27
(ဟးထီၣ်.၃၈:၁ - ၇)
1 ဘှီထီၣ်တၢ်လုၢ်လီၢ်တခါလၢသ့ၣ်ဖှ့ၡံးတၤတက့ၢ်. ကဘၣ်မ့ၢ်အကပၤလွံၢ်ခီဃူလိာ်အသး, အလဲၢ်ယဲၢ်ပျၢ်, အထီအိၣ်ယဲၢ်ပျၢ်, ဒီးအကစီၤထီၣ်ကဘၣ်အိၣ်သၢပျၢ်လီၤ.
2 မၤထီၣ်တၢ်အနၢၤတဖၣ်လၢအသနၢၣ်လွံၢ်နၢၣ်အဖီခိၣ်တက့ၢ်. ဒီးကဘၣ်မ့ၢ်သ့ၣ်တကျီၣ်ဃီဒီးတၢ်လုၢ်လီၢ်, ဒီးတၢ်လုၢ်လီၢ်ဒီခါညါန့ၣ်ကဘၣ်တၢ်ကးဘၢအီၤလၢတိၢ်ဘီန့ၣ်လီၤ.
3 မၤန့ၢ်သပၢၤဘံၣ်တဖၣ်လၢတၢ်ကစိာ်ကွံာ်ဖၣ်ဆါလၢအဘၣ်အၢဒီးသိ တဖၣ်အဂီၢ်, ဒီးမၤန့ၢ်နီၣ်တရီာ်တဖၣ်, လီခီဖးဒိၣ်တဖၣ်နီၣ်ကွးတၢ်တဖၣ်ဒီးသပၢၤမ့ၣ်အူတဖၣ်တက့ၢ်. ကယဲၢ်တၢ်အပီးအလီတဖၣ်အံၤကဘၣ်တၢ်မၤအီၤလၢတိၢ်ဘီန့ၣ်လီၤ.
4 ပိာ်န့ၢ်ဖၣ်ကပူၤအဒါတဘ့ၣ်လၢတိၢ်ဘီဒ်ပှၤထ့တၢ်အသိး, ဒီးထီထီၣ်ကွီၤတိၢ်ဘီလွံၢ်ခါဖဲအနၢၣ်တဖၣ်လၢတၢ်ကစိာ်ထီၣ် စိာ်လီၤအီၤအဂီၢ်တက့ၢ်.
5 ပာ်လီၤဖၣ်ကပူၤအဒါဖဲတၢ်လုၢ်လီၢ်အမဲာ်သၣ်အကဝီၤအဖီလာ်ဒ်သိး ကအိၣ်ဖဲတၢ်လုၢ်လီၢ်အဖးဖီန့ၣ်တက့ၢ်.
6 မၤနီၣ်ယိးဘိတဖၣ်လၢသ့ၣ်ဖှ့ၡံးတၤလၢတၢ်စိာ်ထီၣ်စိာ်လီၤတၢ် လုၢ်လီၢ်အဂီၢ်ဒီးပီၤအီၤလၢတိၢ်ဘီ,
7 ဒီးပာ်အီၤလၢကွီၤတဖၣ်အပူၤလၢအအိၣ်ဖဲတၢ်လုၢ်လီၢ်အကပၤတခီ စုာ်စုာ်ဖဲတၢ်စိာ်အီၤအခါန့ၣ်တက့ၢ်.
8 မၤတၢ်လုၢ်လီၢ်န့ၣ်လၢသ့ၣ်ဘ့ၣ်ဘၣ်တဖၣ်ဒီးပာ်လီၤကအိအီၤဒ်တၢ် တိာ်ကျဲၤလၢယဒုးနဲၣ်သုလၢကစၢၢ်ဒီခိၣ်အသိးန့ၣ်တက့ၢ်.
(ဟးထီၣ်.၃၈:၉ - ၂၀)
9 လၢယအိၣ်ယဆိးအဒဲစီဆှံအဂီၢ်န့ၣ်, ဆးန့ၢ်တၢ်အဒူၣ်တဘ့ၣ်လၢယၣ် ဘျးသဒၢတၢ်လုၣ်အဂ့ၤတဖၣ်တက့ၢ်. လၢကလံၤစိးတကပၤအဂီၢ်ယၣ်ဘျးသဒၢတဖၣ်ကဘၣ်ထီဝဲအပျၢ်တကယၤ,
10 ဒီးကဘၣ်တၢ်ဘျးထီၣ်အီၤလၢတိၢ်ဘီအထူၣ်ခံဆံ, လၢအဘၣ်တၢ်ထီထီၣ်အီၤလၢတိၢ်ဘီအခီၣ်ထံးခံဆံခါအပူၤ, အိၣ်ဒီးအထးဘျးတဖၣ်ဒီးအနီၣ်ဘိတဖၣ်လၢအဘၣ်တၢ်မၤအီၤလၢစ့န့ၣ်လီၤ.
11 မၤတၢ်တမံၤဃီဒ်န့ၣ်အသိးလၢကလံၤစိးတကပၤအတၢ်ဒူၣ်အဂီၢ်တက့ၢ်.
12 လၢမုၢ်နုာ်တကပၤအဂီၢ်န့ၣ်ကဘၣ်အိၣ်ဒီးယၣ်ဘျးသဒၢတဖၣ်အထီ အိၣ်ဝဲအပျၢ်ယဲၢ်ဆံဃုာ်ဒီးအထူၣ်အဘိတဆံဒီးအခီၣ်ထံးအဖျီၣ်အခါတဆံန့ၣ်လီၤ.
13 လၢမုၢ်ထီၣ်တကပၤဖဲတၢ်နုာ်လီၤဟးထီၣ်အကျဲစၢၤအိၣ်ဝဲန့ၣ်, ယၣ်ဘျးသဒၢတဖၣ်လၢအလဲၢ်ဝဲအပျၢ်ယဲၢ်ဆံကဘၣ်အိၣ်ဝဲလီၤ.
14 ဖဲတၢ်နုာ်လီၤဟးထီၣ်ခံခီယၢ်ဘးအကျဲစၢၤန့ၣ်,
15 ယၣ်ဘျးသဒၢတဖၣ်လၢအလဲၢ်အိၣ်တကပၤဆံယဲၢ်ပျၢ်စုာ်စုာ်ဃုာ်ဒီး အထူၣ်သၢဘိ, ဒီးအခီၣ်ထံးအဖျီၣ်သၢခါကဘၣ်အိၣ်ဝဲန့ၣ်လီၤ.
16 ဒီးလၢတၢ်နုာ်လီၤဟးထီၣ်အကျဲစၢၤဒၣ်ဝဲအဂီၢ်န့ၣ်ယၣ်ဘျးသဒၢ တဘ့ၣ်လၢအထီအိၣ်အပျၢ်ခံဆံဒီးဘၣ်တၢ်မၤအီၤလၢတၢ်ကံးယာ်လုၣ် အဂ့ၤထါအသးလၢတၢ်အလွဲၢ်လါ, အလွဲၢ်လုးတကုာ်ဒီးသိ ဆူၣ်ဂီၤဒီးဘၣ်တၢ်မၤဃံမၤလၤအီၤလၢတၢ်ဆးဒဲးကံၣ်ဒဲးဝ့ၤ ကဘၣ်အိၣ်ဝဲန့ၣ်လီၤ. ဒီးကဘၣ်တၢ်ဘျးထီၣ်အီၤလၢအထူၣ်လွံၢ်ထူၣ်လၢတၢ်ထီထီၣ်အီၤလၢ တၢ်အခီၣ်ထံးလွံၢ်ခါအလိၤန့ၣ်လီၤ.
17 ဒီးကယဲၢ်တၢ်အထူၣ်တဖၣ်လၢအအိၣ်ဝးတရံးတၢ်ဒူၣ်န့ၣ်, ကဘၣ်တၢ်ဒုးစဲဘူးအီၤလၢနီၣ်ဘိစ့တဖၣ်, ဒီးအထးဘျးတဖၣ်ကဘၣ်တၢ်မၤအီၤလၢစ့ဒီးတၢ်အခီၣ်ထံးအဖျီၣ် တဖၣ်လၢတိၢ်ဘီန့ၣ်လီၤ.
18 တၢ်အဒူၣ်န့ၣ်အထီကဘၣ်အိၣ်ဝဲအပျၢ်တကယၤ, အလဲၢ်အပျၢ်ယဲၢ်ဆံဒီးအကစီၤထီၣ်ယဲၢ်ပျၢ်န့ၣ်လီၤ. ယၣ်ဘျးသဒၢတဖၣ်န့ၣ်ကဘၣ်တၢ်မၤအီၤလၢတၢ်ကံးယာ်လုၣ်အဂ့ၤဒီး အခီၣ်ထံးအဖျီၣ်တဖၣ်လၢတိၢ်ဘီန့ၣ်လီၤ.
19 ကယဲၢ်တၢ်အပီးအလီလၢအဘၣ်တၢ်သူအီၤလၢယွၤအဒဲစီဆှံ အပူၤဒီးကယဲၢ်နီၣ်စဲခဲလၢာ်လၢဒဲစီဆှံအဂီၢ်ဒီးလၢတၢ်ဒူၣ် အဂီၢ်န့ၣ်ကဘၣ်တၢ်မၤအီၤလၢတိၢ်ဘီန့ၣ်လီၤ.
(ဘူၣ်ဘါ.၂၄:၁ - ၄)
20 မၤလိာ်ကီၢ်အံၣ်စရ့လးအပှၤဂီၢ်မုၢ်လၢကဟဲစိာ်န့ၢ်နၤသ့ၣ်စၤ ယံးအသိအဂ့ၤကတၢၢ်လၢမ့ၣ်အူဒၢအဂီၢ်ဒ်သိးတၢ်ဒွဲၣ်ကပီၤထီၣ် အီၤကိးမုၢ်ဟါဒဲးကသ့ဝဲန့ၣ်တက့ၢ်.
21 စီၤအၤဟရိၣ်ဒီးအဖိခွါတဖၣ်ကဘၣ်ဒွဲၣ်ကပီၤထီၣ်မ့ၣ်အူဒၢလၢယ အိၣ်ယဆိးအဒဲစီဆှံပူၤဖဲယၣ်ဘျးသဒၢအချၢလၢအအိၣ်လၢတၢ်အၢၣ် လီၤအီလီၤတလါစီဆှံအမဲာ်ညါန့ၣ်လီၤ. ဖဲန့ၣ်ဖဲယအိၣ်ယဆိးအလီၢ်န့ၣ်မ့ၣ်အူဒၢကဘၣ်ဒွဲၣ်ကပီၤထီၣ်အီၤ စးထီၣ်လၢမုၢ်ဟါတုၤမုၢ်ဂီၤန့ၣ်လီၤ. တၢ်မၤလိာ်အံၤကဘၣ်တၢ်တိၢ်န့ၢ်ဖံးဃာ်အီၤလီၤထူလီၤယိာ်လၢပှၤ အံၣ်စရ့လးဖိတဖၣ်ဒီးအစၢၤအသွဲၣ်တဖၣ်န့ၣ်လီၤ.