10
1 Hauh thang lhyi Samuel gas tsanlun coeu thuk yoeus las Saulo dah uhloms mas huot kat lho lha nyang lyis bvlot tanh las taiq, Yhensain ka nvng lyis nyah dius Israel dah guon soeu khyvlyis coeu juot dyei. Nvng ngah dius jens lyis guon las nyamoq dah jeswus dvnganh masyah gomh dyei das. Haih zis gas Yhensain nvng lyis nyah dius jens dah guon soeu khyvlyis khyen goeus dah kanghjyoeng nghuot.
2 Nvng khvnyhik ngos yah gang las Benyamin maukyo, Zelza joqyos mas dah Rakhel lop jweh lyis dius aiq yuk xauhgoh das. Nyah aiq yuk gas, Nvng xo dah mauhlyihzoe jens nyvng goeus. Nah uwus gas mauhlyihzoe lyis ma chiq, nvng lyis chiq las, Ngah lo xiklyis khasoeh kuot das au, ge nyei nyeis ge das.
3 Hou mhayah lai loh las Tabor mas gyingshang saiqzains mas jweh lyis beqlo somh doeu wons soeu dvyuk, ohlhyoq somh lhyoq wons soeu dvyuk, zvbiq jeis thuk wons soeu dvyuk ge, Bethel wus Mangso jyank mas phudyei loh dah dius somh yuk nvng yah xauhgoh das.
4 Hauh bang gas nvng lyis jhent las ohlhyoq aiq lhyoq dyei zis nvng xauh lhom yoeus das.
5 Hauh thang lhyi nvng Philisti dvp joq dah Mangso jing Gibeat Elohim mas jweh las wus jweh loh lyis toenk, kvp, khvlhank, baja muot las phon joq jing mhayah gyoh los dah lvpe jens dvphung yah xauhgoh das. Nyamoq gas lvpe pe nyeis das.
6 Hauh uhlyis Yhensain dah Dyos nah jyank mas nyetlos nyettant jweh las nvng nyamoq yah dvgeh lvpe pe zis yah nvng gohja bweh los das.
7 Nvng mas hauh vlho bweh los lyis Mangso nvng lyis uhshe khyvlyis kuot aq.
8 Nvng ngah xik pheh Giga mas gyoh loh langh das. Ngos nvng yah houmha xauhgoh las ngheq phudyei jyungshuk, nyenstap jyungshuk phudyei das. Ngos nah jyank mas jweh las nvng cha kuot das zis taiq shoq nyhet nyeih langh aq, ge.
9 Saulo Samuel jyank masyah tauh los lyis Mangso ka nyang lyis soengh choenk nhaiqlom vsaiq dyei. Housoeh nyang lyis Samuel taiq zis dvnganh hauh nyeih lyis nyang nyuk los.
10 Saulo yahge nyah jyeidwis Gibea mas jweh lyis, lvpe jens dvphung nyang yah xauhgoh. Mangso dah Dyos eq nyang lyis nyetlos nyettant guon tyamp las nyang eq nyamoq yah lvpe pe cho mas bos tyamp.
11 Saulo housoeh kuot nyeis zis lyis xikpheh nyang yah seq goh bang nyvng las nyamoq dvyuk yah dvyuk taiq goh zis gas, Kish dah lo chamus goeus au? Saulo eq lvpe duot goeus lhyeh, ge.
12 Houmha soeu dvyuk phuk taiq zis gas, Namoq gohtoeu lvpe jens lyis khasoeh nghamh goh lah? Nyamoq dah uwus moq gas hank hank nghuot lah, ge. Housoeh yvmvyah Saulo eq lvpe jens mas bos lhyeh, ge zis gas sangkhyangh bweh los.Ref 10.12: 1Sa 19.23-24
13 Nyang lvpe dye pe thang lhyi phon joq jing pheh doq loh.
14 Saulo dah phvthank nyang lyis eq nyah jyeidwis lyis eq taiq zis gas, Nah zomh khapheh loh, ge.
Nyang gas, Mauhlyihzoe jens loh xo: ma nyvng las Samuel jyank mas eq jweh khoq, ge.
15 Saulo dah phvthank gas, Nyang nvng lyis cha taiq kyoh? Ngos lyis taiq kyoh aq, ge.
16 Saulo nyah phvthank lyis taiq zis gas, Gaunyhauq doms nyvng goeus ge nyang ngah zomh lyis taiq kyoh, ge. Nghuot laus eq nyang hwankti bweh das ge nyang lyis Samuel taiq kyoh cho ka nyang nyah phvthank lyis ma taiq kyoh.
Saulo lyis Hwankti toqh
17 Samuel gas dius jens lyis Mizpa mha, Yhensain dah xikkhonh mas zophuom das xiklyis khi huom lha,
18 nyamoq lyis taiq zis gas, Yhensain, Israel dah Mangso heisoeh ge: Ngos namoq lyis Egutu masyah shwih los zis yah, Egutu bang loq masyah eq, namoq lyis gyvzaiq gyvnang dah dius nyau jens dvnganh masyah eq khyuot yoeus.
19 Ngos gas namoq lyis namoq dah ehnyet nyo cho dvnganh yahge yau cho dvnganh masyah khyuot yoeus, namoq dah Mangso nghuot. Nghuot laus eq khvnyhik namoq ngos lyis he tyamp las namoq xiklyis hwankti dyei aq ge ngos lyis sang. Housoeh yvmvyah dvkoq yah dvkoq, dvhuh yah dvhuh Yhensain xikkhonh mas tsain los geh, ge.
20 Housoeh Samuel gas Israel vkoq dvnganh lyis los nhang lha, Benyamin vkoq lyis Mangso khyen yoeus.
21 Benyamin vkoq mas Matri yhenbang lyis khyen yoeus, tsai houmha Kish dah lo Saulo lyis khyen oeng: nghuot laus eq nyang lyis nyamoq xo ma nyvng.
22 Housoeh las nyamoq gas Yhensain lhyi, Nyang houmha vlos lah, ge nyei.
Yhensain phuk taiq zis gas, Yoeuh aq, nyang kyahsoe toh jang khau mha tamh joq, ge.
23 Hauh uhlyis nyamoq Saulo lyis dius huom pheh loh wuih shwih los. Nyang gas nyhang lha dvnganhmoq gas nyah kohthoq nyhank dvbos yvlyis tsain nyvng.
24 Samuel dius jens lyis taiq zis gas, Haih soeu ka Yhensain khyen yoeus toh soeu nghuot. Yamoq mas nyang yah doeus soeu hank ma bos, ge. Dius jens dvnganh gas, Hwankti kang xing bas jungh, ge kaiq.
25 Samuel eq dius jens lyis hauh munghdan dah toeuh yahge thungh lyi taiq kyoh zis yah maussauh mas lhaih las gyingshang joqyos mas toh. Hauh thang lhyi nyang gas nyamoq lyis nyang toeu nyang yhen pheh nhang kat.
26 Saulo eq Gibea wus nyah yhen pheh loh. Mangso yah taiq kyingh dah yomsoq bos bangnoteGreek yomsoq bos bang: Hebre jesphung dvphung ka nyang yah dvgeh loh.
27 Nghuot laus eq coeuh kang bang dvyhamh taiq zis gas, Haih dius yuk yang lyis gis cho khasoeh yoh kuot dyei das? Nyamoq Saulo lyis diusngis khyoq las nyah jyank mas chah jyungshuk eq ma chi los. Saulo ka samlo dvnyeis.