လံာ်ဒၤနံးယ့လး.
1
1 ယူဒၤအစီၤပၤယဟိၤယါကံၣ် ကဲစီၤပၤအနံၣ်သၢနံၣ် တနံၣ်န့ၣ်ဘၤဘူၤလိၣ်အစီၤပၤနဘူၤကၤန့စၢ် ဟဲဝဲဆူယ ရူၤၡလ့ၣ်, ဒီးကဝီၤဃာ်အီၤလီၤ.
2 ဒီးယွၤဟ့ၣ်လီၤယူဒၤအစီၤပၤယဟိၤယါကံၣ် လၢအ စုပူၤ, ဒီးယွၤအဟံၣ်အဃၢၤအဃိၢ်တနီၤ, အဝဲဒၣ်စိာ်ဝဲ ဆူကီၢ်ၡံနၢ်အပူၤ, ဆူအကစၢ်အဟံၣ်ပူၤလီၤ. ဒီးစိာ်တၢ် အဃၢၤအဃိၢ်တဖၣ်ဆူ အကစၢ်အဟံၣ်အတၢ်ပာ်ဖှိၣ် အလီၢ်ပူၤလီၤ.
3 စီၤပၤမၤလိာ်ပှၤဒ့ဒံၣ်ဖိအခိၣ် စီၤအၤၡပနးဒ်သိးအက ဟဲစိာ်ပှၤအံၣ်စရ့လးဖိတနီၤနီၤ, စီၤပၤအချံအသၣ်ဒီးပ ဒိၣ်ဖးဒိၣ်အဖိ,
4 ဖိၣ်သၣ်ခွါလၢအမဲၣ်တအိၣ်ဘၣ်လၢအ လိၤ, ဒီးအက့ၢ်အဂီၤဂ့ၤ, ဒီးမၤတၢ်သ့လၢတၢ်ကူၣ်တၢ် ဆးခဲလၢာ်, ဒီးသ့တၢ်သ့ၣ်ညါ, ဒီးနီၤဖးတၢ်သ့ၣ်ညါအ ဆၢသ့, ပှၤလၢအဆၢထၢၣ်လၢစီၤပၤအနူၢ်ပူၤသ့, ဒ်သိး တၢ်ကသိၣ်လိအီၤလၢ ပှၤက့ၤစ့းဖိအလံာ်အလဲၢ်, ဒီးအ တၢ်ကတိၤအကျိာ်လီၤ.
5 ဒီးစီၤပၤမၤလိာ်န့ၢ်အီၤလၢ စီၤပၤအတၢ်အီၣ်ဝံၣ်တနံၤ အဂီၢ်တနံၤအဂီၢ်, ဒီးလၢအစပံးထံလၢအကအီဝဲ, ဒီးဒ် သိးပှၤကလုၢ်အီၣ်အီၤသၢနံၣ်, ဒီးလၢအလီၢ်ခံန့ၣ်ကဆၢ ထၢၣ်လၢစီၤပၤအမဲာ်ညါလီၤ.
6 ဒီးလၢအဝဲသ့ၣ်အကျါ ပှၤယူဒၤဖိတနီၤအိၣ်ဝဲ, စီၤဒၤ နံးယ့လး, စီၤဃနၤနယၤ, စီၤမံၡအ့လး, ဒီးစီၤဧစၤရ ယၤလီၤ.
7 ဒီးပှၤဒ့ဒံၣ်ဖိအခိၣ်ယုၢ်က့ၤအမံၤလီၤ. စီၤဒၤ နံးယ့လးန့ၣ်ယုၢ်က့ၤအမံၤလၢစီၤဘ့ၤလးတၡါစၢ်, ဒီးစီၤ ဃနၤနယၤန့ၣ်လၢစီၤၡၤဒရး, စီၤမံၤၡအ့လးန့ၣ်လၢစီၤမ့ၤ ၡး, ဒီးစီၤဧစၤရယၤန့ၣ်လၢစီၤဧဘ့ၤဒနကိၤလီၤ.
8 ဒီးစီၤဒၤနံးယ့လးပာ်တၢ်လၢအသးကံၢ်ပူၤ လၢအတ မၤတကဆှီဘၣ်အသးလၢစီၤပၤအတၢ်အီၣ်ဝံၣ်, ဒီးစပံး ထံလၢအအီဝဲန့ၣ်ဘၣ်. ဒီးဃ့ဝဲလၢပှၤဒ့ဒံၣ်ဖိအခိၣ်ဒ်သိး အသုတမၤတကဆှီဘၣ်အသးလၢအီၤတဂ့ၤလီၤ.
9 ဒီးယွၤဟ့ၣ်လီၤ စီၤဒၤနံးယ့လး လၢတၢ်ဘျုးတၢ်ဖှိၣ်, ဒီးတၢ်သးအိၣ်လၢပှၤဒ့ဒံၣ်ဖိအခိၣ်အမဲာ်ညါလီၤ.
10 ဒီးပှၤဒ့ဒံၣ်ဖိအခိၣ်န့ၣ် စံးဘၣ်စီၤဒၤနံးယ့လး, ယပျံၤ ယကစၢ်စီၤပၤလၢအမၤလိာ်န့ၢ်သုတၢ်အီၣ်ဒီး သုတၢ်အီ လီၤ. အဂ့ၢ်ဒ်အံၤ, ကထံၣ်သုမဲာ်လီၤသပှၢ်န့ၢ်ပှၤအိၣ်ဖျဲၣ် တကျဲဒီးသုတက့ၢ်မ့ၢ်အဘၣ်မနုၤလဲၣ်, ဒီးသုကဒုးဘၣ် ယခိၣ်လၢတၢ်ဒဲးဘးလၢစီၤပၤအစုပူၤလီၤ.
11 ဒီးစီၤဒၤနံးယ့လးစံးဘၣ်စီၤမ့လစၢ် လၢပှၤဒ့ဒံၣ်ဖိအ ခိၣ်ပာ်တ့ၢ်ဝဲလၢစီၤဒၤနံးယ့လး, စီၤဃနၤနယၤ, စီၤမံၡ အ့လး, ဒီးစီၤဧစၤရယၤအဖီခိၣ်,
12 မၤကွၢ်စာ်နခ့နပှၤဆံ ဆဲၣ်နံၤတက့ၢ်. ဒီးမ်အဟ့ၣ်လီၤပှၤလၢ တၢ်ဒိးတၢ်လၣ် လၢပကအီၣ်တၢ်, ဒီးထံလၢပကအီတၢ်တက့ၢ်.
13 ဒီးမ် အကွၢ်ပမဲာ်, ဒီးပှၤဖိၣ်သၣ်ခွါလၢအအီၣ်စီၤပၤအတၢ်အီၣ် တဖၣ်အမဲာ်ညါလၢနမဲာ်ညါတက့ၢ်, ဒီးဒ်နထံၣ်တၢ်အ သိးန့ၣ်မၤလၢနခ့နပှၤတက့ၢ်.
14 ဒီးကနၣ်အကလုၢ်လၢ တၢ်န့ၣ်တမံၤ, ဒီးမၤကွၢ်အီၤ ဆံဆဲၣ်နံၤလီၤ.
15 ဒီးလၢဆံဆံၣ်နံၤ အကတၢၢ်န့ၣ် အက့ၢ်အဂီၤဂ့ၤန့ၢ်, ဒီးအဖံးအညၣ်ဘီၣ်န့ၢ် ကယဲၢ်ပှၤဖိၣ်သၣ်ခွါလၢအအီၣ် စီၤပၤအတၢ်အီၣ်ဝံၣ်တက့ၢ်ခဲလၢာ်လီၤ.
16 ဒီးတၢ်မၤအသးလၢ စီၤမ့လစၢ်ဟံးထီၣ်ကွံာ် အတၢ် အီၣ်ဝံၣ်, ဒီးအစပံးထံလၢအကအီဝဲ, ဒီးဟ့ၣ်လီၤအီၤလၢ တၢ်ဒိးတၢ်လၣ်လီၤ.
17 တၢ်လၢ ဖိၣ်သၣ်ခွါလွံၢ်ဂၤန့ၣ် ယွၤဟ့ၣ်လီၤအီၤလၢ တၢ်သ့ၣ်ညါ, ဒီးအသူၣ်ဆးအသးဆးလၢကယဲၢ်တၢ်မၤ လိ, ဒီးတၢ်ကူၣ်သ့အကျါခဲလၢာ်လီၤ. ဒီးစီၤဒၤနံးယ့လး နၢ်ပၢၢ်ကယဲၢ်တၢ်ထံၣ်တၢ်လၢညါခီ, ဒီးတၢ်မံမီၢ်အက လုာ်ကလုာ်ခဲလၢာ်လီၤ.
18 ဒီးမုၢ်နံၤတဖၣ် အကတၢၢ်လၢ စီၤပၤမၤလိာ်တ့ၢ်လၢ ပှၤကဒုးဟဲနုာ်အီၤန့ၣ် ပှၤဒ့ဒံၣ်ဖိအခိၣ်ဒုးဟဲနုာ်အီၤလၢန ဘူၤကးန့စၢ်အမဲာ်ညါလီၤ.
19 ဒီးစီၤပၤန့ၣ် ကတိၤတၢ်ဒီးအီၤ, ဒီးပှၤဒ် စီၤဒၤနံးယ့ လး, စီၤဃနၤနယၤ, ဒီးမံၡအ့လး, ဒီးစီၤဧစၤရယၤအ သိးတအိၣ်ဘၣ်လၢ ပှၤခဲလၢာ်န့ၣ်အကျါဘၣ်. ဒီးဆၢ ထၢၣ်ဝဲလၢစီၤပၤအမဲာ်ညါလီၤ.
20 ဒီးကယဲၢ်တၢ်ဘၣ်ဃးဒီး တၢ်ကူၣ်သ့, တၢ်ကူၣ်တၢ် ဆးလၢစီၤပၤသံကွၢ်အီၤလၢအဂ့ၢ်န့ၣ် ထံၣ်န့ၢ်ဝဲလၢအဂ့ၤ န့ၢ်ကယဲၢ်ပှၤကွဲးလံာ်, ဒီးပှၤသ့တၢ်အူတၢ်သမူ လၢအ အိၣ်ဝဲလၢဘီမုၢ်အပူၤခဲလၢာ်ဆံဆဲၣ်စးတက့ၢ်လီၤ.
21 ဒီးစီၤဒၤနံးယ့လး အိၣ်ဝဲတုၤ စီၤပၤကိရ့ၣ်အနံၣ်ခီၣ် ထံးလီၤ.