10
1 ဖိၪခွၫအီၪလၧဆၧကိၪ့ၥ့ၪနီၪ ဒုၭၥုၪ့ထိၬၥၭထိၬအဖါ တၭးအ့ၪမွဲဖိၪခွၫအဂီၩ့နီၪ မွဲအမိအဆၧၥုၪ့အုၭၥၭအုၭ လီၫ.
2 ဆၧအၧၩ့ဆၧၥၫ့အဆၧအီၪက့ၪကီၪ့နီၪ န့ကၩဆၧနး မံၩ့အ့ၬး အ့ၪမွဲဆၧတီၩဆၧလီၩ့ မၩဖီၩ့မၩဖျ့ၭ ဆၧၥံၫ လီၫ.
3 ၦအတီၩအလီၩ့နီၪ ယဟိဝၩဒုၭၥၭဝံလၩ့ဘဲၩအ့ၬး အ့ၪမွဲၦလတီၩလလီၩ့ဘၪ အဆၧၥၭကွံၩနီၪ, ခွံၬၡိၭခွံၬ ဝ့ၫဒၪလီၫ.
4 ၦလၧအမၩဆၧလၧအစူၪကၠႃၪ့အၥၭနီၪ ဘၪၡၪ့ဘၪ ယၬး အ့ၪမွဲၦအဎၭအစူၪနီၪ ဒုၭကဲၪထၪ့ဆၧလူဒိၪဎွ့ၩ ဒိၪလီၫ.
5 ၦလၧအအၪ့ထုၫ့ကီၪ့ဆၧ လၧဆၧခိခၫနီၪ မွဲဖိၪခွၫအီၪ လၧဆၧကိၪ့ၥ့ၪး အ့ၪမွဲၦလၧအမံၫမၪဝ့ၫ လၧကူၭဆၧ အထီနီၪ, မွဲဖိၪခွၫလၧအဒုၭအီၪထၪ့ဆၧမ့ၬမဲလီၫ.
6 ဆၧဆိၪဂ့ၩၥံၪ အီၪလၧၦတီၩၦလီၩ့ အခိၪဎွံၪလီၩ့း အ့ၪမွဲၦလတီၩလလီၩ့ဘၪအနိၭ မၩဘံၭခွံၬဆၧအၪ့ဂူၬ မၩဆီၪ့လီၫ.
7 ၦအတီၩအလီၩ့အဆၧနၪ့ထၪ့ထဲၩ့နီၪ, ဘၪဆိၪဂ့ၩ ဝ့ၫး အ့ၪမွဲၦလတီၩလလီၩ့ဘၪအမံၩ့နီၪ, မိအုၪဝ့ၫဒၪ လီၫ.
8 ၦလၧအၥၭအီၪ လၧဆၧကိၪ့ၥ့ၪနီၪ, မိထိးဆၧၫ့ဆၧ မၪလူၬၥံၪး အ့ၪမွဲၦအဂီၩ့ ချဲၩ့ကြၩ့ထမးဆၧနီၪ မိလၩ့ ထံၩဖါဝ့ၫဒၪလီၫ.
9 ၦလၧအလ့ၩဆၧလီၩ့လီၩ့နီၪ, လ့ၩဝ့ၫဂုးဂုးခၧၫ့ခၧၫ့း အ့ၪမွဲၦလၧအမၩကဲၪ့အဖၧၩ့ၥၭၥံၪနီၪ, ဆၧမိဒုၭဖျီၪ ထၪ့ဝ့ၫဒၪလီၫ.
10 ၦလၧအဖျၭအမ့ၬနီၪ ဒုၭၥုၪ့အုၭၥၭအုၭဆၧး ဒဲၦအ ဂီၩ့ချဲၩ့ကြၩ့ထမးဆၧနီၪ မိလၩ့ထံၩဖါဝ့ၫဒၪလီၫ.
11 ၦတီၩၦလီၩ့အနိၭနီၪ မွဲထံၫမၧၫ့အဖၧၩ့တၭး အ့ၪမွဲ ၦလတီၩလလီၩ့ဘၪအနိၭ မၩဘံၭခွံၬဆၧအၪ့ဂူၬမၩ ဆီၪ့လီၫ.
12 ဆၧမ့ၬလဲၩၥၭဂဲၫ့နီၪ ထိၪဂဲၩထၪ့ ဆၧအဲၪ့လိၬဆိၭ ချဲၩ့း အ့ၪမွဲဆၧအဲၪဆၧကွံၩ မၩဘံၭခွံၬ ဆၧမၪထီးအ လူၬလီၫ.
13 ၦလၧအအီၪလၧအၥုၪ့ဖၭၥၭဖၭနီၪ, ၦဒၪန့ဆၧကိၪ့ ဘၪကိၪ့ၥ့ၪ လၧအနိၭဖျံၩလဖၪအလီၩ့း အ့ၪမွဲၦလၧအ ၥုၪ့ဖၭအၥၭဖၭလအီၪဘၪနီၪ, နိၪဖျ့ၪအီၪလၧအချိၫ့ခိၪ အဂးလီၫ.
14 ၦကိၪ့ၥ့ၪလဖၪ အီၪက့ၪကီၪ့အဆၧၥ့ၪယၫး အ့ၪမွဲၦ အဂီၩ့အနိၭ လၩ့ဘူၭဆၧဂၭဂီၩ့ဂၭစၪလီၫ.
15 ၦၥထံၫ အစူၪလးခၪ့ခိၪနီၪ, မွဲအဒိၩ့ဂုးခၧၫ့ဝ့ၫတၭး ၦၡၪ့ဖိၪယၬဖိၪအဆၧဂၭဂီၩ့နီၪ, မွဲအဆၧၡၪ့ဆၧယၬ လီၫ.
16 ၦအတီၩအလီၩ့ အလံၩ့အလဲၫနီၪ, မွဲဆၧမၧၫ့တၭး ၦလတီၩလလီၩ့ဘၪ အဆၧအၪထၪ့နီၪ, မွဲဆၧဒဲၩဘၭ လီၫ.
17 ၦလၧအထီးန့ဆၧၥီၪ့ဆၧၥၫ့နီၪ, မွဲဆၧမၧၫ့အဖၧၩ့ၥၭ တၭး အ့ၪမွဲၦလၧအစဲၪ့ဒၪခွံၬဆၧအၪ့ၥီၪ့နီၪ, ဒုၭဂၭဖျိၭ ဆၧလီၫ.
18 ၦလၧအချႃၬဘံၭ ဆၧၥုၪ့ထၪ့ၥၭဂဲၫ့ လၧနိၭဖျံၩအ ဘျံၭအဘျၪနီၪ, ဒဲၦလၧအဒုၭဂၧၫ့ထၪ့ၥၩလၩ့ဆၧပရၧၫ့ အအၧၩ့နီၪ, မွဲၦအဂီၩ့လီၫ.
19 လၧဆၧချဲၩ့အၪထံၪအကျၩနီၪ, ဆၧအမၪလၡၩဘၪ တၭး အ့ၪမွဲၦလၧအပဒၩ့ အနိၭဖျံၩၥံၪနီၪ, မွဲၦကိၪ့ၥ့ၪ လီၫ.
20 ၦအတီၩအလီၩ့အဖျ့ၩနီၪ, မွဲစ့ၩလၧဆၧရွံန့ဝ့ၫး ၦ လတီၩလလီၩ့ဘၪအၥၭနီၪ, အဎွ့ၩၡၩခိၬလီၫ.
21 ၦတီၩၦလီၩ့အနိၭဖျံၩၥံၪ ဒုၭအၪ့ၦအၪဂၩး အ့ၪမွဲၦ အဂီၩ့ၥံၫဝ့ၫ လၧအၥုၪ့လဖၭ အၥၭလဖၭဘၪ အကၠီၩ့ လီၫ.
22 ယဟိဝၩ အဆၧဆိၪဂ့ၩနီၪ, ဒုၭအီၪထၪ့ဆၧလူဒိၪ ဎွ့ၩဒိၪတၭး အဝ့ၫဒၪအီၪက့ၪဎုၬ ဆၧၥုၪ့အုၭၥၭအုၭ လၧအနီၪဆ့အ့ၬ.
23 ၦအဂီၩ့မုၬလၩအၥၭ လၧအမၩဆၧအၧၩ့နီၪတၭး အ့ၪမွဲၦၥုၪ့ဖၭၥၭဖၭလဂၩနီၪ, အီၪလၧဆၧကိၪ့ဘၪကိၪ့ ၥ့ၪလီၫ.
24 ၦလတီၩလလီၩ့ဘၪအဆၧၥၭမဲၪနီၪ, မိဘၪအနၫ့ဆါ ဒၪဝ့ၫအလီၩ့တၭး အ့ၪမွဲၦတီၩၦလီၩ့ အဆၧဆိၫ့န့ဘၪ နီၪ, ယွၩမိဖ့ၪလၫ့ဝ့ၫဒၪလီၫ.
25 ဘဲၫလံၩၥဝံၭလ့ၩဖီၩ့ခွံၬဝ့ၫအၥိၭနီၪ, ဘဲၫနီၪၥိၭၦလ တီၩလလီၩ့ဘၪ အီၪလၧၩ့အ့ၬး အ့ၪမွဲၦတီၩၦလီၩ့နီၪ, မွဲဆၧအခၪ့ထံၭ အဆိၩအကၠၪလီၫ.
26 ဘဲၫဆၧဆဲၪ့ထံၫ လၧၥွၫၥံၪအဂးအၥိၭ, ဒဲဘဲၫမ့ၪခူၪ လၧမ့ၬၥၪၥံၪအဂးအၥိၭနီၪး ၦအကၠႃၪ့လဂၩနီၪ မွဲဘဲၫ နီၪၥိၭလၧ ၦလၧအအၪ့မၧၫ့ဝ့ၫအဂး ဆ့လီၫ.
27 ဆၧၥၭမဲၪ ယဟိဝၩ မိဒုၭအၪထၪ့မုနံၩမုနၩလဖၪး အ့ၪမွဲၦလတီၩလလီၩ့ဘၪ အနံၪ့အလၩၥံၪ မိလၩ့ၡၩ လခီၫလီၫ.
28 ၦအတီၩအလီၩ့အဆၧယိလါနီၪ, မွဲဆၧၥုၪ့ထိၬၥၭ ထိၬး အ့ၪမွဲၦလတီၩလလီၩ့ဘၪ အဆၧယိလါနီၪမိလၩ့ မါဝ့ၫဒၪလီၫ.
29 ယဟိဝၩအဖၧၩ့ၥၭနီၪ, မွဲထိၬလၧၦတီၩၦလီၩ့အဂး, အ့ၪမွဲကဲၪဆၧဂၭဂီၩ့ လၧၦမၩအၧၩ့ဆၧအဂးလီၫ.
30 အဆိၩဆိၩအကၠၪကၠၪနီၪ, ၦအတီၩအလီၩ့ၥုၭဘၪ အလးအ့ၬး အ့ၪမွဲၦလတီၩလလီၩ့ဘၪနီၪ မိအီၪဘၪလၧ ထံၫၥံၪခးၥံၪအဖၧၩ့အ့ၬ.
31 ၦအတီၩအလီၩ့အနိၭ ဒုၭအီၪထၪ့ဆၧကိၪ့ဘၪကိၪ့ ၥ့ၪး အ့ၪမွဲဆၧအၪ့လီၫအဖျ့ၩနီၪ မိဘၪဆၧထ့ၭထၪ့ခွံၬ ဝ့ၫလီၫ.
32 ၦအတီၩအလီၩ့အနိၭဖျံၩၥံၪ ၥ့ၪယၫဆၧလၧအဘၪ ဆၧအၥၭး အ့ၪမွဲၦလတီၩလလီၩ့ဘၪအနိၭ ချဲၩ့အၪ့ လီၫဆၧလီၫ.