16
Dawi yahge Ziba
1 Dawi gas boms thyoh dvtsiq lai loh lyis Mephiboshet dah jyeidwis Ziba gas mauhlyihzoe aiq tu mha ohlhyoq aiqxo, zvbiq kyuk dvxo dyoms, maiphang shih dvxo dyoms yahge zvbiq shohyeis thung dvthung wons las nyang yah los xauhgoh.Ref 16.1: 2Sa 9.9-10
2 Hwankti Ziba lyis nyei zis gas, Haih zis gas cha xiklyis lah, ge.
Ziba gas, Mauhlyihzoe aiq doeu gas nah dius jens ji das zis, ohlhyoq yahge maiphang shih gas loyvm jens zo das zis, zvbiq eq mhanhdyvp mas nyungdaus bang shuk das xiklyis nghuot, ge toeuh.
3 Hwankti nyang lyis nyei zis gas, Mephiboshet khamha nyeis, ge.Ref 16.3: 2Sa 19.26-27
Ziba toeuh zis gas, Yerusalem mas nyeis. Nyang taiq zis gas, Khvnyhik ngos ngah vphauh Saulo dah hwankti munghdan doms yoh das ge, ge.
4 Hwankti Ziba lyis taiq zis gas, Hauh gvng mas, Ngos Mephiboshet yah sen zis dvnganh nvng lyis dyei, ge.
Ziba gas, Nhaiqshoqlang yhensain eh, ngos gas nvng kuot nhang mes zis cha nghuot laus eq vjangh yah kuot das, ge.
Shimei Dawi Lyis Nhoengh
5 Dawi yahge nyah dius jens Bahurim mas lai loh lyis vbusbih dvyuk nyamoq lyis nhoengh thuq los. Nyang gas Saulo yhenbang, Gera dah lo Shimei nghuot.
6 Nyang gas hwankti, hwankti dah zau jens yahge nyamoq lyis lhaink toh dah yomzains thoeuqzoe jens dvnganh lyis lukzains yah doeuh.
7 Nyang Dawi lyis kaiq zis gas, Nvng dius sat soeu, nvng ma gis soeu, hei mhayah thuq loh aq.
8 Saulo yahge nyah yhenbang lyis sat dah yobos dvnganh lyis Yhensain ka nah uhloms thoq mas jweh nhang nyeis goeus. Nvng Saulo dah hwankti tank khauh, gvshih Yhensain ka hauh zis lyis nah lo Absalom lyis dyei goeus. Nvng dius sat soeu, thang thank lyis nvng kuot khyvlyis nvnyang doms xauh kham zo das, ge.
9 Zeruia dah lo Abishai sang zis gas, Haih khuih shei ngah yhensain hwankti lhyi chamus nhoengh das lah? Ngos nyah uhloms loh jenh thyet tyamp bah, ge.
10 Hwankti taiq zis gas, Zeruia dah lo tang eh, haih cho ka nah zomh yah ma sen? Yhensain ka ngos lyis nhoengh das xiklyis nyang lyis taiq toh lyis gas, ngos hank nghuot las nyang lyis tomp das lah, ge.
11 Tsai, Dawi Abishai yahge nyah zau dvyhamh lyis taiq zis gas, Ngah gungs mas yaus dah ngah lo gyingh yangh ngah kang lhyi xo yvlyis yoeuh aq. Hau Benyamin vkoq gas hauh thoq lyis yoh kuot. Nghuot goeus jungh, nyang nhoengh goeus jungh, Yhensain nyang lyis taiq toh.
12 Yhensain ka ngah nhaiqngis nyoqyaus chonoteNhaiqngis nyoqyaus cho ge yvmas Hebre mas gas Lhung cho, ge bos. lhyi yoeuh las khvnyhik nyang nhoengh gvng mas ngos lyis gis cho dyei mvbeh, ge.
13 Dawi gas nyah dius jens yah loh nyeis lyis, Shimei gas Dawi yah twi twi dvyuk dvjing loh las nhoengh zis yah Dawi lyis luk yah doeuh, tsohmop eq lhank.
14 Hwankti yahge nyah thang chank dah dius dvnganh gas nyungdaus las nyamoq Yodan lvngnoteGreek: Yodan lvng; Hebre: toeuqkhom mas jweh lyis daus tsain no nyeis.
Yerusalem mas Absalom
15 Hauh gyo lyis Absalom yahge nyah dius jens dvnganh gas Yerusalem mas jweh los; Ahithophe eq bos.
16 Dawi dah dyenschangh Arkhi dius Hushai eq Absalom jyank mas thyet thyet e lha kaiq taiq zis gas, Hwankti kang xing bas jungh, hwankti kang xing bas jungh, ge.
17 Absalom Hushai lyis taiq zis gas, Haih zis nah dyenschangh lyis jyehjuh kuot zis nghuot lhyeh? Nah dyenschangh yah chamus ma loh, ge.
18 Hushai toeuh zis gas, Ma nghuot, Yhensain yahge Israel jens dvnganh khyen yoeus soeu jyank mas ngos muhwons das oen nyeis.
19 Khasoeh nghuot laus eq ngos nvng lyis chamus ma phuqsoe vvng lah? Ngos gas nah uwus lyis pangh goeus las gvshih nvng lyis pangh das, ge.
20 Hauh thang Absalom Ahithophe jyank pheh xoeu lha nyang lyis nyei zis gas, Ngos cha kuot chah shih lah, ge.
21 Ahithophe nyang lyis taiq kyoh zis gas, Nah uwus yhen zungh das xiklyis toh khoq dah nyah nyinhungh jens jyank mas nvng wvng yhet aq. Housoeh lyis Israel dvnganh gas mehoq yoh tamp das cho ma bos lo shoq nvng nyang lyis maphauh manyang kuot goeus cho seq los das las, nyamoq nvng lyis pangh cho dyei das.
22 Housoeh nyamoq gas dvnganhmoq nyvng dah yhenkhung mha zvng kuot las Absalom ka hauh zvng mas nyah uwus dah nyinhungh jens jyank mas wvng yhet.Ref 16.22: 2Sa 12.11-12
23 Dawi kuot khoq teh Absalom eq Ahithophe dyei dah joeui lhyi yhung. Khasoeh ge lyis Ahithophe taiq dah dangkhonh khanghmuh gas Mangso dah nhuot masyah taiq dah dangkhonh teh joeui bos.