10
1 လၢစီၤပၤဖးဒိၣ်စီၤကိရ့ၣ်ပၢတၢ်လၢပၤရၣ်အဘီအမုၢ်သၢနံၣ် တနံၣ်အပူၤန့ၣ်, တၢ်ကစီၣ်တမံၤဘၣ်တၢ်လီၣ်ဖျါထီၣ် အီၤလၢစီၤဒၤနံးယ့လး, ပှၤလၢအဘၣ်တၢ်ကိးစ့ၢ် ကီးအီၤလၢစီၤဘ့ၤလးတၡါစၢ်, န့ၣ်လီၤ. တၢ်ကစီၣ်န့ၣ်မ့ၢ်အမ့ၢ် အတီဘၣ်ဆၣ်ဒီးတၢ်နၢ်ပၢၢ်အီၤကီဒိၣ်ဒိၣ်ကလဲာ်န့ၣ်လီၤ. တၢ်န့ၣ်ဘၣ်တၢ်တဲဖျါထီၣ်န့ၢ်အီၤလၢတၢ်ထံၣ်လၢညါခီအပူၤန့ၣ်လီၤ.
2 အကတီၢ်ဖဲန့ၣ်, ယအိၣ်ဒီးတၢ်သူၣ်အုးသးအုးသၢနွံန့ၣ်လီၤ.
3 ယတအီၣ်ဘၣ်တၢ်အီၣ်အဝံၣ်မ့ၢ်ဂ့ၤ, တၢ်ဖံးတၢ်ညၣ်, တၢ်အီစပံးထံတကလုာ်ဂ့ၤတကလုာ်ဂ့ၤမ့ၢ်ဂ့ၤ, ခွံယခိၣ်မ့ၢ်ဂ့ၤ တုၤလၢသၢနွံလဲၤပူၤကွံာ်ဝဲဒၣ်လီၤ.
4 လၢနံၣ်အဝဲန့ၣ်အပူၤ, လါအခီၣ်ထံးတလါ, ခံဆံလွံၢ်သီအနံၤ န့ၣ်, ယဆၢထၢၣ်လၢထံကျိဖးဒိၣ်ဃံးဒက့လးအကၢၢ်နံၤန့ၣ်လီၤ.
5 ယကွၢ်ထီၣ်ဒီးယထံၣ်တ့ၢ်ပှၤတဂၤသိးဆ့ဖှီဝါကဆှၣ်တဖၣ်အိၣ်ဒီးယီၢ် တကိးထူဂ့ၤဂ့ၤတဘိန့ၣ်လီၤ.
6 အနီၢ်ခိကပီၤဒ်တၢ်မျၢ်အသိးလီၤ. အမဲာ်သၣ်ကပြုၢ်ကပြီၤ ဝဲဒ်လီဝၢ်ဒံးတခါအသိး, ဒီးအမဲာ်ချံတဖၣ်ကဲၤက ပျီၤဒ်မ့ၣ်အူအသိးလီၤ. အစုဒုၣ်တဖၣ်ဒီးအခီၣ် တဖၣ်ကပီၤဝဲဒ်တိၢ်ဘီထူးကပီၤသးအသိး, ဒီးအကလုၢ်သီၣ်ဒ်ပှၤ ဂီၢ်မုၢ်ဖးဒိၣ်သီၣ်တထြုးထီၣ်အသိးန့ၣ်လီၤ.
7 ယမ့ၢ်ပှၤထဲတဂၤဧိၤလၢအထံၣ်တၢ်ထံၣ်လၢညါခီန့ၣ်လီၤ. ပှၤအိၣ်ဒီးယၤတဖၣ်တထံၣ်ဘၣ်တၢ်နီတမံၤဘၣ်. ဘၣ်ဆၣ်ဒီးအဝဲသ့ၣ်ဃ့ၢ်အိၣ်ခူသူၣ်လၢတၢ်ပျံၤတၢ် ဖုးဖးဒိၣ်အပူၤလီၤ.
8 ယအိၣ်တီၢ်တ့ၢ်ဖဲန့ၣ်ထဲတဂၤဧိၤဒီးကွၢ်ကီတၢ်ထံၣ်လၢညါခီလၢ အလီၤလိၢ်လီၤလးအံၤန့ၣ်လီၤ. ယဂံၢ်ယဘါလၢာ်ကွံာ်ဝဲ, ဒီးယမဲာ်သၣ်အက့ၢ်အဂီၤလဲလိာ်ကွံာ်အသးတုၤဒၣ်လဲၣ်ပှၤကွၢ် နီၣ်ယၤတဘၣ်လၢၤနီတဂၤဘၣ်.
9 ဖဲယနၢ်ဟူအကလုၢ်န့ၣ်ယလီၤဃံၤအီထီလာ်ဆူဟီၣ်ခိၣ်လိၤဒီးယသး ပ့ၤနီၣ်ကွံာ်ယသးန့ၣ်လီၤ.
10 ဒီးကွၢ်ကွၢ်, စုတခီဟံးထီၣ်ယၤဒီးဝံၣ်ဆၢထၢၣ်ယၤလၢယစုဒီး ယခီၣ်လ့ၢ်ခိၣ်အဖီခိၣ်လီၤ. ယကနိးကစုာ်ဒံးယဲအဖၢမုၢ်လီၤ.
11 မူခိၣ်ကလူးစံးဘၣ်ယၤ, “စီၤဒၤနံးယ့လးဧၢ, ကစၢ်ယွၤအဲၣ်နၤလီၤ. ဂဲၤဆၢထၢၣ်ဒီးဒိကနၣ်တၢ်လၢယစံးဘၣ်နၤလီၤတံၢ်လီၤဆဲးတက့ၢ်. ပှၤဆှၢလီၤတ့ၢ်ယၤဆူနအိၣ်လီၤ.” ဖဲအစံးဘၣ်ယၤဒ်န့ၣ်ဝံၤဒီးယ ဂဲၤဆၢထၢၣ်အိၣ်ဒံးလၢတၢ်ကနိးကစုာ်အဖၢမုၢ်လီၤ.
12 အန့ၣ်ဝံၤဒီးအဝဲစံးဘၣ်ယၤ, “စီၤဒၤနံးယ့လးဧၢ, ပျံၤတၢ်တဂ့ၤ, ကစၢ်ယွၤနၢ်ဟူတ့ၢ်လံနတၢ်ထုကဖၣ်တဖၣ်, စးထီၣ်မုၢ်တနံၤလၢ နပာ်လီၤနသးဒ်သိးနကဆီၣ်လီၤနသးလၢနကဒိးန့ၢ်ဘၣ်တၢ် သ့ၣ်ညါနၢ်ပၢၢ်န့ၣ်လီၤ. ယဟဲယဲလၢတၢ်စံးဆၢနတၢ်ထုကဖၣ် အဂီၢ်လီၤ.
13 ကလူးလၢအပၢၤကီၢ်ပၤရၣ်အဘီအမုၢ်န့ၣ်ထီဒါယၤခံဆံတသီလီၤ. အန့ၣ်သတးဒီးမူခိၣ်ကလူးတဖၣ်အခိၣ်အဒိၣ်ကတၢၢ်မံၤက့လး ဟဲဝဲဒ်သိးကမၤစၢၤယၤလီၤ. အဂ့ၢ်ဒ်အံၤ, ယဘၣ်တၢ်ပာ်လီၤတဲာ်ကွံာ်ယၤထဲတဂၤဧိၤလၢကီၢ်ပၤရၣ်အပူၤလီၤ.
14 ယဟဲတ့ၢ်ယဲဒ်သိးယကတဲနၢ်ပၢၢ်နၤလၢတၢ်ကမၤအသးဒီး နပှၤဂီၢ်မုၢ်လၢခါဆူညါအဂ့ၢ်န့ၣ်လီၤ. အအံၤမ့ၢ်တၢ်ထံၣ်လၢညါခီဘၣ်ဃးဒီးခါဆူညါအဂ့ၢ်န့ၣ်လီၤ.”
15 ဖဲအကတိၤတၢ်အံၤန့ၣ်, ယကွၢ်တၢ်ဆူဟီၣ်ခိၣ်လိၤဒီးအိၣ်တအုၣ်လီၤ.
16 အန့ၣ်ဝံၤဒီး, မူခိၣ်ကလူးလၢအလီၤဂာ်ဒီးပှၤကညီ တဂၤန့ၣ်ယူာ်ဃီၤအစုဒီးထိးဘၣ်ယနိးဖံးတဖၣ်လီၤ. ဒီးယစံးဘၣ်အီၤ, “တၢ်ဒိၣ်ဧၢ, တၢ်ထံၣ်လၢညါခီအံၤမၤစၢ် လီၤယဂံၢ်ယဘါတုၤဒၣ်လဲာ်ယကနိးကစုာ်တကတၢၢ်ဘၣ်လီၤ.
17 ယလီၤဂာ်ဒီးကုၢ်တဂၤဆၢထၢၣ်လၢအကစၢ်အမဲာ်ညါလီၤ. ယကတိၤတၢ်ဒီးနၤကသ့ဒ်လဲၣ်. တၢ်ဂံၢ်တၢ်ဘါဒီးတၢ်သါတအိၣ် တ့ၢ်ဒီးယၤဘၣ်.”
18 မၤကဒီးတစု, အဝဲထိးဘၣ်ယၤဒီးယဂံၢ်ယဘါဆူၣ်ထီၣ်ဝဲလီၤ.
19 ဒီးစံးဘၣ်ယၤ, “ကစၢ်ယွၤအဲၣ်နၤလီၤ. မၤသးဒ်န့ၣ်ဒီး ပျဲတၢ်မၤကိၢ်မၤဂီၤနၤမ့ၢ်ဂ့ၤတၢ်မၤပျံၤမၤဖုးနၤမ့ၢ်ဂ့ၤအိၣ်နီ တမံၤတဂ့ၤ.” ဖဲအစံးတၢ်အံၤဝံၤဒီး, မၤသးဒ်ယဂံၢ်ယဘါဆူၣ်ထီၣ်န့ၢ်အလီၢ်ဒီးယစံးဘၣ်အီၤ, “တၢ်ဒိၣ်ဧၢ, တဲဘၣ်ယၤတၢ်လၢနကဘၣ်တဲယၤန့ၣ်တက့ၢ်. နမၤဆူၣ်ထီၣ်က့ၤယၤလီၤ.”
20 တုၤနုၤတစု, အဝဲစံးဘၣ်ယၤ, “ဘၣ်မနုၤအဃိယဟဲဆူနအိၣ်န့ၣ် နသ့ၣ်ညါစ့ၢ်ကီးဧါ. မ့ၢ်ဒ်သိးယကလီၣ်ဖျါထီၣ်န့ၢ်နၤတၢ်ကွဲး အသးလၢလံာ်တၢ်မ့ၢ်တၢ်တီအပူၤန့ၣ်လီၤ. ခဲအံၤယကဘၣ်က့ၤကဒါက့ၤဒီးဒုးတၢ်ထီဒါကလူးလၢအပၢၤကီၢ် ပၤရၣ်, ဒီးတုၤယမၤနၢၤကွံာ်အီၤန့ၣ်, ကလူးလၢအပၢၤကီၢ်ကြံး(စ်)န့ၣ် ကဟဲဝဲလီၤ.
21 ပှၤလၢအကမၤစၢၤယၤန့ၣ်မ့တမ့ၢ်ဘၣ်ကလူးလၢအပၢၤအံၣ်စရ့လး, မံၤက့လးဘၣ်ဒီး, ပှၤတအိၣ်ဘၣ်နီတဂၤဘၣ်.