ပှၤအ့းဖ့းစူးဖိတဖၣ်အအိၣ်
EPHESIANS
စီၤပီလူးအလံာ်ပရၢဆူပှၤအ့းဖ့းစူးဖိတဖၣ်အအိၣ်အံၤ, ဘၣ်ဃးအဆိကတၢၢ်ဒီးယွၤအတၢ်သုးတၢ်ကျဲၤလၢ အကထုးဖှိၣ်က့ၤတၢ်ဘၣ်တ့ခဲလၢာ်လၢအအိၣ်လၢ မူခိၣ်မ့ၢ်ဂ့ၤ, လၢဟီၣ်ခိၣ်မ့ၢ်ဂ့ၤတပူၤဃီ, အိၣ်ဒီးခရံာ်ဒ် အခိၣ်အသိးန့ၣ်လီၤ (၁:၁၀). မ့ၢ်စ့ၢ်ကီးတၢ်သကွံၢ်ကညး ကစၢ်ယွၤအပှၤဂီၢ်မုၢ်လၢအကအိၣ်မူလီၣ်ဖျါထီၣ်ကစၢ်ယွၤ အတၢ်သုးတၢ်ကျဲၤအံၤအတၢ်ဒိၣ်တၢ်ယိာ်န့ၣ်လီၤ.
လံာ်ပရၢအံၤအခီၣ်ထံးတပတီၢ်တဲဖျါထီၣ်ဘၣ်ဃးဒီး တၢ်ကဲထီၣ်တၢ်တမံၤဃီခီဖျိကစၢ်ယွၤအတၢ်ဃုထၢထီၣ် အပှၤဂီၢ်မုၢ်ဒီးလၢအဝဲသ့ၣ်အတၢ်ဒဲးဘးဘၣ်တၢ်ပျၢ်ကွံာ် အီၤခီဖျိဖိခွါယ့ၣ်ၡူးခရံာ်ဒီးကစၢ်ယွၤလၢအတၢ်စံးပာ်ဖးဒိၣ် ဘၣ်တၢ်ပာ်ဂၢၢ်ပာ်ကျၢၤအီၤလၢကစၢ်ယွၤအသးစီဆှံအဂ့ၢ် န့ၣ်လီၤ. လံာ်ပရၢလၢခံတပတီၢ်သကွံၢ်ကညးပှၤဖးတၢ် ဖိလၢအကအိၣ်မူတုၤဒၣ်လဲာ်အဝဲသ့ၣ်အတၢ်မ့ၢ်တၢ်တမံၤဃီလၢ ခရံာ်အပူၤန့ၣ်, ကမ့ၢ်တၢ်နီၢ်နီၢ်လၢအဝဲသ့ၣ်အတၢ်အိၣ်မူ အပူၤန့ၣ်လီၤ.
တၢ်ကတိၤဒိအါမံၤဘၣ်တၢ်သူအီၤဒ်သိးအကလီၣ်ဖျါ ကစၢ်ယွၤအပှၤဂီၢ်မုၢ်အတၢ်မ့ၢ်တၢ်တမံၤဃီလၢခရံာ်အပူၤ အဂီၢ်န့ၣ်လီၤ. တၢ်အိၣ်ဖှိၣ်ဘၣ်တၢ်ဒိလီၤအီၤလၢနီၢ်ခိလၢ အခိၣ်မ့ၢ်ခရံာ်, တၢ်သူၣ်ထီၣ်လၢအလၢၢ်သနၢၣ်မ့ၢ်ခရံာ်, မါလၢအဝၤမ့ၢ်ခရံာ်န့ၣ်လီၤ. လံာ်ပရၢအံၤလီၣ်ဖျါထီၣ် တၢ်မ့ၢ်တၢ်တီအံၤဂ့ၤထီၣ်အါထီၣ်ဒ်ပှၤကွဲးလံာ်ပရၢတဂၤ အံၤဘၣ်တၢ်ထိၣ်ဟူးထိၣ်ဂဲၤအီၤလၢတၢ်ဆိကမိၣ်ထီၣ် ကစၢ်ယွၤအဘျုးအဖှိၣ်လၢခရံာ်အပူၤန့ၣ်လီၤ. တၢ်ခဲလၢာ်ဘၣ်တၢ်ကွၢ်အီၤလၢခရံာ်အတၢ်အဲၣ်, အတၢ်လုၢ်ထီၣ်အသး, အတၢ်ပျၢ်တၢ်ကမၣ်, တၢ်ဘျုးတၢ်ဖှိၣ်ဒီးအတၢ်စီတၢ်ဆှံအပူၤလီၤ.
1
1 လၢစီၤပီလူး, ယ့ၣ်ၡူးခရံာ်အပှၤတၢ်မၢဖိဖဲကစၢ်ယွၤအတၢ်ဘၣ် အသးတဂၤ, ဆူပှၤစီဆှံလၢခရံာ်အပူၤလၢအကလုၢ်တီဒီးအီၤ တဖၣ်အအိၣ်,
2 တၢ်ဘျုးတၢ်ဖှိၣ်ဒီးတၢ်ဃူတၢ်ဖိးလၢပပၢ်ကစၢ်ယွၤဒီးကစၢ် ယ့ၣ်ၡူးခရံာ်န့ၣ်, မ်အဘၣ်လၢ်သုတက့ၢ်.
3 မ်ပစံးထီၣ်ပတြၢၤကစၢ်ယွၤပကစၢ်ယ့ၣ်ၡူးခရံာ်အပၢ်တက့ၢ်. အဂ့ၢ်ဒ်အံၤ, လၢခရံာ်အပူၤန့ၣ်အဝဲဒၣ်ဟ့ၣ်လီၤပှၤလၢတၢ်ဆိၣ်ဂ့ၤဘၣ်ဃးဒီး သူၣ်ဒီးသးတဖၣ်လၢအအိၣ်ဝဲလၢမူခိၣ်န့ၣ်လီၤ.
4 တချုးဒံးဒၣ်လဲာ်လၢဟီၣ်ခိၣ်ဘၣ်တၢ်တ့လီၤအီၤန့ၣ်ကစၢ်ယွၤ ဃုထၢဆိပာ်စၢၤပှၤခီဖျိတၢ်အိၣ်မူလၢခရံာ်အပူၤဒ်သိး ပကစီဆှံဒီးပတၢ်ကမၣ်အသုတအိၣ်လၢအမဲာ်ညါတဂ့ၤ အဂီၢ်န့ၣ်လီၤ.
5 မ့ၢ်လၢကစၢ်ယွၤအတၢ်အဲၣ်ဘၣ်ပှၤအဃိ, အဝဲဒၣ်ပာ်လီၤတ့ၢ်လံအသးလၢခီဖျိယ့ၣ်ၡူးခရံာ်န့ၣ်, အဝဲကဒုးကဲထီၣ်ပှၤလၢအဖိဒၣ်ဝဲန့ၣ်လီၤ. အအံၤမ့ၢ်ယွၤအတၢ်ဘၣ်အသးဒီးအတၢ်တိာ်ပာ်န့ၣ်လီၤ.
6 မ်ပစံးထီၣ်ပတြၢၤယွၤလၢအဘျုးအဖှိၣ်လၢအအိၣ်ဒီးအလၤ ကပီၤ, လၢအဟ့ၣ်လီၤကလီန့ၢ်ပှၤခီဖျိအဖိခွါသးဘိအဃိ န့ၣ်တက့ၢ်.
7 အဂ့ၢ်ဒ်အံၤ, မ့ၢ်လၢခရံာ်အတၢ်ဒိးသံအသးအဃိ, ပဘၣ် တၢ်ပှ့ၤက့ၤပှၤဒီးပဘၣ်တၢ်မၤထူၣ်ဖျဲးထီၣ်ကွံာ်ပှၤ, ဒ်ပစံးတၢ် အသိးပတၢ်ဒဲးဘးတဖၣ်ဘၣ်တၢ်ပျၢ်ကွံာ်အီၤဒ်ကစၢ်ယွၤ အဘျုးအဖှိၣ်ထူးဝဲတီၤဝဲအသိး,
8 တၢ်ဘျုးတၢ်ဖှိၣ်လၢအလူလီၤဂၢ်လီၤဝဲလၢပလိၤဒိၣ်ဒိၣ် အါအါန့ၣ်လီၤ.
9 လၢအတၢ်ကူၣ်ဘၣ်ကူၣ်သ့ဒီးအတၢ်ထံၣ်တုာ်ကွၢ်ဖျါတၢ်ခဲလၢာ် အပူၤ, ယွၤမၤတ့ၢ်တၢ်ဒ်အတိာ်ပာ်တ့ၢ်ဝဲအသိးဒီးလီၣ်ဖျါထီၣ်န့ၢ်ပှၤ လၢအတၢ်ရဲၣ်တၢ်ကျဲၤခူသူၣ်လၢအတိာ်ပာ်တ့ၢ်လံဝဲလၢ အကမၤလၢထီၣ်ပှဲၤထီၣ်ဝဲခီဖျိခရံာ်န့ၣ်လီၤ.
10 တၢ်ရဲၣ်တၢ်ကျဲၤလၢယွၤကမၤလၢထီၣ်ပှဲၤထီၣ်ဝဲဖဲတၢ်ဆၢ ကတီၢ်ဘၣ်ဝဲန့ၣ်, မ့ၢ်အကထုးဖှိၣ်က့ၤတၢ်ဘၣ်တ့ခဲလၢာ်, ကယဲၢ်တၢ်အိၣ်လၢမူခိၣ်ဒီးလၢဟီၣ်ခိၣ်တပူၤဃီ, ဒီးခရံာ်မ့ၢ်တၢ်အခိၣ်န့ၣ်လီၤ.
11 တၢ်ခဲလၢာ်ဘၣ်တၢ်မၤအီၤဒ်ကစၢ်ယွၤအတၢ်ရဲၣ်တၢ်ကျဲၤဒီး အတၢ်စံၣ်ညီၣ်တဲာ်တၢ်အသိးလီၤ. ယွၤဃုထၢထီၣ်ပှၤဒ်သိး ပကကဲထီၣ်အပှၤဂီၢ်မုၢ်ခီဖျိတၢ်အိၣ်မူလၢခရံာ်အပူၤ, ဒ်အတၢ်တိာ်အိၣ်ဝဲအသိး, သန့ၤထီၣ်အသးလၢယွၤ အတၢ်စံၣ်ညီၣ်တဲာ်တ့ၢ်ဝဲလၢတၢ်အခီၣ်ထံးလံၤလံၤန့ၣ်လီၤ.
12 လၢတၢ်န့ၣ်အဃိ, ပဝဲလၢအမ့ၢ်ပှၤအဆိကတၢၢ်လၢ အမုၢ်လၢ်တၢ်လၢခရံာ်အပူၤတဖၣ်န့ၣ်, မ်ပစံးထီၣ်ပတြၢၤကစၢ်ယွၤအလၤကပီၤန့ၣ်တက့ၢ်.
13 သုဝဲလၢအနၢ်ဟူတ့ၢ်လံတၢ်မ့ၢ်တၢ်တီအကလုၢ်ကထါ, တၢ်သးခုအကစီၣ်လၢအဟဲစိာ်န့ၢ်သုတၢ်အုၣ်က့ၤခီၣ်က့ၤ ဒီးစူၢ်က့ၤနာ်က့ၤတ့ၢ်လံခရံာ်တဖၣ်စ့ၢ်ကီးသုဘၣ်တၢ်စဲ ပနီၣ်ဃာ်သုဒီးသးစီဆှံလၢအဘၣ်တၢ်စံးပာ်တ့ၢ်အီၤန့ၣ်လီၤ.
14 သးစီဆှံမ့ၢ်တၢ်လၢအအုၣ်အသးဘၣ်ဃးဒီးတၢ်လၢ ကစၢ်ယွၤကဟ့ၣ်သါအပှၤဂီၢ်မုၢ်တဖၣ်တုၤလီၤလၢပဒိး န့ၢ်ဘၣ်အီၤလၢလၢပှဲၤပှဲၤတစုန့ၣ်လီၤ. မ်ပစံးထီၣ်ပတြၢၤကစၢ်ယွၤအလၤကပီၤန့ၣ်တက့ၢ်.
15 လၢတၢ်ဂ့ၢ်အံၤအဃိ, စးထီၣ်လၢယနၢ်ဟူဘၣ်သုတၢ်စူၢ်တၢ်နာ်က့ၤကစၢ်ယ့ၣ်ၡူး အဂ့ၢ်ဒီးလၢသုတၢ်အဲၣ်ဘၣ်ကစၢ်ယွၤအပှၤဂီၢ်မုၢ်ခဲလၢာ် အဂ့ၢ်လံၤလံၤန့ၣ်,
16 ယတဆိတ့ၢ်တၢ်စံးထီၣ်ပတြၢၤကစၢ်ယွၤလၢသုဃိဘၣ်, ယသ့ၣ်နီၣ်ဘၣ်သုလၢယတၢ်ထုကဖၣ်အပူၤ,
17 ဒ်သိးပကစၢ်ယ့ၣ်ၡူးခရံာ်အပၢ်, ပၢ်လၢအလၢပှဲၤဒီးတၢ်လၤကပီၤတဂၤကဟ့ၣ်လီၤသု သးစီဆှံလၢအကဒုးကူၣ်ဘၣ်ကူၣ်သ့သုဒီးလီၣ်ဖျါထီၣ် န့ၢ်သုလၢယွၤဒ်သိးသုကသ့ၣ်ညါအီၤအဂီၢ်န့ၣ်လီၤ.
18 ယဃ့လၢသုသးအမဲာ်ကအိးထီၣ်အသးဒီးသုကထံၣ်အတၢ် ကပီၤ, ဒ်သိးဒီးသုကနၢ်ပၢၢ်အဝဲအတၢ်ကိးန့ၢ်သုဆူတၢ်မုၢ် လၢ်မနုၤတမံၤအအိၣ်လဲၣ်, ဒီးတၢ်ဆိၣ်ဂ့ၤလၢအဝဲတိာ်ပာ် ဒီးစံးပာ်လၢအကဟ့ၣ်အပှၤဂီၢ်မုၢ်န့ၣ်ထူးတီၤဆံးဒိၣ်လဲၣ်,
19 ဒီးအစိအကမီၤလၢအမၤတၢ်လၢပဝဲပှၤစူၢ်က့ၤနာ်က့ၤတၢ် တဖၣ်အပူၤအံၤဒိၣ်ဝဲဆူၣ်ဝဲဆံးဒိၣ်လဲၣ်အဂီၢ်န့ၣ်လီၤ. တၢ်စိကမီၤလၢအမၤတၢ်လၢပပူၤအံၤမ့ၢ်တၢ်ဂံၢ်တၢ်ဘါဖးဒိၣ် တမံၤဃီ,
20 လၢယွၤသူဝဲဖဲအဒုးဂဲၤဆၢထၢၣ်က့ၤခရံာ်လၢတၢ်သံဒီး ဒုးဆ့ၣ်နီၤအီၤလၢအစုထွဲတခီလၢမူခိၣ်န့ၣ်လီၤ.
21 ဖဲန့ၣ် ခရံာ်ပၢတၢ်, လၢပှၤလၢအပၢတၢ်လၢမူခိၣ်, ပဒိၣ်ပပှၢ်, တၢ်စိတၢ်ကမီၤ, ဒီးကစၢ်တဖၣ်ခဲလၢာ်အဖီခိၣ်န့ၣ်လီၤ. အဝဲအိၣ်ဒီးမံၤလၢအဒိၣ်န့ၢ်ထီန့ၢ်မံၤခဲလၢာ်လၢအဘၣ် တၢ်ယၢၤထီၣ်အီၤ, တမ့ၢ်ထဲလၢစိၤအခဲအံၤဘၣ်, မ့ၢ်စ့ၢ်ကီးလၢစိၤလၢအကဟဲအပူၤန့ၣ်လီၤ.
22 ကစၢ်ယွၤပာ်တၢ်ခဲလၢာ်လၢခရံာ်အခီၣ်အဖီလာ်, ဒီးဒ်ကစၢ် အဒိၣ်ကတၢၢ်,
23 လၢအပၢဘၣ်တၢ်ခဲလၢာ်အသိးန့ၣ်, ယွၤဟ့ၣ်လီၤအီၤလၢတၢ်အိၣ်ဖှိၣ်အဂီၢ်န့ၣ်လီၤ. တၢ်အိၣ်ဖှိၣ်မ့ၢ်ခရံာ်အနီၢ်ခိလၢအမၤလၢထီၣ်ပှဲၤထီၣ်ခရံာ်, လၢအမၤလၢထီၣ်ပှဲၤထီၣ်တၢ်ခဲလၢာ်လၢတၢ်လီၢ် ကိးပူၤဒဲးန့ၣ်လီၤ.