3
1 တၢ်အခ့အခါအိၣ်ဝဲလၢ ကယဲၢ်တၢ်တမံၤလၢ်လၢ် အဂီၢ်, ဒီးအဆၢအကတီၢ်လၢကယဲၢ်တၢ်ကူၣ်တၢ်ဖး လၢမူခိၣ်အဖီလာ်အဂီၢ်လီၤ.
2 အကတီၢ်လၢပှၤကအိၣ် ဖျဲၣ်အဂီၢ်, အကတီၢ်လၢပှၤကသံအဂီၢ်, အကတီၢ်လၢ သူၣ်တၢ်အဂီၢ်, ဒီးအကတီၢ်လၢထဲးကွံာ်တၢ်လၢအသူၣ် အသးအဂီၢ်,
3 အကတီၢ်လၢတၢ်မၤသံတၢ်အဂီၢ်, ဒီးအ ကတီၢ်လၢတၢ်မၤဘျါက့ၤအဂီၢ်, အကတီၢ်လၢတၢ်မၤ လီၤပှီၢ်တၢ်အဂီၢ်, ဒီးအကတီၢ်လၢတၢ်မၤထီၣ်က့ၤတၢ် အဂီၢ်,
4 အကတီၢ်လၢတၢ်ဟီၣ်အဂီၢ်, ဒီးအကတီၢ်လၢ တၢ်နံၤအဂီၢ်, အကတီၢ်လၢတၢ်သးအုးအဂီၢ်, ဒီးအက တီၢ်လၢတၢ်ဂဲၤကလံၣ်အဂီၢ်,
5 အကတီၢ်လၢတၢ်ကွံာ် တ့ၢ်ကွံာ်လၢၢ်အဂီၢ်, ဒီးအကတီၢ်လၢတၢ်ပာ်ဖှိၣ်လၢၢ်အ ဂီၢ်, အကတီၢ်လၢပှၤကဖိးလိာ်သးအဂီၢ်, ဒီးအကတီၢ် လၢပှၤဖိးလိာ်သးကဆိတ့ၢ်အဂီၢ်,
6 အကတီၢ်လၢပှၤက ဃုန့ၢ်တၢ်အဂီၢ်,ဒီးအကတီၢ်လၢတၢ်ကဟါမၢ်အဂီၢ်, အ ကတီၢ်လၢပှၤဟံးဃာ်တၢ်အဂီၢ်, ဒီးအကတီၢ်လၢပှၤက ကွံာ်တ့ၢ်ကွံာ်တၢ်အဂီၢ်,
7 အကတီၢ်လၢပှၤကဖှီတၢ်အ ဂီၢ်, ဒီးအကတီၢ်လၢပှၤကဆးတၢ်အဂီၢ်, အကတီၢ်လၢ ပှၤကအိၣ်ဘှီၣ်ကလာ်အဂီၢ်, ဒီးအကတီၢ်လၢပှၤကက တိၤတၢ်အဂီၢ်,
8 အကတီၢ်လၢပှၤကအဲၣ်တၢ်အဂီၢ်, ဒီး တကတီၢ်လၢပှၤကသးဟ့တၢ်အဂီၢ်, အကတီၢ်လၢတၢ် ဒုးသုးအဂီၢ်, ဒီးအကတီၢ်လၢတၢ်အိၣ်ဃူအိၣ်ဖိးအဂီၢ် န့ၣ်လီၤ.
9 ပှၤလၢအမၤတၢ်န့ၣ်ဘၣ်ဘျုးလၢအမၤတၢ် တုၤအမၤဘှံးအသးအဃိန့ၣ်လၢမနုၤတမံၤလဲၣ်.
10 ယထံၣ်ဘၣ်လံတၢ်ဖံးတၢ်မၤလၢ ယွၤဟ့ၣ်လီၤပှၤက ညီဖိဒ်သိးအကမၤဝဲလီၤ.
11 ယွၤမၤကယဲၢ်တၢ်ခဲလၢာ် အိၣ်ဒီးအဃံအလၤလၢအကတီၢ်ဒၣ်ဝဲ, ဒီးပာ်တၢ်အထူ အယိာ်လၢအသးကံၢ်ပူၤ, ဘၣ်ဆၣ်ဒီးတၢ်လၢယွၤမၤဝဲ လၢအခီၣ်ထံးပၢၢ်လၢအကတၢၢ်န့ၣ် ပှၤကညီအနၢ်တ ပၢၢ်ဘၣ်နီတဂၤဘၣ်.
12 လၢပှၤကညီသးခု, ဒီးမၤတၢ်ဂ့ၤ တစိၤဒၣ်အီၤအမဲာ်ညါန့ၣ် ယသ့ၣ်ညါလၢတၢ်ဂ့ၤအဂၤ တအိၣ်ဘၣ်လၢအဂီၢ်နီတမံၤဘၣ်.
13 လၢပှၤကညီကိးဂၤ ဒဲးကအီၣ်တၢ်, ဒီးအီတၢ်, ဒီးမုာ်လၤတၢ်ဂ့ၤလၢအမၤတၢ် ခဲလၢာ်အပူၤန့ၣ်, မ့ၢ်ယွၤအတၢ်ဟ့ၣ်စ့ၢ်ကီးလီၤ.
14 ယ သ့ၣ်ညါလၢကယဲၢ်တၢ်လၢ ယွၤမၤဝဲန့ၣ်ကအိၣ်ဝဲလီၤ ထူလီၤယိာ်လီၤ.တၢ်ကပာ်ဖှိၣ်ဒီးအီၤတသ့ဘၣ်, ဒီးတၢ် ကထုးကွံာ်လၢအီၤတသ့ဘၣ်နီတမံၤဘၣ်. ဒီးယွၤမၤဝဲ န့ၣ်ဒ်သိးပှၤကပျံၤတၢ်လၢအမဲာ်ညါလီၤ.
15 တၢ်လၢအ အိၣ်ခဲကနံၣ်အံၤအိၣ်တ့ၢ်ဝဲလၢပျၢၤ, ဒီးတၢ်လၢအကကဲ ထီၣ်န့ၣ်အိၣ်တ့ၢ်လၢပျၢၤလီၤ. ဒီးယွၤဃုတၢ်လၢအလဲၤ ပူၤကွံာ်တ့ၢ်န့ၣ်လီၤ.
16 မၤကဒီးတစု, ယကွၢ်တၢ်လၢမုၢ်အဖီလာ်,လၢတၢ်စံၣ်ညီၣ်အလီၢ်, ဒီးတၢ်တတီတလိၤအိၣ်ဖဲန့ၣ်,ဒီးဖဲတၢ်တီတၢ်လိၤအလီၢ်န့ၣ်တၢ်အၢတၢ်သီအိၣ်ဝဲလီၤ.-
17 ယစံးလၢယသးကံၢ်ပူၤ, ယွၤကစံၣ်ညီၣ်ပှၤတီ, ဒီးပှၤတ တီဘၣ်လီၤ. အဂ့ၢ်ဒ်အံၤ, အဆၢအကတီၢ်အိၣ်ဝဲဖဲန့ၣ် လၢကယဲၢ်တၢ်ကူၣ်တၢ်ဖးဒီး တၢ်ဖံးတၢ်မၤတမံၤလၢ် လၢ်အဂီၢ်န့ၣ်လီၤ.
18 ယစံးလၢယသးကံၢ်ပူၤ, မ့ၢ်လၢပှၤကညီဖိအဃိ, ဒ် သိးယွၤကမၤကွၢ်အီၤ, ဒ်သိးပှၤကညီကထံၣ်လီၤက့ၤအ သးဒၣ်ဝဲလၢအမ့ၢ်ဆၣ်ဖိကီၢ်ဖိလီၤ.
19 အဂ့ၢ်ဒ်အံၤ, တၢ်လၢအဘၣ်ပှၤကညီဖိန့ၣ်ဘၣ်ဆၣ် ဖိကီၢ်ဖိလီၤ. တၢ်တမံၤဃီဘၣ်အီၤလီၤ.ဒ်တမံၤသံဝဲအ သိးန့ၣ်အဝဲတမံၤသံဒ်န့ၣ်အသိး, အိၣ်ဝဲဒီးတၢ်သါတမံၤ ဃီလီၤ. ဒီးတၢ်ဂ့ၤန့ၢ်ဆၣ်ဖိကီၢ်ဖိန့ၣ်တအိၣ်ဘၣ်ဒီးပှၤ ကညီဘၣ်. အဂ့ၢ်ဒ်အံၤ, ကယဲၢ်တၢ်ခဲလၢာ်မ့ၢ်တၢ်ကလီ ကလီလီၤ.
20 လဲၤဝဲဆူအလီၢ်တပူၤဃီခဲလၢာ်, ကဲထီၣ် လၢဟီၣ်ခိၣ်အကမူၣ်, ဒီးကကဲထီၣ်က့ၤဟီၣ်ခိၣ်အက မူၣ်ခဲလၢာ်လီၤ.
21 ပှၤကညီအသးလဲၤထီၣ်ဆူထးခီ, ဒီး ဆၣ်ဖိကီၢ်ဖိအသး လဲၤလီၤဆူဟီၣ်ခိၣ်န့ၣ်မ့ၢ်မတၤသ့ၣ်ညါတဂၤလဲၣ်.
22 ဒီးယထံၣ်လၢတၢ်ဂ့ၤန့ၢ် ပှၤကညီသးခုလၢအမၤတၢ် အပူၤန့ၣ်တအိၣ်ဘၣ်.အဂ့ၢ်ဒ်အံၤ, အဝဲန့ၣ်မ့ၢ်အဂီၢ်လီၤ. အဂ့ၢ်ဒ်အံၤ, မ့ၢ်မတၤကဒုးဟဲက့ၤအီၤ ဒ်သိးအက ထံၣ်ဘၣ်တၢ်လၢအကကဲထီၣ်လၢအလီၢ်ခံတဂၤလဲၣ်.