11
1 အဲၣ်ယွၤ, နကစၢ်ယွၤဒီးစူၢ်အဝဲအတၢ်ဘူၣ်တၢ်ဘါအတၢ်သိၣ်တၢ်သီ တဖၣ်ထီဘိတက့ၢ်.
2 တနံၤအံၤသ့ၣ်နီၣ်ထီၣ်တၢ်လၢသုမၤလိတ့ၢ်အီၤဘၣ်ဃးဒီးယွၤ, လၢသုတၢ်လဲၤခီဖျိဃုာ်ဒီးအီၤတဖၣ်အပူၤတက့ၢ်. တမ့ၢ်ဘၣ်သုဖိသုလံၤတဖၣ်ဘၣ်, မ့မ့ၢ်, မ့ၢ်သုဝဲပှၤအအိၣ်ဒီး တၢ်လဲၤခီဖျိတဖၣ်အံၤန့ၣ်လီၤ. သုထံၣ်ဘၣ်တ့ၢ်ယွၤအတၢ်ဒိၣ်တၢ်မုၢ်, အတၢ်စိတၢ်ကမီၤ, ဒီးအဂံၢ်ဆူၣ်ဘါဆူၣ်,
3 ဒီးအတၢ်မၤလီၤလးတဖၣ်န့ၣ်လီၤ. သုထံၣ်ဘၣ်တၢ်လၢအဝဲမၤဘၣ် တ့ၢ်ကီၢ်အဲၤကူပတူးအစီၤပၤဒီးအဝဲအဘီအမုၢ်ဒီဘ့ၣ်ညါန့ၣ်လီၤ.
4 သုထံၣ်ဘၣ်ယွၤတြူာ်ကွံာ်ကီၢ်အဲၤကူပတူးအသုးမုၢ်သံၣ်ဘိ လၢာ်လၢာ်ဆ့ဆ့ဃုာ်ဒီးအဝဲသ့ၣ်အကသ့ၣ်တဖၣ်, ဒီးလ့ၣ်ကဟၣ်ဒုးသုးတဖၣ်ဒ်လဲၣ်ဒ်လဲၣ်, ခီဖျိတၢ်မၤလီၤဘျၢ ကွံာ်အီၤလၢပီၣ်လဲၣ်ဂီၤအပူၤဖဲအဝဲသၣ်ဟဲလူၤထွဲသုအခါန့ၣ် လီၤ.
5 သုသ့ၣ်ညါလၢယွၤမၤတ့ၢ်တၢ်မနုၤလၢသုဂီၢ်လၢပှၢ်မုၢ်ကနၢအပူၤ တချုးလၢသုဟဲတုၤဒံးဖဲအံၤအကတီၢ်န့ၣ်လီၤ.
6 သုသ့ၣ်နီၣ်တၢ်လၢအဝဲမၤဘၣ်တ့ၢ်ပှၤရူၤဘ့ၣ်အဒူၣ်ဖိထၢဖိ စီၤအလံအာ်အဖိခွါစီၤဒၤသၣ်ဒီးစီၤအဘံရၣ်န့ၣ်လီၤ. လၢပှၤကိးဂၤဒဲးအမဲာ်ညါန့ၣ်ဟီၣ်ခိၣ်အိးထီၣ်အသးဒီးယူၢ်လီၤ ကွံာ်အဝဲသ့ၣ်ဃုာ်ဒီးအဟံၣ်ဖိဃီဖိတဖၣ်, အဒဲတဖၣ်, ဒီးကယဲၢ်အဝဲသ့ၣ်အခ့အပှၤအကုၢ်အပှၤတဖၣ်ဒီးအဆၣ်ဖိကီၢ်ဖိတဖၣ် န့ၣ်လီၤ.
7 မ့ၢ်လီၤ. သုမ့ၢ်ပှၤတဖၣ်လၢအထံၣ်ဘၣ်တ့ၢ်တၢ်မၤအဒိၣ်အမုၢ်တဖၣ် အံၤလၢယွၤမၤတ့ၢ်ဝဲန့ၣ်လီၤ.
8 စူၢ်ကယဲၢ်တၢ်တဖၣ်လၢယမၤလိာ်တ့ၢ်သုတနံၤအံၤန့ၣ်တက့ၢ်. အန့ၣ်တစုသုခီဂာ်ထံကျိကသ့ဝဲဒီးမၤန့ၢ်ဘၣ်ကီၢ်လၢဘူးထီၣ် လၢသုကလဲၤနုာ်လီၤဆူအပူၤန့ၣ်လီၤ.
9 ဒီးသုကအိၣ်မူဘၣ်ယံာ်ယံာ်ထၢထၢလၢကီၢ်တဘ့ၣ်လၢအထူးဝဲတီၤ ဝဲဒီးဟီၣ်ခိၣ်ညၣ်ထ့ၣ်ဂ့ၤဝဲအပူၤ, လၢယွၤအၢၣ်လီၤတ့ၢ်လၢအကဟ့ၣ်သုမိၢ်ပၢ်ဖံဖုလၢပျၢၤတဖၣ်ဒီး အဝဲသ့ၣ်အစၢၤအသွဲၣ်တဖၣ်န့ၣ်လီၤ.
10 ကီၢ်လၢသုကလဲၤမၤန့ၢ်အီၤန့ၣ်, တဒ်သိးဘၣ်ကီၢ်အဲၤကူပတူးဖဲ သုအိၣ်ဆိးတ့ၢ်လၢညါန့ၣ်ဘၣ်. လၢကီၢ်အဲၤကူပတူးန့ၣ်, တုၤသုဖှံလီၤတၢ်ချံဒီးသုကဘၣ်မၤ တၢ်ဆူၣ်ဆူၣ်လၢသုကမၤဘၣ်စီၣ်စံာ်ပျီတဖၣ်အဂီၢ်န့ၣ်လီၤ.
11 မ့မ့ၢ်, ကီၢ်လၢသုကလဲၤနုာ်လီၤဆူအပူၤန့ၣ်, မ့ၢ်ကီၢ်တဘ့ၣ်လၢအပှဲၤဒီးကစၢၢ်ကလိတဖၣ်ဒီးတၢ်တြီၤတဖၣ်, ကီၢ်တဘ့ၣ်လၢအဘၣ်တၢ်မၤဘၣ်စီၣ်အီၤလၢမူခိၣ်စူၤထံန့ၣ်လီၤ.
12 ယွၤ, သုကစၢ်ယွၤအံးထွဲကွၢ်ထွဲကီၢ်အံၤဒီးကွၢ်လီၤအီၤ စးထီၣ်လၢနံၣ်အခီၣ်ထံးတုၤလၢနံၣ်အကတၢၢ်န့ၣ်လီၤ.
13 ဒီးလၢတၢ်န့ၣ်အဃိ, စူၢ်တၢ်မၤလိာ်တဖၣ်လၢယဟ့ၣ်လီၤသုတနံၤအံၤတက့ၢ်. အဲၣ်ယွၤ, သုကစၢ်ယွၤဒီးမၤအတၢ်လၢသုသးဒီဖျၢၣ်ညါတက့ၢ်.
14 သုမ့ၢ်မၤဒီး, အဝဲကဆှၢလီၤတၢ်စူၤထံလၢကီၢ်အဖီခိၣ်ဖဲအလိၣ် ဘၣ်ဝဲအခါ, လၢတၢ်ယီၤထီၣ်သီအကတီၢ်ဒီးလၢတၢ်မဲထီၣ်သီ အကတီၢ်, ဒ်သိးဘုဧိၤဟုဧိၤ, စပံးထံဒီးသ့ၣ်စၤယံးအသိ ကအိၣ်ဝဲလၢသုဂီၢ်,
15 ဒီးတပံၢ်တမါလၢဆၣ်ဖိကီၢ်ဖိလၢသုဘုၣ်အီၤတဖၣ်အဂီၢ်န့ၣ်လီၤ. သုကအိၣ်ဒီးကယဲၢ်တၢ်အီၣ်တၢ်အီလၢသုအဲၣ်ဒိးအီၤန့ၣ်လီၤ.
16 ပျဲသုနီၢ်ကစၢ်ဒၣ်ဝဲဘၣ်တၢ်ဆှၢယံၤကွံာ်သုလၢယွၤအအိၣ်လၢတၢ် ဘူၣ်ထီၣ်ဘါထီၣ်ဒီးမၤကစၢ်အဂၤတဖၣ်အတၢ်အဂီၢ်တဂ့ၤ.
17 သုမ့ၢ်မၤအီၤဒီး, ယွၤကသးထီၣ်ဘၣ်သုန့ၣ်လီၤ. အဝဲကတြီဃာ်တၢ်စူၤအံၤ, ဒီးသုဟီၣ်ခိၣ်ကဃ့ထီကဲာ်ဆိးလၢတၢ် မုၢ်တၢ်ဘိတဖၣ်ကမဲထီၣ်အဂီၢ်န့ၣ်လီၤ. အန့ၣ်တစု, ကီၢ်န့ၣ်မ့မ့ၢ်ဒၣ်လဲာ်ကီၢ်အဂ့ၤတဘ့ၣ်လၢ အဝဲဟ့ၣ်လီၤသုဘၣ်ဆၣ်, တယံာ်ဘၣ်ဒီးသုကသံကွံာ်ဖဲန့ၣ်လီၤ.
18 သ့ၣ်နီၣ်ထီၣ်တၢ်မၤလိာ်တဖၣ်အံၤဒီးပာ်ဒိၣ်လီၤဆီအီၤတက့ၢ်. စၢဃာ်အီၤလၢသုစုတီၤတဖၣ်အလိၤဒီးဖျီၣ်ထီၣ်အီၤလၢသုခိၣ် တိသၣ်တဖၣ်အလိၤဒ်တၢ်ဒုးသ့ၣ်နီၣ်တမံၤအသိးန့ၣ်တက့ၢ်.
19 သိၣ်လိန့ၢ်သုဖိတဖၣ်တက့ၢ်. ကတိၤတၢ်လၢအဂ့ၢ်ဖဲ သုအိၣ်လၢဟံၣ်ဒီးဖဲသုလဲၤတၢ်က့ၤတၢ်, ဖဲသုအိၣ်ဘှံးအိၣ်သါ ဒီးဖဲသုဖံးတၢ်မၤတၢ်အခါန့ၣ်တက့ၢ်.
20 ကွဲးလီၤအီၤလၢသုဟံၣ်တဖၣ်အပဲတြီအထူၣ်တဖၣ်အလိၤဒီးလၢသုတြဲၤဖးဒိၣ်တဖၣ်အလိၤန့ၣ်တက့ၢ်.
21 အန့ၣ်တစု, သုဝဲဒီးသုဖိတဖၣ်ကအိၣ်ဆိးယံာ်ယံာ်ထၢထၢလၢကီၢ်န့ၣ်အပူၤ, လၢယွၤသုကစၢ်ယွၤအၢၣ်လီၤတ့ၢ်လၢကဟ့ၣ်လီၤသုမိၢ်ပၢ်ဖံဖုလၢ ပျၢၤတဖၣ်န့ၣ်လီၤ. သုကအိၣ်ဆိးဖဲန့ၣ်ယံာ်ဝဲထဲသိးမူကပိာ်လိၤအိၣ်ဝဲလၢဟီၣ်ခိၣ်အဖီခိၣ်န့ၣ်လီၤ.
22 စူၢ်ကယဲၢ်တၢ်ဘူၣ်တၢ်ဘါအတၢ်သိၣ်တၢ်သီတဖၣ်လၢယဟ့ၣ်လီၤတ့ၢ်သုန့ၣ် လၢတၢ်သူၣ်တီသးရၤအပူၤတက့ၢ်. အဲၣ်ယွၤသုကစၢ်ယွၤ, မၤတၢ်ကိးမံၤဒဲးလၢအဝဲမၤလိာ်ဝဲ, ဒီးအိၣ်ဒီးတၢ်သူၣ်တီသးရၤဒီးအီၤတက့ၢ်.
23 အန့ၣ်တစု, တုၤသုလဲၤထီၣ်ဒုးတၢ်ဒီး, အဝဲကဟီထီၣ်ကွံာ်ကယဲၢ် ပှၤကလုာ်တဖၣ်န့ၣ်ခဲလၢာ်, ဒီးသုကလဲၤနုာ်လီၤမၤန့ၢ်ကီၢ်န့ၣ်လၢအဘၣ်ဃးဒီးပှၤကလုာ်တဖၣ် လၢအဒိၣ်န့ၢ်သုဒီးအစိအကမီၤအါန့ၢ်သုတက့ၢ်န့ၣ်လီၤ.
24 ကယဲၢ်တၢ်လီၢ်လၢသုခီၣ်ယီၢ်လီၤလၢအဖီခိၣ်န့ၣ်ကမ့ၢ်သု တၢ်လီၤ. သုလီၢ်ကဝီၤကလဲၢ်ဝဲစးထီၣ်လၢပှၢ်မုၢ်ကနၢလၢကလံၤ ထံးတခီတုၤဆူကီၢ်လဘၤနိၣ်အကစၢၢ်ကလိတဖၣ်လၢကလံၤစိးတခီ, ဒီးစးထီၣ်လၢထံကျိဖရၤသးလၢမုၢ်ထီၣ်တခီတုၤဆူပီၣ်လဲၣ်ဖးဒိၣ်မဲးဒံးထၢၣ်ရ့နယၢၣ်လၢမုၢ်နုာ်တခီန့ၣ်လီၤ.
25 ဖဲသုလဲၤတၢ်တပူၤလၢ်လၢ်လၢကီၢ်ပူၤန့ၣ်, ယွၤ, သုကစၢ်ယွၤကဒုးပျံၤဘၣ်ဖုးဘၣ်ပှၤဂီၢ်မုၢ်လၢသု, ဒ်အဝဲအၢၣ်လီၤတ့ၢ်လံဝဲအသိး, ဒီးပှၤလၢအတြီသုသ့န့ၣ်တအိၣ်ဘၣ်နီတဂၤဘၣ်.
26 တနံၤအံၤယဟ့ၣ်လီၤသုလၢတၢ်ဃုထၢတမံၤလၢတၢ်ဆိၣ်ဂ့ၤဒီးတၢ် ဆိၣ်အၢအဘၢၣ်စၢၤန့ၣ်လီၤ.
27 သုမ့ၢ်စူၢ်ယွၤ, သုကစၢ်ယွၤအတၢ်မၤလိာ်တဖၣ်လၢယဟ့ၣ်လီၤသုတနံၤအံၤန့ၣ်, မ့ၢ်တၢ်ဆိၣ်ဂ့ၤတမံၤ,
28 မ့မ့ၢ်, သုမ့ၢ်တစူၢ်ဘၣ်တၢ်မၤလိာ်တဖၣ်အံၤဒီးဃၣ်ဃီၤသုသးဆူ ကစၢ်အဂၤတဖၣ်လၢသုကဘူၣ်ထီၣ်ဘါထီၣ်အီၤအအိၣ်လၢ သုတဘါထီၣ်ဘၣ်တ့ၢ်အီၤလၢညါနီတစုဘၣ်န့ၣ်, မ့ၢ်တၢ်ဆိၣ်အၢတမံၤန့ၣ်လီၤ.
29 တုၤယွၤဆှၢနုာ်သုဆူကီၢ်တဘ့ၣ်လၢသုကဘၣ်မၤန့ၢ်အီၤအပူၤန့ၣ်, သုကဘၣ်ဘိးဘၣ်သ့ၣ်ညါထီၣ်တၢ်ဆိၣ်ဂ့ၤလၢကစၢၢ်ကရံးစံၣ် အလိၤဒီးတၢ်ဆိၣ်အၢလၢကစၢၢ်ဧ့ၤဘါလးအလိၤန့ၣ်လီၤ.
30 (ကစၢၢ်ခံဖျၢၣ်အံၤအိၣ်ဝဲလၢထံကျိယၢ်ဒ့ၣ်, အမုၢ်နုာ်, ဖဲပှၤကနၤဧၣ်ဖိတဖၣ်လၢအအိၣ်ဆိးဖဲယၢ်ဒ့ၣ်အတြီၤပူၤ, အလီၢ်ကဝီၤပူၤန့ၣ်လီၤ. အဝဲသ့ၣ်အိၣ်ဝဲဒၣ်လၢမုၢ်နုာ်တကပၤ, တယံၤကဲာ်ဆိးဘၣ်ဒီးကီၢ်မိၤရံယၤအသ့ၣ်စီဆှံ တဖၣ်လၢအအိၣ်ဖဲဝ့ၢ်ကံးလကၤလးအကပၤဘၣ်န့ၣ်လီၤ.)
31 ဘူးထီၣ်လၢသုကလဲၤခီဂာ်ထံကျိယၢ်ဒ့ၣ်ဒီးမၤန့ၢ်ကီၢ်လၢ ယွၤ, သုကစၢ်ယွၤဟ့ၣ်လီၤသုန့ၣ်လံ. တုၤသုမၤန့ၢ်အီၤဒီးအိၣ်ဆိးဖဲန့ၣ်ဒီး,
32 မၤလီၤတံၢ်လၢသုကစူၢ်ကယဲၢ်တၢ်ဘူၣ်တၢ်ဘါအတၢ်သိၣ်တၢ်သီတဖၣ်လၢ ယဟ့ၣ်လီၤသုတနံၤအံၤန့ၣ်တက့ၢ်.