23
1 ရၤလီၤတၢ်ကစီၣ်ဟူထီၣ်သါလီၤအကဘျံးကဘျၣ်တဖၣ်တဂ့ၤ. မၤစၢၤပှၤအိၣ်ဒီးတၢ်ကမၣ်တဂၤခီဖျိဟ့ၣ်တၢ်အုၣ်သးကဘျံးကဘျၣ်တဂ့ၤ.
2 ဖဲပှၤအါဂၤမၤတၢ်ကမၣ်မ့ၢ်ဂ့ၤ, ဖဲအဝဲသ့ၣ်ဟ့ၣ်တၢ်အုၣ်အသးလၢ ကဘိးကဒါတၢ်စံၣ်ညီၣ်တီမ့ၢ်ဂ့ၤန့ၣ်, ပိာ်ထွဲအခံတဂ့ၤ.
3 ကွၢ်မဲာ်ပှၤဖှီၣ်ဖိယာ်ဖိတဂၤလၢအကွီၢ်ပူၤန့ၣ်တဂ့ၤ.
4 နမ့ၢ်ထံၣ်ဘၣ်နဒုၣ်နဒါအကျီၢ်မိၢ်မ့ၢ်ဂ့ၤကသ့ၣ်ယီၤမ့ၢ်ဂ့ၤထူၣ် ဖျဲးဒီးဆှၢက့ၤဆူအအိၣ်န့ၣ်တက့ၢ်.
5 နမ့ၢ်ထံၣ်ဘၣ်နဒုၣ်နဒါအကသ့ၣ်ယီၤလီၤဃံၤလၢအတၢ်ဝံတၢ်ယိးအဃိ ဒီးနတသးအိၣ်မၤစၢၤအီၤဘၣ်ဒီးလဲၤပူၤကွံာ်ကလီအီၤတဂ့ၤ. မၤစၢၤအီၤလၢကဝံၣ်ဆၢထၢၣ်က့ၤအကသ့ၣ်ယီၤအဂီၢ်တက့ၢ်.
6 သမၢတၢ်စံၣ်ညီၣ်တီဖဲပှၤဖှီၣ်ဖိယာ်ဖိတဂၤဘၣ်တၢ်လိာ်ဘၢလိာ် ကွီၢ်အီၤအခါန့ၣ်တဂ့ၤ.
7 ဒုးအိၣ်ထီၣ်တၢ်ပာ်ဒ့ၣ်ပာ်ကမၣ်တတီတလိၤတဖၣ်တဂ့ၤ. ဒီးမၤသံပှၤလၢအတၢ်ကမၣ်တအိၣ်ဘၣ်တဂၤတဂ့ၤ. အဂ့ၢ်ဒ်အံၤ, ယကစံၣ်ညီၣ်ဃၣ်ပှၤတဂၤလၢ်လၢ်လၢအမၤ တၢ်အၢတၢ်သီဒ်န့ၣ်အသိးလီၤ.
8 တူၢ်လိာ်ခိၣ်ဖးလာ်ဆှိးတဂ့ၤ. အဂ့ၢ်ဒ်အံၤ, ခိၣ်ဖးလာ်ဆှိးမၤဘျီၣ်ပှၤအမဲာ်ဒ်သိးအသုတထံၣ်တၢ်အဘၣ်ဒီးမၤ ဟးဂီၤပှၤလၢအတၢ်ကမၣ်တအိၣ်ဘၣ်တဖၣ်အကွီၢ်န့ၣ်လီၤ.
9 မၤတရီတပါပှၤတခီဘီမုၢ်တဂၤတဂ့ၤ. တၢ်မ့ၢ်ပှၤတခီ ဘီမုၢ်ဖိတဂၤန့ၣ်မၤသးဒ်လဲၣ်, သုသ့ၣ်ညါလီၤ. အဂ့ၢ်ဒ်အံၤ, သုမ့ၢ်တ့ၢ်ပှၤတခီဘီမုၢ်ဖိတဖၣ်လၢကီၢ်အဲၤကူပတူးအပူၤလီၤ.
10 လၢဃုနံၣ်အတီၢ်ပူၤန့ၣ်သူၣ်တၢ်ဖျးတၢ်လၢသုစံာ်ပျီပူၤဒီး ပာ်ဖှိၣ်က့ၤတၢ်လၢအဟးထီၣ်တဖၣ်တက့ၢ်.
11 မ့မ့ၢ်လၢနွံနံၣ်တနံၣ်အပူၤန့ၣ်ပာ်အိၣ်ဘှံးအီၤတက့ၢ်. ကူးက့ၤတၢ်လၢအမဲထီၣ်န့ၣ်နီတမံၤတဂ့ၤ. မ်ပှၤဖှီၣ်ပှၤယာ်တဖၣ်အီၣ်တၢ်လၢအမဲထီၣ်ဖဲန့ၣ်ဒီးဆၣ်ဖိကီၢ် ဖိအမံၤတဖၣ်ကအီၣ်တၢ်အီၣ်လီၤတဲာ်ဖဲန့ၣ်ကသ့ဝဲလီၤ. မၤသုစပံးအလီၢ်ဒီးသ့ၣ်စၤယံးအထံးတဖၣ်ဒ်န့ၣ်အသိးတက့ၢ်.
12 တနွံန့ၣ်မၤတၢ်ဃုသီတက့ၢ်. မ့မ့ၢ်လၢနွံသီတသီန့ၣ်မၤတၢ် နီတမံၤတဂ့ၤ. အန့ၣ်ဒီး, သုကုၢ်သုပှၤ, ဒီးပှၤတခီဘီမုၢ်ဖိလၢအမၤတၢ်လၢသု ဂီၢ်, ဒီးသုဆၣ်ဖိကီၢ်ဖိတဖၣ်ဒၣ်လဲာ်ကအိၣ်ဘှံးဘၣ်ဝဲလီၤ.
13 ဒိကနၣ်တၢ်ကိးမံၤဒဲးလၢယၤ, ယွၤ, စံးတ့ၢ်သုတက့ၢ်. ဘါထုကဖၣ်တၢ်ဆူကစၢ်အဂၤတဖၣ်အအိၣ်တဂ့ၤ. ယၢၤထီၣ်ဒၣ်လဲာ်အမံၤတဖၣ်တဂ့ၤ.
(ဟးထီၣ်.၃၄:၁၈ - ၂၆, သိၣ်သီ.၁၆:၁ - ၁၇)
14 တနံၣ်န့ၣ်မၤမူးဖးဒိၣ်သၢမူးလၢတၢ်မၤလၤကပီၤယၤအဂီၢ်တက့ၢ်.
15 လၢလါအၤဘံာ်, လါလၢသုဟးထီၣ်ကွံာ်လၢကီၢ်အဲၤကူပတူးအပူၤ န့ၣ်မၤဘူၣ်ကိၣ်တအိၣ်ဘၣ်ဒီးကိၣ်မံၣ်အမူးဒ်ယမၤလိာ်တ့ၢ်သု အသိးန့ၣ်တက့ၢ်. ဖဲဘူၣ်အံၤအဆၢကတီၢ်နွံသီအတီၢ်ပူၤန့ၣ်သု တဘၣ်အီၣ်ကိၣ်လၢဘၣ်တၢ်မၤအီၤလၢကိၣ်မံၣ်န့ၣ်, နီတစဲးဘၣ်. သုမ့ၢ်တဟဲစိာ်တၢ်မၤဘူၣ်တမံၤဘၣ်ဒီးဟဲဘါထီၣ်ယၤနီတစုတဂ့ၤ.
16 ဖဲသုစးထီၣ်ကူးက့ၤသုတၢ်မုၢ်တၢ်ဘိတဖၣ်န့ၣ်မၤတၢ်ကူးက့ၤ တၢ်အဘူၣ်တက့ၢ်. မၤဘူၣ်ဒဲတဖၣ်အမူးဖဲတၢ်ကိၢ်ခါလၢာ်ဝဲဒီး ဖဲသုပာ်ဖှိၣ်သုတၤသူ တၤသၣ်လၢသုစပံးလီၢ်ဒီးတၤသၣ်လီၢ်တဖၣ်အကတီၢ်န့ၣ်တက့ၢ်.
17 ကိးနံၣ်ဒဲးဖဲဘူၣ်သၢဘူၣ်အမူးတဖၣ်အကတီၢ်အံၤန့ၣ်ပှၤပိာ်ခွါ ကိးဂၤဒဲးကဘၣ်ဟဲဘူၣ်ထီၣ်ဘါထီၣ်ယၤသုကစၢ်ယွၤန့ၣ်လီၤ.
18 ဖဲသုလုၢ်ထီၣ်ပာ်ထီၣ်ဆၣ်ဖိကီၢ်ဖိတဒုဆူယအိၣ်န့ၣ်တဘၣ်ဟ့ၣ် လုၢ်ထီၣ်ကိၣ်အိၣ်ဒီးကိၣ်မံၣ်တဂ့ၤ. ဆၣ်ဖိကီၢ်ဖိတဖၣ်လၢအဘၣ်တၢ်လုၢ်ထီၣ်ပာ်ထီၣ်ဆူယအိၣ်ဖဲမူးတဖၣ် အံၤအကတီၢ်အသိန့ၣ်တဘၣ်အိၣ်လီၤတဲာ်တုၤမုၢ်ဆ့ၣ်ထီၣ်လၢခံ တဂီၤန့ၣ်ဘၣ်.
19 တၤသၣ်ဆိလၢသုကူးက့ၤအီၤန့ၣ်, ဟဲစိာ်အီၤဆူယွၤ, သုကစၢ်ယွၤအဟံၣ်ကိးနံၣ်ဒဲးတက့ၢ်.
ဖီသိဖိအစၢ်မ့ၢ်ဂ့ၤမဲာ်တဲးလဲးဖိမ့ၢ်ဂ့ၤလၢအမိၢ်အနုၢ်ထံ အပူၤတဂ့ၤ.
20 ယကဆှၢလီၤကလူးတဂၤလၢကလဲၤတၢ်လၢသုမဲာ်ညါလၢယကကဟု ကယာ်သုဒီးဆှၢသုဆူတၢ်အလီၢ်တပူၤလၢယကတဲာ်ကတီၤတ့ၢ်အီၤန့ၣ်လီၤ.
21 ဒိကနၣ်အီၤဒီးစူၢ်အကလုၢ်တက့ၢ်. ပူထီၣ်တၢ်ထီဒါအီၤတဂ့ၤ. အဂ့ၢ်ဒ်အံၤ, ယဆှၢလီၤအီၤဒီးတၢ်ပူထီၣ်ဒ်န့ၣ်အသိးန့ၣ်တမ့ၢ်အဝဲကဝံသးစူၤဘၣ်လီၤ.
22 ဘၣ်ဆၣ်ဒီးပှၤမ့ၢ်စူၢ်အကလုၢ်ဒီးမၤတၢ်ကိးမံၤဒဲးလၢယမၤလိာ် သုန့ၣ်, ယကဒုးတၢ်ထီဒါကယဲၢ်သုဒုၣ်သုဒါခဲလၢာ်န့ၣ်လီၤ.
23 ယကလူးကလဲၤတၢ်လၢသုမဲာ်ညါဒီးဆှၢသုဆူပှၤအမိၢ်ဖိတဖၣ်, ပှၤဃ့ၤသးဖိတဖၣ်, ပှၤပရးစၤဖိတဖၣ်, ပှၤကနၤဧၣ်ဖိတဖၣ်, ပှၤဃံၤဝံဖိတဖၣ်ဒီးပှၤယဘူၣ်ဖိတဖၣ်အကီၢ်ပူၤဒီးယကမၤဟးဂီၤ အဝဲသ့ၣ်လီၤ.
24 ဆုးလီၤသုခိၣ်လၢသုကဘါထီၣ်အဝဲသ့ၣ်အကစၢ်တဖၣ်အဂီၢ်တဂ့ၤ. ဟံးန့ၢ်အဝဲသ့ၣ်အတၢ်ဘူၣ်တၢ်ဘါအလုၢ်အလၢ်တဖၣ်တဂ့ၤ. မၤဟးဂီၤကွံာ်အဝဲသ့ၣ်အကစၢ်တဖၣ်ဒီးမၤလီၤပှီၢ်ကွံာ်အလၢၢ်ထူၣ် စီဆှံတဖၣ်တက့ၢ်.
25 သုမ့ၢ်ဘူၣ်ထီၣ်ဘါထီၣ်ယၤ, ယွၤ, သုကစၢ်ယွၤဒီး, ယကဆိၣ်ဂ့ၤသုလၢတၢ်အီၣ်တၢ်အီဒီးထံဒီးသုးယံၤကွံာ် ကယဲၢ်သုတၢ်ဆူးတၢ်ဆါခဲလၢာ်လီၤ.
26 ပိာ်မုၣ်လၢအဟုးလီၤတဲာ်မ့ၢ်ဂ့ၤ, အဖိတအိၣ်ဘၣ်မ့ၢ်ဂ့ၤ, တဘၣ်အိၣ်လၢသုကီၢ်ပူၤနီတဂၤဘၣ်. ပကဟ့ၣ်သုတၢ်အိၣ်မူ လၢအအိၣ်ကၢအိၣ်ခိးန့ၣ်လီၤ.
27 ပှၤဂီၢ်မုၢ်လၢအထီဒါသုန့ၢ်ယကမၤအီၤဒ်သိးကပျံၤယၤ, ယကမၢလီၤတၢ်သဘံၣ်ဘုၣ်အိၣ်ထီၣ်လၢပှၤဂီၢ်မုၢ်လၢသုဒုးထီဒါ အီၤတဖၣ်အကျါ, ဒီးယကမၤဒ်သိးသုဒုၣ်သုဒါတဖၣ်ကဃၣ်ကွံာ်အသးဒီးဃ့ၢ်ကွံာ်လၢ သုအိၣ်န့ၣ်လီၤ.
28 ယကတ့ၢ်လီၤကွံာ်သုဒုၣ်သုဒါဆူတၢ်ပျံၤတၢ်ဖုးဖးဒိၣ်အပူၤ, ယကနီၣ်ထီၣ်ကွံာ်ပှၤဃံၤဝံဖိတဖၣ်, ပှၤကနၤဧၣ်ဖိတဖၣ်ဒီးပှၤ ဃ့ၤသးဖိတဖၣ်ဖဲသုလဲၤထီၣ်ဒုးတၢ်န့ၣ်လီၤ.
29 ယတနီၣ်ထီၣ်ကွံာ်ဘၣ်အဝဲသ့ၣ်လၢတနံၣ်အတီၢ်ပူၤဘၣ်. ယမ့ၢ်မၤဒီး, ကီၢ်န့ၣ်ကအိၣ်သယုၢ်ဝဲဒီးဆၣ်ဖိကီၢ်ဖိအမံၤတဖၣ် ကအါကဲာ်ဆိးလၢသုဂီၢ်လီၤ.
30 အခိၣ်တလိာ်, ယကနီၣ်ထီၣ်ကွံာ်အဝဲသ့ၣ်တစဲးဘၣ်တစဲးတုၤတၢ်ဆၢ ကတီၢ်လၢဝဲလၢသုကန့ၢ်သါဘၣ်ကီၢ်ဝဲန့ၣ်လီၤ.
31 ယကမၤလဲၢ်ထီၣ်သုကီၢ်အဆၢစးထီၣ်လၢပီၣ်လဲၣ်က့ၣ်ကျီၤအကၣ်ဘၣ် ပၢၢ်တုၤလၢထံကျိဖးဒိၣ်ဖရၤသးဒီးစးထီၣ်လၢပီၣ်လဲၣ်ဖးဒိၣ် မဲးဒံးထၢၣ်ရ့နယၢၣ်တုၤလၢပှၢ်မုၢ်ကနၢန့ၣ်လီၤ. ယကဟ့ၣ်သုတၢ်စိတၢ်ကမီၤလၢပှၤအိၣ်လၢကီၢ်န့ၣ်တဖၣ်အဖီခိၣ်ဒီး သုကနီၣ်ထီၣ်ကွံာ်အီၤဖဲသုလဲၤထီၣ်ဒုးတၢ်န့ၣ်လီၤ.
32 မၤတၢ်အၢၣ်လီၤအီလီၤဃုာ်ဒီးအဝဲသ့ၣ်မ့ၢ်ဂ့ၤအကစၢ်တဖၣ်မ့ၢ် ဂ့ၤနီတမံၤတဂ့ၤ.
33 ပျဲပှၤတဖၣ်န့ၣ်အိၣ်ဝဲဆိးဝဲလၢသုကီၢ်အပူၤတဂ့ၤ. သုမ့ၢ်ပျဲဒီး, အဝဲသ့ၣ်ကဒုးမၤသုတၢ်ဒဲးဘးထီဒါယၤန့ၣ် လီၤ. သုမ့ၢ်ဘါထီၣ်အကစၢ်တဖၣ်ဒီး, ကမ့ၢ်ဝဲတၢ်သံအပျံၤသကွီၤလၢသုဂီၢ်န့ၣ်လီၤ.”