5
1 ထီးနီၪလဖၧၫ့ လၧမုလနံၩနီၪ နးဒ့ၭဘိၫရၫ,ဒဲစအ ဘံၫ့နိၫအၫ့အဖိၪခွၫ စဘၫရၭၥံၫကျံၩဆၧတၭစံၭဝ့ၫဒၪ,
2 မွဲအံၫစရ့လၭဂၭဖျ့ၭဝ့ၫတၭ, ၦခမျၧးဖ့ၪလၫ့ခွံၬဒၪအနၫ့ဆါၥံၪတၭ,
စံၭထၪ့အၪ့အူၭယဟိဝၩဆံၭ.
3 ခိၭနၪ, စဎွၩၥံၪဧ့, ဒိၭနၥံၪအနါ, ၦဒိၪၥံၪဧ့, ယဝ့ၫဒၪယီၩယမိစံၭထၪ့အၪ့အူၭယဟိဝၩ,
ယမိၥံၫကျံၩထၪ့ယဟိဝၩ အံၫစရ့လၭအယွၩလီၫ.
4 ယဟိဝၩဧ့, လၧနစဲၪ့ထၪ့ခွံၬလၧစံအၫ, လၧနလ့ၩထၪ့ခွံၬလၧအံဒၧၫ့ အဆၧပျၩ့ဖၧၩ့နီၪ,
ဂၪ့ခိၪဝၭၡီၩ့ၡိၬဝ့ၫ, ဒဲမူၭခိၪဒုၭလၩ့ဆၩ့ဆၧ,
ဒဲဆၧအုၪ့ဒုၭလၩ့ဆၩ့ထံၫဆ့လီၫ.
5 ခိၪလီၩ့ထိၩ့ချိၬဖံၪထၪ့ခွံၬ လၧယဟိဝၩအမ့ၬယၫ, စဲနၫနီၪဒၪလ့ၬ လၧယဟိဝၩ အံၫစရ့လၭအယွၩအမ့ၬ ယၫလီၫ.
6 လၧစအၫနၭအဖိၪခွၫစၡၫမဂၫအမုနံၩ, လၧနးယၫ အ့လၭအမုနံၩလဖၪအဘိၩ့ဆၧၩ့နီၪ, ဖၧၩ့မုလဖၪအီၪ ယူဝ့ၫ,တၭၦလ့ၩဆၧဖိၬဖၧၩ့ၥၭကဲၪ့ကီၪ့လဖၪနီၪလီၫ.
7 တဝၫ့လဖၪအီၪယူ, အီၪယူဝ့ၫလၧအံၫစရ့လၭအ ဖၧၩ့,ထီးယၧၩ, နးဒ့ၭဘိၫရၫဂဲထုၪ့, ထီးယဂဲထုၪ့, မိလဂၩလၧအံၫစရ့လၭအဖၧၩ့လီၫ.
8 အဝ့ၫၥံၪရွံန့အယွၩအၥၫ့လဖၪလီၫ. ထီးနီၪလဖၧၫ့ဆၧဒုၭၥုၭအီၪဝ့ၫလၧတရၫ့အထံၭး
ထၩ့ဖံၭလဘံၪ့မွဲဂ့ၩ, ဖၩ့လဘံၪ့မွဲဂ့ၩအီၪဖျီၪ
လၧအံၫစရ့လၭအၡၩလံလၬလဖၪအကျၩဆ့ဧၪ.
9 ယၥၭအီၪၦပၧၩ့ဆၧလၧအံၫစရ့လၭအကျၩ, ၦဖ့ၪလၫ့ခွံၬဒၪအနၫ့ဆါလဖၪ လၧၦခမျၧးအကျၩ,
စံၭထၪ့အၪ့အူၭယဟိဝၩဆံၭ.
10 ၦလၧအထူၬကၥ့ၪယီၩ့ဘွၩၥံၪဧ့, ၦလၧအဆၧၫ့နၩ့စ့ၩရၫ့ဆၧၥံၪဧ့,
ဒဲၦဖိၬဖၧၩ့မုၥံၪဧ့, ၥံၫကျံၩဆၧဆံၭ.
11 ဖီၩ့ဖျ့ၭလၧၦခၭဆၧဖိၪအၥီၫလၧၦဒုၪ့ထံၫအလးၥံၪ အဖၧၩ့း ထီးပမိလီၩလၩ့ယဟိဝၩအမၩဆၧတီၩဆၧလီၩ့,
အမၩဆၧတီၩဆၧလီၩ့ဘၪဆဲၫ့လၧတဝၫ့လဖၪလၧအံၫ စရ့လၭအကျၩ,
ထီးနီၪလဖၧၫ့ ယဟိဝၩအၡၩခမျၧး မိလ့ၩလၩ့လၧတ ရၫ့လဖၪနီၪလီၫ.
12 နၪ့ထၪ့, နၪ့ထၪ့, ဒ့ၭဘိၫရၫဧ့, နၪ့ထၪ့, နၪ့ထၪ့, ၥံၫကျံၩဆၧဆံၭ.
ဂဲထုၪ့, စဘၫရၭဧ့.
တၭၥိၫ့အၪ့မၧၫ့ဎီးဆၧလၧအအၪ့မၧၫ့ဎီးနၧၩ,
စအဘံၫ့နိၫအၫ့အဖိၪခွၫဧ့,
13 ထီးနီၪလဖၧၫ့ဒုၭပၧၩ့ ၦလၧအအီၪ လၩ့ထးလဖၪ, လၧၦဒိၪဖၭဒိၪလၧၦခမျၧးလဖၪအကျၩအဖၫ့ခိၪ, ယဟိဝၩဒုၭပၧၩ့ယၧၩ လၧၦၡၩအဆီၪ့လဖၪအဖၫ့ခိၪ လီၫ.
14 လၧစအံဖြံၫ့နီၪ အဝံအီၪအၪထၪ့ထၫ့ဒၩ အၫမလ့ၭ လီၫ. လၧနလးခဲၫ့စဘံၪ့ယမံၫ့ဧ့, အီၪလၧၦခမျၧးအကျၩ, လၧမၫခၧၫအဖၧၩ့နီၪၦပၧၩ့ဆၧလဖၪဂဲၫလၩ့,
လၧဇ့ၭဘလၧၫ့နီၪ ၦမၩန့ၦအဝံထၪ့နၬထၪ့ဆၧအနိၪ ထိၭလီၫ.
15 တၭၦဒိၪလၧအံစခၫအဖၧၩ့အီၪဝ့ၫလၧနးဒ့ၭဘိၫရၫ အၥိၭ, အံစခၫဒၪလ့ၬ, ဒဲစဘၫရၭနီၪဆ့လီၫ.
ဆၧအၪ့မၧၫ့အလ့ၩလၧအခၪ့ လၧဆၧဒၩဖၧၩ့နီၪလီၫ. လၧစရုဘံၫ့အဆၧအၪ့နၩ့ဖၭလဖၪနီၪ, အီၪကၩ့ကၩ ဆၧယိၬလၧအၥၭနီၪလီၫ.
16 နအီၪလၧၥိၪဖီၩ့အကျၩ, ဘဲၫၥိၭနမိခိၭနၪၥိၪဂၪ့ကိၭဝ့ၫနီၪ, မွဲဘၪလဲၪ.
လၧစရုဘံၫ့အဆၧအၪ့နၩ့ဖၭလဖၪနီၪ, ကိၪ့ဆၧဖၭဆၧ လၧအၥၭလဖၪဖၭဒိၪအီၪ,
17 ဂံလအၭအီၪဝ့ၫလၧယီၫဒၫ့ဝါလခီၫ, တၭစဒၫ့နီၪအီၪဝ့ၫလၧကဘၩ့ဖၧၩ့မွဲဘၪလဲၪ.
စအၭၡၧၫအီၪဝ့ၫလၧမၫဆမံၭနဲၩ့,
တၭအီၪဝ့ၫလၧအဆၧအိၩဖၧၩ့လဖၪလီၫ.
18 စဇ့ၭဘလၧၫ့မွဲၦခမျၧးလၧအလထီးလၩ့ဘၪအၥၭ ဖိးလၧဆၧၥံၫ, ဒဲစနၭၥလဲၫနီၪ လၧဆၧပျၩ့ဖၧၩ့ အလးထၪ့ထီၫအဖၫ့ ခိၪ.
19 စဎွၩလဖၪဂဲၫဒုၭၥုၭ, ထီးနီၪလဖၧၫ့ကၫနအၫ့အစဎွၩလဖၪဒုၭဆၧ,
လၧတအၫနၭလၧထံၫမဂံၭဒိၫအနဲၩ့တၭ,
အဝ့ၫၥံၪမၩန့စ့ၩနးဆံၭအ့ၬ.
20 ဆၧဒုၭဆၧလၧမူၭခိၪ, ၡၪၥံၪဖီၫၥံၪလၧဖၧၩ့မုဖၧၩ့နီၪဒုၭၥုၭထၫ့ဒၩစံစရၫ,
21 ထံၫချိၬကံၡၧၫ့အထံၫမၩလၩ့ဘံၭခွံၬဝ့ၫ, ထံၫချိၬလၧဖျိၩ့, ထံၫချိၬကံၡၧၫဧ့,
နယဲးလၩ့ယူၭဆၧအဂဲးအဘၭ, ယၥၭဧ့,
22 တၭကၥ့ၪအခၪ့မံၪထ့ဖၭလၧ အစဲၪ့ဆၧအကၠီၩ့တၭ, အကၥ့ၪအဆီၪ့လဖၪလၧအစဲၪ့ဆၧအကၠီၩ့လီၫ.
23 မွဲနၥံၪဘၪဆိၪအၧၩ့မံရီၭနီၪဆံၭ, ယဟိဝၩအၥီၫ့စံၭ ဝ့ၫဒၪ, ဆိၪအၧၩ့ၦၡၩဒိၩ့ဖိၪလဖၪနီၪလၧဆၧဆိၪအၧၩ့အဆီၪ့ နီၪဆံၭ.
အဂဲးဘဲၫယီၩမွဲအဂဲၫမၩဆၧၩ့ယဟိဝၩအ့ၬ,
မၩဆၧၩ့ယဟိဝၩထၫ့ဒၩၦအဆီၪ့နီၪအ့ၬ.
24 ၦကံၫ့နဲၭဖိၪစဟံဘၧၫအမၫနးယၫအ့လၭနီၪ, မွဲအဘၪဆၧဆိၪဂ့ၩလၧၦမုၪလဖၪအဖၫ့ခိၪဆံၭ.
မွဲအဘၪဆၧဆိၪဂ့ၩ အၪနဲၪ့ၦမုၪလၧတဲၩဖၧၩ့လဖၪ ဆံၭ.
25 အဝ့ၫဒၪအၪ့ကံၩ့ထံၫတၭ, ဖ့ၪလၫ့ဝ့ၫလၧဆၧနူထံၫး ဂဲၫဆိၬဆၧနူထံၫလၩ့ဒၭလၧၦဒိၪအထွ့ၫအဖၧၩ့,
26 အီၪက့ၪလၩ့အစူၪလၧနိၪဖျၭနီၪ, တၭအစူၪထွ့ၪလၧၦမၩဆၧၥ့ၪအစၭခုၫအလီၩ့,
တၭဒိၪစံစရၫလၧစၭခုၫ, ဒိၪအခိၪ,
တၭဆ့ၭဖျီၫ့အနါကံၭထံၭလီၫ.
27 အဝ့ၫဒၪၡီၫ့လၩ့လၧၦမုၪအခၪ့ထံၭ, လၩ့ထံၩဖါဝ့ၫ, မံၫနၩ့ဝ့ၫ, ထီးၦမုၪအခၪ့ထံၭနီၪၡီၫ့လၩ့ဝ့ၫ, လၩ့ထံၩဖါဝ့ၫလီၫ.
ထီးအၡီၫ့လၩ့ အလးနီၪလၩ့ထံၩဖါၥံၫဝ့ၫဒၪ ထီးနီၪ လီၫ.
28 စံစရၫအမိယိဆၧလၧဆၧဖိး, ဒဲကိၭထၪ့လၧဆၧဖိး
အလဲၪ့ၥုၭလဂဲၫထီၩ့ဘၪနီၪအီၪယံၬယံၬမွဲဘၪလဲၪ.
အလဲၪ့ၥုၭဂဲၫၡီၫၡီမွဲဘၪလဲၪ.
29 အၦမုၪလၧအကိၪ့ဆၧၥ့ၪလဖၪစံၭဆၧၫ့ဝ့ၫ, မွဲမၬ, စံၭဆၧၫ့လၩ့ဒၪအနၫ့ဆါဒၪဝ့ၫ,
30 လဒၪန့ဘၪဆၧဧၪ, အၪ့နၩ့ဖၭယူၭဆၧအၪ့ဂူၬန့, မွဲဒံၭအ့ၬဧၪ.
ၦလဂၩဂၩအဂးနီၪ, ၦမုၪနၩ့လဂၩနံၫဂၩဆုၬဆုၬ,
လၧစံစရၫအဂးနီၪ, ဆၧအၪ့ဂူၬန့အကံၪကဲၩ့,
ဆၧအၪ့ဂူၬန့ လၧၦဆၭကံၪဝ့ၫ, လၧၦဆၭကံၪဝ့ၫလါ ခီၫလူၬ,
လၧၦအၪ့ဂူၬန့ဆၧလၧအခိၬၥံၪအလီၩ့နီၪလီၫ.
31 မွဲနဒုၪနဒၩထီးအလူၬဂၭဂီၩ့ဘဲၫနီၪဆံၭ, ယဟိဝၩ ဧ့, အ့ၪမွဲၦလၧအအဲၪဝ့ၫလဖၪနီၪ,
မွဲအအီၪဘဲၫမုမ့ၬလၧအလ့ၩထၪ့လၧအဂဲးဆီၪ့အဘၭ ဆီၪ့အၥိၭနီၪဆံၭ.
တၭထံၫၥံၪခးၥံၪအီၪပွံၭဝ့ၫအနံၪ့လံဆံၫလီၫ.