18
Dawi dah Jesdvp Ung
(2Sa 8:1-18)
1 Hauh thang lhyi Dawi gas Philisti jens lyis loh doms zan ung lha Gat wus yahge hauh vyvm vwi wus jens lyis Philisti jens loq masyah yoeus.
2 Moab mau lyis eq zan ung lha, Moab jens gas Dawi dah loq o mha dius bweh los las khoengh kat.
3 Hauh thang lhyi Dawi gas Hamat mau nvm mas Zoba Hwankti, Siria dius Hadadezer lhyi zan, khasoeh ge lyis Hadadezer gas Uphrat lvng thoq pheh joq mau lyis nyang yoh guon das xiklyis yomkat nyeis.
4 Dawi gas nyah dah jeslhyingh 1,000, jeslhyingh ji bang 7,000 yahge khyei cho suh jeslo 20,000 yuk lyis nyhik yoeus loh. Nyang gas jeslhyingh 100 xiklyis nyang jens yoeus toh las nyet goeu lyis gas khyei gyi thyet tyamp.
5 Damasku mas dah Siria jens gas Zoba Hwankti Hadadezer lyis los pangh das xiklyis jesdvp nhang kat uhlyis, Dawi gas Siria dius 22,000 sat.
6 Housoeh Dawi gas nyamoq dah mau mas jesdvp toh las nyamoq gas Dawi lyis jons mus zis yah khoengh kat chah. Yhensain ka Dawi khalhye loh khalhye ung cho yoh nhang.
7 Hadadezer dah zau jens chi dah xing gos jens lyis Dawi Yerusalem mas yoeus los.
8 Hadadezer guon dah wus jens Tibhat yahge Kun mha dah thunk nyoshoq eq Dawi khyom yoeus los. (Thang pheh Yhenmuh xiklyis Solomon thunk jeis thomh, thunk zains yahge thunk yah kuot dah auh, khuq, muotlo teh dah jyauqzo jyauq shuk mas yhung vyhang lhyi hauh thunk yah kuot.)Ref 18.8: 1Hw 7.40-47; 2Ss 4.11-18
9 Dawi gas Zoba hwankti Hadadezer dah jesphung dvnganh lyis ung ge cho Hamat Hwankti Tou xauhgyo.
10 Housoeh las Tou ka nyah jeswus Hadadezer lyis Dawi zan ung yvmvyah, buisnoms kuot las jeshuh das xiklyis nyah lo Yoram lyis Dawi jyank mas nhang kat. Yoram gas ngwis kom, xing kom, thunk kom nyoshoq wons las loh.
11 Hwankti Dawi gas hauh vyhang lyis eq Edom, Moab, Amalek dius jens, Philisti jens yahge Amalek jens masyah yoeus los dah ngwis xing lyis eq paiq yvmas yhung das xiklyis kyauh.
12 Hauh thoq lyis ungwes Zeruia lo Abishai ka Coh langhkhau mha Edom dius jens lyis zan ung lha nyamoq mas dvmons xet khyoengh lyis sat.Ref 18.12: Chd 60 (Dangjyung)
13 Housoeh Dawi gas Edom dvmau gonh mas thoenkgus jesdvp toh las nyamoq gas Hwankti Dawi lyis jons mus. Yhensain ka Dawi khalhye loh khalhye ung cho yoh nhang.
14 Housoeh Dawi gas Israel mau gonh lyis guon las nyah dius jens dvnganh lyis jyoeng, dan khyvlyis yoeuh guon nyeis.
15 Zeruia lo Yoab gas jeszau zainsmuh, Ahilud lo Yehoshaphat gas comh soeu;
16 Ahitub lo Zadok yahge Abiatha lo Abimelek gas phudyei bang, Shawsha gas maussauh lhaih soeu;
17 Yehoiada lo Benaia gas Dawi dah gungszungh zau jens lyis guon soeu nghuot. Hwankti Dawi loloeu jens gas hwankti dah muh wons uhjyung jens nghuot.