29
1 အအံၤမ့ၢ်တၢ်အၢၣ်လီၤအီလီၤအတၢ်ကတိၤတဖၣ်လၢယွၤမၤလိာ်စီၤ မိၤၡ့ဒ်သိးကမၤဝဲဒီးကီၢ်အံၣ်စရ့လးအပှၤဂီၢ်မုၢ်လၢကီၢ်မိၤ အးအပူၤန့ၣ်လီၤ. ကယဲၢ်တၢ်ခဲလၢာ်အံၤမ့ၢ်တၢ်ပာ်ဖှိၣ်အါထီၣ်ဆူတၢ်အၢၣ်လီၤအီ လီၤလၢယွၤမၤတ့ၢ်ဒီးအဝဲသ့ၣ်ဖဲ ကစၢၢ်စံၤနါအလိၤန့ၣ်လီၤ.
2 စီၤမိၤၡ့ကိးဖှိၣ်ဃီၤကယဲၢ်ကီၢ်အံၣ်စရ့လးအပှၤဂီၢ်မုၢ်ခဲ လၢာ်ဒီးစံးဘၣ်အဝဲသ့ၣ်, “တၢ်လၢယွၤမၤတ့ၢ်အီၤဆူကီၢ်အဲၤကူပတူးအစီၤပၤ, ဆူအပဒိၣ်ပပှၢ်တဖၣ်, ဒီးဆူအထံအကီၢ်ဒီတဘ့ၣ်ညါန့ၣ်, သုထံၣ်တ့ၢ်အီၤလၢသုနီၢ်ကစၢ်ဒၣ်ဝဲန့ၣ်လီၤ.
3 သုထံၣ်တ့ၢ်တၢ်ဆါသံသတြိာ်လီၤပျံၤလီၤဖုးတဖၣ်, တၢ်ပနီၣ်လီၤလးတဖၣ်ဒီးတၢ်လီၤကမၢကမၣ်ဖးဒိၣ်တဖၣ်လၢယွၤမၤတ့ၢ်ဝဲန့ၣ်လီၤ.
4 ဘၣ်ဆၣ်တုၤလီၤလၢမုၢ်မဆါတနံၤအံၤဒၣ်လဲာ်, အဝဲတပျဲဒံးသုနၢ်ပၢၢ်တၢ်လၢသုကထံၣ်ဘၣ်တ့ၢ်အီၤတဖၣ်န့ၣ်ဘၣ်.
5 လၢအနံၣ်လွံၢ်ဆံအတီၢ်ပူၤ, ယွၤဆှၢတ့ၢ်သုခီဖျိပှၢ်မုၢ်ကနၢ, ဒီးသုကူသုသိးဒီးသုခီၣ်ဖံးတဖၣ်တလီၢ်လံၤကွံာ်ဘၣ်.
6 ကိၣ်လၢသုကအီၣ်မ့ၢ်ဂ့ၤ, စပံးထံမ့တမ့ၢ်သံးလၢသုကအီမ့ၢ် ဂ့ၤတအိၣ်ဒီးသုဘၣ်. ဘၣ်ဆၣ်ယွၤမၤပှဲၤထီၣ်သုတၢ်လိၣ်တဖၣ်ဒ်သိးကသိၣ်လိသုလၢအဝဲ မ့ၢ်သုကစၢ်ယွၤအဂီၢ်န့ၣ်လီၤ.
7 ဒီးဖဲပဟဲတုၤဃီၤဆူတၢ်လီၢ်အံၤန့ၣ်, ကီၢ်ဃ့ၡဘိၣ်အစီၤပၤစံ ဃိၣ်ဒီးကီၢ်ဘၤၡၣ်အစီၤပၤဧိာ်ဟဲထီၣ်ဒ်သိးကဒုးတၢ်ထီဒါပှၤ န့ၣ်လီၤ. ဘၣ်ဆၣ်ပမၤနၢၤကွံာ်အဝဲသ့ၣ်,
8 ဟံးန့ၢ်ကွံာ်အဝဲသ့ၣ်အထံအကီၢ်, ဒီးနီၤဖးလီၤအီၤဆူဒူၣ် တဖၣ်လၢအမ့ၢ်ရူၤဘ့ၣ်အဒူၣ်, ကးအဒူၣ်ဒီးမနၤၡ့ၣ်အဒူၣ်တဝာ်အအိၣ်န့ၣ်လီၤ.
9 စူၢ်ကယဲၢ်တၢ်အၢၣ်လီၤအီလီၤအံၤအတၢ်ဂ့ၢ်တၢ်ကျိၤတဖၣ်လၢ တၢ်ပာ်လီၤအီၤန့ၣ်လၢတၢ်သူၣ်တီသးရၤအပူၤဒ်သိးသုကအိၣ်ဒီးတၢ်ကဲ ထီၣ်လိၣ်ထီၣ်လၢတၢ်ခဲလၢာ်လၢသုမၤအီၤအပူၤန့ၣ်တက့ၢ်.
10 တနံၤအံၤသုအိၣ်ဆၢထၢၣ်လၢယွၤ, သုကစၢ်ယွၤအမဲာ်ညါ, ကယဲၢ်သုဝဲခဲလၢာ်လၢအမ့ၢ်သုပှၤခိၣ်ပှၤနၢ်တဖၣ်ဒီးပဒိၣ်ပပှၢ်တဖၣ်, သုပှၤပိာ်ခွါတဖၣ်,
11 ပိာ်မုၣ်တဖၣ်ဒီးဖိသၣ်တဖၣ်, ဒီးပှၤတခီဘီမုၢ်ဖိတဖၣ်လၢအအိၣ် ဆိးလၢသုကျါ, လၢအကူာ်သ့ၣ်ဒီးစိာ်ထံလၢသုဂီၢ်တဖၣ်န့ၣ်လီၤ.
12 တနံၤအံၤသုအိၣ်ဖဲအံၤလၢသုကနုာ်လီၤဆူတၢ်အၢၣ်လီၤအီလီၤ အံၤလၢယွၤ, သုကစၢ်ယွၤမၤဝဲဒီးသုအပူၤဒီးလၢသုကတူၢ်လိာ်အတၢ်ဘျုးတၢ်ဖှိၣ်တဖၣ်အဂီၢ်,
13 ဒ်သိးခဲအံၤယွၤကပာ်ဂၢၢ်ပာ်ကျၢၤသုဒ်အဝဲအပှၤဂီၢ်မုၢ်အသိး ဒီးအဝဲကမ့ၢ်သုကစၢ်ယွၤ, ဒ်အဝဲအၢၣ်လီၤတ့ၢ်သုဒီးသုပၢ်ဖးဒိၣ်လၢပျၢၤတဖၣ်လၢအမ့ၢ် စီၤအၤဘြၤဟၣ်, စီၤအံၤစဲးဒီးစီၤယၤကိာ်အသိးန့ၣ်လီၤ.
14 တမ့ၢ်ဘၣ်ထဲသုဝဲဧိၤ, သုမ့ၢ်ပှၤတဖၣ်လၢယွၤမၤတၢ်အၢၣ်လီၤအီ လီၤအံၤဃုာ်ဒီးတၢ်လၢသုကဘၣ်မၤအီၤတဖၣ်န့ၣ်ဘၣ်.
15 အဝဲမၤတၢ်န့ၣ်ဒီးကယဲၢ်ပဝဲခဲလၢာ်လၢတနံၤအံၤဆၢထၢၣ်ဖဲအံၤ, လၢအဝဲအမဲာ်ညါဒီးမ့ၢ်စ့ၢ်ကီးလၢပစၢၤပသွဲၣ်တဖၣ်လၢတအိၣ် ဖျဲၣ်ထီၣ်ဒံးဘၣ်အဂီၢ်န့ၣ်လီၤ.
16 သုသ့ၣ်နီၣ်ထီၣ်လၢတၢ်အိၣ်မူလၢကီၢ်အဲၤကူပတူးအပူၤမ့ၢ်တၢ်ဒ်လဲၣ်, ဒီးတၢ်လဲၤတၢ်က့ၤခီဖျိပှၤကလုာ်ဂၤတဖၣ်အလီၢ်ကဝီၤမ့ၢ်တၢ်ဒ် လဲၣ်န့ၣ်လီၤ.
17 သုထံၣ်ဘၣ်တ့ၢ်အဝဲသ့ၣ်အတၢ်ဂီၤတၢ်ဖီၣ်လီၤသးဘၣ်အၢတဖၣ်လၢအဘၣ်တၢ်ဘှီအီၤလၢသ့ၣ်, လၢၢ်, စ့ဒီးထူန့ၣ်လီၤ.
18 မၤလီၤတံၢ်လၢ, တနံၤအံၤပှၤပိာ်ခွါမ့ၢ်ဂ့ၤ, ပှၤပိာ်မုၣ်မ့ၢ်ဂ့ၤ, ဟံၣ်ဖိဃီဖိမ့ၢ်ဂ့ၤ, ပှၤအဒူၣ်မ့ၢ်ဂ့ၤလၢအဆၢထၢၣ်ဖဲအံၤ, တဃၣ်ကွံာ်ဘၣ်အသးလၢယွၤ, ပကစၢ်ယွၤအအိၣ်နီတဂၤဒ်သိးကဘါထီၣ် ပှၤကလုာ်ဂၤတဖၣ်အတၢ်ဂီၤတၢ်ဖီၣ်တဖၣ်အဂီၢ်ဘၣ်န့ၣ်တက့ၢ်. တၢ်န့ၣ်ကလီၤဂာ်ဒ်တၢ်အဂံၢ်တဘိလၢအမဲထီၣ်ဒီးကကဲထီၣ်တၢ်အမုၢ် တမုၢ်လၢအခၣ်ဒီးအိၣ်ဒီးအစုၣ်အပျၢ်အသိးန့ၣ်လီၤ.
19 မၤလီၤတံၢ်လၢ, ဖဲအံၤ, တနံၤအံၤပှၤလၢအနၢ်ဟူတၢ်မၤလိာ်သမှံၤ သပှၢ်တဖၣ်ဒီးနာ်န့ၢ်လီၤဒံးအသးတုၤကစံးဝဲလၢမ့ၢ်လဲၤတၢ်လၢ အကျဲဒၣ်ဝဲအိၣ်ဒီးတၢ်ခိၣ်ကိၤဒၣ်လဲာ်န့ၣ်, တၢ်ကိးမံၤဒဲးကဘၣ်လီၢ်ဘၣ်စးဒီးအီၤလီၤန့ၣ်, တအိၣ်နီတဂၤဘၣ်တက့ၢ်. တၢ်န့ၣ်ကမၤဟးဂီၤကယဲၢ်သုဝဲခဲလၢာ်, ပှၤအဂ့ၤမ့ၢ်ဂ့ၤ, ပှၤအအၢမ့ၢ်ဂ့ၤဒ်သိးသိးန့ၣ်လီၤ.
20 ယွၤတပျၢ်ကွံာ်ပှၤဒ်န့ၣ်အသိးတဂၤအတၢ်ကမၣ်ဘၣ်, အခိၣ်တလိာ်, ယွၤအတၢ်သးကဲၤထီၣ်ကကဲၤကပျီၤထီၣ်ဘၣ်ထီဒါအီၤ, ဒီးကယဲၢ်တၢ်တတၢးတနါတဖၣ်လၢအအိၣ်ကွဲးအသးလၢလံာ်အံၤအပူၤ ကလီၤဘၣ်လၢအလိၤ, တုၤလၢယွၤမၤဟးဂီၤကွံာ်အီၤလၢာ်လၢာ်ဆ့ဆ့တစုန့ၣ်လီၤ.
21 ယွၤကဒုးကဲထီၣ်အီၤလၢတၢ်ဒိတၢ်တဲာ်တမံၤလၢကယဲၢ်အံၣ်စရ့လး အဒူၣ်တဖၣ်အမဲာ်ညါ, ဒီးကဟဲစိာ်တၢ်တတၢးတနါလၢအလိၤဃူဃီၣ်လီၤပလိာ်ဒီးတၢ်ဆိၣ်အၢတဖၣ်လၢဘၣ်တၢ်ယၢၤထီၣ်အီၤ အိၣ်ကွဲးလီၤပာ်အသးလၢတၢ်အၢၣ်လီၤအီလီၤလၢအအိၣ်လၢ ယွၤအတၢ်သိၣ်လိတဖၣ်အလံာ်အံၤအပူၤန့ၣ်လီၤ.
22 လၢစိၤလၢအကဟဲတဖၣ်အပူၤန့ၣ်, သုစၢၤသုသွဲၣ်တဖၣ်ဒီးပှၤတခီဘီမုၢ်ဖိတဖၣ်လၢထံကီၢ်အယံၤတဖၣ်, ကထံၣ်တၢ်တတၢးတနါတဖၣ်ဒီးတၢ်နးတၢ်ဖှီၣ်တဖၣ်လၢယွၤဒုးလီၤဘၣ် အီၤလၢသုထံသုကီၢ်အဖီခိၣ်န့ၣ်လီၤ.
23 စံာ်ဧိၤပှဲၤဧိၤတဖၣ်ကကဲထီၣ်တၢ်အိၣ်သယုၢ်အလီၢ်တပူၤ, ဘၣ်တၢ်ခဲဘၢအီၤလၢကးကမူၣ်ဒီးအံသၣ်န့ၣ်လီၤ. တၢ်တသူၣ်လီၤဖျးလီၤဘၣ်တၢ်နီတမံၤဒီးနီၣ်ဧိၤမံၤဧိၤဒၣ်လဲာ် တမဲထီၣ်ဘၣ်ဖဲန့ၣ်ဘၣ်. သုထံသုကီၢ်ကမၤအသးဒ်ဝ့ၢ်တဖၣ်လၢအမ့ၢ်စဒိၣ်ဂမိရၤ, အၤဒမၤဒီးစဘိအံးအသိးလၢယွၤမၤဟးဂီၤကွံာ်တ့ၢ်အီၤဖဲအဝဲ အသးဒိၣ်ကဲၤကပျီၤဝဲအခါန့ၣ်လီၤ.
24 အန့ၣ်ဒီး, ဟီၣ်ခိၣ်ဒီဘ့ၣ်ကသံကွၢ်ဝဲ, ယွၤမၤတၢ်ဒ်သိးအံၤဆူ အဝဲသ့ၣ်အထံအကီၢ်ဘၣ်မနုၤအဃိလဲၣ်. အဝဲအတၢ်သးဒိၣ်ကဲၤကပျီၤဝဲလၢတၢ်ဂ့ၢ်မနုၤအဃိလဲၣ်.
25 ဒီးတၢ်စံးဆၢကမ့ၢ်ဝဲ, တၢ်န့ၣ်မ့ၢ်လၢယွၤအပှၤဂီၢ်မုၢ်မၤဟးဂီၤကွံာ်တၢ်အၢၣ်လီၤအီလီၤဒီးအီၤ, ယွၤ, လၢအမ့ၢ်အဝဲသ့ၣ်အမိၢ်ပၢ်ဖံဖုလၢပျၢၤတဖၣ်အကစၢ်ယွၤဖဲ အဝဲထုးထီၣ်ကွံာ်အဝဲသ့ၣ်လၢကီၢ်အဲၤကူပတူးအခါအဃိန့ၣ်လီၤ.
26 အဝဲသ့ၣ်မၤတ့ၢ်ကစၢ်အဂၤတဖၣ်လၢအဝဲသ့ၣ်တဘါထီၣ်တ့ၢ်ဘၣ်လၢပျၢၤ နီတစုအတၢ်, ကစၢ်တဖၣ်လၢ, ယွၤတြီတ့ၢ်အဝဲသ့ၣ်လၢကဘူၣ်ထီၣ်ဘါထီၣ်ဝဲန့ၣ်လီၤ.
27 ဒီးလၢတၢ်န့ၣ်အဃိ, ယွၤသးဒိၣ်ထီၣ်ဘၣ်အပှၤဂီၢ်မုၢ်ဒီးဒုး လီၤဘၣ်ကယဲၢ်တၢ်တတၢးတနါတဖၣ်လၢအအိၣ်ကွဲးပာ် အသးလၢလံာ်အံၤအပူၤ, လၢအဝဲသ့ၣ်အထံအကီၢ်အလိၤန့ၣ်လီၤ.
28 ယွၤအတၢ်သးဒိၣ်ကဲၤထီၣ်တ့ၢ်ဝဲဒီးလၢအဝဲအတၢ်သးဒိၣ်ဖးဒိၣ် အပူၤန့ၣ်, အဝဲထဲးထီၣ်ကွံာ်တ့ၢ်အဝဲသ့ၣ်လၢအဝဲသ့ၣ်အထံအကီၢ်အပူၤ, ဒီးကွံာ်လီၤကွံာ်အဝဲသ့ၣ်ဆူထံကီၢ်အဂၤတဘ့ၣ်အပူၤ, ဒီးတနံၤအံၤအဝဲသ့ၣ်အိၣ်ဝဲဖဲန့ၣ်လီၤ.
29 တၢ်အိၣ်ဒံးဝဲအဂၤတနီၤလၢယွၤ, ပကစၢ်ယွၤပၢၤဃာ်ခူသူၣ်တ့ၢ်အီၤ, ဘၣ်ဆၣ်အဝဲလီၣ်ဖျါတ့ၢ်အဝဲအတၢ်သိၣ်တၢ်သီ, လၢပှၤယူဒၤဖိအဂီၢ်ဒီးပဝဲဒီးပစၢၤပသွဲၣ်တဖၣ်ပကဘၣ်စူၢ်အီၤ လီၤစိၤလီၤထီန့ၣ်လီၤ.