27
Dawi Philisti yah Tsoq
1 Nghuot laus eq Dawi nyah ehnyet mas taiq zis gas, Dvnyeih gas ngos lyis Saulo sat das. Housoeh las ngos Philisti mau pheh phang lhyi ngah xiklyis gis thank cho nghuot. Housoeh lyis Saulo ngos lyis Israel mau mas ma xo lo das las ngos luiq cho yoh das, ge.
2 Housoeh Dawi gas nyah dius khyukxo yah dvgeh toq las, Maok dah lo Gat hwankti Akhish jyank lvnyap goeu e.
3 Dawi yahge nyah dius jens gas hank eq hank yhenbang yah dvgeh Gat mas dah Akhish jyank mas nyeis. Yezrel wus mas dah Ahinoam ge soeu yahge Naba dah chauhmuh Khamel mas dah Abigai ge soeu Dawi dah yhensain nyhiq vzomh eq bos.
4 Housoeh Dawi gas Gat wus pheh phang loh cho Saulo lyis taiq kyoh los las nyang ma xo lo.
5 Dawi Akhish lyis taiq zis gas, Ngos nah xikkhonh mas nyoqnho yoh lyis gas hwankti wus mas nyeis das gungsthaiq, ngos lyis wus lo dvwus dyei aq, ge.
6 Akhish gas hauh nyeih lyis nyang lyis Ziklag wus dyei. Housoeh las Ziklag wus gas khvnyhik jweh shoq Yuda hwankti jens sain toh.
7 Dawi Philisti mau mas nyeis zis dvzvn lhamhmuh nyei khyvp nghuot.
8 Dawi yahge nyah dius jens gas, Geshu, Gerzi yahge Amalek dius jens lyis loh thyoq. Khasoeh ge lyis hauh bang gas gohlhain yah Shur pheh loh cho mautsung shot, Egutu jweh shoq nyeis bang nghuot.
9 Dawi gas hauh mau lyis thyoq las vbusbih vmesbih lyis vdwis ma nyhet toh sat, yvng, noeu, mauhlyihzoe gola-u yahge dyimis yoeus las Akhish jyank mas tauh jweh los.
10 Akhish taiq zis gas, Khvnyhik namoq khapheh loh zan, ge. Dawi gas, Yuda mau mautyi, Yeramel jens mau yahge, Ken mau pheh loh zan, ge.
11 Dawi gas, Dawi housoeh kuot ge Gat wus mas loeus loh hoeuh das dius ma bos lo shoq vbusbih, vmesbih dvyuk lyis eq ma toh lo. Housoeh nyang gas Philisti mau mas nyeis dvyoq gonh housoeh kuot.
12 Akhish eq Dawi lyis loms las taiq zis gas, Nyah vnyau Israel nyang lyis svsoh hoeng shoq kuot goeus. Housoeh las nyang vjangh ngos lyis phuqsoe nyeis lo das, ge.