1 ယဒၪဘၪယဟိဝၩဆၧၫ့ထုၪ့ လၧဆၧလုလးအနဲၩ့ ထံၭတၭ,စံၭဝ့ၫဒၪ, ဒိၪတရၫ့အခိၪဘဲၫၥိၭအထုၪ့ၥံၪမိ ဝၭဝ့ၫဆံၭ. မၩခါလၩ့ဘျ့ၭဝ့ၫ လၧၦထီးအလူၬအဖၫ့ ခိၪဆံၭ.ယမိမၩၥံၫအဆၨၩအဆၬလၧနၭလီၫ. ၦလၧ အစဲၪ့ဖျိၭဝ့ၫလၧအကျၩနီၪ, စဲၪ့ထၪ့ခွံၬဘၪအ့ၬ. ဒဲၦ 2 လၧအမိစဲၪ့ဖီၩ့ဖျ့ၭနီၪ, ဖီၩ့ဖျ့ၭနးဂၩအ့ၬ.- အဝ့ၫၥံၪခုၪ့ ထီၩ့လၩ့ဝ့ၫလၧဖျႃဖၧၩ့လါနၫ့တၭ, ယစူၪမိမၩန့အဝ့ၫ ၥံၪထီးနီၪလီၫ. အ့ၪထၪ့, ထၪ့ဘၭမူၭခိၪလါနၫ့တၭ,ယ 3 စူၪမိဖီၪ့န့အဝ့ၫၥံၪထီးနီၪလီၫ.- အ့ၪအီၪက့ၪၥူၪအၥၭ လၧကၫမလၭအဒၩ့ခိၪလါနၫ့တၭ, ယမိအၪ့ဎၬန့ဒဲမၩန့ ခွံၬအဝ့ၫၥံၪထီးနီၪလီၫ. အ့ၪအီၪက့ၪၥူၪခွံၬအၥၭလၧ မၫဆမံၭယိၬအဖၧၩ့လါနၫ့တၭ, ယမိမၪလူၬဂူၥံၪ, မိ 4 အဲၪ့အဝ့ၫၥံၪလီၫ.- အ့ၪလ့ၩကဲၪဎီးလၧအဒုၪအဒၩအ မ့ၬယၫလါနၫ့တၭ, ယမိမၪလူၬနၭထီးနီၪတၭ, မိမၩ ၥံၫအဝ့ၫၥံၪလီၫ. ယမိကၠၪစိၩယမ့ၬၥၪလၧအဝ့ၫၥံၪအ လီၩ့လၧဆၧအၧၩ့အဂးတၭ, မွဲလၧဆၧဂ့ၩအဂးအ့ၬ. 5 အဂဲးဘဲၫယီၩမွဲဝ့ၫလၧယဟိဝၩ ဆၧၥုၭမုခမျၧးအယွၩ လၧအထိၭဘၪဂၪ့ခိၪနီၪတၭ, ဖံၪထၪ့ခွံၬဝ့ၫဒဲကယဲၦ လၧအအီၪဝ့ၫလၧအချိၫ့ထီးအလူၬနီၪဂၪ့ဝ့ၫလီၫ. တၭ မိထၪ့ဝ့ၫထၧၫ့ဘံၪ့ယၫ ဘဲၫထံၫမိၡါလုၬဘံၭအၥိၭ, ဒဲ 6 လၩ့ၥံၭခွံၬ, ဘဲၫခးအံဇံၭအထံၫမိၡါအၥိၭနီၪလီၫ.- ၦ လၧအတဲၩ့အဒူၭထၪ့ထီၫလၧမူၭခိၪ, ဒဲအီၪက့ၪလၩ့အ မူၭထံၭလၧဂၪ့ခိၪချိၫ့, ၦလၧအကိၭန့မၫဆမံၭထံၫနီၪ, ဒဲလူၫလၩ့ဝ့ၫလၧဂၪ့ခိၪချိၫ့နီၪ, အမံၩ့မွဲယဟိဝၩလီၫ.

7 နၥံၪမွဲဘဲၫၦအံၫၥအိပၠၪဖိၪအၥိၭ လၧယဂး,မွဲအ့ၬ ဧၪ,ၦအံၫစရ့လၭဖိၪၥံၪဧ့း ယဟိဝၩစံၭဝ့ၫဒၪ. ယဒုၭ စဲၪ့ထၪ့အံၫစရ့လၭ လၧခးအံဇံၭအဖၧၩ့နီၪ, ဒဲၦဖလံ ၡၫဖိၪလၧကၭပတီၫအဖၧၩ့, ဒဲၦအစံရအၫဖိၪလၧကၧၫ 8 နီၪ,မွဲအ့ၬဧၪ.- ယိခွါ,ကဆါယဟိဝၩကၠၪအမ့ၬၥၪလၧ ဆၧဒဲၩဘၭအဘၩ့အမုးအအီၪတၭ, စံၭဝ့ၫဒၪ,ယမိမၩ ဂၭဂီၩ့ခွံၬအဝ့ၫၥံၪလၧဂၪ့ခိၪချိၫ့နီၪး လါနၫ့တၭ, စယၫ ကူၭအဂံၪ့နီၪ ယမၩဂၭဂီၩ့လူၬထူၬဝ့ၫအ့ၬ. ယဟိဝၩ 9 စံၭဝ့ၫဒၪ.- အဂဲးဘဲၫယီၩ,ယိခွါ, ယမိမၪလူၬဆၧတၭ, ဂုၦအံၫစရ့လၭဖိၪ လၧၦကိၭဆၨၩဒ့ၭအကျၩ, ဘဲၫၦ ဂုဘုၪၥံၪဂူၫၥံၪလၧချဲၩဖၧၩ့အၥိၭတၭ, ဘုၪလဖျိၪ့လၩ့ 10 ထ့ၬဘၪလၧဂၪ့ခိၪအဖၫ့ခိၪအ့ၬ.- အ့ၪမွဲကယဲၦဆၧဒဲၩ ဘၭဖိၪလၧယၡၩခမျၧးအကျၩ လၧအစံၭဝ့ၫ,ဆၧအၧၩ့ နီၪလီၩ့ချႃၭန့ပၧၩအ့ၬ, ထီးအလူၬလဖၪနီၪမိၥံၫဝ့ၫလၧ နၭလီၫ.

11 ဆၧလၧမုလနံၩနီၪ ယမိဘိၭဆၧၫ့ထုၪ့စဒၫဝံၭအတဲၩ လၧအလၩ့ဎီးဝ့ၫတၭ, ယမိမၩဎွ့ၩအဆၧဘုၪ့ဖိးလဖၪ တၭ,ယမိမၩထၪ့ထဲၩ့ အဆၧလၩ့ဎီးနီၪ, ဒဲယမိတဲၩ့ 12 ထၪ့ထဲၩ့ဝ့ၫဘဲၫလၧမုနံၩလၧဖျိၩ့အၥိၭလီၫ.- ဘဲၫၥိၭ ဆၧမိန့ၥၫဆၧအီၪလၩ့ထးလၧအံဒၧၫ့, ဒဲကယဲၦဆၨၩ လၧဆၧဖျိၬဝ့ၫလၧယမံၩ့ ယဟိဝၩလၧအမၩဆၧယီၩ, 13 စံၭဝ့ၫဒၪလီၫ.- ယိခွါ, ယဟိဝၩစံၭဝ့ၫဒၪ, မုနံၩလဖၪ မိဘၪလၧၦထဲၫဆၧမိချႃၭန့ ၦကူၭဆၧၥံၪ, ဒဲၦလၧအ ယဲးလၩ့စဘံၭၥၪနီၪ ၦလၧအဎွံၪဆၧချံၪ,ဒဲခိၪလီၩ့ထိၩ့ ချိၬမိဒုၭလၩ့ဆၩ့စဘံၭထံၫအၥၫ့တၭ, ဆၧစီၩ့ခိၪထီး 14 အလူၬမိဖံၪထၪ့ခွံၬလီၫ.- ယမိဒုၭဂဲၫထဲၩ့ယၡၩခမျၧး အံၫစရ့လၭလၧအလ့ၩကဲၪဎီးတၭ, အဝ့ၫၥံၪမိတဲၩ့ထၪ့ ထဲၩ့ဒိၩ့အီၪယူလဖၪတၭ, မိအီၪဝ့ၫလၧအဖၧၩ့တၭ, မိၥုၪ့လၩ့စဘံၭမုအလးလဖၪ, ဒဲမိအီၩအစဘံၭထံၫ တၭ,မိမၩကျိၭလဖၪနီၪ, ဒဲမိအၪ့အဆၧၥၪလဖၪဆ့ 15 လီၫ.- အဂဲးဘဲၫယီၩ ယမိၥုၪ့အဝ့ၫၥံၪလၧအခးဒၪဝ့ၫ အဖၧၩ့တၭ, ဆၧထ့ၭထၪ့ခွံၬလၧၩ့အဝ့ၫၥံၪ လၧအခး လၧယဖ့ၪလၫ့ဝ့ၫနီၪ အဖၧၩ့အ့ၬ. ယဟိဝၩနယွၩ စံၭ ဝ့ၫဒၪ.