15
Absalom Gomloeus toq Cvvq
1 Hauh thang lhyi Absalom gas jeslhyingh dvkya yahge nyang jens wis toh las, nyah xik pheh wuih das dius oengci yuk lyis eq lhung toh.
2 Nyang gas nvpyau nvp noq yah toq las wus khomh pheh e loh. Dius jens hwankti jyank soetuon dyei das xiklyis los lyis, Absalom gas namoq khamha zis nghuot, ge gyangh nyei. Nyamoq gas nyamoq dah vkoq nyings gyangh taiq kyoh.
3 Absalom gyangh taiq das zis gas, Nvng jyoengh nyang soe zainsmuh dvkoeuq yoh. Hwankti nah soe lhyi gyo dyei das xiklyis dius ma yoh zis gas svsoh chah.
4 Ngos soetuon soeu toq nghuot lyis gas, dius jens nyamoq dah soe lhyi ngah jyank los taiq las, ngos nyamoq lyis jus cho dyei das, ge.
5 Housoeh dius jens nyang lyis paiq lyis, Absalom gas nyamoq lyis ma paiq nhang. Hauh gungsthaiq nyang nyamoq lyis nyah loq yah po lha bvlot tanh.
6 Nyang housoeh kuot las, Israel dius jens dvnganh nyah shot dap goeus.
7 NyeinoteGreek, Syriac 4 zvn: Hebre 40 zvn, ge bos. zvn dah thang lhyi Absalom hwankti lhyi taiq zis gas, Ngos lyis ngos Yhensain lhyi nyhen toh cho kuot nyuk das xiklyis Hebron mas Yhensain lhyi phudyei cho loh jenh kuot nhang aq.
8 Khasoeh ge lyis ngos Geshu mas nyeis uhlyis, Nyang ngos lyis Yerusalem mas shwih tauh loh lyis gas ngos Nyang lyis Hebron mas phudyei das oen ngos dangthoengh toh, ge.
9 Hwankti nyang lyis taiq zis gas, Gis goeus, nvng nyhen toh cho lhyi loh kuot nyhuk aq, ge. Housoeh las Absalom Hebron pheh loh.
10 Nghuot laus eq nyang houmha nyeis uhlyis, Nyang gas hwankti lhyi tyi dah gomloeus phung toq das xiklyis Israel mau khyiq khanghmuh mas tsoek yah loeuskyoh bang lyis nhang kat. Namoq lvbuh thwe xauhgyo yah dvyih Hebron mas Absalom hwankti bweh goeus oen zis namoq seq das, ge nyah loeuskyoh soeu nghap.
11 Nyang gas Yerusalem masyah dius aiq xo yuk lyis nyah boengh khyvlyis shwih loh, nghuot laus eq nyamoq nyah toeuqkhom lhyi ma seq.
12 Nyang phudyei cho kuot nyeis uhlyis, Dawi dah xamchangh jens mas dvyuk nghuot dah Gilo mas nyeis Ahithophe lhyi shwih nhang kat. Ma nyangh lyis gohtoeu dius nyoshoq Absalom jyank zain los las, hauh gomloeus toq cho ka yombos los.
Yerusalem masyah Phang
13 Loeuskyoh soeu dvyuk khanyhank ma nyangh lyis Dawi jyank mas los taiq zis gas, Israel jens dvnganh nvng lyis gomloeus toq das xiklyis Absalom yah dye tsoq toh goeus, ge.
14 Dawi nyah dius jens lyis jyonh zis gas, Yang dvlhain dvm phang chah, ma nghuot lyis gas thang gyoh tyamp das. Lvnyap thuq goh! Nyang ma jweh shih lyis yang wus masyah yoh thuq lyis gas, yang eq Yerusalem wus eq dyoqbis cho mhayah luiq das zis nghuot, ge.
15 Nyah joeui dyei bang toeuh zis gas, Ngamoq nvng yah dvgeh nghuot. Nvng gis thank oen nghamh zis kuot aq, ge.
16 Housoeh las hwankti yahge nyah yhenbang dvlhain dvm thuq loh. Nyang hwankti yhen yoeuh gomh das xiklyis nyah nyinhungh dvci yuk masyah lai las hank lyis eq ma nyhet toh khoq.
17 Hwankti yahge nyah dius jens gas khyei chank yah thuq loh las nyamoq wus thang mha loh no.
18 Housoeh nyamoq no zis gas cho she das Dawi dah jesphung ka nyamoq xik pheh lai loh das xiklyis nghuot. Hauh jesphung mha Dawi yah dvgeh Gat wus masyah los dah Giti jens khyuk xo yuk yahge hwankti dah gungszunghnoteHebre: Kerethi jens, Pelet jens bang tsain nghuot.
19 Hwankti ka Giti zau Itai lyis taiq zis gas, Nvng chamus ngamoq yah loh das? Nvng nah dius jens yah dvgeh hwankti Absalom jyank tauh loh aq, khasoeh oen lhyi nvng gas nah mau masyah khat thuq xauh soeu, Israel mas boengh duot nyeis soeu nghuot.
20 Nvng nyinaq shih dvjweh los soeu lhyi ngamoq yah dvgeh jyon yenh das xiklyis ngos nvng lyis jyonh vvng lah? Ngamoq khapheh loh das zis yangh ngos ma seq. Nah jesphung yah dvgeh tauh loh aq. Yhensain ka nyah mathank magons jyetdap cho yahge koptoq cho nvng lyis chixoeuq bas jungh,noteGreek: nvng lyis chixoeuq bas jung. Hebre: nvng yah loh bas jungh. ge.
21 Nghuot laus eq Itai hwankti lhyi phuk taiq zis gas, Yhensain nyang nyeis, nvng hwankti dwis nyeis zis yah dvyhangteh, shei laus yangh laus, cha bweh laus eq nvng hwankti yah dvgeh ngos loh das oen maukhi, ge.
22 Dawi doms taiq zis gas, Gis goeus, ngamoq yah dvgeh los aq, ge. Housoeh las Itai yahge nyah dius khyuk xo yuk yahge nyamoq dah yhenbang gas nyamoq yah dvgeh loh.
23 Hwankti yahge nyah thang chank bang lai loh uhlyis dius jens gas svsoh nhaiqkuk. Nyamoq gas Kidron Langhkhau lhyi lai khoq las mhanhdyvp pheh uhxoeu lha loh.
24 Abiatha yahge Zadok yahge Lewi jens gas Mangso dah Thanghchvp Kwi lhyi yoeus loh las cho yvm mas khyoq toh. Nyamoq gas dius dvnganh wus masyah dye thuq loh thang lhyi hauh Kwi lhyi doms dvng.
25 Dawi gas Mangso dah Kwi lhyi wus vkhau pheh doms dvng loh das xiklyis Zadok lyis taiq shet. Dawi taiq, Mangso bauh lyis gas, ngos Kwi yahge Zvng lyis nyvng das xiklyis Mangso ngos lyis doms shwih tauh los das.
26 Nghuot laus eq, nyang ngos lyis ma yhung lo lyis gas, nyah xiklyis gis thank khyvlyis nyang lyis kuot nhang aq, ge.
27 Phudyei Zadok lyis hwankti taiq kyoh zis gas, Yoeuh aq,noteGreek: yoeuh aq; Hebre: Nvng nyvng soeu lah, nghuot ya Nvng vnyvng lah. haih zis gas ngos toeuq cho nghuot. Nvng yahge Abiatha ka nah lo Ahima yahge Abiatha dah lo Yonathan yah dvgeh wus vkhau pheh tsoek yah tauh loh geh.
28 Ngos Yodan lvng yvmnoteHebre mhanhdyvp pheh loh cho. mas no las nah jyank mas dah loeus lyis langh das. Ngos mhanhdyvp pheh ma wvng loh shih lyis Yerusalem mas bweh cho lhyi ngos lyis seq nhang aq, ge.
29 Housoeh las Zadok yahge Abiatha ka Mangso dah Kwi lhyi Yerusalem pheh doms dvng loh las, nyamoq houmha nyeis.
30 Dawi gas Tsanlun boms pheh loh das cho chank yah ngaus las loh. Kukxi dah vlho khyvlyis yah nyah uhloms mas nghop las khyei chen suh loh. Nyang yah dvgeh nghuot dah dius jens eq uhloms mas nghop las ngaus zis yah nyamoq boms doq.
31 Dius dvyuk Dawi lyis taiq kyoh zis, Absalom yah dvgeh gomloeus toq bang mas Ahithophe bos, ge. Dawi gas, Yhensain eh, Ahithophe dyei dah joeui ka vkoh vpaq bweh bas jungh, ge dung.
32 Dius jens Mangso lhyi paiq dah joqyos Tsanlun Boms thyoh mas nyamoq jweh loh yah dvyih Dawi gas Arkhi wus mas dah Hushai ka nyang lyis langh nyeis zis loh nyvng. Hushai ka kukxi vlho khyvlyis nyah dyimis langchuiq tyamp, uhloms mas tsoh lhyauq toh.
33 Nghuot laus eq Dawi nyang lyis taiq kyoh zis gas, Nvng ngos yah loh nghuot lyis gas, ngah xiklyis yvwons duot das.
34 Yerusalem pheh tauh loh las Absalom lyis taiq kyoh aq, Xikpheh ngos nah uwus dah joeui dyei soeu nghuot zis yah dvyhangteh, gvshih nah joeui dyei soeu duot das, oen aq. Housoeh lyis nvng Ahithophe dyei dah joeui lhyi yoh thyoq tomp das.
35 Wus khau mha phudyei Zadok yahge Abiatha nyeis. Ngos lyis nyhik das ge dah sont cho lhyi nyah zomh lyis taiq kyoh aq.
36 Housoeh lyis nyah zomh gas nyah zomh dah lo Ahima yahge Yonathan lhyi yah ngos lyis xo lha cha bweh nyeis zis lyis taiq kyoh nhang das, ge.
37 Housoeh Dawi dah dyenschangh Hushai ka Yerusalem pheh tauh loh, Absalom jweh yah dvyih houmha jweh loh.