10
(ဟးထီၣ်.၃၄:၁-၁၀)
1 အန့ၣ်ဒီး, ယွၤစံးဘၣ်ယၤ, ကူးတဲာ်န့ၢ်လၢၢ်ဘ့ၣ်ဘၣ်ခံဘ့ၣ်ဒ်လၢ ညါတဖၣ်အသိးဒီးမၤန့ၢ်တလါစီဆှံသ့ၣ်တဖျၢၣ်လၢနကဒၢနုာ်အီၤ အဂီၢ်န့ၣ်တက့ၢ်. ဟဲထီၣ်ဆူယအိၣ်လၢကစၢၢ်ဒီခိၣ်,
2 ဒီးတၢ်လၢယကွဲးလီၤတ့ၢ်အီၤလၢလၢၢ်ဘ့ၣ်ဘၣ်တဖၣ်လၢန မၤသ့ၣ်ဖးအီၤအလိၤန့ၣ်ယကကွဲးလီၤအီၤလၢလၢၢ်ဘ့ၣ်ဘၣ်တဖၣ်အံၤ အလိၤဝံၤဒီးနကဘၣ်ဒၢနုာ်အီၤဆူတလါစီဆှံအပူၤန့ၣ်လီၤ.
3 လၢတၢ်န့ၣ်အဃိ, ယမၤန့ၢ်တလါစီဆှံတဖျၢၣ်လၢသ့ၣ်ဖှ့ၡံးတၤ ဒီးကူးတဲာ်လၢၢ်ဘ့ၣ်ဘၣ်ခံဘ့ၣ်ဒ်လၢအခီၣ်ထံးတဖၣ်အသိးဒီးလဲၤ စိာ်ထီၣ်အီၤဆူကစၢၢ်ဒီခိၣ်န့ၣ်လီၤ.
4 အန့ၣ်ဒီး, ယွၤကွဲးလီၤတၢ်လၢလၢၢ်ဘ့ၣ်ဘၣ်တဖၣ်န့ၣ်အလိၤ, တၢ်ကတိၤတဖၣ်တမံၤဃီဒ်အကွဲးတ့ၢ်ဝဲလၢအခီၣ်ထံးတဘျီ အသိး, လၢအမ့ၢ်ဝဲတၢ်မၤလိာ်အထံၣ်တဆံလၢအဟ့ၣ်လီၤတ့ၢ်သုဖဲ အကတိၤတၢ်လၢမ့ၣ်အူအကျါလၢမုၢ်တနံၤဖဲသုပာ်ဖှိၣ်ထီၣ်သုသး ဖဲကစၢၢ်အံၤန့ၣ်လီၤ. ယွၤဟ့ၣ်လီၤယၤလၢလၢၢ်ဘ့ၣ်ဘၣ်တဖၣ်န့ၣ်,
5 ဒီးယဃၣ်ကဒါက့ၤယသးဒီးဟဲက့ၤလီၤလၢကစၢၢ်လိၤန့ၣ်လီၤ. အန့ၣ်ဝံၤဒီး, ဒ်ယွၤမၤလိာ်တ့ၢ်ဝဲဒၣ်အသိး, ယဒၢနုာ်အီၤလၢတလါစီဆှံလၢယမၤတ့ၢ်အီၤအပူၤဒီးအဝဲသ့ၣ် အိၣ်ဖဲန့ၣ်စးထီၣ်လၢန့ၣ်လံၤလံၤလီၤ.
6 (ပှၤအံၣ်စရ့လးဖိတဖၣ်ဟးထီၣ်လၢတၢ်လီၢ်ဖဲထံပူၤတဖၣ်လၢအဘၣ် ဃးဒီးပှၤဝ့ၢ်ယၤကၣ်ဖိအိၣ်ဝဲဒီးလဲၤဝဲဆူဝ့ၢ်မိၤစ့ရၤန့ၣ် လီၤ. ဖဲန့ၣ်စီၤအၤဟရိၣ်သံဝဲဒီးဘၣ်တၢ်ခူၣ်လီၤကွံာ်အီၤဒီးအဝဲ အဖိခွါစီၤအလၤဧါစၢ်ကဲထီၣ်ပှၤလုၢ်တၢ်အခိၣ်လၢအဝဲအလီၢ်န့ၣ် လီၤ.
7 ဖဲန့ၣ်ဝံၤဒီး, အဝဲသ့ၣ်လဲၤဆူဝ့ၢ်ကူးဒကိၤဒၤ, ဝံၤဒီးလဲၤဆူညါဆူဝ့ၢ်ယးတဘၤသၤလၢအမ့ၢ်တၢ်လီၢ်တတီၤလၢ အစုၣ်စီၣ်ဂ့ၤမးန့ၣ်လီၤ.
8 ဖဲကစၢၢ်န့ၣ်, ယွၤဃုထၢပာ်လီၤပှၤတဖၣ်လၢလ့ၤဝံအဒူၣ်အပူၤဒ် သိးကဟံးန့ၢ်မူဒါလၢတၢ်အံးထွဲကွၢ်ထွဲတၢ်အၢၣ်လီၤအီလီၤ အတလါစီဆှံအဂီၢ်, လၢကမၤအတၢ်မၤဒ်ပှၤလုၢ်တၢ်အခိၣ်တဖၣ်ဒီးဒ်သိးအကကိးထီၣ်တၢ် ဆိၣ်ဂ့ၤလၢယွၤအမံၤအဂီၢ်န့ၣ်လီၤ. ဒီးတၢ်တဖၣ်အံၤမ့ၢ်ဒံးဒၣ်အဝဲသ့ၣ်အမူအဒါတဖၣ်န့ၣ်လီၤ.
9 တၢ်န့ၣ်မ့ၢ်ဝဲဘၣ်မနုၤအဃိပှၤလ့ၤဝံဖိတဖၣ်တန့ၢ်ဘၣ်ဟီၣ်ခိၣ် နီတတီၤဒ်ပှၤအဒူၣ်အဂၤတဖၣ်ဒိးန့ၢ်ဝဲအသိးအဂ့ၢ်န့ၣ်လီၤ. တၢ်လၢအဝဲသ့ၣ်ဒိးန့ၢ်ဘၣ်ဝဲန့ၣ်, မ့ၢ်တၢ်ခွဲးတၢ်ယာ်လၢအကဲ ဘၣ်ယွၤအပှၤလုၢ်တၢ်အခိၣ်တဖၣ်, ဒ်ယွၤ, သုကစၢ်ယွၤအၢၣ်လီၤတ့ၢ် ဝဲအသိးန့ၣ်လီၤ.)
10 ယအိၣ်လၢကစၢၢ်ဒီခိၣ်လၢအနံၤလွံၢ်ဆံဒီးအနၤလွံၢ်ဆံ အတီၢ်ပူၤ, ဒ်ယမၤတ့ၢ်အီၤလၢအခီၣ်ထံးတဘျီအသိးန့ၣ်လီၤ. ယွၤဒိကနၣ်ကဒီးယၤတဘျီ, ဒီးဘၣ်သူၣ်ဘၣ်သးလၢအတမၤဟးဂီၤ ကွံာ်သုဘၣ်န့ၣ်လီၤ.
11 အန့ၣ်ဝံၤဒီး, အဝဲတဲဘၣ်ယၤလၢယကလဲၤဒီးဆှၢသုဒ်သိးသုန့ၢ်ဘၣ်ကီၢ်လၢ အဝဲအၢၣ်လီၤတ့ၢ်ဝဲလၢအကဟ့ၣ်လီၤသု မိၢ်ပၢ်ဖံဖုလၢပျၢၤတဖၣ်ဒ်သုတၢ်ဒၣ်ဝဲအသိးကသ့အဂီၢ်န့ၣ်လီၤ.
12 ခဲကနံၣ်အံၤ, ကီၢ်အံၣ်စရ့လးအပှၤဂီၢ်မုၢ်သ့ၣ်ဧၢ, ဒိကနၣ်တၢ်လၢယွၤ, သုကစၢ်ယွၤဃ့ဝဲလၢသုအိၣ်န့ၣ်တက့ၢ်. အိၣ်ဒီးတၢ်ယူးယီၣ်ယွၤ, ဒီးမၤကယဲၢ်တၢ်လၢအဝဲမၤလိာ်ဝဲတဖၣ် န့ၣ်တက့ၢ်. အဲၣ်အီၤ, မၤအတၢ်မၤလၢသုသးဒီဖျၢၣ်ညါ,
13 ဒီးစူၢ်ကယဲၢ်အဝဲအတၢ်ဘူၣ်တၢ်ဘါအတၢ်သိၣ်တၢ်သီတဖၣ်တက့ၢ်. တနံၤအံၤယဟ့ၣ်လီၤသုလၢတၢ်တဖၣ်န့ၣ်, လၢသုတၢ်ဂ့ၤတၢ်ဘျုးအဂီၢ်လီၤ.
14 မူခိၣ်ဒီးအလီၢ်လၢအထီကတၢၢ်ဒၣ်လဲာ်ဘၣ်ဃးဒီးယွၤလီၤ. ဟီၣ်ခိၣ်ဒီးတၢ်လၢအအိၣ်လၢအပူၤကိးမံၤဒဲးန့ၣ်မ့ၢ်စ့ၢ်ကီးအဝဲအတၢ်န့ၣ်လီၤ.
15 မ့မ့ၢ်ယွၤအတၢ်အဲၣ်လၢသုမိၢ်ပၢ်ဖံဖုလၢပျၢၤတဖၣ်အဂီၢ်န့ၣ်, ဆူၣ်ဝဲဒိၣ်မးတုၤဒၣ်လဲာ်, အဝဲဒၣ်ဃုထၢသု, လၢပှၤဂီၢ်မုၢ်အဂုၤအဂၤတဖၣ်အလီၢ်န့ၣ်လီၤ. ဒီးသုမ့ၢ်ဒံးဒၣ်အဝဲအပှၤဂီၢ်မုၢ်လၢအဃုထၢဝဲန့ၣ်လီၤ.
16 ဒီးလၢတၢ်န့ၣ်အဃိ, စးထီၣ်ခဲအံၤဒီးဆူညါန့ၣ်ကဲထီၣ်ပှၤ စူၢ်ယွၤအကလုာ်ဒီးဆိကတီၢ်ကွံာ်သုတၢ်ခိၣ်ကိၤန့ၣ်တက့ၢ်.
17 ယွၤ, သုကစၢ်ယွၤန့ၣ်ဒိၣ်စိဝဲဒၣ်လၢကစၢ်အဂၤတဖၣ်ခဲလၢာ်ဒီး ကယဲၢ်တၢ်စိတၢ်ကမီၤခဲလၢာ်အဖီခိၣ်န့ၣ်လီၤ. အဝဲဒၣ်န့ၣ်ဒိၣ်ဝဲဒီးအဂံၢ်အဘါဆူၣ်ဝဲဒီးအဝဲကဘၣ်တၢ်ပျံၤအီၤန့ၣ်လီၤ. အဝဲတကွၢ်မဲာ်တၢ်ဘၣ်ဒီးတတူၢ်လိာ်ဘၣ်ခိၣ်ဖးလာ်ဆှိးန့ၣ်ဘၣ်.
18 အဝဲမၤလီၤတံၢ်ဝဲလၢဖိၣ်ဃဲတဖၣ်ဒီးမုၣ်ကမဲတဖၣ်ကဘၣ်တၢ်မၤ အီၤတီတီလိၤလိၤန့ၣ်လီၤ. အဝဲအဲၣ်ပှၤတခီဘီမုၢ်ဖိတဖၣ်လၢအအိၣ်ဆိးဝဲလၢပပှၤဂီၢ်မုၢ်အကျါ, ဒီးဟ့ၣ်လီၤအဝဲသ့ၣ်လၢတၢ်အီၣ်တၢ်အီဒီးတၢ်ကူတၢ်သိးတဖၣ်န့ၣ်လီၤ.
19 မၤသးဒ်န့ၣ်ဒီး, ဒုးနဲၣ်တၢ်အဲၣ်တၢ်ကွံလၢပှၤတခီဘီမုၢ်ဖိ တဖၣ်တက့ၢ်. အဂ့ၢ်ဒ်အံၤ, တဘျီန့ၣ်သုမ့ၢ်တ့ၢ်ပှၤတခီ ဘီမုၢ်ဖိတဖၣ်လၢကီၢ်အဲၤကူပတူးအပူၤလီၤ.
20 အိၣ်ဒီးတၢ်ယူးယီၣ်ယွၤ, သုကစၢ်ယွၤဒီးဘူၣ်ထီၣ်ဘါထီၣ်ထဲ အဝဲဒၣ်တဂၤဧိၤန့ၣ်တက့ၢ်. အိၣ်ဒီးတၢ်သူၣ်တီသးရၤဒီးအီၤဒီးမၤသုတၢ်အၢၣ်လီၤအီလီၤ တဖၣ်ထဲလၢအဝဲအမံၤအပူၤန့ၣ်တက့ၢ်.
21 စံးထီၣ်ပတြၢၤအီၤတက့ၢ်. အဝဲဒၣ်မ့ၢ်သုကစၢ်ယွၤ, ဒီးသုထံၣ်ဘၣ်တ့ၢ်လၢသုမဲာ်ချံတဖၣ်ဒၣ်သုဝဲ, လၢအမ့ၢ်, တၢ်တဖၣ်လၢအဒိၣ်ဒီးလီၤလးမးလၢအဝဲအမၤတ့ၢ်ဝဲလၢ သုဂီၢ်န့ၣ်လီၤ.
22 ဖဲသုမိၢ်ပၢ်ဖံဖုလၢပျၢၤတဖၣ်လဲၤဆူကီၢ်အဲၤကူပတူးန့ၣ်, အဝဲသ့ၣ်အိၣ်ဒၣ်ထဲပှၤအဂၤနွံဆံဧိၤလီၤ. မ့မ့ၢ်ခဲကနံၣ်အံၤ ယွၤ, သုကစၢ်ယွၤမၤအါထီၣ်တ့ၢ်သုအါအါကလဲာ်ဒ်ဆၣ်ဧိၤဖီဧိၤလၢ မူကပိာ်လိၤအသိးန့ၣ်လီၤ.