3
1 ယဒီပုၢ်ဝဲၢ်ခရံာ်ဖိလၢအဘၣ်တၢ်ကိးန့ၢ်စ့ၢ်ကီးအီၤလၢကစၢ်ယွၤ သ့ၣ်ဧၢ, ကွၢ်ထံဆိကမိၣ်ယ့ၣ်ၡူးလၢကစၢ်ယွၤမၢလီၤအီၤလၢ အကမ့ၢ်ပတၢ်စူၢ်တၢ်နာ်အပှၤလုၢ်တၢ်အခိၣ်အဒိၣ်ကတၢၢ် တဂၤန့ၣ်တက့ၢ်.
2 အဝဲအကလုၢ်တီဒီးကစၢ်ယွၤလၢအမၢအီၤတဂၤဒ်စီၤမိၤၡ့ အကလုၢ်တီဝဲလၢအတၢ်ဆှၢကစၢ်ယွၤအပှၤဂီၢ်မုၢ်အပူၤ အသိးန့ၣ်လီၤ.
3 ယ့ၣ်ၡူးန့ၣ်ကြၢးဝဲဒီးတၢ်လၤတၢ်ကပီၤဒိၣ်န့ၢ်အါန့ၢ်စီၤမိၤၡ့ တက့ၢ်, ဒ်ပှၤဘှီဟံၣ်တဂၤဒိးန့ၢ်ဘၣ်တၢ်လၤတၢ်ကပီၤဒိၣ်န့ၢ် အါန့ၢ်ဟံၣ်တက့ၢ်အသိးန့ၣ်လီၤ.
4 သပှၢ်ကတၢၢ်, ဟံၣ်ကိးဖျၢၣ်ဒဲးဘၣ်တၢ်သူၣ်ထီၣ်ဘှီထီၣ်အီၤလၢ ပှၤတဂၤဂၤလီၤ. မ့မ့ၢ်ပှၤလၢအသူၣ်ထီၣ်ဘှီထီၣ်တၢ်ခဲလၢာ်မ့ၢ် ကစၢ်ယွၤလီၤ.
5 စီၤမိၤၡ့အကလုၢ်တီဝဲလၢယွၤအပှၤဂီၢ်မုၢ်အဖီခိၣ်ဒ်တၢ်အခ့ အပှၤတဂၤအသိး, ဒီးအဝဲကတိၤတၢ်ဘၣ်ဃးတၢ်လၢကစၢ်ယွၤ ကစံးကတိၤဝဲလၢခါလၢအကဟဲအပူၤတဖၣ်လီၤ.
6 မ့မ့ၢ်ခရံာ်အကလုၢ်တီဝဲဒ်ဖိခွါတဂၤအသိးလၢကစၢ်ယွၤအဒူၣ် အထၢအဖီခိၣ်န့ၣ်လီၤ. ပမ့ၢ်အိၣ်ဒီးတၢ်သူၣ်ဒူသးဒူဒီးတၢ်သူၣ်ဂၢၢ်သးကျၢၤလၢပတၢ် မုၢ်လၢ်အပူၤဒီးပမ့ၢ်အဝဲဒၣ်အဒူၣ်ဖိထၢဖိလီၤ.
7 လၢတၢ်န့ၣ်အဃိဒ်သးစီဆှံစံးဝဲအသိး,
“တနံၤအံၤဖဲသုနၢ်ဟူကစၢ်ယွၤအကလုၢ်န့ၣ်
8 တဘၣ်မၤကိၤသုခိၣ်ဒ်သုမိၢ်ပၢ်ဖံဖုလၢပျၢၤတဖၣ်
မၤဝဲဖဲအဝဲသ့ၣ်ထီဒါယွၤအကတီၢ်
ဖဲအဝဲသ့ၣ်အိၣ်လၢပှၢ်မုၢ်ကနၢ
ဒီးမၤကွၢ်ယွၤအသိးန့ၣ်တဂ့ၤ.
9 ကစၢ်ယွၤစံးဝဲဒၣ်, အဝဲသ့ၣ်ထံၣ်တ့ၢ်လံတၢ်လၢယမၤတ့ၢ်
လၢအနံၣ်လွံၢ်ဆံအတီၢ်ပူၤ
နာ်သက့အဝဲသ့ၣ်မၤကွၢ်ဒံးယၤဖဲန့ၣ်လီၤ.
10 လၢတၢ်န့ၣ်အဃိယသးဒိၣ်ထီၣ်အဝဲသ့ၣ်ဒီးစံး,
‘ထီဘိန့ၣ်အဝဲသ့ၣ်အသးတတီလၢယၤဘၣ်ဒီး
တဒိကနၣ်ဘၣ်ယတၢ်မၤလိာ်တဖၣ်ဘၣ်.’
11 လၢတၢ်သးဒိၣ်ထီၣ်အပူၤယဆိၣ်လီၤယသးလၢ
‘အဝဲသ့ၣ်တလဲၤနုာ်ဘၣ်ဆူ
ယတၢ်အိၣ်ဘှံးအပူၤနီတဘျီဘၣ်န့ၣ်လီၤ.’ ”
12 ယဒီပုၢ်ဝဲၢ်သ့ၣ်ဧၢ, ပလီၢ်သုသးဒ်သိးပှၤလၢသုကျါအသုတအိၣ်ဒီးသးလၢ အအၢဝဲဒီးအတစူၢ်တနာ်ဘၣ်တၢ်တုၤအကဃၣ်ကွံာ်အသး လၢကစၢ်ယွၤလၢအမူဝဲဒီးဟ့ၣ်တၢ်မူတဂၤအအိၣ်နီတဂၤ တဂ့ၤအဂီၢ်န့ၣ်တက့ၢ်.
13 မ့မ့ၢ်, ဖဲ “မုၢ်တနံၤအံၤ” ဘၣ်ထွဲဒီးပှၤအဖၢမုၢ်န့ၣ်, ဒ်သိးသုသုတဘၣ်တၢ်လီန့ၢ်သုလၢတၢ်ဒဲးဘးဒီးကဲထီၣ်ပှၤလၢ အခိၣ်ကိၤနီတဂၤတဂ့ၤအဂီၢ်န့ၣ်, သုဘၣ်မၤစၢၤဟ့ၣ်ဂံၢ်ဟ့ၣ်ဘါလိာ်သုသးသကိးသကိး, ကိးနံၤဒဲးလီၤ.
14 အဂ့ၢ်ဒ်အံၤ, ပမ့ၢ်ဟံးဃာ်ပတၢ်သူၣ်ဂၢၢ်သးကျၢၤလၢပဒိးန့ၢ်တ့ၢ်လံလၢ တၢ်အခီၣ်ထံးလံၤလံၤတုၤအကတၢၢ်န့ၣ်, ပကမ့ၢ်ပှၤလၢအဘၣ်ဃးဒီး ခရံာ်န့ၣ်လီၤ.
15 အအံၤမ့ၢ်လၢတၢ်ကွဲးအသးစံးဝဲ,
“သုမ့ၢ်နၢ်ဟူကစၢ်ယွၤအကလုၢ်တနံၤအံၤဒီး,
တဘၣ်မၤကိၤသုခိၣ်ဒ်သုမိၢ်ပၢ်
ဖံဖုလၢပျၢၤတဖၣ်
မၤဝဲအသိး,
ဖဲအဝဲသ့ၣ်ထီဒါကစၢ်ယွၤအခါန့ၣ်တဂ့ၤ.”
16 ပှၤလၢအနၢ်ဟူကစၢ်ယွၤအကလုၢ်ဒီးထီဒါအီၤန့ၣ်မ့ၢ် မတၤတဖၣ်လဲၣ်. မ့ၢ်ပှၤခဲလၢာ်လၢအဘၣ်တၢ်ထုးထီၣ်အီၤလၢ စီၤမိၤၡ့လၢကီၢ်အဲၤကူပတူးအပူၤတဖၣ်လီၤ.
17 ပှၤလၢအဘၣ်ကစၢ်ယွၤအတၢ်သးထီၣ်လၢအနံၣ်လွံၢ်ဆံအတီၢ်ပူၤ န့ၣ်မ့ၢ်မတၤတဖၣ်လဲၣ်. မ့ၢ်ပှၤလၢအမၤတၢ်ဒဲးဘးဒီးလီၤဃံၤသံဝဲ လၢပှၢ်မုၢ်ကနၢအပူၤတဖၣ်တမ့ၢ်ဘၣ်ဧါ.
18 ပှၤလၢကစၢ်ယွၤဆိၣ်လီၤအသးလၢအတလဲၤနုာ်ဘၣ်ဝဲဆူ အတၢ်အိၣ်ဘှံးအပူၤလ့ၤတက့ၤဘၣ်န့ၣ်မ့ၢ်မတၤတဖၣ် လဲၣ်. မ့ၢ်ပှၤလၢအတဒိကနၣ်တၢ်တဖၣ်တမ့ၢ်ဘၣ်ဧါ.
19 လၢတၢ်န့ၣ်အဃိပထံၣ်ဘၣ်လၢအဝဲသ့ၣ်လဲၤနုာ်ဆူကီၢ်ပူၤ တသ့ဘၣ်, မ့ၢ်လၢအတၢ်တစူၢ်တနာ်အဃိလီၤ.