အဃိလၢတၢ်သူၣ်ဂၢၢ်သးကျၢၤအပူၤ, မ်ပသုးဘူးပသးဆူကစၢ်ယွၤအလီၢ်ပစိာ်, ဖဲတၢ်ဘျုးတၢ်ဖှိၣ်အိၣ်ဝဲဒၣ်အလီၢ်န့ၣ်တက့ၢ်. ဖဲန့ၣ်ပကထံၣ်န့ၢ်တၢ်သးကညီၤဒီးတၢ်ဘျုးတၢ်ဖှိၣ်လၢ အကမၤစၢၤပှၤဖဲပလိၣ်ဘၣ်အီၤအဆၢအကတီၢ်န့ၣ်လီၤ.