39
(ဟးထီၣ်. ၂၈:၁-၁၄)
1 အဝဲသ့ၣ်ဆးပှၤလုၢ်တၢ်အခိၣ်အတၢ်ကူတၢ်သိးဃံလၤတဖၣ်လၢတၢ် အလွဲၢ်လါအဲး, တၢ်အလွဲၢ်လုးတကုာ်ဒီးသိဆူၣ်အလွဲၢ်ဂီၤ, ဒ်သိးအဝဲသ့ၣ်ကကူဝဲသိးဝဲဖဲအဝဲသ့ၣ်မၤတၢ်လၢတၢ်အလီၢ်စီဆှံပူၤအခါန့ၣ်လီၤ. အဝဲသ့ၣ်မၤပှၤလုၢ်တၢ်အခိၣ်အကူအသိးတဖၣ်လၢစီၤအၤဟရိၣ်အဂီၢ်ဒ် ယွၤမၤလိာ်တ့ၢ်စီၤမိၤၡ့အသိးန့ၣ်လီၤ.
2 အဝဲသ့ၣ်မၤအ့ဖိးလၢတၢ်ကံးညာ်အဂ့ၤအိၣ်ဒီးအလွဲၢ်လါအဲး, အလွဲၢ်လုးတကုာ်ဒီးသိဆူၣ်အလွဲၢ်ဂီၤ, ဒီးလုၣ်ထူအပျံၤတဖၣ်လီၤ.
3 အဝဲသ့ၣ်ပိာ်န့ၢ်ထူဘ့ၣ်ဘၣ်တဖၣ်ဒီးတံာ်ကဲထီၣ်အီၤဆူပျံၤဘူသ လါဖိတဖၣ်ဒ်သိးတၢ်ကထါဒၢနုာ်အီၤဆူတၢ်ကံးညာ်အဂ့ၤတဖၣ်အပူၤ ဒီးဆူသိဆူၣ်အလွဲၢ်လါအဲး, အလွဲၢ်လုးတကူာ်ဒီးအလွဲၢ်ဂီၤတဖၣ်အပူၤန့ၣ်လီၤ.
4 အဝဲသ့ၣ်မၤဖံဘၣ်ခိၣ်အပျံၤခံဘိလၢအ့ဖိးအဂီၢ်ဒီးဒုးစဲ ဘူးအီၤဒီးအကပၤတဖၣ်ဒ်သိးတၢ်စၢတံၢ်အီၤကသ့ဝဲန့ၣ်လီၤ.
5 ယီၢ်တကိးလၢတၢ်ထါအီၤဂ့ၤဂ့ၤန့ၣ်တၢ်မၤအီၤလၢတၢ်ပီးတၢ်လီ တကလုာ်ဃီတဖၣ်, ဒီးဘၣ်တၢ်ဒုးစဲဘူးအီၤဆူအ့ဖိးဒ်သိးကကဲထီၣ်တၢ်တခါဃီ ဒီးအီၤဒ်ယွၤမၤလိာ်တ့ၢ်စီၤမိၤၡ့အသိးန့ၣ်လီၤ.
6 အဝဲသ့ၣ်ကတဲာ်ကတီၤတၢ်မျၢ်မဟူယၤဂီၤတဖၣ်ဒီးကွီၤအီၤလၢထူအကွီၤတဖၣ်လီၤ. ဒီးလၢတၢ်မျၢ်မဟူယၤဂီၤတဖၣ်အလိၤန့ၣ်တၢ်စိးပျၤစီၤယၤကိာ် အဖိခွါတဖၣ်အမံၤလၢတၢ်သ့တၢ်ဘၣ်ဖးဒိၣ်အပူၤလီၤ.
7 အဝဲသ့ၣ်ပာ်ထီၣ်အီၤလၢအ့ဖိးအဖံဘၣ်ခိၣ်အပျံၤအလိၤဒ်သိးကဒိ လီၤပှၤအံၣ်စရ့လးဖိတဆံခံဒူၣ်ဒ်ကစၢ်ယွၤမၤလိာ်တ့ၢ်စီၤမိၤၡ့အသိးန့ၣ်လီၤ.
(ဟးထီၣ်. ၂၈:၁၅-၃၀)
8 အဝဲသ့ၣ်မၤဝဲအသဃိးလၢသးနါပှၢ်အဂီၢ်လၢတၢ်အပီးအလီ တဖၣ်တမံၤဃီဒ်တၢ်သူအီၤလၢအ့ဖိးအဂီၢ်ဒီးတၢ်ဆးဒဲးကံၣ်ဒဲးဝ့ၤတမံၤဃီန့ၣ်လီၤ.
9 တၢ်န့ၣ်မ့ၢ်တၢ်ကံးညာ်အိၣ်လွံၢ်သနၢၣ်ဃူဃူလၢတၢ်ချံးအီၤဖဲ အဖးဖီ, ဒီးအထီအိၣ်တထါအလဲၢ်အိၣ်တထါန့ၣ်လီၤ.
10 အဝဲသ့ၣ်ထီထီၣ်လၢၢ်လုၢ်ဒိၣ်ပှ့ၤဒိၣ်အဂ့ၢ်လွံၢ်ဂ့ၢ်လၢသဃိး အလိၤန့ၣ်လီၤ. အခီၣ်ထံးတဂ့ၢ်န့ၣ်ထီထီၣ်ဝဲလၢတၢ်မျၢ်ဆီသွံၣ်တဖျၢၣ်, တၢ်မျၢ်ဘီတဖျၢၣ်ဒီးလၢၢ်လါတဖျၢၣ်န့ၣ်လီၤ.
11 ခံဂ့ၢ်တဂ့ၢ်န့ၣ်ထီထီၣ်ဝဲတၢ်မျၢ်ဂီၤတဖျၢၣ်, တၢ်မျၢ်နံၤလါအဲးတဖျၢၣ်, ဒီးလၢၢ်တၢ်မျၢ်သူနကၤသွဲးတဖျၢၣ်န့ၣ်လီၤ.
12 သၢဂ့ၢ်တဂ့ၢ်န့ၣ်ထီထီၣ်ဝဲတၢ်မျၢ်လါဂီၤတဖျၢၣ်, တၢ်မျၢ်မဟူယၤဝါတဖျၢၣ်, ဒီးတၢ်မျၢ်သကီၤဖီတဖျၢၣ်န့ၣ်လီၤ.
13 ဒီးလွံၢ်ဂ့ၢ်တဂ့ၢ်န့ၣ်ထီထီၣ်ဝဲတၢ်မျၢ်လါဟ့တဖျၢၣ်, တၢ်မျၢ်မဟူယၤဂီၤတဖျၢၣ်ဒီးတၢ်မျၢ်နကၤသွဲးတဖျၢၣ်န့ၣ်လီၤ. ဒီးတၢ်မျၢ်တဖၣ်အံၤဘၣ်တၢ်ကွီၤအီၤလၢထူအကွီၤတဖၣ်န့ၣ်လီၤ.
14 လၢလၢၢ်တဆံခံဖျၢၣ်တဖျၢၣ်အလိၤန့ၣ်, တၢ်စိးပျၤကွဲးလီၤစီၤ ယၤကိာ်အဖိခွါတဖၣ်တဂၤစုာ်စုာ်အမံၤဒ်သိးကဒိလီၤပှၤအံၣ်စရ့လးဖိတဆံခံဒူၣ်အဂီၢ်န့ၣ်လီၤ.
15 လၢသဃိးလၢသးနါပှၢ်အဂီၢ်န့ၣ်အဝဲသ့ၣ်မၤသွဲထူစီလၢအဘၣ်တၢ် ပိၤဘံပကံအီၤဒ်ပျံၤတဖၣ်အသိးန့ၣ်လီၤ.
16 အဝဲသ့ၣ်မၤတၢ်စၢပျံၤအလီၢ်ခံတီၤလၢထူဒီးထူအကွီၤခံခါ ဒီးဒုးစဲဘူးထူအကွီၤခံခါဆူသဃိးလၢသးနါပှၢ်အဂီၢ်အဖီခိၣ်သနၢၣ်တဖၣ်န့ၣ်လီၤ.
17 အဝဲသ့ၣ်စၢတံၢ်ပျံၤထူခံဘိန့ၣ်လၢထူအကွီၤခံကွီၤ,
18 ဒီးပျံၤအထိးနါအဂၤခံတီၤန့ၣ်စၢတံၢ်ဝဲဖဲတၢ်စၢပျံၤအလီၢ် ခံတီၤ, ဒီးလၢကျဲဒ်အံၤန့ၣ်ဒုးစဲဘူးအီၤဆူအ့ဖိးအမဲာ်ညါအဖံဘၣ် ခိၣ်အပျံၤတဖၣ်န့ၣ်လီၤ.
19 အဝဲသ့ၣ်မၤထူအကွီၤခံကွီၤ, ဒီးထီထီၣ်အီၤဖဲသဃိးလၢသးနါ ပှၢ်အဂီၢ်အခီၣ်ထံးအသနၢၣ်တဖၣ်လၢအ့ဖိးအကပၤတၢ်အိပူၤအထိးနါန့ၣ်လီၤ.
20 အဝဲသ့ၣ်မၤထီၣ်ထူအကွီၤခံကွီၤဒီးဒုးစဲဘူးအီၤဆူအ့ဖိးအဖံ ဘၣ်ခိၣ်အပျံၤလၢတၢ်မဲာ်ညါခံဘိအခီၣ်ထံးဘူးဒီးအ့ဖိးဆး ချံးသးအကျိၤဖဲယီၢ်တကိးလၢအဘၣ်တၢ်ထါအီၤဂ့ၤဂ့ၤအဖီခိၣ်န့ၣ်လီၤ.
21 ဒ်ယွၤမၤလိာ်တ့ၢ်ဝဲစီၤမိၤၡ့အသိးန့ၣ်, အဝဲသ့ၣ်စၢတံၢ်သဃိး လၢသးနါပှၢ်အဂီၢ်အကွီၤတဖၣ်ဒီးအ့ဖိးအကွီၤတဖၣ်လၢပျံၤလါ အဲးတဘိ, ဒ်သိးသဃိးလၢသးနါပှၢ်အဂီၢ်ကအိၣ်ကျၢၤဖဲယီၢ်တကိး အဖီခိၣ်န့ၣ်ဒီးသုတလီၤဃ့ၣ်ကွံာ်တဂ့ၤအဂီၢ်န့ၣ်လီၤ.
(ဟးထီၣ်. ၂၈:၃၁-၄၃)
22 ဆ့ကၤဖးထီလၢတၢ်သိးထီၣ်အီၤလၢအ့ဖိးအဖီလာ်န့ၣ်ဘၣ်တၢ်မၤ အီၤလၢသိဆူၣ်အလွဲၢ်လါအဲးဒီဘ့ၣ်ညါလီၤ.
23 ဆ့ကၤအကိာ်န့ၣ်ဘၣ်တၢ်မၤကျၢၤအီၤခီဖျိတၢ်ထါပီၤဝးတရံးဒ် သိးသုတယာ်ကွံာ်တဂ့ၤအဂီၢ်န့ၣ်လီၤ.
24 ဆ့ကၤဖးထီအခီၣ်ထံးဝးတရံးန့ၣ်တၢ်ဆးထီၣ်ဝဲသလဲသၣ်တဖၣ်လၢ လုၣ်အလွဲၢ်လါအဲး, အလွဲၢ်လုးတကုာ်ဒီးသိဆူၣ်အလွဲၢ်ဂီၤဒီးတၢ်ကံးညာ်ပိၤဘံ ပကံးအသးဂ့ၤဂ့ၤတဖၣ်န့ၣ်လီၤ.
25 လၢသလဲသၣ်တဖၣ်အကဆူးန့ၣ်အဝဲသ့ၣ်ထီထီၣ်စ့ၢ်ကီးဝဲ ပှ့ၤသၣ်ထူစီတဖၣ်န့ၣ်လီၤ.
26 ပှ့ၤသၣ်တဖၣ်ဝံၤသလဲသၣ်စုာ်စုာ်ဘၣ်တၢ်ထီထီၣ်အီၤဝးတရံးဆ့ကၤ ဖးထီအခီၣ်ထံးလၢတၢ်ကမၤယွၤအတၢ်မၤအဂီၢ်အံၤန့ၣ်မ့ၢ်ဒ်ယွၤ မၤလိာ်တ့ၢ်စီၤမိၤၡ့အသိးန့ၣ်လီၤ.
27 အဝဲသ့ၣ်ဆးပိာ်ခွါအဆ့ကၤတဖၣ်လၢစီၤအၤဟရိၣ်ဒီးအဖိခွါအတဖၣ်အဂီၢ်.
28 ဒီးခိၣ်ဖၢၣ်, ခိၣ်ဖျီၣ်တဖၣ်ဒီးဖျီၣ်ခံဖုၣ်တဖၣ်,
29 ဒီးယီၢ်တကိးလၢလုၣ်အဂ့ၤအလွဲၢ်လါအဲး, အလွဲၢ်လုးတကုာ်ဒီးသိ ဆူၣ်အလွဲၢ်ဂီၤလၢအဘၣ်တၢ်ဆးဒဲးကံၣ်ဒဲးဝ့ၤအီၤဒ်ယွၤမၤလိာ်စီၤမိၤၡ့အသိးန့ၣ်လီၤ.
30 အဝဲသ့ၣ်မၤတၢ်ကယၢကယဲလၢထူစီ, ဒ်အမ့ၢ်တၢ်အပနီၣ်စီဆှံ, လၢတၢ်ပာ်စီဆှံသးအဂီၢ်ဒီးလၢအလိၤန့ၣ်စိးပျၤကွဲးလီၤဝဲ, တၢ်ပာ်စီဆှံထီၣ်အီၤဆူယွၤအအိၣ်’ န့ၣ်လီၤ.
31 အဝဲသ့ၣ်စၢထီၣ်အီၤလၢခိၣ်ဖၢၣ်အမဲာ်ညါလၢပျံၤအလွဲၢ်လါအဲးတဘိ, ဒ်ယွၤမၤလိာ်တ့ၢ်စီၤမိၤၡ့အသိးန့ၣ်လီၤ.
(ဟးထီၣ်. ၃၅:၁၀-၁၉)
32 ကယဲၢ်တၢ်မၤလၢယွၤအိၣ်ဝဲဆိးဝဲအဒဲစီဆှံအဂီၢ်န့ၣ်, လၢခံကတၢၢ်န့ၣ်ဘၣ်တၢ်မၤဝံၤအီၤဂ့ၤဂ့ၤန့ၣ်လီၤ. ပှၤအံၣ်စရ့လးဖိတဖၣ်မၤတၢ်ကိးမံၤဒဲးဒ်ယွၤမၤလိာ်တ့ၢ်စီၤမိၤၡ့အသိးန့ၣ်လီၤ.
33 အဝဲသ့ၣ်ဟဲစိာ်ဒဲစီဆှံန့ၣ်ဆူစီၤမိၤၡ့အအိၣ်, ဃုာ်ဒီးကယဲၢ်အတၢ်ပီးတၢ်လီ, အနီၣ်ဘျးတဖၣ်, ကွီၣ်တဖၣ်, အနီၣ်ဘိတဖၣ်, အထူၣ်တဖၣ်, ဒီးအထူၣ်ခီၣ်ထံးတဖၣ်,
34 အခိၣ်ဒုးလၢတၢ်မၤအီၤလၢသိဖါအဖံးလၢတၢ်စုၣ်ဂီၤထီၣ်အီၤ, အခိၣ်ဒုးလၢတၢ်မၤအီၤတၢ်ဖံးအဂ့ၤဒီးယၣ်ဘျးသဒၢတၢ်,
35 ဒီးတၢ်အၢၣ်လီၤအီလီၤအတလါစီဆှံလၢအအိၣ်ဒီးတၢ်မၤလိာ်အထံၣ် တဆံအလၢၢ်ဘ့ၣ်ဘၣ်တဖၣ်, အနီၣ်ယိးဘိတဖၣ်, ဒီးအခိၣ်ကၢၢ်,
36 စီၢ်နီၤခိၣ်ဒီးကယဲၢ်အတၢ်ပီးတၢ်လီတဖၣ်ဒီးကိၣ်လၢတၢ်လုၢ်ထီၣ်အီၤဆူကစၢ်ယွၤ,
37 တၢ်ပာ်မ့ၣ်အူဒၢအလီၢ်လၢတၢ်မၤအီၤလၢထူစီ, အမ့ၣ်အူဒၢတဖၣ်, ဒီးကယဲၢ်တၢ်ပီးတၢ်လီတဖၣ်, ဒီးသိလၢမ့ၣ်အူဒၢတဖၣ်အဂီၢ်,
38 ဒီးတၢ်လုၢ်လီၢ်လၢအဘၣ်တၢ်မၤအီၤလၢထူ, သိလၢတၢ်ကဖှူတၢ်အဂီၢ်, တၢ်နၢမူ, ယၣ်ဘျးသဒၢတၢ်လၢဒဲစီဆှံအကျဲစၢၤအဂီၢ်,
39 ဒီးတၢ်လုၢ်လီၢ်တိၢ်ဘီဃုာ်ဒီးအဖ့ဂုၤတိၢ်ဘီ, အနီၣ်ယိးဘိတဖၣ်, ဒီးကယဲၢ်တၢ်အပီးအလိ, တၢ်သ့စီအသရာ်ဒီးအခီၣ်တဖၣ်,
40 ယၣ်ဘျးသဒၢတဖၣ်လၢအအိၣ်ဝးတရံးဒဲစီဆှံဒီးအထူၣ်တဖၣ်, အခီၣ်ထံးအဖျီၣ်တဖၣ်, ယၣ်ဘျးသဒၢလၢဒဲစီဆှံအကျဲ စၢၤအဂီၢ်ဒီးအပျံၤတဖၣ်, ဒဲစီဆှံအနီၣ်ပျၤတဖၣ်, ဒီးကယဲၢ်တၢ်ပီးတၢ်လီတဖၣ်, လၢတၢ်ကသူအီၤလၢဒဲစီဆှံအပူၤ,
41 ဒီးတၢ်ကူတၢ်သိးဃံလၤတဖၣ်လၢပှၤလုၢ်တၢ်အခိၣ်ကဘၣ်သိးထီၣ်အီၤလၢတၢ်အလီၢ်စီဆှံအပူၤ, လၢအမ့ၢ်တၢ်ကူတၢ်သိးစီဆှံတဖၣ်လၢပှၤလုၢ်တၢ်အခိၣ်စီၤအၤဟရိၣ်ဒီးအဖိခွါတဖၣ်အဂီၢ်န့ၣ်လီၤ.
42 ပှၤအံၣ်စရ့လးဖိတဖၣ်မၤဝံၤကယဲၢ်တၢ်မၤခဲလၢာ်, ဒ်ယွၤမၤလိာ်တ့ၢ်စီၤမိၤၡ့န့ၣ်လီၤ.
43 စီၤမိၤၡ့သမံသမိးကွၢ်တၢ်ကိးမံၤဒဲးဒီးထံၣ်ဘၣ်ဝဲလၢအဝဲ သ့ၣ်မၤတၢ်ခဲလၢာ်ဒ်ယွၤမၤလိာ်တ့ၢ်ဝဲအသိးန့ၣ်လီၤ. လၢတၢ်န့ၣ်အဃိစီၤမိၤၡ့ဆိၣ်ဂ့ၤအဝဲသ့ၣ်တဖၣ်န့ၣ်လီၤ.