24
1 ယွၤစံးဘၣ်စီၤမိၤၡ့, “ဟဲထီၣ်ဆူကစၢၢ်ကလိဆူယအိၣ်, နဲဒၣ်ဒီးစီၤအၤဟရိၣ်, စီၤနၤဒးဒီးစီၤအဘံဟူၤ, ဒီးပှၤအံၣ်စရ့လးဖိအခိၣ်အနၢ်တဖၣ်အဂၤနွံဆံန့ၣ်တက့ၢ်. ဒီးဖဲသုအိၣ်ဒံးလၢအယံၤန့ၣ်ဆုးလီၤသုခိၣ်လၢတၢ်ဘူၣ်ထီၣ် ဘါထီၣ်အပူၤတက့ၢ်.
2 ထဲနၤတဂၤဧိၤကဘၣ်ဟဲဘူးဆူယအိၣ်လီၤ. ပှၤအဂၤတဘၣ်ဟဲနီတဂၤဘၣ်. ပှၤဂီၢ်မုၢ်တဖၣ်ဒၣ်လဲာ်တဘၣ်ဟဲထီၣ်ဆူကစၢၢ်ဒီခိၣ်ဘၣ်.”
3 စီၤမိၤၡ့လဲၤတၢ်ဒီးတဲဘၣ်ပှၤဂီၢ်မုၢ်လၢကယဲၢ်တၢ်လၢယွၤမၤ လိာ်တ့ၢ်ဝဲတဖၣ်ဒီးကယဲၢ်လုၢ်လၢ်တၢ်စီဆှံတဖၣ်န့ၣ်လီၤ. ဒီးပှၤဂီၢ်မုၢ်ခဲလၢာ်စံးဆၢသကိးဝဲ, “ပကမၤကယဲၢ်တၢ်ကိးမံၤလၢယွၤစံးဘၣ်တဲဘၣ်တ့ၢ်ဝဲန့ၣ်လီၤ.”
4 စီၤမိၤၡ့ကွဲးလီၤကယဲၢ်ယွၤအတၢ်မၤလိာ်တဖၣ်န့ၣ်လီၤ. မုၢ်ဆ့ၣ်ထီၣ်တနံၤဂီၤဂီၤန့ၣ်, အဝဲဘှီထီၣ်ဝဲတၢ်လုၢ်လီၢ်တခါ လၢကစၢၢ်ခီၣ်ထံးဒီးဆီလီၤလၢၢ်တဆံခံဖျၢၣ်, တဖျၢၣ်စုာ်စုာ်လၢပှၤအံၣ်စရ့လးဖိတဆံခံဒူၣ်, တဒူၣ်စုာ်စုာ်အဂီၢ်လီၤ.
5 အန့ၣ်ဝံၤဒီးအဝဲမၢလီၤပိာ်ခွါသးစၢ်တဖၣ်ဒီးအဝဲသ့ၣ်ဆူး ကဲၤထီၣ်တၢ်လုၢ်တၢ်ပာ်တဖၣ်ဆူယွၤအအိၣ်ဒီးလုၢ်ထီၣ်ပာ်ထီၣ်ဂီၤ ဘုၣ်ဂီၤဖံးတနီၤဒ်တၢ်လုၢ်မၤဃူမၤဖိးတဖၣ်အသိးန့ၣ်လီၤ.
6 စီၤမိၤၡ့ဟံးန့ၢ်ဆၣ်ဖိကီၢ်ဖိတဖၣ်အသွံၣ်တဝာ်ဒီးဒၢနုာ်အီၤ လၢလီခီတဖၣ်အပူၤဒီးအဂၤတဝာ်န့ၣ်ဖှံလီၤအီၤလၢတၢ်လုၢ်လီၢ် အမဲာ်ညါန့ၣ်လီၤ.
7 အန့ၣ်ဝံၤဒီး, အဝဲဟံးန့ၢ်လံာ်တၢ်အၢၣ်လီၤအီလီၤလၢယွၤအတၢ် မၤလိာ်တဖၣ်အိၣ်ကွဲးအသးလၢအပူၤ, ဒီးဖးထီၣ်အီၤလၢအကလုၢ်ဒိၣ်ဒိၣ်ဆူပှၤဂီၢ်မုၢ်အအိၣ်လီၤ. ဒီးပှၤဂီၢ်မုၢ်စံးဝဲဒၣ်, “ပကစူၢ်ယွၤအကလုၢ်ဒီးမၤကယဲၢ်တၢ်လၢ အမၤလိာ်ဝဲကိးမံၤဒဲးန့ၣ်လီၤ.”
8 အန့ၣ်ဝံၤဒီးစီၤမိၤၡ့ဟံးန့ၢ်တၢ်သွံၣ်လၢလီခီတဖၣ်အပူၤ ဒီးဖှံလီၤဝဲလၢပှၤဂီၢ်မုၢ်အလိၤန့ၣ်လီၤ. ဒီးစံးဝဲဒၣ်, “အအံၤမ့ၢ်တၢ်သွံၣ်လၢအစဲပနီၣ်တၢ်အၢၣ်လီၤအီ လီၤလၢယွၤမၤတ့ၢ်ဒီးသုဖဲအဝဲဟ့ၣ်လီၤတၢ်မၤလိာ်တဖၣ်အံၤ အကတီၢ်န့ၣ်လီၤ.”
9 စီၤမိၤၡ့, စီၤအၤဟရိၣ်, စီၤနၤဒး, စီၤအဘံဟူၤဒီးပှၤအံၣ် စရ့လးဖိအခိၣ်အနၢ်အဂၤနွံဆံန့ၣ်လဲၤထီၣ်ဆူကစၢၢ်အလိၤ,
10 ဒီးအဝဲသ့ၣ်ထံၣ်ပှၤအံၣ်စရ့လးဖိအကစၢ်ယွၤန့ၣ်လီၤ. လၢအခီၣ်ဖီလာ်န့ၣ်တၢ်လီၤဂာ်ဒီးတၢ်မျၢ်နံၤလါအိၣ်ဒါလီၤအသး, ဒီးလါအဲးဝဲဒ်မူကပိာ်လိၤအသိးန့ၣ်လီၤ.
11 ကစၢ်ယွၤတမၤဘၣ်ဒိဆါဘၣ်ပှၤအံၣ်စရ့လးဖိအခိၣ်အနၢ်တဖၣ်အံၤ ဘၣ်. အဝဲသ့ၣ်ထံၣ်ဘၣ်ကစၢ်ယွၤဒီးအီၣ်သကိးအီသကိးတၢ်န့ၣ်လီၤ.
12 ယွၤစံးဘၣ်တ့ၢ်စီၤမိၤၡ့, “ဟဲထီၣ်ဆူကစၢၢ်လိၤဆူယအိၣ်တ က့ၢ်. ဒီးနအိၣ်ဖဲအံၤအကတီၢ်န့ၣ်ယကဟ့ၣ်နၤလၢၢ်ဘ့ၣ်ဘၣ်ခံဘ့ၣ်လၢ အအိၣ်ဒီးတၢ်သိၣ်တၢ်သီတဖၣ်လၢယကွဲးအီၤလၢတၢ်သိၣ်လိနဲၣ်ယုၤပှၤ ဂီၢ်မုၢ်အဂီၢ်န့ၣ်လီၤ.”
13 စီၤမိၤၡ့ဒီးအပှၤမၤစၢၤအီၤစီၤယိၤၡူကတဲာ်ကတီၤအသးဒီး စီၤမိၤၡ့စးထီၣ်လဲၤထီၣ်ဆူကစၢၢ်စီဆှံအလိၤန့ၣ်လီၤ.
14 စီၤမိၤၡ့စံးဘၣ်ပှၤခိၣ်ပှၤနၢ်တဖၣ်, “အိၣ်ခိးပှၤဖဲအံၤ တုၤပဟဲက့ၤတစုတက့ၢ်. စီၤအၤဟရိၣ်ဒီးစီၤဃူၢ်အိၣ်ဒီးသုဖဲအံၤ လီၤ. မၤသးဒ်န့ၣ်ဒီးပှၤတဂၤဂၤအတၢ်ဂ့ၢ်လိာ်ဘှီလိာ်လၢကဘၣ်တၢ်မၤ လိၤအီၤအလီၢ်မ့ၢ်အိၣ်န့ၣ်လဲၤဆူအဝဲသ့ၣ်အအိၣ်သ့ဝဲဒၣ်လီၤ.”
15 စီၤမိၤၡ့လဲၤထီၣ်ဆူကစၢၢ်စံၤနါအလိၤဒီးတၢ်အၢၣ်တလိၣ်လုၣ်ဘၢအီၤလီၤ.
16 ယွၤအိၣ်ဝဲဆိးဝဲအတၢ်ကပီၤကပြုၢ်ကပြီၤန့ၣ်ဟဲလီၤဝဲလၢကစၢၢ်အလိၤန့ၣ်လီၤ. လၢပှၤအံၣ်စရ့လးဖိတဖၣ်အဂီၢ်, တၢ်ကပီၤအံၤဖျါလီၤဂာ်ဒ်မ့ၣ်အူအီၣ်တၢ်လၢကစၢၢ်ဒီခိၣ်အသိးန့ၣ်လီၤ.
17 တၢ်အၢၣ်လုၣ်ဘၢကစၢၢ်န့ၣ်လၢဃုသီအတီၢ်ပူၤဒီးလၢနွံသီတသီ န့ၣ်ယွၤကိးထီၣ်စီၤမိၤၡ့လၢတၢ်အၢၣ်အပူၤန့ၣ်လီၤ.
18 စီၤမိၤၡ့လဲၤထီၣ်ဆူကစၢၢ်အလိၤလၢတၢ်အၢၣ်အကျါန့ၣ်လီၤ. ဒီးအဝဲအိၣ်ဝဲဖဲန့ၣ်အသီလွံၢ်ဆံန့ၣ်လီၤ.