19
1 ပှၤအံၣ်စရ့လးဖိဟးထီၣ်လၢ ကီၢ်အဲၤကူပတူးအလီၢ် ခံ, သၢလါတလါမုၢ်တနံၤဃီန့ၣ်, ဟဲတုၤဝဲလၢပှၢ်မုၢ် ကနၢစံၤနါလီၤ.
2 ဒီးဟးထီၣ်ကွံာ်ဝဲလၢရဖံၤဒံၣ်, ဒီး လဲၤတုၤဝဲလၢပှၢ်မုၢ်ကနၢစံၤနါ, ဒီးသူၣ်အဒဲလၢပှၢ်မုၢ် ကနၢဒီးအံၣ်စရ့လးသူၣ်အဒဲဖဲန့ၣ် လၢကစၢၢ်တဖျၢၣ် န့ၣ်အမဲာ်ညါလီၤ.
3 ဒီးစီၤမိၤရှ့လဲၤထီၣ်ဆူ ယွၤအအိၣ်, ဒီးယွၤကိးထီၣ်အီၤလၢကစၢၢ်လိၤန့ၣ်, ဒီးစံးဝဲဒၣ်, နဘၣ်စံးဘၣ်စီၤယၤကိာ်အဟံၣ်ဖိ, ဒီးဒုးနဲၣ်ပှၤအံၣ်စရ့လးဖိ ဒ်အံၤ,-
4 ယမၤဘၣ် ပှၤအဲၤကူပတူးဖိဒ်အံၤဒ်နုၤန့ၣ် သုထံၣ်ဘၣ် လံ, ဒီးယစိာ်ထီၣ်သုလၢလံာ်ကြီကြာ်အဒံးဆ့အဖီခိၣ်, ဒီးဒုးဟဲထီၣ်သုဆူယအိၣ်ဒၣ်ယဲအံၤလီၤ.
5 ဒီးခဲကနံၣ်အံၤသုမ့ၢ်ဒိကနၣ်ယကလုၢ်သပှၢ်တၢၢ်, ဒီးတိၢ်န့ၢ် ယတၢ်အၢၣ်လီၤအီလီၤဒီး, သုကကဲထီၣ်တၢ်လုၢ်ဒိၣ်ပှ့ၤဒိၣ်လၢယဂီၢ်ဒိၣ်န့ၢ် ပှၤကလုာ်ခဲလၢာ်တက့ၢ်လီၤ. အဂ့ၢ်ဒ်အံၤ, ဟီၣ်ခိၣ်ဒီဘ့ၣ်ညါမ့ၢ်ယတၢ်လီၤ.-
6 ဒီးသုကကဲထီၣ်ပှၤလုၢ်တၢ်အဒိၣ်တဖၣ်အဘီအမုၢ်, ဒီး ပှၤတကလုာ်စီဆှံလီၤ.အဝဲအံၤမ့ၢ်တၢ်ကတိၤလၢနဘၣ် စံးဘၣ်ပှၤအံၣ်စရ့လးဖိလီၤ.
7 ဒီးစီၤမိၤရှ့ဟဲက့ၤ, ဒီးကိးန့ၢ်ပှၤဂီၢ်မုၢ်အသူၣ်က့အသး ပှၢ်, ဒီးပာ်ကယဲၢ်တၢ်ကတိၤအံၤ လၢယွၤမၤလိာ်အီၤ, လၢအမဲာ်ညါလီၤ.
8 ဒီးပှၤဂီၢ်မုၢ်စံးဆၢတၢ်တဘျီဃီ, ဒီးစံးဝဲဒၣ်, ကယဲၢ် တၢ်လၢယွၤစံးတၢ်န့ၣ်ပကမၤခဲလၢာ်လီၤ. ဒီးစီၤမိၤရှ့ ဆှၢထီၣ်ပှၤဂီၢ်မုၢ်အတၢ်ကတိၤဆူယွၤအအိၣ်လီၤ.
9 ဒီးယွၤစံးဘၣ်စီၤမိၤရှ့, ကွၢ်ကွၢ်, ယဟဲဆူနအိၣ်လၢ တၢ်အၢၣ်တီၣ်အပူၤ, ဒ်သိးပှၤဂီၢ်မုၢ်ကနၢ်ဟူယကတိၤ တၢ်ဒီးနၤ, ဒီးနာ်က့ၤစ့ၢ်ကီးနၤလီၤထူလီၤယိာ်လီၤ. ဒီး စီၤမိၤရှ့စံးဘၣ်က့ၤပှၤဂီၢ်မုၢ်အတၢ်ကတိၤလၢယွၤလီၤ.
10 ဒီးယွၤစံးဘၣ်စီၤမိၤရှ့, လဲၤဆူပှၤဂီၢ်မုၢ်အအိၣ်, ဒီးမၤ စီဆှံအီၤလၢ မုၢ်မဆါတနံၤအံၤ, ဒီးခဲဂီၤတနံၤတက့ၢ်. မ်အဆှုၣ်အကူအသိးတက့ၢ်.
11 ဒီးအိၣ်ကတဲာ်ကတီၤ တၢ်လၢသၢနံၤတနံၤအဂီၢ်တက့ၢ်. အဂ့ၢ်ဒ်အံၤ, သၢနံၤ တနံၤန့ၣ်ယွၤကဟဲလီၤလၢ ပှၤဂီၢ်မုၢ်ခဲလၢာ်အမဲာ်ညါ ဆူကစၢၢ်စံၤနါအလိၤလီၤ.
12 ဒီးနဘၣ်ကရၢတၢ်ဝးတရံး လၢပှၤဂီၢ်မုၢ်အဂီၢ်ဒီးစံး, ပလီၢ်သုသးလၢသုသုတလဲၤ ထီၣ်ဆူကစၢၢ်, လၢသုသုတထိးဘၣ်အဃၢၤန့ၣ်တဂ့ၤ. ဖဲဒၣ်ပှၤလၢ အထိးဘၣ်ကစၢၢ်တဂၤလၢ်လၢ်န့ၣ် သံဒီး ကသံလီၤ.
13 တၢ်အစုတဘၣ်ထိးဘၣ်အီၤဘၣ်. အဂ့ၢ် ဒ်အံၤ, ကဘၣ်တၢ်ကွံာ်အီၤလၢလၢၢ်, မ့တမ့ၢ်ဘၣ်ဒီး ကဘၣ်တၢ်ခးဖျိသံအီၤသပှၢ်တၢၢ်လီၤ. ဆၣ်ဖိကီၢ်ဖိမ့ၢ် ဂ့ၤ, ပှၤကညီမ့ၢ်ဂ့ၤ, တမူဘၣ်ဘၣ်. ဒီးတုၤကွဲၤသီၣ် ထီထီကလဲာ်ဒီး, ကဟဲထီၣ်ဘူးဝဲဆူကစၢၢ်န့ၣ်လီၤ.
14 ဒီးစီၤမိၤရှ့လဲၤလီၤ လၢကစၢၢ်လိၤန့ၣ်ဆူပှၤဂီၢ်မုၢ်အ အိၣ်, ဒီးမၤစီဆှံပှၤဂီၢ်မုၢ်, ဒီးအဝဲသ့ၣ်ဆှုၣ်အကူအသိး လီၤ.
15 ဒီးစံးဘၣ်ပှၤဂီၢ်မုၢ်န့ၣ်, ကတဲာ်ကတီၤသုသး လၢမုၢ်သၢနံၤတနံၤအဂီၢ်တက့ၢ်. ဒီးသုးဘူးသုသးဆူ သုမါအအိၣ်တဂ့ၤ.
16 ဒီးမုၢ်သၢနံၤတနံၤမုၢ်ဆ့ၣ်ထီၣ်န့ၣ်, တၢ်မၤအသးလၢ လီသီၣ်တဖၣ်ဒီးလီဝၢ်ဒံးအိၣ်ဝဲ, ဒီးတၢ်အၢၣ်တီၣ်လၢ ကစၢၢ်လိၤန့ၣ်, ဒီးကွဲၤအသီၣ်ဆူၣ်ဆူၣ်ကလဲာ်ဒီး, က ယဲၢ်ပှၤဂီၢ်မုၢ် လၢအအိၣ်လၢ သူၣ်ဒဲအလီၢ်ခဲလၢာ်န့ၣ် ကနိးကစုာ်လီၤ.
17 ဒီးစီၤမိၤရှ့ဒုးဟးထီၣ်ပှၤဂီၢ်မုၢ်လၢ သူၣ်ဒဲအလီၢ်ဒ်သိး အကသဂၢၢ်ယွၤ, ဒီးဆၢထၢၣ်ဝဲလၢကစၢၢ်အဖီလာ်န့ၣ် လီၤ.
18 ဒီးကစၢၢ်စံၤနါအိၣ်ဒီးမ့ၣ်အူခုၣ်လၢအလိၤဒီဖျၢၣ် ညါလီၤ. အဂ့ၢ်ဒ်အံၤ, ယွၤဟဲလီၤလၢအလိၤလၢမ့ၣ်အူ ကျါ, ဒီးအခုၣ်ထီၣ်ဒ်ဖၣ်ကပူၤခုၣ်အသိးန့ၣ်, ဒီးကစၢၢ် ဟူးဝးဒီဖျၢၣ်ညါနးမးလီၤ.
19 ဒီးတၢ်မၤအသးလၢ ကွဲၤအသီၣ်လဲၤထီၣ်ဒီးဆူၣ်ထီၣ် နးမး, ဒီးစီၤမိၤရှ့ကတိၤတၢ်, ဒီးယွၤစံးဆၢအီၤလၢတၢ် အကလုၢ်လီၤ.
20 ဒီးယွၤဟဲလီၤလၢကစၢၢ်စံၤနါအလိၤ လၢကစၢၢ်ဒီခိၣ်န့ၣ်, ဒီးယွၤကိးထီၣ်စီၤမိၤရှ့ဆူကစၢၢ် အဒီခိၣ်န့ၣ်, ဒီးစီၤမိၤရှ့လဲၤထီၣ်ဝဲလီၤ.
21 ဒီးယွၤစံးဘၣ်စီၤမိၤရှ့, လဲၤလီၤဒုးပလီၢ် ပှၤဂီၢ်မုၢ်အ သးတက့ၢ်. ကမၤဘၢၣ်ဖျိဘၣ်ဖုးတၢ်ဆူ ယွၤအအိၣ်ဒ် သိးအကကွၢ်တၢ်, ဒီးကသံဘၣ်ဖုး လၢအကျါအါဂၤ လီၤ.
22 ဒီးမ်ပှၤလုၢ်တၢ်အဒိၣ်တဖၣ်လၢအဟဲဘူးစ့ၢ်ကီး ဒီးယွၤ, မၤစီဆှံအသးတက့ၢ်. ယွၤကမၤဖျိဆူၣ်ဘၣ်ဖုး တၢ်ဆူအအိၣ်လီၤ.
23 ဒီးစီၤမိၤရှ့စံးဘၣ်ယွၤ, ပှၤဟဲဆူကစၢၢ်စံၤနါ တသ့ ဘၣ်. အဂ့ၢ်ဒ်အံၤ, နအုၣ်နသးလၢပမဲာ်ညါဒီးစံး, ပာ်တၢ်ကရၢလၢကစၢၢ်, ဒီးပာ်စီဆှံအီၤတက့ၢ်န့ၣ်လီၤ.
24 ဒီးယွၤစံးဘၣ်အီၤ, လဲၤတ့ၢ်, က့ၤလီၤတက့ၢ်. ဒီးန ကဟဲက့ၤထီၣ်, နဲဒၣ်ဒီးစီၤအၤဟရိၣ် အိၣ်ဒီးနၤလီၤ. ဘၣ်ဆၣ်ဒီးဒ်သိးအကဟဲဆူယွၤအအိၣ်ဒီး, မ်ပှၤလုၢ် တၢ်အဒိၣ်ဒီးပှၤဂီၢ်မုၢ်အသုတမၤဘၢၣ်ဖျိတၢ်တဂ့ၤ. အ တၢ်ကမၤဖျိဆူၣ်ဘၣ်ဖုးတၢ်ဆူအအိၣ်လီၤ.
25 ဒီးစီၤမိၤရှ့က့ၤလီၤဆူပှၤဂီၢ်မုၢ်အအိၣ်, ဒီးစံၣ်တဲၤတဲ လီၤတၢ်လၢအီၤလီၤ.