31
1 လၢပဘၣ်တၢ်စိာ်မၢကဲကုၢ်ပှၤပှဲၤထီၣ်အနံၣ်တဆံတနံၣ်, လါသၢလါတလါထီၣ်အခီၣ်ထံးတသီအနံၤန့ၣ်ယွၤကတိၤတ့ၢ်တၢ်ဒီး ယၤလီၤ.
2 အဝဲစံးဝဲဒၣ်, “ပှၤကညီလၢအသံသ့ဧၢ, စံးဘၣ်ကီၢ်အဲၤကူပ တူးအစီၤပၤဒီးကယဲၢ်အပှၤဂီၢ်မုၢ်ခဲလၢာ်ဒ်အံၤတက့ၢ်. နဂံၢ်နဘါဆူၣ်ဝဲဒိၣ်မးလဲၣ်. ယကသ့ထိၣ်သတြီၤနၤလၢမနုၤတမံၤလဲၣ်.
3 နလီၤဂာ်ဒီးသ့ၣ်ဆှိအ့းရ့းတထံးလၢကီၢ်လဘၤနိၣ်, လၢအအိၣ်ဒီး အဒ့ဃံလၤကဒုဂ့ၤမးတဖၣ်, သ့ၣ်တထူၣ်လၢအထီဝဲတုၤထီၣ်ဘး လၢတၢ်အၢၣ်တဖၣ်န့ၣ်လီၤ.
4 ဖဲန့ၣ်ထံအိၣ်ဝဲလၢအကဒုးဒိၣ်ထီၣ်အီၤ, ဒီးထံကျိၤလၢဟီၣ် ခိၣ်လာ်တဖၣ်လၢကဒုးဂံၢ်ဆူၣ်အီၤန့ၣ်လီၤ. အဝဲသ့ၣ်မၤဘၣ်စီၣ်တၢ်လီၢ်ဖဲသ့ၣ်န့ၣ်မဲထီၣ်ဝဲ, ဒီးဒုးယွၤလီၤအထံကျိဖိတဖၣ်ဆူကယဲၢ်သ့ၣ်တဖၣ် လၢအအိၣ်လၢပှၢ်လၢ်ကျါန့ၣ်လီၤ.
5 မ့ၢ်လၢအဝဲမၤန့ၢ်ဘၣ်ထံလၢလၢပှဲၤပှဲၤအဃိအဝဲထီထီၣ်န့ၢ်ဒံး သ့ၣ်အဂၤတဖၣ်တက့ၢ်န့ၣ်လီၤ. အဝဲအဒ့တဖၣ်ဒိၣ်ဝဲဒီးထီဝဲဒၣ် န့ၣ်လီၤ.
6 ကယဲၢ်ထိၣ်အကလုာ်ကလုာ်ဘှီထီၣ်အသွံတဖၣ်လၢအဝဲအဒ့တဖၣ် အလိၤန့ၣ်လီၤ. ဆၣ်ဖိကီၢ်ဖိအမံၤတဖၣ်ဖှံလီၤအဖိဆံးတဖၣ်လၢ အဝဲအကဒုဖီလာ်န့ၣ်လီၤ. ပှၤကလုာ်တဖၣ်လၢဟီၣ်ခိၣ်ချၢအိၣ်ကဒု ဝဲလၢအဝဲအကဒုဖီလာ်န့ၣ်လီၤ.
7 သ့ၣ်အံၤဃံလၤဝဲဒိၣ်မးလဲၣ်. ထီဂ့ၤမးအိၣ်ဒီးအဒ့တဖၣ်လၢအ ထီဝဲစ့ၢ်ကီးန့ၣ်လီၤ. အဝဲအဂံၢ်တဖၣ်စဲၤလီၤအသးယိာ်တုၤလၢထံကျိတဖၣ် လၢအယွၤဝဲန့ၣ်လီၤ.
8 သ့ၣ်ဆှိအ့ရ့းလၢကစၢ်ယွၤအတၤသၣ်လီၢ်န့ၣ်တၢ်ထိၣ် သတြီၤဒီးအီၤတသ့နီတထံးဘၣ်. သ့ၣ်ဆှိတအိၣ်ဒီးအဒ့တဖၣ် ဒ်န့ၣ်အသိးနီတထံးဘၣ်. ဒီးသ့ၣ်ဧၤမိၣ်လၢအဒ့တဖၣ်ကဒိၣ်ထဲသိးန့ၣ်တအိၣ်နီတထံး ဘၣ်. သ့ၣ်လၢကစၢ်ယွၤအတၤသၣ်လီၢ်ဒၣ်ဝဲအပူၤတထဲန့ၣ် အသိးနီတထံးဘၣ်.
9 ယတ့လီၤအီၤဃံဃံလၤလၤအိၣ်ဒီးအဒ့တဖၣ်အါအါဂီၢ်ဂီၢ်န့ၣ်လီၤ. တၢ်န့ၣ်မ့ၢ်တၢ်လၢအဒုးသးကါကယဲၢ်သ့ၣ်လၢအအိၣ်လၢကစၢ်ယွၤ အဧ့ၤဒ့ၣ်တၤသၣ်လီၢ်အပူၤလၢအီၤန့ၣ်လီၤ.
10 အန့ၣ်ဒီးခဲကနံၣ်အံၤ, ယၤယွၤပၢဘၣ်တၢ်ခဲလၢာ်ကစၢ်, ကတဲဘၣ် နၤတၢ်လၢကမၤအသးဒီးသ့ၣ်န့ၣ် လၢအဒိၣ်ထီၣ်တ့ၢ်ဝဲတုၤလၢအ တုၤဃီၤဆူတၢ်အၢၣ်တဖၣ်အအိၣ်န့ၣ်လီၤ. ဒ်အထီထီၣ်ဝဲအသိးန့ၣ်အသးထီၣ်ထီဝဲန့ၣ်လီၤ.
11 လၢတၢ်န့ၣ်အဃိ, ယစူးကွံာ်ညိကွံာ်လံအီၤဒီး ကပျဲပှၤတခီဘီမုၢ်ဖိအပဒိၣ်တဂၤမၤန့ၢ်အီၤန့ၣ်လီၤ. အဝဲကဟ့ၣ်သ့ၣ်န့ၣ်လၢတၢ်လၢအကြၢးဒိးန့ၢ်ဝဲလၢအတၢ်အၢ တၢ်သီအဃိန့ၣ်လီၤ.
12 ပှၤတခီဘီမုၢ်ဖိတဖၣ်လၢတအိၣ်ဒီးတၢ်သးကညီၤဘၣ်န့ၣ်ကကျီလီၤ အီၤဒီးပာ်တ့ၢ်ကွံာ်အီၤန့ၣ်လီၤ. အဒ့တဖၣ်ဒီးအဒ့ဖးဒိၣ်တဖၣ်လၢ အကၢ်ကွံာ်န့ၣ်ကလီၤတဲာ်လၢကယဲၢ်ကစၢၢ်အလိၤဒီးဆူတၢ်တြီၤ ပူၤလၢထံကီၢ်အပူၤန့ၣ်လီၤ. ပှၤကလုာ်တဖၣ်လၢအအိၣ်ဆိးလၢ အဝဲအတၢ်ကဒုပူၤန့ၣ်ကဟးကွံာ်ဝဲဒၣ်န့ၣ်လီၤ.
13 ထိၣ်တဖၣ်ကဟဲစီၢ်လီၤလၢသ့ၣ်လၢအကၢ်လီၤကွံာ်အလိၤဒီး ဆၣ်ဖိကီၢ်ဖိအမံၤတဖၣ်ကယီၢ်ခီကွံာ်တၢ်လၢအဒ့တဖၣ်အလိၤန့ၣ်လီၤ.
14 ဒီးလၢတၢ်န့ၣ်အဃိ, စးထီၣ်ခဲအံၤဒီးဆူညါန့ၣ်, ထံမ့ၢ်ဂ့ၤထဲအံၤ ထဲနုၤနာ်သက့, သ့ၣ်လၢကဒိၣ်ထီၣ်ဒီးထီကဒီးထဲသိးန့ၣ်, ဒီးဖှိး ထီၣ်အသးဆူတၢ်အၢၣ်တဖၣ်အကျါတုၤအထီဝဲထဲသိးန့ၣ်, တအိၣ်ဘၣ်နီတထံးဘၣ်. အဝဲသ့ၣ်ခဲလၢာ်ဘၣ်တၢ်စံၣ်ညီၣ်သံ ဃါမနၤဒ်ပှၤကညီတဖၣ်လၢအသံသ့ဝဲအသိးန့ၣ်, ဘၣ်တၢ်စံၣ်ညီၣ် ဃါမနၤလၢကလဲၤသကိးဃုာ်ဒီးပှၤတဖၣ်လၢအလဲၤလီၤဆူ တၢ်သံအကီၢ်ပူၤန့ၣ်လီၤ.”
15 အအံၤမ့ၢ်တၢ်လၢယွၤပၢဘၣ်တၢ်ခဲလၢာ်ကစၢ်စံးဝဲန့ၣ်လီၤ. “မုၢ်တနံၤဖဲသ့ၣ်န့ၣ်လဲၤလီၤဆူတၢ်သံအကီၢ်ပူၤဒီးယကမၤဘၢအီၤ လၢထံလၢဟီၣ်ခိၣ်လာ်တဖၣ်ဒ်အမ့ၢ်တၢ်သူၣ်အုးသးအုးအပနီၣ် တမံၤအသိးန့ၣ်လီၤ. ယကဒုးအိၣ်ကတီၢ်ထံကျိတဖၣ်ဒီးတပျဲဘၣ်ထံကျိ ဖိတဖၣ်ယွၤလီၤလၢၤဘၣ်. မ့ၢ်လၢသ့ၣ်န့ၣ်သံလံဝဲအဃိ, ယကဟဲစိာ်ဃီၤတၢ်ခံးတၢ်နၤဆူကီၢ်လဘၤနိၣ်အကစၢၢ် တဖၣ်အလိၤဒီးဒုးဃ့ထီကွံာ်သ့ၣ်တဖၣ်လၢအအိၣ်လၢပှၢ်ပူၤန့ၣ်လီၤ.
16 ဖဲယဆှၢလီၤအီၤဆူတၢ်သံအကီၢ်ပူၤန့ၣ်, အတၢ်လီၤပှီၢ်အတၢ်သီၣ် ကမၤကနိးကစုာ်ပှၤကလုာ်တဖၣ်န့ၣ်လီၤ. သ့ၣ်ခဲလၢာ်လၢဧ့ၤဒ့ၣ်, ဒီးသ့ၣ်အဂ့ၤကတၢၢ်တဖၣ်လၢအမၤန့ၢ်ထံဂ့ၤဂ့ၤလၢကီၢ်လဘၤနိၣ်, လၢအလဲၤလီၤဆူဟီၣ်ခိၣ်လာ်န့ၣ်ကသူၣ်ဖှံသးညီလၢအဝဲအတၢ်လီၤ ကွံာ်အဃိန့ၣ်လီၤ.
17 အဝဲသ့ၣ်ကလဲၤလီၤဃုာ်ဒီးအီၤဆူတၢ်သံအကီၢ်ပူၤ, ဒ်သိးကလဲၤ အိၣ်သကိးဃုာ်ဒီးပှၤလၢအလီၤကွံာ်တ့ၢ်လံတဖၣ်န့ၣ်လီၤ. ဒီး ကယဲၢ်ပှၤလၢအအိၣ်လၢအဝဲအတၢ်ကဒုအဖီလာ်ခဲလၢာ်ကလီၤ ပြံလီၤပြါလၢပှၤကလုာ်တဖၣ်အကျါန့ၣ်လီၤ.
18 သ့ၣ်န့ၣ်မ့ၢ်ကီၢ်အဲၤကူပတူးအစီၤပၤဒီးအဝဲအပှၤဂီၢ်မုၢ်ခဲလၢာ်န့ၣ်လီၤ. သ့ၣ်တဖၣ်လၢဧ့ၤဒ့ၣ်တၤသၣ်လီၢ်အပူၤဒၣ်လဲာ်တထီဒီးတလီၤကဟု ကညီၢ်ထဲသိးအီၤဘၣ်. ဘၣ်ဆၣ်ခဲကနံၣ်အံၤဒ်သ့ၣ်တဖၣ်လၢ ဧ့ၤဒ့ၣ်တၤသၣ်လီၢ်အပူၤအသိးန့ၣ်, အဝဲကလဲၤလီၤဆူတၢ်သံအကီၢ်ပူၤ, ဒီးကအိၣ်ဆိးသကိးဒီးပှၤတဖၣ်လၢအယွၤတအိၣ်ဒီး ပှၤတဖၣ်လၢအဘၣ်တၢ်မၤသံအီၤလၢတၢ်ဒုးပျီအပူၤန့ၣ်လီၤ.” ယွၤပၢဘၣ်တၢ်ခဲလၢာ်ကစၢ်စံးဝဲယကတိၤလံတၢ်လံ.