38
(ဟးထီၣ်.၂၇:၁-၈)
1 လၢတၢ်လုၢ်မ့ၣ်အူတဖၣ်အဂီၢ်န့ၣ်, အဝဲမၤတၢ်လုၢ်လီၢ်တခါလၢသ့ၣ် ဖှံၡံးတၤလီၤ. ဒီးတၢ်လုၢ်လီၢ်န့ၣ်အလဲၢ်အနီၣ်ထိၣ်ဃူလွံၢ်ကပၤလိာ်လၢ အထီအိၣ်ယဲၢ်ပျၢ်ဒီး, ဒီးအလဲၢ်အိၣ်ယဲၢ်ပျၢ်, ဒီးအကစီၤထီၣ်ဝဲသၢပျၢ်န့ၣ်လီၤ.
2 အဝဲမၤတၢ်အနၢၤတဖၣ်ဖဲတၢ်အနၢၣ်လွံၢ်နၢၣ်အထိးနါဒ်သိးကကဲထီၣ် တခါဃီဒီးတၢ်လုၢ်လီၢ်န့ၣ်လီၤ. အဝဲကးဘၢအီၤခဲလၢာ်လၢတိၢ်ဘီန့ၣ်လီၤ.
3 အဝဲမၤစ့ၢ်ကီးတၢ်လုၢ်လီၢ်အပီးအလီတဖၣ်ဒ်သပၢၤဘံၣ်တဖၣ်, နီၣ်တရီာ်တဖၣ်သလၢတဖၣ်, နီၣ်ကွးတဖၣ်ဒီးသပၢၤမ့ၣ်အူတဖၣ်လၢတိၢ်ဘီခဲလၢာ်လီၤ.
4 အဝဲမၤဖ့ဂုၤတိၢ်ဘီတဘ့ၣ်ဒီးပာ်အီၤလၢတၢ်လုၢ်လီၢ်အခိၣ်ဒူအဖီလာ်ဖဲတၢ်လုၢ်လီၢ်အဖးဖီ န့ၣ်လီၤ.
5 လၢတၢ်စိာ်ထီၣ်စိာ်လီၤတၢ်လုၢ်လီၢ်အဂီၢ်, အဝဲထီထီၣ်ကွီၤတိၢ်ဘီလွံၢ်ကွီၤ ဖဲဖ့ဂုၤတိၢ်ဘီအသနၢၣ်လွံၢ်နၢၣ်န့ၣ်လီၤ.
6 အဝဲမၤနီၣ်ယိးဘိတဖၣ်လၢသ့ၣ်ဖှ့ၡံးတၤဒီးကးဘၢအီၤလၢတိၢ်ဘီ,
7 ဒီးဒၢနုာ်အီၤဆူကွီၤတဖၣ်အပူၤလၢအအိၣ်လၢတၢ်လုၢ်လီၢ်ကပၤတခီစုာ်စုာ်န့ၣ်လီၤ. တၢ်လုၢ်လီၢ်န့ၣ်ဘၣ်တၢ်မၤအီၤလၢသ့ၣ်ဘၣ်တဖၣ်ဒီးလီၤကအိဝဲဒၣ်လီၤ.
(ဟးထီၣ်.၃၀:၁၈)
8 အဝဲမၤသရာ်ဒီးအခီၣ်လၢတိၢ်ဘီဖဲမဲာ်ထံကလၤတဖၣ်လၢအဘၣ်ဃး ဒီးပိာ်မုၣ်တဖၣ်လၢအမၤတၢ်ဖဲယွၤအိၣ်ဝဲဆိးဝဲအဒဲစီဆှံ အကျဲစၢၤထံးအချၢန့ၣ်လီၤ.
(ဟးထီၣ်.၂၇:၉-၁၉)
9 လၢယွၤအိၣ်ဝဲဆိးဝဲအဒဲစီဆှံအဂီၢ်န့ၣ်အဝဲမၤယၣ်ဘျးသဒၢ တဖၣ်လၢတၢ်ကံးညာ်ဖှီဝါကဆှၣ်အဂ့ၤကတၢၢ်န့ၣ်လီၤ. ယၣ်ဘျးသဒၢလၢကလံၤထံးတကပၤန့ၣ်အထီအိၣ်ဝဲ အပျၢ်တကယၤ,
10 ဒီးဘၣ်တၢ်ဘျးလီၤစဲၤအီၤလၢတိၢ်ဘီအထူၣ်ခံဆံအလိၤ, လၢအခီၣ်ထံးအဖျီၣ်မ့ၢ်တိၢ်ဘီ, ဒီးအထးဘျးတဖၣ်, ဒီးအနီၣ်ဘိတဖၣ်, ဘၣ်တၢ်မၤအီၤလၢစ့န့ၣ်လီၤ.
11 ဒီးယၣ်ဘျးသဒၢအိၣ်လၢကလံၤစိးတကပၤအဂီၢ်န့ၣ်မ့ၢ်တၢ်တမံၤဃီန့ၣ်လီၤ.
12 လၢမုၢ်နုာ်တကပၤန့ၣ်ယၣ်ဘျးသဒၢအထီအိၣ်အပျၢ်ယဲၢ်ဆံ ဃုာ်ဒီးအထူၣ်အဘိတဆံ, အခီၣ်ထံးအဖျီၣ်အခါတဆံဒီးအထးဘျးတဖၣ်, ဒီးအနီၣ်ဘိတဖၣ်ဘၣ်တၢ်မၤအီၤလၢစ့န့ၣ်လီၤ.
13 လၢမုၢ်ထီၣ်အကပၤတကပၤန့ၣ်, ယၣ်ဘျးသဒၢအထီအိၣ်ဝဲအပျၢ်ယဲၢ်ဆံ ဃုာ်ဒီးအထူၣ်သၢထူၣ်ဒီးအခီၣ်ထံးအဖျီၣ်သၢခါန့ၣ်လီၤ.
14 လၢကျဲစၢၤအကပၤတကပၤန့ၣ်, ယၣ်ဘျးသဒၢအထီအိၣ်ဝဲတဆံယဲၢ်ပျၢ် ဃုာ်ဒီးအထူၣ်သၢထူၣ်ဒီးအခီၣ်ထံးအဖျီၣ်သၢခါန့ၣ်လီၤ.
15 လၢကျဲစၢၤအကပၤအဂၤတကပၤစ့ၢ်ကီးယၣ်ဘျးသဒၢအထီ အိၣ်ဝဲတဆံယဲၢ်ပျၢ်ဃုာ်ဒီးအထူၣ်သၢထူၣ်ဒီးအခီၣ်ထံးအဖျီၣ်သၢခါန့ၣ်လီၤ.
16 ယၣ်ဘျးသဒၢခဲလၢာ်လၢအအိၣ်ဝးတရံးဒဲစီဆှံန့ၣ်ဘၣ်တၢ်မၤအီၤ လၢတၢ်ကံးညာ်ဖှီဝါကဆှၣ်အဂ့ၤကတၢၢ်န့ၣ်လီၤ.
17 တၢ်အခီၣ်ထံးအဖျီၣ်တဖၣ်လၢထူၣ်အဂီၢ်န့ၣ်ဘၣ်တၢ်မၤအီၤလၢတိၢ် ဘီ, မ့မ့ၢ်ထူၣ်အထးဘျးတဖၣ်, အနီၣ်ဘိတဖၣ်ဒီးအခိၣ်ဖျီၣ်တဖၣ်န့ၣ်ဘၣ်တၢ်မၤအီၤလၢစ့လီၤ. ဒီးကယဲၢ်ယၣ်အထူၣ်အိၣ်ဝးတရံးယွၤအဒဲစီဆှံတဖၣ်န့ၣ်ဘၣ်တၢ်ဒုးစဲဘူးအီၤဒီးနီၣ်ဘိစ့ တဖၣ်န့ၣ်လီၤ.
18 ယၣ်ဘျးသဒၢလၢဒဲစီဆှံအကျဲစၢၤန့ၣ်ဘၣ်တၢ်ထါအီၤလၢလုၣ် အဂ့ၤကတၢၢ်အိၣ်ဒီးအလွဲၢ်လါအဲး, အလွဲၢ်လုးတကုာ်, ဒီးသိဆူၣ်အလွဲၢ်အဂီၤ, ဒီးဘၣ်တၢ်ဆးဒဲးကံၣ်ဒဲးဝ့ၤအီၤန့ၣ် လီၤ. ဒီးယၣ်န့ၣ်အထီအိၣ်ဝဲအပျၢ်ခံဆံ, ဒီးအလဲၢ်အိၣ်ဝဲ ယဲၢ်ပျၢ်ဒ်ဒဲစီဆှံအယၣ်ဘျးသဒၢတဖၣ်အသိးန့ၣ်လီၤ.
19 တၢ်န့ၣ်ဘၣ်တၢ်ဘျးလီၤစဲၤအီၤလၢထူၣ်လွံၢ်ဘိအလိၤလၢအခီၣ်ထံး အဖျီၣ်မ့ၢ်တိၢ်ဘီလွံၢ်ခါန့ၣ်လီၤ. ထူၣ်တဖၣ်အထးဘျးတဖၣ်, အခိၣ်ဖျီၣ်တဖၣ်, ဒီးအနီၣ်ဘိတဖၣ်န့ၣ်ဘၣ်တၢ်မၤအီၤလၢစ့န့ၣ်လီၤ.
20 ကယဲၢ်နီၣ်ပျၤတဖၣ်လၢဒဲစီဆှံဒီးယၣ်ဘျးသဒၢဝးတရံးတဖၣ် အဂီၢ်န့ၣ်မ့ၢ်တိၢ်ဘီခဲလၢာ်လီၤ.
21 အအံၤမ့ၢ်တၢ်ကွဲးနီၣ်တမံၤဘၣ်ဃးဒီးစ့ဃါဃုာ်အနီၣ်ဂံၢ်တဖၣ် လၢဘၣ်တၢ်သူအီၤလၢယွၤအိၣ်ဝဲဆိးဝဲအဒဲစီဆှံအပူၤတၢ်လီၢ် ဖဲတၢ်ပာ်လၢၢ်ဘ့ၣ်ဘၣ်ခံဘ့ၣ်လၢတၢ်မၤလိာ်အထံၣ်တဆံအိၣ်ကွဲး အသိးလၢအလိၤန့ၣ်လီၤ. ဒ်စီၤမိၤၡ့ဟ့ၣ်လီၤအကလုၢ်အသိးတၢ်ကွဲးနီၣ်အံၤဘၣ်တၢ်မၤအီၤ လၢပှၤလ့ၤဝံဖိတဖၣ်လၢအမၤတၢ်လၢပှၤလုၢ်တၢ်အခိၣ်စီၤအၤဟရိၣ် အဖိခွါစီၤအံသမၢ်အတၢ်နဲၣ်ကျဲအဖီလာ်န့ၣ်လီၤ.
22 ပှၤလၢယူဒၤအဒူၣ်ပူၤစီၤဃူၢ်အလံၤခွါ, စီၤအူၤရံၤအဖိခွါ စီၤဘစၤလအ့လးမၤကယဲၢ်တၢ်ကိးမံၤဒဲးဒ်ယွၤမၤလိာ်ဝဲအသိးန့ၣ်လီၤ.
23 အဝဲအပှၤမၤစၢၤအီၤ, ပှၤဒၣ်အဒူၣ်ဖိစီၤအဃံစမးအဖိခွါစီၤအၤဟလံလာ်မ့ၢ်ပှၤတဂၤလၢအသ့စိးပျၤတၢ်, ပှၤသ့တ့ တၢ်ဂီၤအဒိဒီးပှၤသ့ထါဒဲးကံၣ်ဒဲးဝ့ၤလုၣ်အဂ့ၤကတၢၢ်လၢတၢ် အလွဲၢ်လါအဲး, အလွဲၢ်လုးတကုာ်, ဒီးသိဆူၣ်အလွဲၢ်အဂီၤန့ၣ်လီၤ.
24 ကယဲၢ်ထူလၢဘၣ်တၢ်ပာ်စီဆှံထီၣ်အီၤဆူယွၤလၢဒဲစီဆှံအဂီၢ် န့ၣ်အတယၢၢ်ဃၢဝဲခံဆံခွံကံကၢ်ဒီးၡ့က့လးနွံကယၤသၢဆံဒ် တၢ်အလီၢ်စီဆှံအနီၣ်ထိၣ်အိၣ်ဝဲဒၣ်အသိးန့ၣ်လီၤ.
25 ပှၤကမျၢၢ်လၢတၢ်ဂံၢ်နီၣ်အီၤ, အစ့ညၣ်န့ၣ်အတယၢၢ်ဃၢဝဲ ကံကၢ်တကယၤဒီးတကထိနွံကယၤနွံဆံယဲၢ်ၡ့က့လးဒ်တၢ်အလီၢ်စီဆှံအနီၣ်ထိၣ်အိၣ်ဝဲဒၣ် အသိးန့ၣ်လီၤ.
26 တၢ်ပာ်ဖှိၣ်တၢ်လၢအန့ၢ်အံၤပှဲၤသိးသိးဒီးကယဲၢ်ပှၤကိးဂၤဒဲး လၢအဆဲးလီၤအမံၤလၢတၢ်ဂံၢ်နီၣ်အပူၤအတၢ်ဟ့ၣ်ခဲလၢာ်ပာ်ဖှိၣ် န့ၣ်လီၤ. ပှၤတဂၤဘၣ်တဂၤစုာ်စုာ်ဟ့ၣ်တၢ်ဒ်တၢ်လီၤဘၣ်အီၤ, လီၤတယၢၢ်ဝဲဒ်တၢ်လီၢ်စီဆှံအနီၣ်ထိၣ်အိၣ်ဝဲအသိးန့ၣ်လီၤ. ပှၤပိာ်ခွါလၢအသးအိၣ်အနံၣ်ဃုဆံဆူအဖီခိၣ်, အနီၣ်ဂံၢ်အိၣ်ဝဲဃုကလီၢ်သၢကထိယဲၢ်ကယၤယဲၢ်ဆံဂၤ, လၢတၢ်ဆဲးလီၤမံၤအတၢ်ဂံၢ်နီၣ်အပူၤန့ၣ်လီၤ.
27 လၢစ့ညၣ်တဖၣ်အကျါန့ၣ်ကံကၢ်တယၤ, ဘၣ်တၢ်သူအီၤလၢတၢ်ကမၤဒဲစီဆှံဒီးယၣ်ဘျးသဒၢအထူၣ်အခီၣ် ထံးအခါတကယၤအဂီၢ်, ဒီးတခါစုာ်စုာ်န့ၣ်အတယၢၢ်ဃၢဝဲတကံကၢ်န့ၣ်လီၤ.
28 လၢစ့ညၣ်အိၣ်တ့ၢ်တကထိနွံကယၤနွံဆံယဲၢ်ၡက့လးန့ၣ်စီၤဘစၤလအ့လးမၤဒဲအဘိတဖၣ်နီၣ်ဘျးလၢတၢ်အထူၣ်တဖၣ်အဂီၢ်ဒီးတၢ်အခိၣ်ဖျီၣ်လၢထူၣ်အခိၣ်ထိးတဖၣ်အဂီၢ်န့ၣ်လီၤ.
29 တိၢ်ဘီလၢအဘၣ်တၢ်ပာ်စီဆှံအီၤလၢယွၤအအိၣ်ခဲလၢာ်န့ၣ်အတယၢၢ် ဃၢဝဲကံကၢ်နွံဆံဒီးၡ့က့လးခံကထိလွံၢ်ကယၤန့ၣ်လီၤ.
30 ဒီးလၢတိၢ်ဘီအံၤန့ၣ်အဝဲမၤတၢ်အခီၣ်ထံးတဖၣ်လၢယွၤအိၣ်ဝဲဆိးဝဲအဒဲစီဆှံအကျဲစၢၤ, တိၢ်ဘီတၢ်လုၢ်လီၢ်ဒီးအဖ့ဂုၤတိၢ်ဘီဒီးတၢ်လုၢ်လီၢ်အပီးအလီခဲလၢာ်
31 တၢ်အခီၣ်ထံးတဖၣ်လၢယၣ်ဘျးသဒၢအိၣ်ဝးတရံးဒဲစီဆှံ, ဒီးကျဲစၢၤအယၣ်ဘျးသဒၢအဂီၢ်, ဒီးလၢဒဲစီဆှံဒီးယၣ်ဘျးသဒၢအိၣ်ဝးတရံးအီၤအနီၣ်ဘျးခဲလၢာ်အဂီၢ်န့ၣ်လီၤ.