5
1 ဒီးယထံၣ်ဘၣ်လံာ်အိၣ်ကွဲးအသးလၢအပူၤဒီးလၢအ ချၢ,ဒီးစဲဃာ်ဝဲဒီးတၢ်စဲပနီၣ်ဃာ်နွံဖျၢၣ်,အိၣ်လၢပှၤဆ့ၣ် နီၤလၢလီၢ်ပစိာ်အဖီခိၣ်အစုထွဲပူၤလီၤ.
2 ဒီးယထံၣ်ဘၣ် ကလူးအိၣ်ဒီးအဂံၢ်ဆူၣ်အဘါဆူၣ်တဂၤ, လၢအကိး ထီၣ်လၢအကလုၢ်ဖးဒိၣ်, ဒီးစံးဝဲဒၣ်, မ့ၢ်မတၤကြၢးအိး ထီၣ်လံာ်,ဒီးမၤသ့ၣ်ဖးအတၢ်စဲပနီၣ်ဃာ်တဂၤလဲၣ်.
3 ဒီးပှၤအိၣ်လၢမူခိၣ်မ့ၢ်ဂ့ၤ, လၢဟီၣ်ခိၣ်ချၢမ့ၢ်ဂ့ၤ, လၢ ဟီၣ်ခိၣ်ဖီလာ်မ့ၢ်ဂ့ၤ,လၢအအိးထီၣ်လံာ်သ့မ့ၢ်ဂ့ၤ, ကွၢ် အီၤသ့မ့ၢ်ဂ့ၤ တအိၣ်ဘၣ်နီတဂၤဘၣ်.
4 ဒီးယဟီၣ်နးမး လီၤ.အဂ့ၢ်ဒ်အံၤ,ပှၤလၢအကြၢးအိးထီၣ်လံာ်,ဒီးကွၢ်အီၤ န့ၣ်,တအိၣ်ဘၣ်လီၤ.
5 ဒီးပှၤသူၣ်က့သးပှၢ်တဂၤ စံးဘၣ်ယၤ, ဟီၣ်တဂ့ၤ. ကွၢ်ကွၢ်, ခ့ယုၢ်ဘၣ်ဃးဒီးယူဒၤအဒူၣ်,ဒီးစီၤဒၤဝံးအဂံၢ် တဂၤ, မၤနၢၤတၢ်ဒ်သိးအကအိးထီၣ်လံာ်,ဒီးအတၢ်စဲပ နီၣ်ဃာ်နွံဖျၢၣ်န့ၣ်လီၤ.
6 ဒီးယထံၣ်သိဖိ,ဒ်အဘၣ်တၢ်မၤ သံအီၤအသိး, ဆၢထၢၣ်ဝဲလၢလီၢ်ပစိာ်အသးကံၢ်ပူၤလၢ တၢ်အသးလွံၢ်ဒုအကျါ, ဒီးလၢပှၤသူၣ်က့သးပှၢ်အကျါ န့ၣ်,အိၣ်ဝဲဒီးအနၢၢ်နွံဘိ, ဒီးအမဲာ်နွံတိၣ်လၢအမ့ၢ်ယွၤ အသးနွံဖျၢၣ်လၢတၢ်မၢလီၤအီၤဆူ ဟီၣ်ခိၣ်ချၢသကုၤ ဆးဒးန့ၣ်လီၤ.
7 ဒီးအဝဲဒၣ်န့ၣ်ဟဲဝဲ,ဒီးဟံးန့ၢ်လံာ်လၢ ပှၤဆ့ၣ်နီၤလၢလီၢ်ပစိာ်အဖီခိၣ်အစုထွဲပူၤန့ၣ်လီၤ.
8 ဒီးဖဲအဟံးန့ၢ်လံာ်န့ၣ်,တၢ်အသးလွံၢ်ဒု, ဒီးပှၤသူၣ်က့ သးပှၢ်ခံဆံလွံၢ်ဂၤ,တဂၤဒီးတဂၤ,အိၣ်ဒီးတနၢ်, ဒီးလီခီ ထူတဖၣ်ပှဲၤဒီးတၢ်ဆိၣ်ကဲၤနၢမူလၢအမ့ၢ်ပှၤစီဆှံအတၢ် ထုကဖၣ်, ဒီးတီၤလီၤကဒွံကျိာ်ဝဲလၢ သိဖိအမဲာ်ညါ လီၤ.
9 ဒီးအဝဲသ့ၣ်တဖၣ်န့ၣ်အုၣ်တၢ်လၢထါအသီ,ဒီးစံး ဝဲဒၣ်, နဂ့ၤဟံးန့ၢ်လံာ်န့ၣ်,ဒီးအိးထီၣ်အတၢ်စဲပနီၣ်ဃာ် လီၤ. အဂ့ၢ်ဒ်အံၤ,နဒိးသံနသး,ဒီးနပှ့ၤက့ၤပှၤလၢနသွံၣ်, လၢယွၤအဂီၢ်လၢကယဲၢ်ပှၤအဒူၣ်, ဒီးပှၤကတိၤတၢ်အ ကျိာ်အကလုာ်ကလုာ်, ဒီးကယဲၢ်ပှၤဂီၢ်မုၢ်,ဒီးကယဲၢ်ပှၤ အကလုာ်တဖၣ်အကျါလီၤ.
10 ဒီးနပာ်အီၤလၢဘီမုၢ်,ဒီး ပှၤလုၢ်တၢ်အဒိၣ်လၢယွၤအမဲာ်ညါ, ဒီးအဝဲသ့ၣ်ကပၢ တၢ်လၢဟီၣ်ခိၣ်ချၢလီၤ.
11 ဒီးယထံၣ်တၢ်, ဒီးယနၢ်ဟူကလူးအါဂၤအိၣ်ဝးတရံး လီၢ်ပစိာ်,ဒီးတၢ်အသးတဖၣ်န့ၣ်,အကလုၢ်လီၤ.အတၢ် ဂံၢ်အိၣ်ဝဲကလးတဖၣ်အကလး, ဒီးကထိတဖၣ်အက ထိလီၤ.
12 ဒီးစံးဝဲဒၣ်လၢအကလုၢ်သီၣ်ဖးဒိၣ်,သိဖိလၢ အဒိးသံအသးန့ၣ်, ဂ့ၤဒိးန့ၢ်တၢ်စိတၢ်ကမီၤ,ဒီးတၢ်ထူး တၢ်တီၤ,ဒီးတၢ်ကူၣ်ဘၣ်ကူၣ်သ့,ဒီးတၢ်အဂံၢ်အဘါ,ဒီး တၢ်ယူးတၢ်ယီၣ်, ဒီးတၢ်လၤကပီၤ,ဒီးတၢ်စံးထီၣ်ပတြၢၤ အီၤလီၤ.
13 ဒီးကယဲၢ်တၢ်ဘၣ်တ့အသးလၢမူခိၣ်,ဒီးလၢ ဟီၣ်ခိၣ်ချၢ,ဒီးလၢဟီၣ်ခိၣ်အဖီလာ်, ဒီးလၢပီၣ်လဲၣ်အ ဖီခိၣ်, ဒီးကယဲၢ်တၢ်အိၣ်လၢတၢ်န့ၣ်တဖၣ်အပူၤခဲလၢာ် န့ၣ်, ယနၢ်ဟူလၢအစံး,တၢ်စံးထီၣ်ပတြၢၤ,ဒီးတၢ်ယူး တၢ်ယီၣ်, ဒီးတၢ်လၤကပီၤ,ဒီးတၢ်ဂံၢ်တၢ်ဘါတဖၣ်န့ၣ်, မ်အအိၣ်ဒီးပှၤလၢအဆ့ၣ်နီၤလၢလီၢ်ပစိာ်အဖီခိၣ်,ဒီးသိ ဖိန့ၣ်အစိၤစိၤအဃၣ်ဃၣ်တက့ၢ်.
14 ဒီးတၢ်အသးလွံၢ်ဒု စံးဝဲဒၣ်, အၤမ့ၣ်, ဒီးပှၤသူၣ်က့သးပှၢ်တီၤလီၤဘါတၢ် လီၤ.