24
1 ဒီးလၢစီၤယိၤအၣ်ကဲသီစီၤပၤန့ၣ် အသးပှၢ်နွံနံၣ်, ဒီး ကဲစီၤပၤလၢယရူၤၡလ့ၣ်အပူၤအနံၣ်လွံၢ်ဆံ, ဒီးအမိၢ်အ မံၤမ့ၢ်နီၢ်စံဘယၤဘၣ်ဃးဒီးဘ့ၢ်ၡဘၤလီၤ.
2 ဒီးကယဲၢ်အပှၤလုၢ်တၢ်အဒိၣ် စီၤယဟိယဒါအမုၢ်နံၤခဲလၢာ်န့ၣ် စီၤယိၤအၣ်မၤတၢ်အလိၤလၢယွၤအမဲာ်လီၤ.-
3 ဒီးစီၤယဟိယဒါဟံးန့ၢ်ဝဲလၢအဂီၢ် လၢအမါခံဂၤ, ဒီး အဝဲဒၣ်ထီၣ်ဖိဖိခွါတဖၣ်, ဒီးဖိမုၣ်တဖၣ်လီၤ.
4 ဒီးတၢ်န့ၣ်အလီၢ်ခံတၢ်မၤအသးလၢ စီၤယိၤအၣ်အသး အိၣ်လၢအကမၤက့ၤယွၤအဟံၣ်လီၤ.
5 ဒီးဒုးအိၣ်ဖှိၣ်ရိဖှိၣ်ပှၤလုၢ်တၢ်အဒိၣ်, ဒီးပှၤလ့ၤဝံဖိ, ဒီး စံးဘၣ်အီၤ, လဲၤဆူကယဲၢ်ယူဒၤအဝ့ၢ်တဖၣ်အပူၤ, ဒီး ထၢဖှိၣ်စ့လၢအံၣ်စရ့လးဖိခဲလၢာ်ဒ်သိး သုကမၤက့ၤသု ကစၢ်အဟံၣ်တနံၣ်ဘၣ်တနံၣ်တက့ၢ်. ဒီးမၤတၢ်အံၤချ့ချ့ တက့ၢ်. ဘၣ်ဆၣ်ဒီးပှၤလ့ၤဝံဖိတမၤဘၣ်ချ့ချ့ဘၣ်.
6 ဒီးစီၤပၤကိးန့ၢ် တၢ်အခိၣ်စီၤယဟိယဒါ, ဒီးစံးဘၣ် အီၤ, နတမၢဘၣ်ပှၤလ့ၤဝံဖိဟဲစိာ်ယွၤအခ့အပှၤစီၤမိၤရှ့ အတၢ်ထၢဖှိၣ်လၢယူဒၤ, ဒီးလၢယရူၤၡလ့ၣ်အပူၤ, ဒီး လၢအံၣ်စရ့လးအပှၤအိၣ်ဖှိၣ်ဖိ လၢတၢ်အၢၣ်လီၤအီလီၤ အဒဲအဂီၢ်န့ၣ်မ့ၢ်အဘၣ်မနုၤလဲၣ်,
7 အဂ့ၢ်ဒ်အံၤ, ပိာ်မုၣ် အအၢနီၢ်ဧသၤလယၤအဖိခွါတဖၣ် မၤဟးဂီၤတ့ၢ်ယွၤအ ဟံၣ်, ဒီးကယဲၢ်တၢ်မၤဘူၣ်လၢယွၤအဟံၣ်ပူၤန့ၣ် ဟ့ၣ် လီၤဝဲလၢဘဧၤလးတဖၣ်လီၤ.
8 ဒီးစီၤပၤမၤလိာ်တၢ်ဒီး ပှၤမၤတလါတဖျၢၣ်, ဒီးပာ်ဝဲ လၢခိဖဲယွၤအဟံၣ်အပဲတရီန့ၣ်လီၤ.
9 ဒီးကိးထီၣ်တၢ်လၢယူဒၤဒီကီၢ်ညါ, ဒီးလၢယရူၤၡလ့ၣ် ဒီဝ့ၢ်ညါဒ်သိး ပှၤကဟဲစိာ်တၢ်ထၢဖှိၣ်လၢယွၤအခ့အပှၤ စီၤမိၤရှ့ပာ်လၢ အံၣ်စရ့လးအဖီခိၣ်, လၢပှၢ်မုၢ်ကနၢန့ၣ် ဆူယွၤအအိၣ်လီၤ.
10 ဒီးပဒိၣ်ဖးဒိၣ်တဖၣ်, ဒီးပှၤဂီၢ်မုၢ်ခဲလၢာ် သူၣ်ခုသးခု ဒီးဟဲစိာ်တၢ်, ဒီးတ့ၢ်နုာ်လီၤလၢတလါတဖျၢၣ်အပူၤတုၤ အလၢာ်လီၤ.
11 ဒီးအကတီၢ်လၢ ပှၤဟဲစိာ်တလါန့ၣ်ဆူ စီၤပၤအပဒိၣ် ဖးဒိၣ်အအိၣ်လၢပှၤလ့ၤဝံဖိအစုပူၤန့ၣ် တုၤအထံၣ်ဘၣ် လၢစ့အိၣ်အါမးလၢတလါပူၤန့ၣ်ဒီး, တၢ်မၤအသးလၢ စီၤပၤအပှၤကွဲးလံာ်တဂၤ, ဒီးပှၤလုၢ်တၢ်အခိၣ်အပဒိၣ်တ ဂၤဟဲလူလီၤန့ၢ်ဝဲ, ဒီးဟံးန့ၢ်တလါ, ဒီးပာ်လီၤက့ၤအီၤ လၢအလီၢ်ပူၤလီၤ. မၤဝဲဒ်န့ၣ်တနံၤဘၣ်တနံၤ, ဒီးထၢဖှိၣ် စ့အါအါကလဲာ်လီၤ.
12 ဒီးစီၤပၤ, ဒီးစီၤယဟိယဒါဟ့ၣ် လီၤဝဲလၢပှၤမၤယွၤအဟံၣ်အတၢ်မၤ, ဒီးငါပှၤမၤတၢ်လၢ လၢၢ်, ဒီးပှၤမၤတၢ်လၢသ့ၣ်ဖိတဖၣ်လၢစ့ ဒ်သိးအက မၤက့ၤယွၤအဟံၣ်, ဒီးပှၤလၢအမၤတၢ်လၢထး, ဒီးလၢ တိၢ်စ့ၢ်ကီးဒ်သိးအကမၤက့ၤယွၤအဟံၣ်လီၤ.
13 ဒီးပှၤမၤတၢ်ဖိန့ၣ်မၤတၢ်, ဒီးမၤက့ၤတၢ်ဝံၤ, ဒီးမၤဂၢၢ် မၤကျၢၤယွၤအဟံၣ်, ဒီးမၤအီၤခၢၣ်သနၢၢ်လီၤ.
14 ဒီးမၤဝဲဝံၤဒီးဟဲစိာ်စ့လၢအအိၣ်လီၤတဲာ်ဆူစီၤပၤ, ဒီး ဆူစီၤယဟိယဒါအအိၣ်, ဒီးပှၤတ့တၢ်အဃၢၤအဃိၢ်လၢ ယွၤအဟံၣ်အဂီၢ်, တၢ်အဃၢၤအဃိၢ်လၢပှၤမၤတၢ်အဂီၢ်, ဒီးလၢလုၢ်တၢ်အဂီၢ်, ဒီးနီၣ်တၢၤတဖၣ်, ဒီးတၢ်အ ဃၢၤအဃိၢ်ထူ, ဒီးတၢ်အဃၢၤအဃိၢ်စ့လီၤ. ဒီးလုၢ်တၢ်လုၢ်မ့ၣ်အူလၢယွၤအဟံၣ်ပူၤတထံၣ်ဃီလၢ စီၤယဟိယဒါအမုၢ်နံၤခဲလၢာ်အတီၢ်ပူၤလီၤ.
15 ဒီးစီၤယဟိယဒါအသးပှၢ်ထီၣ်, ဒီးဖဲအသံန့ၣ်ပှဲၤဝဲဒီး နံၤတဖၣ်လီၤ. တုၤအသံဒီး, အသးပှၢ်အနံၣ်တကယၤ သၢဆံလီၤ.
16 ဒီးပှၤခူၣ်လီၤကွံာ်အီၤလၢစီၤဒၤဝံးအဝ့ၢ်ပူၤ လၢစီၤပၤအကျါလီၤ. အဂ့ၢ်ဒ်အံၤ, လၢယွၤအဂီၢ်မ့ၢ်ဂ့ၤ, လၢအပှၤဟံၣ်ဖိအဂီၢ်မ့ၢ်ဂ့ၤ, မၤတၢ်ဂ့ၤလၢအံၣ်စရ့လးအ ပူၤလီၤ.
17 ဒီးလၢစီၤယဟိယဒါသံဝဲအလီၢ်ခံန့ၣ်, ယူဒၤအပဒိၣ် ဖးဒိၣ်တဖၣ်ဟဲဝဲ, ဒီးတီၤလီၤကဒွံကျိာ်လၢ စီၤပၤအမဲာ် ညါ, ဒီးစီၤပၤဒိကနၣ်အကလုၢ်လီၤ.
18 ဒီးလဲၤသဒၣ် ယွၤအပၢ်တဖၣ်အကစၢ်အဟံၣ်, ဒီးမၤ အရှ့ရၤ, ဒီးတၢ်ဂီၤတဖၣ်အတၢ်, ဒီးတၢ်သးထီၣ်ဘၣ်ယူ ဒၤ, ဒီးယရူၤၡလ့ၣ်လၢတၢ်မၤကမၣ်တၢ်န့ၣ်အဃိလီၤ.
19 ဒီးမၢလီၤဝံတဖၣ်ဆူအအိၣ်ဒ်သိး အကဒုးဟဲက့ၤအီၤ ဆူယွၤအအိၣ်, ဒီးအဝဲသ့ၣ်အုၣ်အသး ထီဒါအီၤဘၣ် ဆၣ်ဒီး, တဒိကနၣ်ဘၣ်ဝဲဘၣ်.
20 ဒီးယွၤအသးလီၤဘၣ်ပှၤလုၢ်တၢ်အဒိၣ် စီၤယဟိယဒါ အဖိခွါစီၤစကၤရယၤအလိၤ, လၢအဆၢထၢၣ်လၢပှၤဂီၢ် မုၢ်အဖီခိၣ်, ဒီးစံးဘၣ်အီၤ, ယွၤစံးဒ်အံၤ, သုလုၣ်သ့ၣ် ခါပတာ်ယွၤအတၢ်မၤလိာ်တဖၣ် တုၤသုဘီၣ်ထီၣ်ညီ ထီၣ်တသ့ဘၣ်န့ၣ် မ့ၢ်အဘၣ်မနုၤလဲၣ်. မ့ၢ်သုလဲၤသ ဒၣ်ယွၤဒီး, ယွၤလဲၤသဒၣ်သုစ့ၢ်ကီးလီၤ.
21 ဒီးပှၤကူၣ်တၢ်ထီဒါအီၤ, ဒီးကွံာ်အီၤလၢလၢၢ်လၢ စီၤ ပၤမၤလိာ်တၢ်အဃိလၢယွၤအဟံၣ်အဂၢၤပူၤလီၤ.
22 ဒီးစီၤပၤယိၤအၣ်တသ့ၣ်နီၣ်ထီၣ်က့ၤ တၢ်ဘျုးတၢ်ဖှိၣ် လၢအဝဲဒၣ်အပၢ်စီၤယဟိယဒါမၤအီၤဘၣ်. ဒီးမၤသံအ ဖိခွါ, ဒီးတုၤအသံဒီးစံးဝဲဒၣ်, မ်ယွၤကွၢ်ဝဲ, ဒီးဃုတၢ် တက့ၢ်.
23 ဒီးတၢ်လၢနံၣ်န့ၣ်ဆၢအလီၢ်ဒီး, တၢ်မၤအသးလၢစူၤ ရံအပှၤသုးမုၢ်ဟဲထီဒါအီၤ, ဒီးဟဲဝဲဆူယူဒၤ, ဒီးယရူၤၡ လ့ၣ်, ဒီးမၤဟးဂီၤကယဲၢ်ပှၤဂီၢ်မုၢ်အပဒိၣ်ဖးဒိၣ်ခဲလၢာ် လၢပှၤဂီၢ်မုၢ်အကျါ, ဒီးတၢ်ဟ့ၣ်ယုၢ်အတၢ်ဂုာ်န့ၢ်ခဲလၢာ် ဆူဒၤမ့ၤစ့းအစီၤပၤလီၤ.
24 အဂ့ၢ်ဒ်အံၤ, ပှၤစူၤရံဖိအပှၤသုးမုၢ်ဟဲစှၤဂၤ, ဒီးယွၤ ဟ့ၣ်လီၤပှၤသုးမုၢ်အါဂၤလၢအစုပူၤ လၢအလဲၤသဒၣ် ယွၤအပၢ်အကစၢ်အဃိလီၤ. ဒီးမၤတၢ်စံၣ်ညီၣ်လၢ စီၤ ယိၤအၣ်အလိၤလီၤ.
25 ဒီးတုၤအဟးထီၣ်ကွံာ်လၢအအိၣ်, (အဂ့ၢ်ဒ်အံၤ, ပာ်လီၤတဲာ်အီၤဘၣ်တၢ်ဆါနးနးကလဲာ်.) အခ့အပှၤဒၣ်ဝဲ ကူၣ်တၢ်ထီဒါအီၤလၢပှၤလုၢ်တၢ်အဒိၣ်, စီၤယဟိယဒါ အဖိခွါအသွံၣ်အဃိ, ဒီးမၤသံအီၤလၢအလီၢ်မံပူၤ, ဒီး သံဝဲ, ဒီးပှၤခူၣ်လီၤကွံာ်အီၤလၢစီၤဒၤဝံးအဝ့ၢ်ပူၤဘၣ်ဆၣ် ဒီး, တမ့ၢ်ဘၣ်လၢစီၤပၤအတၢ်သွၣ်ခိၣ်အပူၤဘၣ်.
26 ဒီးအအံၤမ့ၢ် ပှၤလၢအကူၣ်တၢ်ထီဒါအီၤ, ပှၤဧၣ်မိၣ် မုၣ်နီၢ်ၡံမဧးအဖိခွါ စီၤစၤဘး, ဒီးပှၤမိၤအးမုၣ် နီၢ်ၡမံရံး အဖိခွါစီၤယဟိစဘးလီၤ.
27 ဒီးအဖိခွါတဖၣ်, ဒီးတၢ်ဝံတၢ်ယိးအဃၢ လၢအအိၣ် ဝဲလၢအလိၤ, ဒီးတၢ်မၤက့ၤယွၤအဟံၣ်အဂ့ၢ်အကျိၤန့ၣ် ကွၢ်ကွၢ်, ကွဲးအသးလၢလံာ်ဃဲၤဖျါလံာ်စီၤပၤအပူၤလီၤ. ဒီးအဖိခွါစီၤအမၤစယါကဲထီၣ်စီၤပၤလၢအလီၢ်န့ၣ်လီၤ.