6
1 ယဒီပုၢ်ဝဲၢ်သ့ၣ်ဧၢ, ပှၤတဂၤဂၤမ့ၢ်ဘၣ်တၢ်ထံၣ်န့ၢ်အီၤလၢအမၤ ကမၣ်တၢ်တမံၤမံၤန့ၣ်, သုဝဲလၢယွၤအသးပၢသုတဖၣ်, သုကြၢးမၤဂ့ၤမၤဘၣ်က့ၤအီၤန့ၣ်လီၤ. ဘၣ်ဆၣ်ဒီး, သုကဘၣ်မၤအီၤလၢတၢ်ကပုာ်လုးဖိအပူၤလီၤ. ဒီးကွၢ်လီၤသုသးဒ်သိး
သုသုတဘၣ်တၢ်လ့ပစီတဂ့ၤစ့ၢ်ကီးန့ၣ်တက့ၢ်.
2 ဝံလိာ်သုတၢ်ဝံတၢ်ယိးတဖၣ်တဂၤဒီးတဂၤ, ဒီးလၢကျဲဒ်အံၤ အပူၤန့ၣ်, သုကစူၢ်ခရံာ်အတၢ်သိၣ်တၢ်သီန့ၣ်လီၤ.
3 ပှၤတဂၤဂၤမ့ၢ်ဆိကမိၣ်လီၤအသးလၢအမ့ၢ်တၢ်တမံၤမံၤဖဲ အဝဲနီၢ်နီၢ်တမ့ၢ်တၢ်နီတမံၤဘၣ်န့ၣ်, အဝဲလီလီၤဒၣ်အသးဒၣ်ဝဲန့ၣ်လီၤ.
4 ပှၤတဂၤဘၣ်တဂၤကြၢးစံၣ်ညီၣ်အကစၢ်ဒၣ်ဝဲအသကဲာ်ပဝးဒီး အတၢ်မၤန့ၣ်လီၤ.
တၢ်လၢအမၤတ့ၢ်ဝဲမ့မ့ၢ်တၢ်အဂ့ၤဒီးအဝဲပာ်ကဖၢလၢအသး
လၢတၢ်လၢအမၤတ့ၢ်ဝဲအဃိသ့, ဒီးအလီၢ်တအိၣ်လၢအကထိၣ်သတြီၤဝဲဒီးတၢ်လၢပှၤဂၤတဖၣ်
မၤတ့ၢ်ဝဲန့ၣ်ဘၣ်.
5 အဂ့ၢ်ဒ်အံၤ, ပှၤကိးဂၤဒဲးကဘၣ်ဝံအတၢ်ဝံတၢ်ယိးဒၣ်ဝဲလီၤ.
6 ပှၤတဂၤလၢအဘၣ်တၢ်သိၣ်လိအီၤလၢတၢ်အကလုၢ်ကထါန့ၣ်, ကြၢးနီၤဟ့ၣ်လီၤကယဲၢ်တၢ်အဂ့ၤလၢအအိၣ်ဒီးအီၤခဲလၢာ်ဆူ အသရၣ်လၢအသိၣ်လိအီၤတဖၣ်အအိၣ်လီၤ.
7 သုတလီလီၤသုသးတဂ့ၤ, ပှၤလီကစၢ်ယွၤတန့ၢ်နီတဂၤဘၣ်. ပှၤတဂၤကကူးဘၣ်က့ၤတၢ်ဒ်အဖှံဝဲအသိးလီၤ.
8 အဂ့ၢ်ဒ်အံၤ, အဝဲဒၣ်မ့ၢ်သူၣ်လီၤဖျးလီၤတၢ်လၢအတၢ်သူၣ်လီ သးကွံတဖၣ်အပူၤန့ၣ်, တၢ်လၢအကကူးဘၣ်က့ၤဝဲမ့ၢ်တၢ်သံ
န့ၣ်လီၤ. မ့မ့ၢ်အဝဲဒၣ်မ့ၢ်သူၣ်လီၤဖျးလီၤတၢ်လၢယွၤအသး
အပူၤဒီး, ယွၤအသးကမၤစၢၤအီၤဒ်သိးအကကူးဘၣ်က့ၤဝဲတၢ်မူ
အထူအယိာ်န့ၣ်လီၤ.
9 လၢတၢ်န့ၣ်အဃိ, မ်ပသုတလီၤဘှံးလီၤတီၤလၢပမၤဂ့ၤတၢ် အဃိတဂ့ၤ, အဂ့ၢ်ဒ်အံၤပမ့ၢ်တသးဟးဂီၤဘၣ်ဒီးတၢ်ဆၢကတီၢ်
ကတုၤဝဲဖဲပကကူးဘၣ်က့ၤတၢ်လၢအဂ့ၤန့ၣ်လီၤ.
10 လၢတၢ်န့ၣ်အဃိ, ဒ်ပအိၣ်ဒီးတၢ်အခွဲးအယာ်အသိးန့ၣ်, ပကြၢးမၤဂ့ၤပှၤကိးဂၤဒဲးဒီးလီၤဆီဒၣ်တၢ်ပှၤသ့ၣ်တဖၣ် လၢအဘၣ်ဃးဒီးပဒူၣ်ဖိထၢဖိလၢတၢ်စူၢ်တၢ်နာ်အပူၤလီၤ.
11 သုကထံၣ်ဘၣ်လံာ်မဲာ်ဖျၢၣ်ဖးဒိၣ်တဖၣ်လၢယကွဲးန့ၢ်သုခဲ အံၤလၢယနီၢ်ကစၢ်ဒၣ်ယဲယစုန့ၣ်လီၤ.
12 ပှၤသ့ၣ်တဖၣ်လၢအဂုာ်ကျဲးစၢးမၢဆူၣ်သုဒိးတၢ်ကူးတရံး န့ၣ်မ့ၢ်ပှၤတဖၣ်လၢအအဲၣ်ဒိးမၤအိၣ်အမဲာ်သၣ်ဒီးကတိၤတၢ်
ကဖၢလၢဘၣ်ဃးတၢ်အိၣ်ဖျါလၢခိတကပၤလီၤ. အဝဲသ့ၣ်
မၤဝဲဒ်အံၤန့ၣ်, မ့ၢ်ဒ်သိးအသုတဘၣ်တၢ်မၤအၢမၤနးအီၤ, လၢအစံၣ်တဲၤတဲလီၤခရံာ်အတၢ်သံလၢထူၣ်စုညါအလိၤ
အဂ့ၢ်အဃိ, တဂ့ၤအဂီၢ်န့ၣ်လီၤ.
13 ပှၤသ့ၣ်တဖၣ်လၢအဒိးတၢ်ကူးတရံးဒၣ်လဲာ်န့ၣ်, တမ့ၢ်အစူၢ် တၢ်သိၣ်တၢ်သီဘၣ်. အဝဲသ့ၣ်အဲၣ်ဒိးလၢသုကဒိးတၢ်ကူးတရံးဒ်သိးအကပာ်
ကဖၢလၢအသးလၢသုပျဲအဝဲသ့ၣ်ကူးတရံးသုအဃိန့ၣ်လီၤ.
14 မ့မ့ၢ်ယဲဒၣ်အံၤ, ယကပာ်ကဖၢလၢယသးထဲဒၣ်လၢပကစၢ် ယ့ၣ်ၡူးခရံာ်အထူၣ်စုညါအဃိလီၤ. အဂ့ၢ်ဒ်အံၤ, ခီဖျိလၢ
အထူၣ်စုညါန့ၣ်, တၢ်ဘၣ်ဃးဒီးဟီၣ်ခိၣ်သံသဒၣ်ကွံာ်ယၤဒီး
ယသံသဒၣ်ကွံာ်တၢ်ဘၣ်ဃးဒီးဟီၣ်ခိၣ်န့ၣ်လီၤ.
15 ပှၤတဂၤဒိးတၢ်ကူးတရံးမ့ၢ်ဂ့ၤ, တဒိးဝဲမ့ၢ်ဂ့ၤတမ့ၢ်တၢ်လၢ အကါဒိၣ်ဘၣ်. တၢ်လၢအကါဒိၣ်တခီမ့ၢ်ဝဲတၢ်ကဲထီၣ်
တၢ်ဘၣ်တ့အသီန့ၣ်လီၤ.
16 မ့မ့ၢ်ပှၤလၢအပိာ်ထွဲတၢ်ဘျၢအဝဲအံၤလၢအတၢ်အိၣ်မူ အပူၤန့ၣ်, မ်တၢ်ဃူတၢ်ဖိးဒီးတၢ်သးကညီၤအိၣ်ဒီးအဝဲသ့ၣ်ဒီး
ကစၢ်ယွၤအပှၤဂီၢ်မုၢ်ခဲလၢာ်န့ၣ်တက့ၢ်.
17 တၢ်လၢယအဲၣ်ဒိးစံးလၢခံကတၢၢ်မ့ၢ်ဒ်အံၤလီၤ. မ်ပှၤသုတဟ့ၣ်လၢၤယၤတၢ်ကီတၢ်ခဲဆူညါနီတဂၤ တဂ့ၤ, အဂ့ၢ်ဒ်အံၤ, တၢ်ပူၤလီၢ်ပူၤကျဲလၢအအိၣ်လၢယနီၢ်ခိအလိၤတဖၣ်ဒုးနဲၣ်ဝဲဒၣ်
လၢယမ့ၢ်ယ့ၣ်ၡူးအကုၢ်န့ၣ်လီၤ.
18 ယဒီပုၢ်ဝဲၢ်သ့ၣ်ဧၢ, မ်ပကစၢ်ယ့ၣ်ၡူးခရံာ်အဘျုးအဖှိၣ်အိၣ်ဒီး သုခဲလၢာ်န့ၣ်တက့ၢ်. အၤမ့ၣ်.