30
1 ခဲအံၤယဟ့ၣ်လီၤသုတၢ်ဃုထၢတမံၤလၢတၢ်ဆိၣ်ဂ့ၤတမံၤဒီးတၢ် ဆိၣ်အၢတမံၤအဘၢၣ်စၢၤန့ၣ်လီၤ. တုၤကယဲၢ်တၢ်ခဲလၢာ်အံၤမၤအသးဒီးသု, ဒီးသုအိၣ်သုဆိးလၢပှၤကလုာ်တဖၣ်အကျါ, ဖဲယွၤ, သုကစၢ်ယွၤမၤလီၤပြံ လီၤပြါတ့ၢ်သုန့ၣ်, သုကသ့ၣ်နီၣ်ထီၣ်က့ၤတၢ်ဃုထၢလၢယဟ့ၣ်လီၤ တ့ၢ်သုန့ၣ်လီၤ.
2 သုဝဲဒီးသုစၢၤသုသွဲၣ်တဖၣ်, မ့ၢ်ဃၣ်က့ၤအသးဆူယွၤအအိၣ် ဒီး, စူၢ်အဝဲအတၢ်မၤလိာ်တဖၣ်လၢယဟ့ၣ်လီၤသုတနံၤအံၤလၢကယဲၢ်သု သူၣ်ဒီဖျၢၣ်သးဒီဖျၢၣ်ဒီး,
3 တုၤနုၤတစု, ယွၤ, သုကစၢ်ယွၤကအိၣ်ဒီးတၢ်သးကညီၤဘၣ်သုန့ၣ် လီၤ. အဝဲကဟဲက့ၤစိာ်က့ၤသုလၢ, ပှၤကလုာ်တဖၣ်ဖဲအဝဲမၤလီၤပြံလီၤပြါတ့ၢ်သုအကျါ, ဒီးအဝဲကဒုးဘီၣ်ထီၣ်ညီထီၣ်က့ၤကဒီးသုန့ၣ်လီၤ.
4 သုမ့ၢ်လီၤပြံလီၤပြါလၢဟီၣ်ခိၣ်အသနၢၣ်အယံၤကတၢၢ်တဖၣ်ဒၣ်လဲာ် န့ၣ်, ယွၤ, သုကစၢ်ယွၤကပာ်ဖှိၣ်က့ၤသုတပူၤဃီဒီးဟဲ က့ၤစိာ်ကဒါက့ၤသု,
5 ဒ်သိးသုကမၤန့ၢ်ကဒါက့ၤကဒီးထံကီၢ်အတၢ်န့ၢ်သါဖဲသု မိၢ်ပၢ်ဖံဖုလၢပျၢၤတဖၣ်အိၣ်ဆိးတ့ၢ်ဝဲတဘျီန့ၣ်လီၤ. ဒီးအဝဲကမၤဘီၣ်ထီၣ်ညီထီၣ်သုအါန့ၢ်ဒံးအလီၢ်တက့ၢ်, ဒီးမၤအါထီၣ်သုနီၣ်ဂံၢ်အါန့ၢ်ဒံးနီၣ်ဂံၢ်လၢအအိၣ်တ့ၢ်ဝဲ ဒီးသုမိၢ်ပၢ်ဖံဖုလၢပျၢၤတဖၣ်န့ၣ်လီၤ.
6 ယွၤ, သုကစၢ်ယွၤကဟ့ၣ်လီၤသုဝဲဒီးသုစၢၤသုသွဲၣ်တဖၣ်လၢ တၢ်စူၢ်တၢ်အကလုၢ်အသးတဖၣ်, ဒ်သိးသုကအဲၣ်အီၤလၢသုသးဒီဖျၢၣ်ညါဒီးသုကအိၣ်ဆိးထွဲဘၣ်ဒံးလၢ ထံကီၢ်န့ၣ်အပူၤန့ၣ်လီၤ.
7 အဝဲကဃၣ်ဃီၤကယဲၢ်တၢ်ဆိၣ်အၢတဖၣ်အံၤဆူသုဒုၣ်သုဒါတဖၣ်လၢအသးဟ့တ့ၢ်သု ဒီးမၤနၢၤမၤပ့ၤတ့ၢ်သုအအိၣ်,
8 ဒီးသုကစူၢ်က့ၤကဒီးအီၤဒီးတိၢ်န့ၢ်ဖံးဃာ်ကယဲၢ်အဝဲအတၢ်မၤလိာ်တဖၣ်လၢ ယဟ့ၣ်လီၤသုတနံၤအံၤန့ၣ်လီၤ.
9 ယွၤကမၤဘီၣ်ထီၣ်ညီထီၣ်သုလၢကယဲၢ်တၢ်လၢသုမၤအီၤအပူၤ, သုကအိၣ်ဒီးဖိတဖၣ်အါအါဂီၢ်ဂီၢ်ဒီးဆၣ်ဖိကီၢ်ဖိလၢသုဘုၣ်အီၤဂီၢ်မုၢ်ဂီၢ်ပၤ, ဒီးသုစံာ်ဧိၤပှဲၤဧိၤတဖၣ်ကဟ့ၣ်ထီၣ်တၤသူတၤသၣ်တဖၣ်အါအါကလဲာ်န့ၣ်လီၤ. အဝဲကသးခုဒုးဘီၣ်ထီၣ်ညီထီၣ်သုဒ်အမၤဘၣ်တ့ၢ်သုမိၢ်ပၢ်ဖံဖု လၢပျၢၤတဖၣ်အသိး,
10 ဘၣ်ဆၣ်သုကဘၣ်စူၢ်အီၤဒီးတိၢ်န့ၢ်ဖံးဃာ်ကယဲၢ်အဝဲအတၢ်ဘူၣ်တၢ် ဘါအတၢ်သိၣ်တၢ်သီတဖၣ်လၢအအိၣ်ကွဲးလီၤပာ်အသးလၢ အဝဲအတၢ်သိၣ်တၢ်သီတဖၣ်အလံာ်အံၤအပူၤန့ၣ်လီၤ. သုကဘၣ်ဃၣ်ဃီၤသုသးဆူအဝဲအအိၣ်လၢသုသးဒီဖျၢၣ်ညါန့ၣ်လီၤ.
11 တၢ်မၤလိာ်လၢယဟ့ၣ်လီၤသုတနံၤအံၤန့ၣ်, တမ့ၢ်ဘၣ်တၢ်လၢအကီကဲာ် ဆိးမ့ၢ်ဂ့ၤ, တၢ်လၢသုနၢ်ပၢၢ်တထီၣ်ဘးမ့ၢ်ဂ့ၤန့ၣ်ဘၣ်.
12 တၢ်န့ၣ်တအိၣ်ဘၣ်လၢမူကပိာ်လိၤဘၣ်. တလိၣ်လၢသုကဘၣ်သံကွၢ်, (မ့ၢ်မတၤကလဲၤထီၣ်ဆူထးခီဒီးဟဲက့ၤစိာ်လီၤန့ၢ်ပှၤဒ်သိး ပနၢ်ဟူအီၤဒီးစူၢ်အီၤကသ့လဲၣ်.) န့ၣ်ဘၣ်.
13 တအိၣ်စ့ၢ်ကီးဘၣ်လၢပီၣ်လဲၣ်အဝၢ်ဘးခီဘၣ်. တလိၣ်လၢသု ကဘၣ်သံကွၢ်, (မ့ၢ်မတၤကလဲၤခီဂာ်ပီၣ်လဲၣ်ဒီးဟဲက့ၤစိာ်န့ၢ် ပှၤဒ်သိးပကနၢ်ဟူဘၣ်အီၤဒီးစူၢ်အီၤကသ့လဲၣ်.) န့ၣ်ဘၣ်.
14 မ့မ့ၢ်, တၢ်န့ၣ်အိၣ်ဝဲဒီးသုဖဲအံၤလီၤ. သုသ့ၣ်ညါအီၤဒီး ယၢၤထီၣ်က့ၤအတၢ်ကွဲးအသးတဖၣ်ကသ့ဝဲလီၤ. လၢတၢ်န့ၣ်အဃိ, ခဲကနံၣ်အံၤစူၢ်အီၤတက့ၢ်.
15 တနံၤအံၤယဟ့ၣ်လီၤသုတၢ်ဃုထၢတမံၤလၢတၢ်ဂ့ၤဒီးတၢ်အၢအဘၢၣ် စၢၤ, လၢတၢ်မူဒီးတၢ်သံအဘၢၣ်စၢၤန့ၣ်လီၤ.
16 သုမ့ၢ်စူၢ်ယွၤ, သုကစၢ်ယွၤအတၢ်မၤလိာ်လၢယဟ့ၣ်လီၤသု တနံၤအံၤ, သုမ့ၢ်အဲၣ်အီၤ, စူၢ်အီၤ, ဒီးတိၢ်န့ၢ်ဖံးဃာ်ကယဲၢ် အဝဲအတၢ်ဘူၣ်တၢ်ဘါအတၢ်သိၣ်တၢ်သီတဖၣ်န့ၣ်ဒီး, အန့ၣ်တစုသုကဘီၣ်ထီၣ်ညီထီၣ်ဒီးကဲထီၣ်ပှၤဂီၢ်မုၢ်ဖးဒိၣ်အပှၤ ကလုာ်န့ၣ်လီၤ. ယွၤ, သုကစၢ်ယွၤကဆိၣ်ဂ့ၤသုလၢကီၢ်လၢသုကဘၣ်မၤန့ၢ်အီၤအပူၤ န့ၣ်လီၤ.
17 မ့မ့ၢ်သုမ့ၢ်တစူၢ်ဒီးဂ့ၢ်လိာ်လၢသုကဒိကနၣ်အီၤ, ဒီးဟးဖျိးကွံာ်လၢတၢ်ဘူၣ်ထီၣ်ဘါထီၣ်ကစၢ်အဂၤတဖၣ်ဒီး,
18 ယဟ့ၣ်ပလီၢ်သုဖဲအံၤဒီးခဲကနံၣ်အံၤလၢသုကဘၣ်တၢ်မၤဟးဂီၤ ကွံာ်သုန့ၣ်လီၤ. သုတအိၣ်ဆိးဘၣ်ယံာ်ယံာ်ထၢထၢလၢထံကျိ ယၢ်ဒ့ၣ်အဝၢ်ဘးခီကီၢ်တဘ့ၣ်လၢသုကဘၣ်မၤန့ၢ်အီၤအပူၤန့ၣ်ဘၣ်.
19 ခဲကနံၣ်အံၤယဟ့ၣ်လီၤသုတၢ်ဃုထၢလၢတၢ်မူဒီးတၢ်သံ အဘၢၣ်စၢၤဒီးကိးထီၣ်မူခိၣ်ဒီးဟီၣ်ခိၣ်လၢကကဲထီၣ်တၢ်အုၣ် အသးလၢတၢ်ဃုထၢလၢသုမၤအီၤအဂီၢ်န့ၣ်လီၤ. ဃုထၢတၢ်မူတက့ၢ်.
20 အဲၣ်ယွၤ, သုကစၢ်ယွၤ, စူၢ်အီၤဒီးအိၣ်ဒီးတၢ်သူၣ်တီသးရၤဒီး အီၤတက့ၢ်. အန့ၣ်ဒီးသုဝဲဒီးသုစၢၤသုသွဲၣ်တဖၣ်ကအိၣ်ကၢအိၣ်ခိးလၢကီၢ် န့ၣ်အပူၤ, လၢအဝဲအၢၣ်လီၤပာ်တ့ၢ်ဝဲလၢကဟ့ၣ်လီၤသုပၢ်ဖးဒိၣ်လၢပျၢၤ တဖၣ်လၢအမ့ၢ်စီၤအၤဘြၤဟၣ်, စီၤအံၤစဲးဒီးစီၤယၤကိာ်န့ၣ်လီၤ.