1-2 ယွၤကတိၤကဒီးတၢ်လီၤ. အဝဲစံးဝဲဒၣ်, “ပှၤကညီလၢအသံသ့ဧၢ, ကတိၤတၢ်လၢဝံအကျိာ်ဒီး ဘိးဘၣ်သ့ၣ်ညါတၢ်လၢယၤယွၤပၢဘၣ်တၢ်ခဲလၢာ်ကစၢ်စံးဝဲန့ၣ်တက့ၢ်. နကဘၣ်ကိးပသူထီၣ်တၢ်ကတိၤတဖၣ်အံၤလီၤ. တၢ်လီၤပျံၤလီၤဖုးအမုၢ်နံၤ တနံၤဟဲလံဝဲလံ. 3 မုၢ်တနံၤန့ၣ်ဘူးထီၣ်လံ. မုၢ်တနံၤဖဲယွၤကမၤတၢ်, မုၢ်တနံၤလၢ အပှဲၤဒီးတၢ်အၢၣ်တဖၣ်ဒီး တၢ်ကိၢ်တၢ်ဂီၤလၢပှၤကလုာ်တဖၣ်အဂီၢ်န့ၣ်လီၤ. 4 တၢ်ဒုးကအိၣ်ဝဲလၢကီၢ်အဲၤကူပတူးအပူၤဒီး တၢ်ကိၢ်တၢ်ဂီၤဖးဒိၣ်လၢကီၢ်ကူၤၡးအပူၤန့ၣ်လီၤ. ပှၤအါဂၤလၢ ကီၢ်အဲၤကူပတူးအပူၤကဘၣ်တၢ်မၤသံအီၤလီၤ. ထံကီၢ်ကဘၣ်တၢ်ဂုာ်န့ၢ်ဆူၣ်အီၤဒီး ပာ်လီၤတဲာ်တ့ၢ်အီၤလၢ တၢ်ဟးဂီၤတဖၣ်အပူၤန့ၣ်လီၤ. 5 တၢ်ဒုးအဝဲန့ၣ် ကမၤသံကွံာ်စ့ၢ်ကီးသုးဖိတဖၣ် လၢအဘၣ်တၢ်ဒိးလဲအီၤလၢ ကီၢ်ကူၤၡး, ကီၢ်လံးဘယၣ်, ကီၢ်အရ့ဘယၣ်, ကီၢ်လူၤဒံ, ကီၢ်ကူာ်ဒီးလၢယပှၤဂီၢ်မုၢ်ဒၣ်ယဲအကျါဒၣ်လဲာ်န့ၣ်လီၤ.” 6 ယွၤစံးဝဲဒၣ်, “စးထီၣ်လၢမံးကဒိးလး, လၢကလံၤစိးတုၤဆူ စဝ့နၤလၢကလံၤထံး, ကယဲၢ်ကီၢ်အဲၤကူပတူးအပှၤတြီဆၢတၢ် ခဲလၢာ်ကဘၣ်တၢ်မၤသံအီၤလၢ တၢ်ဒုးအပူၤန့ၣ်လီၤ. ကီၢ်အဲၤကူပတူးအသုးမုၢ်လၢ အပာ်ကဖၢလၢအသးန့ၣ်ကဘၣ်တၢ်မၤဟးဂီၤကွံာ်အီၤန့ၣ်လီၤ. ယၤ, ယွၤပၢဘၣ်တၢ်ခဲလၢာ်ကစၢ်ကတိၤလံတၢ်လံ. 7 ကီၢ်န့ၣ်ကကဲထီၣ်တၢ်လီၢ်အိၣ်သယုၢ်လီၤဃီ ကတၢၢ်လၢဟီၣ်ခိၣ်ချၢဒီးအဝ့ၢ်တဖၣ်ကအိၣ်တ့ၢ်ဝဲလၢ တၢ်ဟးဂူာ်ဟးဂီၤလၢာ်လၢာ်ဆ့ဆ့အပူၤန့ၣ်လီၤ. 8 ဖဲယဒွဲၣ်အူထီၣ် ကီၢ်အဲၤကူပတူးလၢမ့ၣ်အူဒီး အပှၤတြီဆၢတၢ်တဖၣ်ဘၣ်တၢ်မၤသံကွံာ်အီၤန့ၣ် အဝဲသ့ၣ်ကသ့ၣ်ညါဝဲလၢယမ့ၢ်ယွၤန့ၣ်လီၤ. 9 ဖဲမုၢ်နံၤအဝဲန့ၣ်ဟဲဃီၤဒီးကီၢ်အဲၤကူပတူးဘၣ်တၢ်မၤဟးဂီၤအီၤန့ၣ်, ယကဆှၢလီၤပှၤစိာ်တၢ်ကစီၣ်တဖၣ်လၢကဘီတဖၣ်အပူၤဒ်သိး ကထိၣ်ဂဲၤထီၣ်ကီၢ်ကူၤၡးအပှၤဂီၢ်မုၢ်လၢအတဆိကမိၣ်ထီၣ်တၢ် ကမၤအသးဒ်အံၤတဖၣ်ဒီးအဝဲသ့ၣ်ကပျံၤတၢ်ဖုးတၢ်န့ၣ်လီၤ. မုၢ်နံၤအဝဲန့ၣ်ဟဲလံဝဲလံ.” 10 ယွၤပၢဘၣ်တၢ်ခဲလၢာ်ကစၢ်စံးဝဲ, “ယကသူကီၢ်ဘၤဘူၤလိၣ် အစီၤပၤနဘူၤကးန့စၢ်ဒ်သိး ကမၤကတၢၢ်ကွံာ်ကီၢ်အဲၤကူပတူးအတၢ်ထူးတၢ်တီၤန့ၣ်လီၤ. 11 အဝဲဒီးအသုးမုၢ်လၢ အတအိၣ်ဒီးတၢ်သးကညီၤဘၣ် န့ၣ်ကဟဲဒ်သိးကမၤဟးဂူာ်ဟးဂီၤထံကီၢ်အဂီၢ်န့ၣ်လီၤ. အဝဲသ့ၣ်ကဟဲထီၣ်ဒုးကီၢ်အဲၤကူပတူးလၢနးတဖၣ်ဒီး ကီၢ်န့ၣ်ကပှဲၤဒီးတၢ်သံစိၣ်တဖၣ်န့ၣ်လီၤ. 12 ယကမၤဃ့ထီကွံာ်ထံကျိနံၤလါဒီး ပာ်လီၤကီၢ်အဲၤကူပတူးလၢပှၤအၢ ပှၤသီတဖၣ်အစိကမီၤအဖီလာ်န့ၣ်လီၤ. ပှၤတခီဘီမုၢ်ဖိတဖၣ် ကမၤဟးဂူာ်ဟးဂီၤကွံာ်ထံကီၢ်ဒီဘ့ၣ်ညါန့ၣ်လီၤ.” ယၤ, ယွၤကတိၤလံတၢ်လံ. 13 ယွၤပၢဘၣ်တၢ်ခဲလၢာ်ကစၢ်စံးဝဲဒၣ်, “ယကမၤဟးဂီၤကွံာ်တၢ်ဂီၤ တၢ်ဖီၣ်တဖၣ်ဒီးယွၤအတမ့ၢ်တတီတဖၣ်လၢဝ့ၢ်မဲဖံးအပူၤန့ၣ်လီၤ. ပှၤလၢအကပၢကီၢ်အဲၤကူပတူး တအိၣ်လၢၤ နီတဂၤဘၣ်ဒီးယကမၤပျံၤမၤဖုးကယဲၢ်ပှၤဂီၢ်မုၢ်ခဲလၢာ်န့ၣ်လီၤ. 14 ယကဒုးအိၣ်သယုၢ် ကီၢ်အဲၤကူပတူးကလံၤထံးဒီး ဒွဲၣ်အူကွံာ်ဝ့ၢ်စိၤဧၢ်လၢကလံၤထံးတကပၤန့ၣ်လီၤ. ယကစံၣ်ညီၣ်သံဘံးအဝ့ၢ်ခိၣ်န့ၣ်လီၤ. 15 ယကဒုးကလၢၢ်ဘၣ်, ကီၢ်အဲၤကူပတူးအဝ့ၢ်ဖးဒိၣ်လၢအအိၣ်ဒီး တိာ်ခၢၣ်သနၢၣ်, ဝ့ၢ်စံၤလၢယတၢ်သးကဲၤထီၣ်န့ၣ်လီၤ. ယကမၤဟးဂီၤကွံာ်သံဘံးအတၢ်ထူးတၢ်တီၤန့ၣ်လီၤ. 16 ယကဒွဲၣ်ကွံာ်ကီၢ်အဲၤကူပတူးလၢ မ့ၣ်အူဒီးဝ့ၢ်စံၤန့ၣ်ကအိၣ်လၢတၢ်သူၣ်အူသးကဲၤအပူၤန့ၣ် လီၤ. ဝ့ၢ်သံဘံးအခိၣ်ဒူတဖၣ်ကဘၣ်တၢ်မၤလီၤပှီၢ်ကွံာ်အီၤဒီး ဝ့ၢ်န့ၣ်ကဘၣ်တၢ်လုၣ်ဘၢအီၤလၢထံန့ၣ်လီၤ. 17 ပှၤပိာ်ခွါသးစၢ်တဖၣ်လၢ ဝ့ၢ်ဟဲလံအီၣ်ဖီလံာ်ဒီး ဝ့ၢ်ပံၤဘ့စ့းတဖၣ်န့ၣ်ကသံလၢတၢ်ဒုးတၢ်ယၤ အပူၤဒီးပှၤဂီၢ်မုၢ်အဂၤတဖၣ်ကဘၣ် တၢ်စိာ်ကွံာ်အီၤဒ်ပှၤဃိာ်ဖိတဖၣ်အသိးန့ၣ်လီၤ. 18 တၢ်ခံးကလီၤဘၣ်လၢ ဝ့ၢ်တၤပါန့ၤအလိၤဖဲ ယမၤကတၢၢ်ကွံာ်ကီၢ်အဲၤကူပတူးအစိကမီၤဒီး မၤကတၢၢ်ကွံာ်အဂံၢ်အဘါလၢအဝဲသ့ၣ်ပာ်ထီၣ်ထီ တ့ၢ်အသးန့ၣ်လီၤ. တၢ်အၢၣ်ကလုၣ်ဘၢ ကီၢ်အဲၤကူပတူးဒီးပှၤဂီၢ်မုၢ်လၢအအိၣ်လၢအဝ့ၢ်တဖၣ်အပူၤန့ၣ် ကဘၣ်တၢ်စိာ်ကွံာ်အီၤဒ်ပှၤဃိာ်ဖိတဖၣ်အသိးန့ၣ်လီၤ. 19 တုၤယစံၣ်ညီၣ်ကီၢ်အဲၤကူပတူးလၢကျဲဒ်အံၤအပူၤန့ၣ်အဝဲသ့ၣ် ကသ့ၣ်ညါဝဲလၢယမ့ၢ်ယွၤန့ၣ်လီၤ.”

20 လၢပဘၣ်တၢ်စိာ်မၢကဲကုၢ်ပှဲၤထီၣ်အနံၣ်တဆံတနံၣ်, လါအခီၣ်ထံးတလါထီၣ်နွံသီတသီန့ၣ်ယွၤက တိၤတ့ၢ်တၢ်ဒီးယၤန့ၣ်လီၤ. 21 အဝဲစံးဝဲဒၣ်, “ပှၤကညီလၢအသံသ့ဧၢ, ယဘိးကၢ်ကွံာ်ကီၢ်အဲၤကူပတူးအစီၤပၤအစုဒုၣ်လံန့ၣ်လီၤ. ပှၤလၢကဘိၣ်ဘံထီၣ်အီၤမ့ၢ်ဂ့ၤ, ထၢနုာ်အီၤလၢတၢ်ကံးညၣ်ဝံ စုအပူၤမ့ၢ်ဂ့ၤတအိၣ်နီတဂၤ, ဒ်သိးကဘျါက့ၤဒီးအဂံၢ်အ ဘါကဆူၣ်ထီၣ်က့ၤတုၤလၢအဖီၣ်ထီၣ်ကဒီးနးသ့ဝဲန့ၣ်ဘၣ်. 22 အန့ၣ်ဝံၤဒီး, အအံၤမ့ၢ်တၢ်လၢယၤ, ယွၤပၢဘၣ်တၢ်ခဲလၢာ်ကစၢ် စံးဝဲန့ၣ်လီၤ. ယမ့ၢ်ကီၢ်အဲၤကူပတူးအစီၤပၤအဒုၣ်အဒါန့ၣ်လီၤ. ယကမၤကၢ်ကွံာ်အစုခံခီလၢာ်, လၢအဂ့ၤဒံးမ့ၢ်ဂ့ၤ, လၢအကၢ်ကွံာ် တ့ၢ်လံတခီမ့ၢ်ဂ့ၤဒီးနးကလီၤတဲာ်ကွံာ်လၢအစုပူၤန့ၣ်လီၤ. 23 ယကမၤလီၤပြံလီၤပြါကွံာ်ပှၤအဲၤကူပတူးဖိတဖၣ်သကုၤဟီၣ်ခိၣ် ဒီဘ့ၣ်ညါန့ၣ်လီၤ. 24 အန့ၣ်ဝံၤဒီးယကမၤဆူၣ်ထီၣ်ကီၢ်ဘၤဘူၤလိၣ်အစီၤပၤအစုဒုၣ်တဖၣ် ဒီးပာ်လီၤယနးလၢအစုပူၤန့ၣ်လီၤ. ဘၣ်ဆၣ်ယကမၤကၢ်ကွံာ်ကီၢ်အဲၤကူပတူးအစီၤပၤအစု ဒုၣ်တဖၣ်ဒီးအဝဲကကအုကစွါဒီးသံကွံာ်လၢအဒုၣ်အဒါတဖၣ် အမဲာ်ညါန့ၣ်လီၤ. 25 မ့ၢ်လီၤ, ယကမၤစၢ်လီၤကွံာ်အဝဲအဂံၢ်အဘါဒီးမၤဆူၣ်ထီၣ် ကီၢ်ဘၤဘူၤလိၣ်အစီၤပၤအဂံၢ်အဘါန့ၣ်လီၤ. ဖဲယဟ့ၣ်ဃီၤ အီၤယနးဒီးအဝဲယူာ်ဃီၤဝဲဆူကီၢ်အဲၤကူပတူးန့ၣ်, ပှၤကိးဂၤဒဲး ကသ့ၣ်ညါလၢယမ့ၢ်ယွၤန့ၣ်လီၤ. 26 ယကမၤလီၤပြံလီၤပြါပှၤအဲၤကူပတူးဖိတဖၣ်သကုၤဟီၣ်ခိၣ်ဒီဘ့ၣ် ညါန့ၣ်လီၤ. အန့ၣ်တစုအဝဲသ့ၣ်ကသ့ၣ်ညါလၢယမ့ၢ်ယွၤန့ၣ်လီၤ.”