3
1 ကစၢ်ယွၤစံးဝဲဒၣ်, “ပှၤကညီလၢ အသံသ့ဧၢ, အီၣ်လံာ်ထူအံၤ တက့ၢ်. ဝံၤဒီး လဲၤကတိၤတၢ်ဒီး ကီၢ်အံၣ်စရ့လးအပှၤဂီၢ်မုၢ်
န့ၣ်တက့ၢ်.”
2 လၢတၢ်န့ၣ်အဃိ ယအီးထီၣ်ယကိာ်ပူၤ, ဒီးအဝဲဟ့ၣ်လီၤယၤ လံာ်ထူလၢယကအီၣ်အီၤအဂီၢ်လီၤ.
3 အဝဲစံးဝဲဒၣ်, “ပှၤကညီအသံသ့ဧၢ, အီၣ်လံာ်ထူလၢ ယဟ့ၣ်လီၤနၤအံၤတက့ၢ်. မၤပှဲၤနဟၢဖၢဒီး အီၤတက့ၢ်.”
ယအီၣ်အီၤဒီး ဆၢဝဲလၢ ယကိာ်ပူၤ ဒ်ကနဲစီအသိးန့ၣ်လီၤ.
4 ဝံၤဒီး ကစၢ်ယွၤစံးဝဲဒၣ်, ပှၤကညီလၢ အသံသ့ဧၢ, လဲၤဆူကီၢ်အံၣ်စရ့လး အပှၤဂီၢ်မုၢ်အအိၣ်ဒီး
စံးဘၣ်အဝဲသ့ၣ်တၢ်တမံၤဂ့ၤတမံၤဂ့ၤလၢ ယတဲဘၣ်နၤလၢ
နကစံးအီၤန့ၣ်တက့ၢ်.
5 ယတမၢလီၤနၤဆူ ပှၤတကလုာ်အအိၣ်လၢ အကတိၤထံဂၤကီၢ်ဂၤအကျိာ်လၢအကီအခဲန့ၣ်ဘၣ်.
မ့မ့ၢ် ဆူပှၤအံၣ်စရ့လးဖိတဖၣ်အအိၣ်န့ၣ်လီၤ.
6 ယမ့ၢ်မၢလီၤနၤဆူ ပှၤကလုာ်ဖးဒိၣ်တဖၣ်အအိၣ်, လၢအကတိၤကျိာ်လၢအကီအခဲတဖၣ်လၢ
နတနၢ်ပၢၢ်အီၤဘၣ်န့ၣ်, အဝဲသ့ၣ်ကဒိကနၣ်နၤလီၤ.
7 ဘၣ်ဆၣ်ဒီး, ကီၢ်အံၣ်စရ့လး အပှၤဂီၢ်မုၢ်တမ့ၢ်ကသးအိၣ်ဒိကနၣ်နၤ နီတဂၤဘၣ်, အဝဲသ့ၣ် တမ့ၢ်ကဒိကနၣ်ယၤဒၣ်လဲာ်န့ၣ်ဘၣ်.
အဝဲသ့ၣ်ခဲလၢာ်မ့ၢ် ပှၤအခိၣ်အကိၤဒီး ခီၣ်ဆၢတၢ်န့ၣ်လီၤ.
8 ခဲအံၤ ယကဒုးကဲထီၣ်နၤ, ပှၤလၢအခိၣ်ကိၤဒီးအနၢ်ဘုစကုဒ် အဝဲသ့ၣ်အသိးန့ၣ်လီၤ.
9 ယကဒုးကဲထီၣ်နၤ ပှၤဂၢၢ်ဝဲကျၢၤဝဲ ဒ်လၢၢ်တဖျၢၣ်အသိး, ကိၤဝဲဒ်လၢၢ်တၢ်မျၢ်တဖျၢၣ်အသိးန့ၣ်လီၤ. ပျံၤဘၣ်ပှၤပူထီၣ် တၢ်ဖိတဖၣ်န့ၣ်တဂ့ၤ.”
10 ကစၢ်ယွၤကတိၤဒံးတၢ်ဆူညါဒီး စံးဝဲ, “ပှၤကညီလၢအသံသ့ဧၢ, ပာ်သူၣ်ပာ်သး လီၤတံၢ်လီၤဆဲး သ့ၣ်နီၣ်ထီၣ်တၢ်ကိးမံၤဒဲးလၢ
ယတဲဘၣ်နၤန့ၣ်တက့ၢ်.
11 ဝံၤဒီး လဲၤဆူ နပှၤထံဖိကီၢ်ဖိတဖၣ်လၢ အအိၣ်လၢတၢ်စိာ်မၢကဲ ကုၢ်အပူၤအအိၣ်, ဒီး တဲဘၣ်အဝဲသ့ၣ်လၢ, တၢ်လၢယၤ,
ယွၤပၢတၢ်ခဲလၢာ်ကစၢ်, စံးဘၣ်အဝဲသ့ၣ်ဖဲ အဝဲသ့ၣ်ကနၣ်နၤမ့ၢ်ဂ့ၤ, တကနၣ်နၤမ့ၢ်ဂ့ၤ, ဘၣ်အခါန့ၣ်တက့ၢ်.”
12 အန့ၣ်ဝံၤဒီး, ကစၢ်ယွၤအသးစိာ်ထီၣ်ယၤ, ဒီးလၢယလီၢ်ခံတခီ ယနၢ်ဟူဘၣ်တၢ်ကလုၢ်ဖးဒိၣ် သီၣ်ထီၣ်လၢအစံးဝဲ,
စံးထီၣ်ပတြၢၤယွၤ အလၤကပီၤလၢ မူခိၣ်ထးန့ၣ်တက့ၢ်.
13 ယနၢ်ဟူဘၣ်တၢ်ဘၣ်တ့တဖၣ် အဒံးဆ့ဘၣ်ထံးလိာ်သးလၢ ကလံၤကျါအသီၣ်, ဒီးလ့ၣ်ဖံဘၣ်တဖၣ်အသီၣ်, လၢအသီၣ်ဝဲ
ဒိၣ်ထဲသိး ဟီၣ်ခိၣ်ဟူးအသီၣ်န့ၣ်လီၤ.
14 ယွၤအစိကမီၤလီၤဘၣ်လၢ ယလိၤအိၣ်ဒီး အသဟီၣ်ဆူၣ်ဒိၣ်မး, ဒီးဖဲအသး စိာ်ဆှၢကွံာ်ယၤန့ၣ်, ယသးခၣ်ဒီးယသးထီၣ်ယဲလီၤ.
15 လၢတၢ်န့ၣ်အဃိ, ယဟဲဆူဝ့ၢ်တ့ၤလၤဘံးလၢထံကျိကဘၢ်အနံၤ, ဖဲပှၤဘၣ်တၢ်စိာ်မၢကဲကုၢ်တဖၣ် အိၣ်ဆိးဝဲ, ဒီးယအိၣ်ဖဲန့ၣ် နွံသီ,
ဒီးတၢ်လၢယထံၣ်ဘၣ်ဒီး နၢ်ဟူဘၣ်တ့ၢ်တဖၣ် မၤလီၤသဘှံး
ယသးန့ၣ်လီၤ.
(ဃ့း. ၃၃:၁-၉)
16 နွံသီပူၤကွံာ်ဝံၤဒီး, ယွၤကတိၤတၢ်ဒီး ယၤစံးဝဲ,
17 “ပှၤကညီလၢ အသံသ့ဧၢ, ယဒုးကဲထီၣ်နၤလၢ ပှၤခိးကွၢ်တၢ်ဖိ တဂၤလၢ ကီၢ်အံၣ်စရ့လး အပှၤတကလုာ်အဂီၢ်လီၤ. တၢ်ပလီၢ်
ပဒီတဖၣ်လၢ ယဟ့ၣ်လီၤနၣ်, နကဘၣ်ဟ့ၣ်ခီဟ့ၣ်နီၤဆူအဝဲသ့ၣ်
အအိၣ်န့ၣ်တက့ၢ်.
18 ယမ့ၢ်စံးလၢ ပှၤအအၢအသီတဂၤန့ၣ် ကသံဝဲလီၤ, ဘၣ်ဆၣ်ဒီး နမ့ၢ် တဟ့ၣ်ပလီၢ်အီၤလၢ ကလဲလိာ်အကျဲတဖၣ် ဒ်သိးအဝဲကအုၣ်က့ၤ
ခီၣ်က့ၤအသးသမူဘၣ်န့ၣ်, အဝဲကသံဝဲဒ် အမ့ၢ်ဒံးဒၣ်ပှၤတၢ်ဒဲးဘးဖိ
တဂၤအသိးန့ၣ်လီၤ. ဘၣ်ဆၣ်ဒီး, ယကဟံးဃာ်နၤဒ်
ပှၤအိၣ်မူအိၣ်ဒါလၢ အဝဲအတၢ်သံအဂီၢ်န့ၣ်လီၤ.
19 နမ့ၢ်ဟ့ၣ်ပလီၢ်ပှၤ အအၢအသီတဂၤန့ၣ်ဒီး အဝဲမ့ၢ်တဆိကတီၢ်မၤ တၢ်ဒဲးဘးဒီး, အဝဲကသံဝဲဒ်အမ့ၢ်ဒံးဒၣ်ပှၤတၢ်ဒဲးဘးဖိတဂၤ
အသိးလီၤ. ဘၣ်ဆၣ်ဒီး, နသးသမူ ကဘၣ်တၢ်ပျၢ်ဖျဲးအီၤန့ၣ်လီၤ.
20 တုၤပှၤအဂ့ၤနီၢ်နီၢ်တဂၤ စးထီၣ်မၤတၢ်အၢတၢ်သီဒီးယပာ်အီၤလၢ တၢ်လီၤပျံၤလီၤဖုး, လီၤဘၣ်ယိာ်အဂ့ၢ်အခၢးအပူၤလံဒီး, နမ့ၢ်တဟ့ၣ်
ပလီၢ်အီၤဘၣ်နၣ် အဝဲဒၣ်ကသံဝဲလီၤ. အဝဲဒၣ်
ကသံဝဲလၢအတၢ်ဒဲးဘးတဖၣ်အဃိလီၤ.
ယတသ့ၣ်နီၣ်ဘၣ် တၢ်အဂ့ၤလၢ အမၤတ့ၢ်ဝဲဘၣ်ဒီးယကဟံး
ဃာ်နၤ ဒ်ပှၤအိၣ်မူအိၣ်ဒါလၢ အတၢ်သံအဂီၢ်န့ၣ်လီၤ.
21 နမ့ၢ်ဟ့ၣ်ပလီၢ်ပှၤ အဂ့ၤတဂၤဒ်သိး အသုတမၤတၢ်ဒဲးဘးတဂ့ၤ, ဒီးအဝဲမ့ၢ် ဒိကနၣ်နၤ, ဒီးမ့ၢ်တမၤတၢ်ဒဲးဘးဘၣ်ဒီး,
အဝဲကမူဒံးဝဲဒီး နသးသမူကဘၣ်တၢ်မၤပူၤမၤဖျဲးအီၤ စ့ၢ်ကီးန့ၣ်လီၤ.”
22 ယကလၢၢ်ဘၣ် ယွၤအတၢ်အိၣ်လီၤစိလီၤကမီၤဒီး နၢ်ဟူအဝဲစံးဘၣ် ယၤ, “ဂဲၤဆၢထၢၣ်ဒီး လဲၤဟးထီၣ်ဆူ တၢ်တြီၤပူၤတက့ၢ်. ယကကတိၤ
တၢ်ဒီး နၤဖဲန့ၣ်လီၤ.”
23 လၢတၢ်န့ၣ်အဃိ, ယဟးထီၣ်ဒီး လဲၤဆူတၢ်တြီၤပူၤ, ဒီးဖဲန့ၣ် ယထံၣ်ဘၣ်ယွၤအလၤကပီၤ, ဒ်ယထံၣ်ဘၣ်တ့ၢ်အီၤဖဲထံကျိ
ကတၢ်အနံၤအသိးန့ၣ်လီၤ. ယလီၤဃံၤအီထီလာ်လၢ
ယမဲာ်သၣ်လၢဟီၣ်ခိၣ်လိၤ,
24 ဘၣ်ဆၣ်ဒီး ကစၢ်ယွၤအသးဟဲနုာ်လီၤလၢ ယပူၤဒီးဒုးဆၢထၢၣ် ယၤလၢ ယခီၣ်လီၤ. ယွၤစံးဘၣ်ယၤ, “က့ၤဆူဟံၣ်ဒီးကတံာ်ဃာ်
နသးလၢဟံၣ်ပူၤတက့ၢ်.
25 ပှၤကညီလၢ အသံသ့ဧၢ, နကဘၣ်တၢ်စၢဃာ်နၤလၢ ပျံၤတဖၣ်, ဒီးနလဲၤဟးထီၣ်ဆူ ကမျၢၢ်အကျါတသ့ဘၣ်.
26 ယကဒုးစဲဘူးနပျ့ၤဒီး နခၣ်ခိၣ်ဒီး နကအိၣ်တအုၣ်ဒ်သိးနဟ့ၣ်ပလီၢ် ပှၤဂီၢ်မုၢ်လၢ အပူထီၣ်တၢ်တဖၣ်အံၤ အသုတသ့တဂ့ၤအဂီၢ်လီၤ.
27 အနၣ်ဝံၤဒီး, ဖဲယကတိၤကဒီးတၢ်ဒီးနၤ တဘျီဒီးဟ့ၣ်ကဒါက့ၤ နၤတၢ်သ့ကတိၤတၢ်န့ၣ်, နကတဲဘၣ်အဝဲသ့ၣ်တၢ်လၢယၤ,
ယွၤပၢဘၣ်တၢ်ခဲလၢာ်ကစၢ်စံးဝဲန့ၣ်လီၤ. အဝဲသ့ၣ်တနီၤကဒိကနၣ်
တၢ်, ဘၣ်ဆၣ် တကနၣ်ဃုာ်နၤဘၣ်. အဂ့ၢ်ဒ်အံၤ, အဝဲသ့ၣ်မ့ၢ်ပှၤပူထီၣ်
တၢ်ဖိတကလုာ်န့ၣ်လီၤ.”