22
(အၪ့ ၥ၈).
1 မုလနံၩလၧယဟိဝၩမၩဖီၩ့ဖျ့ၭအဝ့ၫ လၧအဒုၪအ ဒၩထီးအလူၬအစူၪဖၧၩ့, ဒဲလၧစစီလူၫအစူၪဖၧၩ့နီၪ, စဒၫဝံၭချဲၩ့ဆၧလၧယဟိဝၩ လၧထၭခိၪယီၩ အဆၧ ချဲၩ့တၭ, စံၭဝ့ၫဒၪ,
2 ယဟိဝၩမွဲယလဲၫ့, ဒဲယထိၬ, ဒဲဆၧမၩဖီၩ့မၩဖျ့ၭယၧၩ,
3 ယလိးမုအယွၩ, ယမိဒိၭနဲၩ့ယၥၭလၧအဝ့ၫ, ယထၩ့ဖံၭလဘံၪ့, ယဆၧထိးထဲၩ့တၩ့ထဲၩ့ယၧၩအ နိၩ့, ယတၨၭထၪ့ထီၫ, ယဖလ့ၬယၥၭအလး, ဆၧထိးထဲၩ့တၩ့ထဲၩ့ယၧၩ, နထိးထဲၩ့တၩ့ထဲၩ့ယၧၩလၧဆၧမၩဆီၪ့လီၫ.
4 ယမိကိၭထၪ့ယဟိဝၩ လၧအကြၨၭဘၪဆၧစံၭထၪ့ အၪ့အူၭ, ယမိဘၪဆၧမၩဖီၩ့မၩဖျ့ၭယၧၩ လၧယဒုၪယဒၩလီၫ.
5 ဆၧၥံၫအလပီၩဘွၩခိၪအီၪဝၬဖီၩ့ယၧၩ, ၦၡၩလတီၩဘၪအၪဘဲၫထံၫလုၬဘံၭဆၧအၥိၭ, မၩၥၭ မဲၪယၧၩ,
6 ဖျႃဖၧၩ့အဖျံၩလဖၪအီၪဝၬဖီၩ့ယၧၩ, ဆၧၥံၫအဖျံၩခွၩ့လဖၪပဒၩ့ထၬယၧၩလီၫ.
7 ထီးယဘၪဆၧခိဆၧဝီၩတၭ, ယကိၭထၪ့ယဟိဝၩ, တၭယမိအၪ့ယၫဆၧလၧယယွၩလီၫ. တၭမွဲအခိၭနၪဝ့ၫယလူလၧအနီးဖၧၩ့, တၭယအၪ့ယၫဆၧလ့ၩနုၬလၧအနါဖၧၩ့လီၫ.
8 တၭဂၪ့ခိၪၡိၩ့ၡိၬ, ဒဲဝၭထိၬဝ့ၫ, မူၭခိၪအခၪ့ထံၭလဖၪၥုၭအၥၭ, ဒဲၡိၩ့ၡိၬအၥၭ, အဂဲးဘဲၫယီၩအဝ့ၫဒၪၥၭထၪ့ဝ့ၫလီၫ.
9 မ့ၪခူၪစဲၪ့ထၪ့လၧအနၫဖၧၩ့, တၭမ့ၪလၧအနိၭအၪ့ဆၧ, မ့ၪအၧၩ့ဘၪဆၧဒုၭခဲၩထၪ့လၧအဝ့ၫလီၫ.
10 အဝ့ၫဒၪမၩကူၭလၩ့မူၭခိၪဆ့တၭ, ဂဲၫလၩ့, တၭဆၧခံၭၥၧၫ့အီၪဝ့ၫလၧအခၪ့ယၫၥၭဖၫ့လၬလီၫ.
11 အဝ့ၫထူၬခ့ၫရူၬလဂၩတၭ, ယူၩဝ့ၫ, တၭဆၧဒၪဘၪအဝ့ၫလၧလံၩအဒံၭၥံၪအဖၫ့ခိၪလီၫ.
12 ဆၧခံၭနီၪဒုၭကဲၪဝ့ၫလၧတဲၩအီၪဝၬဖီၩ့အဝ့ၫ, ထံၫၥၧၫ့, လၧမူၭဖိၭဖၫ့အဆၧအုၪ့တၪ့လီၫ.
13 လၧဆၧယုၩ့ယဲလၧအမ့ၬယၫအကၠီၩ့နီၪ, မ့ၪအၧၩ့ခဲၩထၪ့ဝ့ၫလီၫ.
14 တၭယဟိဝၩအၪ့မၧၫ့လၫ့ဎွံၩ့လၧမူၭခိၪ, တၭဆၧထၪ့ထီၫထုၬဒုၭၥီၫထၪ့အလူ,
15 အၪ့မၧၫ့လၩ့ဖျါလဖၪတၭ, မၩလၩ့ပြံၩပၩအဝ့ၫၥံၪး လၫ့ဝဲအဒံၭတၭ, မၩစၪအဝ့ၫၥံၪလီၫ.
16 တၭမၫဆမံၭအကၠီၪ့လဖၪနီၪဖျီၪထၪ့ဝ့ၫ, ဂၪ့ခိၪအခၪ့ထံၭလဖၪနီၪဘၪဆၧဒၪန့ဝ့ၫ, လၧယဟိဝၩအၪ့ၥီၪ့ဆၧအကၠီၩ့, အနၫဖၧၩ့ၥၪၡိၫဆၧလဖၧၫ့အကၠီၩ့လီၫ.
17 အဝ့ၫအၪ့မၧၫ့လၩ့ဆၧလၧထၭလခီၫ မၩန့ထၪ့ယၧၩ, ထုၭထၪ့ခွံၬယၧၩလၧထံၫအၪအကျၩ,
18 အဝ့ၫမၩဖီၩ့ဖျ့ၭယၧၩလၧယဒုၪယဒၩအဆီၪ့လဂၩ, ဒဲလၧၦအမ့ၬလဲၩယၧၩလဖၪလီၫ. အဂဲးဘဲၫယီၩအဝ့ၫၥံၪဆီၪ့လၨၪလၧယဂးလီၫ.
19 လၧယဆၧနၭဆၧၡၪ့အမုနံၩနီၪ အဝ့ၫၥံၪပဒၩ့ထၬ ယၧၩလီၫ. မွဲလါနၫ့ယဟိဝၩမွဲဆၧဒိၭနဲၩ့အလးလၧယဂး,
20 အဝ့ၫဒၪၥိၫ့ထၪ့ယၧၩဆ့ ထီၩ့လၧအလးဖၭလဲလီၫ. အဝ့ၫဒၪမၩဖီၩ့မၩဖျ့ၭယၧၩ, အဂဲးဘဲၫယီၩဘၪအဝ့ၫ ဒၪအၥၭလၧယၧၩလီၫ.
21 ယဟိဝၩဖ့ၪလၫ့ကၪယၧၩ ဘဲၫဆၧတီၩဆၧလီၩ့အ ၥိၭ, တၭဘဲၫယစူၪဆံၫ့အၥိၭနီၪ မွဲအဖ့ၪဆၧၫ့ယၧၩလီၫ.
22 အဂဲးဘဲၫယီၩ ယထီးန့ယူၭ ယဟိဝၩအဖၧၩ့ၥၭလ ဖၪယူၭ, ယမၩမၪယယွၩစဲၪ့ဒၪဝ့ၫအ့ၬ.
23 မွဲအဆၧစ့ၩရၫ့ထီးအလူၬ အီၪလၧယမ့ၬယၫအကၠီၩ့ တၭ,အဆၧမၪလူၬလဖၪနီၪယလလၨၪခၫ့ဖၬဘၪး
24 တၭယတီၩဆ့လၧအမ့ၬယၫ, ဒဲယထီးလၩ့ယၥၭလၧယဆၧအၧၩ့လီၫ.
25 အခိးမွဲဘဲၫနီၪတၭ, ယဟိဝၩဖ့ၪလၫ့ယၧၩ, ဘဲၫယ ဆၧတီၩဆၧလီၩ့အၥိၭဘဲၫယစူၪဆံၫ့ဎံၪလၧအမ့ၬယၫ အၥိၭနီၪလီၫ.
26 နမိယၫ့ၥၭၦလၧအယၫ့ၥၭဆၧလဖၪနီၪ, လၧၦအတီၩအလီၩ့အမ့ၬယၫနီၪ နမိအီၪက့ၪတီၩအီၪ က့ၪလီၩ့နၥၭ.
27 လၧၦအဆံၫ့အမ့ၬယၫနီၪနအီၪက့ၪဆံၫ့နၥၭ, လၧၦအကၪအမ့ၬယၫနီၪနအီၪက့ၪကၪနၥၭလီၫ.
28 တၭနမိမၩဖီၩ့မၩဖျ့ၭၦခမျၧးလၧအဘၪၡၪ့ဘၪနၭ, အ့ၪမွဲနမ့ၬၥၪအီၪလၧၦထၪ့ထီၫအလီၩ့တၭနမိဆၪ့လၩ့ ဝ့ၫလီၫ.
29 အဂဲးဘဲၫယီၩနမွဲယမ့ၪဒိၩ့ယဟိဝၩဧ့, တၭယဟိဝၩမိမၩဖၩ့ထၪ့ယဆၧခံၭလီၫ.
30 အဂဲးဘဲၫယီၩ မွဲလၧနၧၩနီၪ, ယစဲၪ့နုၬဖျီၫ့ၦၥုၭဖိၪ လဒီၪ့ယူၭ, လၧယယွၩလဂၩယဖုၫဖၬယူၭဆၧခိၪဒၧၩ့လီၫ.
31 ဆၧလၧယွၩနီၪအဖၧၩ့ၥၭလၧၫ့ထၪ့ဎွ့ၩထၪ့လီၫ. ယဟိဝၩအလူနီၪဘၪဆၧမၩဆံၫ့ဝ့ၫလီၫ. မွဲဝ့ၫလၧထၩ့ဖံၭလဘံၪ့လၧကယဲၦလၧအဒိၭနဲၩ့အၥၭ လၧအဝ့ၫလီၫ.
32 တၭအ့ၪလမွဲဘၪယဟိဝၩနီၪ မွဲပလၫကဲၪယွၩလဂၩ လဲၪ. လၧပယွၩအဖၫ့ခိၪနီၪ, လဲၫ့မွဲပလၫလဂၩလဲၪ.
33 ယွၩမွဲယဂဲးယဘၭ, ဒဲယစီၩ့ယမၩ့တၭ, အဝ့ၫဒၪ မၩဎွ့ၩယဖၧၩ့ၥၭလီၫ.
34 အဝ့ၫဒုၭကဲၪယခၪ့ဘဲၫခံၫဘၩ့မိအခၪ့အၥိၭ, တၭဒုၭဆၧၫ့ထုၪ့ယၧၩလၧယလးထၪ့ထီၫၥံၪ,
35 အဝ့ၫၥီၪ့လိၪယစူၪလၧယမိဒုၭဆၧ, ဘဲၫၥိၭချံၪထီးဘၩ့မိခါခွံၬဝ့ၫလၧယစူၪလီၫ.
36 တၭနဖ့ၪလၫ့ယၧၩလၧဆၧမၩဖီၩ့မၩဖျ့ၭအထၩ့ဖံၭ, တၭနၥၭဆၧၩ့နီၪမၩဒိၪထၪ့ယၧၩလီၫ.
37 နမၩလဲထၪ့ယခၫထၪ့ဆၧလဖၪ, တၭယခၪ့ဖျၬဘၪအ့ၬ.
38 ယလီၩ့ဆီးယဒုၪယဒၩတၭ, မၩဂၭဂီၩ့အဝ့ၫၥံၪ, ယလချႃၭမၩလူၬခွံၬဒံၭဘၪအဝ့ၫၥံၪတၭ, ယဂဲၫထဲၩ့ ထဲၩ့အ့ၬ.
39 ယမၩလူၬခွံၬယူၭအဝ့ၫၥံၪတၭ, ယဆ့ၭဘၪဝ့ၫ,ထီး အဝ့ၫၥံၪဂဲထုၪ့ၥ့ၪအ့ၬ. မွဲမၬ,လၩ့ထံၩဖါဝ့ၫလၧယခၪ့ ဖၫ့လၬလီၫ.
40 အဂဲးဘဲၫယီၩ နခဲးထူၬယယးဒံၩ့ လၧဆၧဂဲးဆၧ ဘၭလၧဒုၭၥုၭအဂး, နဒုၭခိၬလၩ့ၦလၧအဆၧၫ့ထုၪ့ထၫ့ဒၩယၧၩ လၧယဖၫ့ လၬ.
41 နဖ့ၪလၫ့ယၧၩလၧယဒုၪယဒၩအခိၬ, ဘဲၫၥိၭၦလၧအၥၭဂဲၫ့ယၧၩနီၪ ယမိမၩဂၭဂီၩ့ခွံၬအဝ့ၫ ၥံၪလီၫ.
42 အဝ့ၫၥံၪယိဝ့ၫလါနၫ့ ဆၧမၩဖီၩ့ မၩဖျ့ၭအီၪနးဂၩ အ့ၬ, လၧယဟိဝၩလါနၫ့ဘိၩ, မွဲအစံၭဆၧၫ့အဝ့ၫၥံၪအ့ၬ.
43 ထီးနီၪလဖၧၫ့ ယမၩလၩ့ဘျ့ၭအဝ့ၫၥံၪ ဘဲၫဂၪ့ခိၪ မုၬအၥိၭနီၪ, ဘဲၫဖၧၩ့ၥၭအကဖံၬအၥိၭယယဲးထဲးဝ့ၫနီၪ, ယဎွံၪပၩ အဝ့ၫၥံၪလီၫ.
44 နမၩဖီၩ့မၩဖျ့ၭယၧၩ, လၧယၡၩခမျၧးအဆၧအဲၪ့ လိၬၥံၪ, နအီၪက့ၪယူၭယၧၩလၧၦဆၨၩလဖၪအခိၪ, ၦခမျၧးလၧယလၥ့ၪယၫ ဝဲၩဘၪဝ့ၫနီၪ မိမၩယဆၧ လီၫ.
45 ၦလခီၫဘၩ့မုးဖိၪ မိကျဲၩ့မၩဆၪ့လၩ့အၥၭလၧယ ဖၫ့လၬ, ထီးအနါဂၧၫ့ဆၧလၧအနါတၭ, မိခိၭနၪယလူလီၫ.
46 ၦလခီၫဘၩ့မုးဖိၪမိလၩ့ယံၭခွံၬ, တၭမိၥၭမဲၪဆၧလၧအလးကထံၬအဖၧၩ့လီၫ.
47 ယဟိဝၩမၧၫ့ဝ့ၫတၭး မွဲယလဲၫ့ဘၪဆၧစံၭထၪ့အၪ့ အူၭဆံၭ. တၭယဆၧမၩဖီၩ့မၩဖျ့ၭအလဲၫ့အယွၩနီၪ, မွဲအဘၪဆၧအီၪက့ၪထၪ့ထီၫဝ့ၫဆံၭ.
48 ၦလၧအမၩဆၧၫ့ဆၧအၧၩ့လၧယဂးနီၪမွဲယွၩ, တၭမၩနၧၩ့မၩစၪၦခမျးလၧယဖၫ့လၬ,
49 တၭၥိၫ့ထၪ့ခွံၬယၧၩ လၧယဒုၪယဒၩအစူၪဖၧၩ့, နအီၪက့ၪထၪ့ယၧၩ ထီၫနဲၪ့ၦလၧအဂဲထုၪ့ထၫ့ဒုၪဒၩ ယၧၩး နမၩဖီၩ့ဖျ့ၭယၧၩ လၧၦမၩဆီၪ့ဆၧလဂၩနီၪလီၫ.
50 မၩအၥၭဘဲၫနီၪတၭ, ယမိစံၭထၪ့အၪ့အူၭနၧၩ, လၧၦဆၨၩလဖၪအကျၩ, ယဟိဝၩဧ့, တၭယမိၥံၫကျံၩအၪ့အူၭထၪ့နမံၩ့လီၫ.
51 မွဲဆၧမၩဖီၩ့မၩဖျ့ၭအတၨၭထီၫလၧအစဎွၩအဂး, ဒဲမၩဆၧအခိးအတၩ လၧအၡၩ ဒိၭဂုၪအၥၭလဂၩ, စဒၫဝံၭဒဲအချံၫအၥၪ လၩ့ဆိၩလၩ့ကၠၪလီၫ.