26
Saulo lyis Aiq vlhain Lhuiq
1 Zip dius jens dvyhamh Gibea wus Saulo jyank mas los taiq zis gas, Dawi gas Yeshimon yah twi twi Hakhila jing mas tamh joq, ge.Ref 26.1: Chd 54 (Dang jyung)
2 Hauh thang lhyi Saulo toq las Israel mas khyen toh bang somh khyoengh yah Zip mhanhdyvp mas Dawi lyis xo das ge loh.
3 Saulo ka Yeshimon yah twi twi Hakhila jing, choyvm mas dvp thoeng toh. Dawi gas mhanhdyvp mas nyeis las nyang lyis chank khat cho seq.
4 Housoeh las Dawi gas joh yoeuh bang nhang kat yoeuh las Saulo jyoengh jweh los zis seq.
5 Hauh uhlyis Dawi toq las Saulo dvp thoeng dah joqyos mas jweh e. Saulo yahge Ner dah lo, nyah jeszau Abna yhet joqyos lyis Dawi nyvng. Saulo ka thoenkgus jesdvp gungs mas yhet las jeslo jens gas nyah vyvm vwi mas nghuot.
6 Dawi gas Hiti dius Ahimelek yahge Zeruia dah lo Yoab dah vnoeuh Abishai lhyi, Ngos yah Saulo dah dvp mas hank gyoh e das, ge lyis
Abishai ka, Ngos nvng yah gyoh e das, ge.
7 Dawi yahge Abishai nyenh lyis Saulo dah dvp mas wvng e lha, Saulo ka dvp gungs mas yhet joq, nyah lham ka nyah uhloms toeu, nyeisjvng mas tsuk toh, Abna yahge jeslo jens gas vyvm vwi mas nghuot zis e nyvng.
8 Abishai Dawi lyis taiq zis gas, Mangso ka nah jeswus lyis khvnyhik nah loq mas kyauh goeus. Housoeh las ngos hauh lham yah nyang lyis nyeisjvng mas dvlham lhyi yah jenh guons tsuk bah, aiq dvm ma noh, ge.
9 Dawi Abishai lhyi taiq zis gas, Nyang lyis vmhont, Yhensain dah coeu juot kham soeu lhyi zangh soeu lhyi Yhensain joeng das zis nghuot, ge.
10 Dawi taiq shih zis gas, Yhensain nyang nyeis zis yah dvyhangteh, Yhensain yah nyang lyis sat das, nghuot ya nyang jes mas gyoh las dyoqbis das, nghuot ya nyang mang las shei das.
11 Yhensain dah coeu juot zis xauh soeu lhyi ngah loq ma jweh shoq Yhensain tung toh. Gvshih nyah uhloms toeu mha dah lham yahge jeis jywang yoeus loh goh, ge.Ref 26.11: 1Sa 24.6
12 Dawi Saulo uhloms toeu mha dah lham yahge jeis jywang yoeus las nyah zomh Abishai tauh loh. Hank eq ma soh los, ma nyvng ma seq kat. Khasoeh ge lyis Yhensain nyamoq lyis yhetmuh muih nhang lha nyamoq yhet joq.
13 Housoeh Dawi gas langhkhau noq thyitvp we we gau dah jing thoq mas yap joq.
14 Dawi gas jeslo jens lyis eq, Ner dah lo Abna lyis eq kaiq zis gas, Abna eh, toq aq, ge. Abna phuk taiq zis gas,
Hwankti lhyi kaiq nhauh soeu nvng hank nghuot, ge.
15 Dawi Abna lyis taiq zis gas, Nvng thoeuqzoe ma nghuot lhyeh? Israel mas nvng teh zis hank nyeis? Housoeh lyis nvng nah yhensain hwankti lhyi chamus ma zungh? Nah hwankti lhyi sat das ge dius dvyuk wvng los.
16 Hai nvng kuot cho ma gis: Yhensain dah coeu juot zis xauh soeu, namoq dah yhensain lhyi ma zungh yvmvyah, Yhensain dwis nyeis zis yah dvyhangteh namoq gas shei mon. Hwankti dah uhloms toeu mha hwankti dah lham yahge jeis thuk joq ma joq yoeuh aq, ge.
17 Saulo ka Dawi dah thwe seq las taiq zis gas, Ngah lo Dawi eh, haih zis nah thwe nghuot lhyeh, ge lyis
Dawi gas, Nghuot, ngah yhensain hwankti eh, ge.
18 Nyang taiq zis gas, Ngah yhensain ka nah jyeidwis ngos lyis chamus chank xo yenh shih lah? Ngos cha kuot goeus? Ngos mas chah yobos bos?
19 Housoeh las ngah yhensain hwankti eh, gvshih ngah dang jenh gyo dyei aq. Yhensain ka ngos lyis tyixo das xiklyis nvng lyis jyonh lyis gas, nyang ngah phudyei lyis lhom yoeus bas jungh. Nghuot laus eq dius yah dvjyonh lyis gas nyamoq Yhensain dah nhoengh zis xauh bas jungh: khasoeh ge lyis nyamoq ngos lyis Yhensain dah vso maunyeis masyah gohtoeu mangso lhyi kyingh dvyoh paiq dah mau pheh khat tyamp.
20 Yhensain xikkhonh masyah we dah gohnyau mau mas ngos lyis vshei nhang. Israel hwankti ka khvlhaih dvdoeu lyis xo das xiklyis chamus los? Boms mas nghoqtoeuq lyis teh ngos lyis chamus chank xo lah, ge.
21 Saulo ka, Ngos cu goeus, ngah lo Dawi tauh los aq. Nvng khvnyhik ngah kang lhyi yu yvmvyah ngos nvng lyis jes ma kuot lo: yoeuh aq, ngos koh goeus, ngos svsoh cu goeus, ge.
22 Dawi phuk taiq zis gas, Hwankti dah lham lhyi yoeuh aq, loyvm dvyuk lyis los yoeus nhang aq.
23 Yhensain ka dan las lomluk bang lyis phauh shang. Yhensain ka khvnyhik nvng lyis ngah loq mas kyauh laus eq, nyah coeu juot zis xauh soeu nvng lyis ngos ma zangh thungh.
24 Housoeh las khvnyhik ngos nah kang lhyi yu dyei teh, Yhensain ngah kang lhyi yu las ngos lyis yaukyenh cho dvnganh masyah khyuot kat bas jungh, ge.
25 Hauh uhlyis Saulo Dawi lyis taiq zis gas, Ngah lo Dawi eh, nvng ngelhoq bas jungh. Nvng muhzains kuot las ung cho zainsmuh yoh das, ge.
Housoeh Dawi gas loh las, Saulo eq yhen pheh tauh loh.