11
Saulo Amon jens lyis Ung
1 Lhamhmuh dvkhyvp ko thang lhyi Amon hwankti Nahash gas Gilead mau Yabesh wus lyis zan das xiklyis nyah jesphung lhyi shwih las hauh wus lyis lhaink toh. Yabesh bang Nahash lyis taiq zis gas, Ngamoq yah thanghchvp toh goh, housoeh lyis, ngamoq nvng lyis ngamoq dah guon soeu khyvlyis lhom yoeus das, ge.
2 Nahash phuk taiq zis gas, Namoq dvnganhmoq dah loqyos nyoqjeih chet las Israel jens dvnganh lyis ngos yoh jwangh khau yah thanghchvp dvtoh das, ge.
3 Yabesh uhshe bang nyang lyis taiq zis gas, Ngamoq Israel mau gonh mas loeuskyoh bang nhang das zis nyhet nyeih dyei aq. Ngamoq lyis pangh das dius ma thuq los lyis gas ngamoq nah jyank mas somh kham das, ge.
4 Loeuskyoh bang gas Saulo nyeis Gibea mas jweh las dius jens lyis loeus kyoh. Dius jens dvnganh gas nghamhloms cho ma bos bang teh tsain kaiq ngaus.
5 Saulo ka yos masyah noeu komp los las nyei zis gas, Dius jens chamus kaiq ngaus, ge. Nyamoq nyang lyis Yabesh jens dah loeus tsain taiq kyoh.
6 Saulo hauh loeus xauhgyo lyis Mangso dah Dyos nyang lyis guon gvng mas, nyang nhaiqgis yo.
7 Nyang noeu dvkya yoeus zan las loeuskyoh bang loq masyah Israel dvmau gonh mas gvm kat zis yah taiq zis gas, Saulo yahge Samuel thang mha ma chank soeu dah noeu lyis heisoeh kuot das, ge hoeuh nhang.
Israel dius jens eq Yhensain cha toq kuot das ge gyuk las ehnyet dvlom yah dvyuk eq ma nyet lo dvnganh thuq e.
8 Saulo Bezek wus mas nyamoq lyis huom nhang, Israel jens somh sens, Yuda dius somh mons bos.
9 Yabesh masyah los dah loeuskyoh bang lyis nyamoq taiq zis gas, Phvnaq nyeihyo nyeih gungs buis ma toeu shih lyis pangh cho yoh das oen namoq dah dius lyis loh taiq aq, ge. Yabesh bang hauh loeus xauhgyo lyis svsoh tsain gaus.
10 Housoeh las Yabesh bang Nahash lyis taiq zis gas, Nvpyo ngamoq namoq jyank mas somh kham das, namoq bauh khyvlyis ngamoq lyis kuot geh, ge.
11 Hauh nyens Saulo ka dius jens lyis somh phung gvm las, nungs nvp lyis nyamoq jesphung mha wvng las Amon dius jens lyis zan. Nyeihgungs lyis nyamoq gas nyamoq lyis vboms dom sat goeus. Nyet bang gas nyang yuk nyang toeu dungs shih lvng gang phang loh goeus.
12 Hauh thang lhyi Israel jens eq, Saulo Hwankti ma kuot oeng ge sang bang khamha nyeis lah? Hauh bang lyis ngamoq lyis kyauh geh, ngamoq hauh bang lyis sat das, ge.
13 Saulo taiq zis gas, Khvnyhik dius dvyuk eq shei cho ma xauh das: khasoeh ge lyis khvnyhik Yhensain ka Israel jens lyis kyoeu kat goeus, ge.
14 Housoeh Samuel dius jens lyis taiq zis gas, Los geh, Giga wus mas loh las Saulo lyis hwankti khyvlyis dvlhain doms toqh goh, ge.
15 Housoeh nyamoq dvnganhmoq Giga mas loh las, gyingshang joqyos mas Saulo lyis hwankti toqh. Nyamoq Yhensain xikkhonh mas nyenstap jyungshuk phudyei. Saulo yahge Israel jens dvnganh svsoh gaus.