11
1 အဝဲအိၣ်မူ အိၣ်ဒါလၢ တၢ်မၤစၢၤယၤဒီး ဒီဒၣ်အိၣ်ပှိၤယၤအဂီၢ်ဒီးယနီၢ်ကစၢ်ဒၣ်ယဲ, လၢပှၤမၤဒဲဖိအစီၤပၤစီၤဒၤရယါဝ့ၣ်ပၢ တၢ်အခီၣ်ထံးတနံၣ်အပူၤန့ၣ်, ယဆၢထၢၣ်ခၢၣ်သနၢၣ်, လၢတၢ်မၤဂၢၢ် မၤကျၢၤဒီးတၢ်မၤဆူၣ်ထီၣ်အီၤန့ၣ်လီၤ.
2 ဒီးခဲအံၤယကဒုးနဲၣ်နၤလၢတၢ်မ့ၢ်တၢ်တီန့ၣ်လီၤ.”
“ကွၢ်ကွၢ်, စီၤပၤအဂၤသၢဂၤကဟဲအိၣ်ထီၣ်ဒံးလၢကီၢ်ပၤရၣ်အပူၤ, ဒီးလွံၢ်ဂၤတဂၤန့ၣ်ကထူးတီၤဝဲအါန့ၢ်ဒံးအဝဲသ့ၣ်ခဲလၢာ်လီၤ. ဒီးဖဲအဂံၢ်အဘါဆူၣ်ထီၣ်ခီဖျိအတၢ်ထူးတၢ်တီၤန့ၣ်, ကတၤလိာ်အသးဒီးကြံး(စ်)အဘီအမုၢ်န့ၣ်လီၤ.
3 အန့ၣ်ဒီးစီၤပၤလၢအဂံၢ်အဘါဆူၣ်ဖးဒိၣ်တဂၤကပၢၢ်ထီၣ်ဝဲ, ဒီးကပၢတၢ်လၢဘီမုၢ်ဖးဒိၣ်တဘ့ၣ်အဖီခိၣ်, ဒီးမၤဖဲဒၣ်အသး န့ၣ်လီၤ.
4 ဘၣ်ဆၣ်ဒီးဖဲအတုၤလၢအစိဒိၣ်ကမီၤထီအကတၢၢ်န့ၣ် အဘီအမုၢ်ကလီၤပှီၢ်ဝဲဒီးနီၤဖးအသးလွံၢ်ခီလီၤ. စီၤပၤတဖၣ်လၢတမ့ၢ် ဘၣ်အစၢၤအသွဲၣ်န့ၣ်ကပၢတၢ်လၢအလီၢ်လီၤ. ဘၣ်ဆၣ်ဒီးအဝဲသ့ၣ်တမ့ၢ်လၢကအိၣ်ဒီးတၢ်စိတၢ်ကမီၤဒ်သိး အီၤဘၣ်.
5 ကီၢ်အဲၤကူပတူးအစီၤပၤအဂံၢ်အဘါကဆူၣ်ထီၣ်ဝဲဒီးအသုးခိၣ် ကျၢၢ်တဖၣ်အကျါတဂၤကဆူၣ်န့ၢ်ဒံးအီၤဒီးပၢဘၣ်ဘီမုၢ်ဒိၣ်န့ၢ်အီၤ တက့ၢ်လီၤ.
6 တဘျုးနံၣ်အလီၢ်ခံန့ၣ်, ကီၢ်အဲၤကူပတူးအစီၤပၤကဒီသိၣ် ဒီမှံၤလိာ်သးဒီးကီၢ်စူၤရံအစီၤပၤ, ဒီးဖျီဃုာ်အီၤလၢ အဖိမုၣ်လီၤ. ဘၣ်ဆၣ်ဒီးတၢ်ဒီသိၣ်ဒီမှံၤလိာ်သးအံၤတဂၢၢ် တကျၢၤဘၣ်. အနီၢ်ကစၢ်ဒၣ်ဝဲ, အဝၤဒီးအဖိ, ဒီးအကုၢ်အပှၤလၢအလဲၤ ဃုာ်ဒီးအီၤတဖၣ်န့ၣ်ကဘၣ်တၢ်မၤသံကွံာ်အီၤခဲလၢာ်လီၤ.
7 တယံာ်ဘၣ်ဒီးအဘူးအတံၢ်အကျါတဂၤကကဲထီၣ်စီၤပၤလီၤ. အဝဲကဒုးတၢ်ထီဒါကီၢ်စူၤရံအစီၤပၤ, နုာ်လီၤဆူအတိာ်ပူၤ ဒီးမၤဃၣ်ကွံာ်အီၤလီၤ.
8 ကဟဲစိာ်ကဒါက့ၤဝဲအကစၢ်တဖၣ်အက့ၢ်အဂီၤတဖၣ်, ထူဒီးစ့အပီးအလီတဖၣ်လၢတၢ်လုၢ်ထီၣ်တ့ၢ်အီၤဆူအကစၢ် တဖၣ်န့ၣ်, ဆူကီၢ်အဲၤကူပတူးလီၤ. ဒီးလၢတၢ်ဃူတၢ်မုာ်အိၣ်ဝဲတဘျုးနံၣ်အလီၢ်ခံ
9 ကီၢ်စူၤရံအစီၤပၤကနုာ်လီၤဒုးကီၢ်အဲၤကူပတူးလီၤ. ဘၣ်ဆၣ်ဒီးကဘၣ်တၢ်မၤဆူၣ်မၤနၢၤအီၤဒ်သိးကဂုၤက့ၤအလီၢ်ခံလီၤ.
10 ဒီးကီၢ်စူၤရံအစီၤပၤအဖိခွါတဖၣ်န့ၣ်ကကတဲာ်ကတီၤအသးလၢ တၢ်ဒုးသုးအဂီၢ်ဒီးပာ်ဖှိၣ်ထီၣ်အသုးမုၢ်တဖုလီၤ. လၢအကျါတဂၤန့ၣ် ကတြုာ်ကွံာ်တၢ်ဒ်ထံအါလုၣ်ဘၢတၢ် အသိးဒီးဒုးတၢ်ထီဒါဒုၣ်ဒါအတိာ်တဖျၢၣ်န့ၣ်လီၤ.
11 ဒီးလၢတၢ်သးဒိၣ်အပူၤကီၢ်အဲၤကူပတူးအစီၤပၤကလဲၤဒုးတၢ် ထီဒါကီၢ်စူၤရံအစီၤပၤဒီးဖီၣ်န့ၢ်အသုးမုၢ်ဖးဒိၣ်န့ၣ်လီၤ.
12 ဒီးဖဲအမၤန့ၢ်ဒုၣ်ဒါအသုးမုၢ်ဖးဒိၣ်န့ၣ်အသးကထီၣ်ထီဝဲလၢ အတၢ်မၤနၢၤအဃိဒီးမၤသံကွံာ်ပှၤအကလးသ့ၣ်တဖၣ်လီၤ. ဘၣ်ဆၣ်ဒီးတမၤနၢၤတၢ်ဆူညါလၢၤဘၣ်.
13 ကီၢ်စူၤရံအစီၤပၤကဒုးအိၣ်ထီၣ်ကဒီးသုးမုၢ်ဒိၣ်န့ၢ်အခီၣ်ထံး တဖုလၢအအိၣ်တ့ၢ်ဒီးအီၤန့ၣ်လီၤ. တဘျုးနံၣ်အလီၢ်ခံန့ၣ်, အဝဲကဟဲထီၣ်ကဒီးဝဲလၢသုးမုၢ်ဖး ဒိၣ်တဖုအိၣ်ဒီးတၢ်စုကဝဲၤအလၢအပှဲၤန့ၣ်လီၤ.
14 တုၤနုၤတစုပှၤအါဂၤကပၢၢ်ဆၢထီဒါကီၢ်အဲၤကူပတူးအစီၤပၤလီၤ. စီၤဒၤနံးယ့လးဧၢ, ပှၤမၤအၢမၤသီတၢ်တနီၤလၢနထံနကီၢ်အပူၤ, အဝဲသ့ၣ်ကဆၢထၢၣ်ပၢၢ်ဆၢတၢ်လၢအတၢ်ထံၣ်စိတမံၤအဃိ, ဘၣ်ဆၣ်ဒီးကဘၣ်တၢ်မၤဃၣ်ကွံာ်အီၤန့ၣ်လီၤ.
15 မၤသးဒ်န့ၣ်ဒီးကီၢ်စူၤရံအစီၤပၤကမၤထီၣ်ထီဟီၣ်ခိၣ်လၢတိာ်ခၢၣ် သနၢၣ်အဝ့ၢ်တဖျၢၣ်အခိၣ်ဒူအဃၢၤဒီးမၤန့ၢ်မၤနၢၤအီၤလီၤ. ကီၢ်အဲၤကူပတူးအသုးဖိတဖၣ်အဂံၢ်အဘါကလီၤစၢ်လၢကဒုး တၢ်ဆူညါအဂီၢ်ဒီးပှၤအဆူၣ်ကတၢၢ်လၢအကျါဒၣ်လဲာ်အဂံၢ် အဘါတအိၣ်လၢၤလၢလၢလီၣ်လီၣ်ဘၣ်န့ၣ်လီၤ.
16 မ့မ့ၢ်ကီၢ်စူၤရံအသုးမုၢ်တဖၣ်ကမၤအီၤဖဲဒၣ်အသးအိၣ်မၤဝဲဒီး ပှၤကတြီဆၢအီၤတအိၣ်ဘၣ်နီတဂၤဘၣ်. ကဆၢထၢၣ်လၢ ကီၢ်တၢ်စံးပာ်အပူၤဒီးတၢ်ခဲလၢာ်ကအိၣ်လၢအစိကမီၤအဖီလာ် လၢာ်လၢာ်ဆ့ဆ့လီၤ.
17 ကီၢ်စူၤရံအစီၤပၤကကူၣ်ထီၣ်တၢ်ကျဲၤဖးဒိၣ်တမံၤခီဖျိအသုးမုၢ်အဂံၢ် အဘါခဲလၢာ်လၢအဘီအမုၢ်အပူၤတမံၤန့ၣ်လီၤ. ဒီးလၢတၢ်မၤဟးဂီၤကွံာ်အဒုၣ်အဒါအဘီမုၢ်အဂီၢ်န့ၣ်ကဒုးအိၣ် ထီၣ်တၢ်ဒီသိၣ်ဒီမှံၤလိာ်သးဒီးအီၤဒီးဟ့ၣ်အီၤလၢအပှၤပိာ်မုၣ် သးစၢ်တဂၤလၢကဖျီဃုာ်အသးဒီးအီၤန့ၣ်လီၤ. ဘၣ်ဆၣ်ဒီးအတၢ်ကူၣ်တၢ်ကျဲၤအံၤတကဲထီၣ်လိၣ်ထီၣ်ဘၣ်.
18 တၢ်န့ၣ်အလီၢ်ခံကလဲၤဒုးဝဲထံကီၢ်တဖၣ်လၢပီၣ်လဲၣ်အနံၤဒီး မၤန့ၢ်ဝဲတဘျုးကီၢ်န့ၣ်လီၤ. ဘၣ်ဆၣ်ဒီးသုးခိၣ်လၢတခီထံ တခီကီၢ်တဂၤကမၤဃၣ်ကွံာ်အီၤဒီးကဆိကတီၢ်ကွံာ်အတၢ်ပာ် ဒိၣ်ပာ်ထီအသးန့ၣ်လီၤ. ဒီးဃါမနၤန့ၣ်, ကီၢ်စူၤရံအစီၤပၤကဒိးဘၣ်အတၢ် ပာ်ဒိၣ်ပာ်ထီအသးအဘူးအလဲန့ၣ်လီၤ.
19 ဒီးကက့ၤကဒါက့ၤဆူတိာ်တဖၣ်လၢအကီၢ်ဒၣ်ဝဲအပူၤ, ဘၣ်ဆၣ်ဒီးကဘၣ်တၢ်မၤနၢၤကွံာ်အီၤဒီးတၢ်န့ၣ်ကမ့ၢ်အတၢ် ကတၢၢ်န့ၣ်လီၤ.
20 အန့ၣ်ဝံၤဒီး, စီၤပၤအဂၤတဂၤကထီၣ်ဝဲလၢအလီၢ်လီၤ. အဝဲဒၣ်န့ၣ်ကဆှၢလီၤပှၤဃ့သွဲတဂၤဒ်သိးကမၤအါထီၣ် အဘီအမုၢ်အတၢ်ထူးတၢ်တီၤန့ၣ်လီၤ. လၢစှၤနံၤစှၤသီအတီၢ်ပူၤ စီၤပၤန့ၣ်ကဘၣ်တၢ်မၤသံကွံာ်အီၤလီၤ. ဘၣ်ဆၣ်ဒီးတမ့ၢ်ဘၣ် လၢကမျၢၢ်အကျါမ့ၢ်ဂ့ၤလၢတၢ်ဒုးတၢ်ယၤအပူၤမ့ၢ်ဂ့ၤန့ၣ်ဘၣ်.”
21 ဒီးမူခိၣ်ကလူးကတိၤတၢ်ဆူညါဒီးတဲဖျါထီၣ်ဝဲ, “ကီၢ်စူၤရံအစီၤပၤဆူညါတဂၤကမ့ၢ်ဝဲပှၤအၢပှၤသီတဂၤ, လၢပှၤဂီၢ်မုၢ်တပာ်ကဲဘၣ်အီၤဒီးတဟ့ၣ်အီၤအလီၢ်ဒ်စီၤလိၣ်စီၤပၤတဂၤ အသိးဘၣ်န့ၣ်လီၤ. မ့မ့ၢ်ကဟဲထီၣ်ဝဲသတူၢ်ကလာ်ခီဖျိ တၢ်ကတိၤဘျ့လၢအလီန့ၢ်ပှၤအသးဒီးဟံးန့ၢ်ဆူၣ်တၢ်စိကမီၤန့ၣ်လီၤ.
22 ပှၤတဂၤလၢ်လၢ်လၢအထီဒါအီၤ, ကစၢ်ယွၤအပှၤလုၢ်တၢ် အခိၣ်အဒိၣ်ဒၣ်လဲာ်ကဘၣ်တၢ်တၢၤကွံာ်အီၤန့ၣ်လီၤ.
23 ခီဖျိတၢ်မၤတၢ်ဒီသိၣ်ဒီမှံၤလိာ်သးန့ၣ်ကမၤဝဲလၢတၢ်ကဘျံး အဘျၣ်အပူၤဒီးပှၤအိၣ်ဒီးအီၤမ့ၢ်ထဲစှၤဂၤဘၣ်ဆၣ်အဂံၢ်အဘါ ကဆူၣ်ထီၣ်ဝဲပှီၢ်ပှီၢ်လီၤ.
24 ကဟဲနုာ်ဒုးကီၢ်ဖိတဘ့ၣ်လၢအထူးတီၤဒိၣ်မးန့ၣ်သတူၢ်ကလာ် ဒီးကမၤတၢ်တဖၣ်လၢအမိၢ်ပၢ်ဖံဖုလၢပျၢၤတဖၣ်တမၤတ့ၢ်ဝဲ နီတဂၤဘၣ်န့ၣ်လီၤ. ဒီးကနီၤဟ့ၣ်တၢ်စုလီၢ်ခီၣ်ခိၣ်ဒီးတၢ်ထူး တၢ်တီၤတဖၣ်လၢအမၤန့ၢ်ဆူၣ်ဝဲလၢတၢ်ဒုးတၢ်ယၤ အပူၤဆူပှၤပိာ်အခံတဖၣ်အကျါလီၤ. အဝဲကကူၣ်ထီၣ်ဖးလီၤ တၢ်လၢကဒုးန့ၢ်တိာ်ဧိၤတာ်ဧိၤတဖၣ်အဂီၢ်လီၤ. ဘၣ်ဆၣ်ဒီးအမုၢ်နံၤကလၢာ်ကွံာ်ဝဲချ့သဒံးလီၤ.
25 အဝဲကလိာ်ဒူအသးဒီးမၤအိၣ်ထီၣ်သုးမုၢ်ဖးဒိၣ်တဖုလၢက ဒုးတၢ်ထီဒါကီၢ်အဲၤကူပတူးအစီၤပၤအဂီၢ်န့ၣ်လီၤ. ဒီးကီၢ်အဲၤကူပတူးအစီၤပၤကကတဲာ်ကတီၤအသးဒီးထီဒါ ဆၢက့ၤအီၤလၢသုးမုၢ်ဒိၣ်န့ၢ်ဆူၣ်န့ၢ်အီၤဖးဒိၣ်တဖုလီၤ. ဘၣ်ဆၣ်ဒီးကီၢ်အဲၤကူပတူးအစီၤပၤကဘၣ်တၢ်လီန့ၢ်အီၤ ဒီးတမၤနၢၤတၢ်ဘၣ်.
26 အပှၤကူၣ်လိာ်တၢ်အဘူးကတၢၢ်ဒီးအီၤတဖၣ်ကမၤဟးဂီၤအီၤ, ဒီးအသုးဖိအါဂၤကဘၣ်တၢ်မၤသံကွံာ်အီၤဒီးအသုးမုၢ်ကဘၣ် တၢ်မၤဟးဂီၤကွံာ်အီၤလၢာ်လၢာ်ဆ့ဆ့န့ၣ်လီၤ.
27 ဒီးစီၤပၤခံဂၤန့ၣ်ကဆ့ၣ်နီၤလၢစီၢ်နီၤခိၣ်တဖျၢၣ်ဃီဒီးအီၣ်သကိးတၢ်လီၤ. မ့မ့ၢ်အတၢ်တိာ်သူၣ်ပာ်သးတဖၣ်ကမ့ၢ်တၢ်အၢတၢ်သီ, ဒီးကလီလိာ်အသးတဂၤဒီးတဂၤန့ၣ်လီၤ. ဘၣ်ဆၣ်ဒီးတဒိးန့ၢ်ဘၣ်ဝဲတၢ် လၢအသးလီတဖၣ်န့ၣ်ဘၣ်. အဂ့ၢ်ဒ်အံၤ, တၢ်ဆၢကတီၢ် လၢအဝဲန့ၣ်အဂီၢ်တဟဲတုၤဒံးဘၣ်ဝဲဘၣ်.
28 ဒီးကီၢ်စူၤရံအစီၤပၤကက့ၤကဒါက့ၤဆူအကီၢ်ဒၣ်ဝဲအပူၤဃုာ်ဒီး တၢ်လၢအဂုာ်န့ၢ်ဝဲတဖၣ်လီၤ. အဝဲပာ်လီၤအသးလၢကမၤ ဟးဂီၤကစၢ်ယွၤအပှၤဂီၢ်မုၢ်အတၢ်ဘူၣ်တၢ်ဘါလီၤ. ဒီးကမၤဝဲဒ်အသးအိၣ်မၤဝဲအသိးဒီးကက့ၤကဒါက့ၤဆူ အကီၢ်ဒၣ်ဝဲန့ၣ်လီၤ.
29 တုၤတၢ်ဆၢကတီၢ်လၢကစၢ်ယွၤတိာ်ပာ်ထီၣ်ဘးဝဲန့ၣ်အဝဲကဟဲ က့ၤကဒီးဆူကီၢ်အဲၤကူပတူးန့ၣ်လီၤ. ဘၣ်ဆၣ်ဒီးအအံၤတစု တၢ်တမၤလၢၤဘၣ်အသးဒ်အမၤတ့ၢ်အသးလၢညါတဘျီ အသိးန့ၣ်လၢၤဘၣ်.
30 ပှၤရိမ့ၤဖိတဖၣ်ကဟဲလၢကဘီတဖၣ်အပူၤဒီးကထီဒါအီၤ ဒီးအဝဲကပျံၤတၢ်ဖုးတၢ်လီၤ. အန့ၣ်ဒီးအဝဲကဃၣ်ကဒါက့ၤ အသးလၢတၢ်သူၣ်ဒိၣ်သးဖျိးအပူၤဒီးကကျဲးစၢးဒ်သိးကမၤ ဟးဂီၤကွံာ်ကစၢ်ယွၤအပှၤဂီၢ်မုၢ်အတၢ်ဘူၣ်တၢ်ဘါန့ၣ်လီၤ. အဝဲကပိာ်ထွဲပှၤလၢအပာ်တ့ၢ်ညိကွံာ်တၢ်ဘူၣ်တၢ်ဘါအဝဲန့ၣ်တဖၣ် အတၢ်ဟ့ၣ်ကူၣ်ဟ့ၣ်ဖးန့ၣ်လီၤ.
31 အပှၤသုးဖိတနီၤကမၤဘၣ်အၢတၢ်လုၢ်ဟံၣ်ဒီးတၢ်ဘူၣ်တၢ်ဘါအလုၢ်အလၢ်လီၤ. ကဆိကတီၢ်ကွံာ်တၢ်လုၢ်တၢ်ပာ်ကိးနံၤဒဲး ဒီးပာ်ထီၣ်တၢ်လီၤပျံၤလီၤဖုးလၢအလီၤသး ဘၣ်အၢဒိၣ်ဒိၣ်ကလဲာ်လၢတၢ်လုၢ်လီၢ်အဖီခိၣ်န့ၣ်လီၤ.
32 လၢတၢ်လီတၢ်ဝ့ၤန့ၣ်စီၤပၤကထုးန့ၢ်ပှၤတဖၣ်လၢအပာ်တ့ၢ်ညိ ကွံာ်လံအတၢ်ဘူၣ်တၢ်ဘါအတၢ်ဆီၣ်ထွဲအီၤန့ၣ်လီၤ. ဘၣ်ဆၣ်ဒီးပှၤတဖၣ်လၢအပိာ်ကစၢ်ယွၤအကျဲန့ၣ်ကဒုးဆၢက့ၤ တၢ်လီၤ.
33 ဒီးပှၤခိၣ်ပှၤနၢ်လၢအကူၣ်သ့ကူၣ်ဘၣ်တဖၣ်လၢပှၤဂီၢ်မုၢ်အကျါန့ၣ် ကဟ့ၣ်နီၤလီၤအတၢ်ကူၣ်ဘၣ်ကူၣ်သ့ဆူပှၤအါဂၤလီၤ. ပှၤတနီၤလၢအဝဲသ့ၣ်အကျါကဘၣ်တၢ်မၤသံအီၤလၢတၢ်ဒုး တၢ်ယၤအပူၤမ့တမ့ၢ်ကဘၣ်တၢ်ဆူးကဲၤသံအီၤလၢမ့ၣ်အူဒီး တနီၤကဘၣ်တၢ်ဂုာ်ဆူၣ်ပျီဆူၣ်အီၤဒီးဒုးကဲထီၣ်အီၤလၢပှၤဘၣ် တၢ်စၢဃာ်တဖၣ်လီၤ. ဘၣ်ဆၣ်ဒီးကမ့ၢ်ဝဲစှၤနံၤစှၤသီလီၤ.
34 ဖဲတၢ်မၤသံမၤဝီတၢ်အိၣ်ဒံးဝဲအဖၢမုၢ်န့ၣ်ကစၢ်ယွၤအပှၤဂီၢ်မုၢ် ကဒိးန့ၢ်တၢ်မၤစၢၤတဆံးတက့ၢ်န့ၣ်လီၤ. ဒီးပှၤအါဂၤကဒုးဘၣ်ထွဲ အသးဒီးအဝဲသ့ၣ်လၢတၢ်ကတိၤဘျ့လၢအလီန့ၢ်တၢ်အပူၤန့ၣ်လီၤ.
35 ပှၤခိၣ်ပှၤနၢ်လၢအကူၣ်သ့ကူၣ်ဘၣ်တနီၤကဘၣ်တၢ်မၤသံကွံာ်အီၤ, ဘၣ်ဆၣ်ဒီးလၢတၢ်အံၤအဃိပှၤဂီၢ်မုၢ်ကဘၣ်တၢ်မၤကဆှီအီၤလီၤ. တၢ်အံၤကမၤအသးတုၤတၢ်အကတၢၢ်တုၤဝဲ, တၢ်အကတီၢ်လၢ ကစၢ်ယွၤပာ်လီၤဝဲန့ၣ်လီၤ.
36 ကီၢ်စူၤရံအစီၤပၤကမၤတၢ်ဒ်အသးအိၣ်မၤဝဲအသိးလီၤ. ကကတိၤတၢ်ကဖၢလၢ, ဒီးစံးဝဲလၢအဝဲမ့ၢ်ပှၤဒိၣ်န့ၢ်ကစၢ်တဂၤလၢ် လၢ်, ဒီးဒိၣ်န့ၢ်ဒံးတၢ်ထီကတၢၢ်ကစၢ်ယွၤဒၣ်လဲာ်န့ၣ်လီၤ. မၤတၢ်အံၤကသ့ဝဲတုၤတၢ်အကတီၢ်ဖဲကစၢ်ယွၤစံၣ်ညီၣ်အီၤန့ၣ် လီၤ. ကစၢ်ယွၤကမၤတၢ်လီၤတံၢ်လီၤဆဲးဒ်တၢ်လၢအကူၣ် ပာ်တ့ၢ်ဝဲအသိးလီၤ.
37 စီၤပၤန့ၣ်တကနၣ်ဃုာ်ပာ်ကဲဘၣ်ကစၢ်လၢအမိၢ်ပၢ်ဖံဖုလၢ ပျၢၤတဖၣ်မၤအတၢ်မၤ, ဒီးကစၢ်လၢပိာ်မုၣ်တဖၣ်အဲၣ်ဝဲစ့ၢ်ကီးဘၣ်. နီၢ်နီၢ်န့ၣ်, မ့ၢ်အတကနၣ်ဃုာ်ပာ်ကဲဘၣ်ကစၢ်ကိးဂၤဒဲးန့ၣ်လီၤ. အဂ့ၢ်ဒ်အံၤ, ကဆိကမိၣ်လီၤအသးလၢအဒိၣ်န့ၢ်ဒံးကစၢ် တဂၤလၢ်လၢ်န့ၣ်လီၤ.
38 ဒီးကမၤလၤကပီၤဝဲကစၢ်တဂၤလၢအအိၣ်ပှိၤတိာ်ဧိၤတာ်ဧိၤ တဖၣ်, လၢကစၢ်တဖၣ်န့ၣ်အလီၢ်လီၤ. အဝဲကလုၢ်ထီၣ်မၤဘူၣ်ဝဲထူ, စ့, တၢ်မျၢ်ဒီးတၢ်ဟ့ၣ်လုၢ်ဒိၣ်ပှ့ၤဒိၣ်အဂၤတဖၣ်ဆူကစၢ်တဂၤလၢအမိၢ် ပၢ်ဖံဖုလၢပျၢၤတဖၣ်တဘူၣ်ထီၣ်ဘါထီၣ်ဝဲနီတစုဘၣ်အအိၣ်န့ၣ်လီၤ.
39 လၢတၢ်ဒီသဒၢအတိာ်တဖၣ်အဂီၢ်, ကသူဝဲပှၤဂီၢ်မုၢ်လၢအဘါ ထီၣ်ပှၤတခီဘီမုၢ်ဖိအကစၢ်တဂၤန့ၣ်လီၤ. ကဟ့ၣ်ဝဲတၢ်လၤကပီၤဖးဒိၣ်ဆူ ပှၤတဖၣ်လၢအတူၢ်လိာ်အီၤဒ်ပှၤပၢတၢ်တဂၤအသိးန့ၣ်လီၤ. ဒီးကပာ်အီၤလၢမူဒါအလီၢ်ထီတဖၣ်ဒီးဟ့ၣ်အီၤလၢဟီၣ်ခိၣ်က ဝီၤဒ်တၢ်ဟ့ၣ်ဘျုးအသိးန့ၣ်လီၤ.
40 ဖဲကီၢ်စူၤရံအစီၤပၤအမုၢ်နံၤလၢခံကတၢၢ်ဘူးကတုၤဝဲန့ၣ်, ကီၢ်အဲၤကူပတူးအစီၤပၤကဟဲဒုးအီၤဒီးကီၢ်စူၤရံအစီၤပၤကဒုး ဆၢက့ၤအီၤလၢအဂံၢ်အဘါခဲလၢာ်, လၢလ့ၣ်ကဟၣ်ဒုးသုး, ကသ့ၣ်ဒီးကဘီတဖၣ်လီၤ. ဒီးအဝဲကဟဲနုာ်လီၤဒုးထံကီၢ်အါဘ့ၣ်ဒ်ထံအါလုၣ်ဘၢတၢ်အသိးန့ၣ်လီၤ.
41 ကဟဲနုာ်လီၤဒုးဒၣ်လဲာ်ကီၢ်တၢ်စံးပာ်ဒီးမၤသံကွံာ်ပှၤလၢအကလး တဖၣ်လီၤ. မ့မ့ၢ်ထံကီၢ်ဒ်ကီၢ်အဒိၣ်, ကီၢ်မိၤအးဒီးတၢ်အိၣ် လီၤတဲာ်လၢကီၢ်ဧၣ်မိၣ်, တဖၣ်န့ၣ်ကပူၤဖျဲးဝဲလီၤ.
42 ဖဲအနုာ်လီၤဒုးကယဲၢ်ကီၢ်တဖၣ်အံၤန့ၣ်, ကီၢ်အဲၤကူပတူးဒၣ်လဲာ်တပူၤဖျဲးဘၣ်.
43 ကစိာ်ကွံာ်ဝဲကီၢ်အဲၤကူပတူးအတၢ်ထူးတၢ်တီၤတဖၣ်, ထူ, စ့ဒီးတၢ်လုၢ်ဒိၣ်ပှ့ၤဒိၣ်ခဲလၢာ်လၢတၢ်ခူသူၣ်အလီၢ်အပူၤန့ၣ်လီၤ. ဒီးကမၤနၢၤပှၤလံးဘယၣ်ဖိအကီၢ်ဒီးပှၤကူၤၡးဖိအကီၢ် န့ၣ်လီၤ.
44 ဘၣ်ဆၣ်ဒီးတၢ်ကစီၣ်တဖၣ်လၢအဟဲလၢမုၢ်ထီၣ်ဒီးလၢကလံၤ စိးန့ၣ်ကမၤပျံၤမၤဖုးအီၤဒီးကဒုးတၢ်လၢတၢ်သးကဲၤထီၣ်အပူၤ ဒီးမၤသံကွံာ်ပှၤဂီၢ်မုၢ်ဂီၢ်ပၤလီၤ.
45 ဒီးကသူၣ်ထီၣ်ဒၣ်လဲာ်စီၤလိၣ်စီၤပၤအဒဲဖးဒိၣ်တဖၣ်လၢပီၣ်လဲၣ် ဒီးကစၢၢ်အဘၢၣ်စၢၤ, ကစၢၢ်လၢတၢ်လုၢ်ဟံၣ်အိၣ်လၢအလိၤန့ၣ်လီၤ. ဘၣ်ဆၣ်ဒီးကသံဝဲဒီးပှၤမၤစၢၤအီၤဖဲန့ၣ်တအိၣ်ဘၣ်နီတဂၤဘၣ်.”