17
Dawi jyank Nathan Loeus
(2Sa 7:1-17)
1 Gvshih Dawi gas nyah yhen mha nyeis. Dvnyeih gas, nyang Lvpe Nathan lhyi khi lha taiq, Yoeuh aq gvshih ngos gas Arit thyeh yhen mha lungh nyeis. Nghuot laus eq Yhensain dah Thanghchvp Kwi ka misseh zvng mas dvjoq, ge.
2 Nathan Dawi lyis taiq zis gas, Mangso ka nvng yah nghuot las nvng nah nhaiqlom mas bos zis dvnganh kuot aq, ge.
3 Nghuot laus eq hauh nyens lyis Mangso ka Nathan lhyi taiq.
4 Yhensain heisoeh ge oen ngah jyeidwis Dawi lyis taiq kyoh aq: Nvng gas ngos nyeis das Yhenmuh tsuk das soeu ma nghuot.
5 Ngos Israel jens lyis Egutu masyah shwih doq los nyeih masyah khvnyhik jweh shoq, ngos Yhenmuh mas khanhamp eq ma lungh ku, misseh zvng dvkoeuq mas vjangh nyeis las dvjoq masyah gohtoeu dvjoq pheh thuot yenh.
6 Israel dvnyau gonh yah thuot nyeis yenh dah joqyos khyiq khanghmuh mas ngah dius nyau lyis shwih gomh das uhshe soeu dvyuk yuk lyis, Namoq ngah xiklyis arit thyeh yhenmuh chamus ma kuot dyei oen dvkhonh eq ma taiq ku.
7 Housoeh las ngah jyeidwis Dawi lyis heisoeh taiq aq: Ngos Yomzains Yhensain heisoeh ge. Nvng ngah dius Israel lyis guon das xiklyis nvng yvng yoeuh nyeis, yvng zungs masyah ngos nvng lyis khyen yoeus.
8 Nvng khalhye loh khalhye ngos nvng yah dvgeh loh, nah jeswus dvnganh lyis nah xikkhonh masyah khat tyamp dyei goeus. Nyeisjvng thoq mas nyings hoeuh bang dah nyings teh ngos nah nyings lyis hoeuh nhang das.
9 Hauh thoq lyis ngos ngah dius Israel xiklyis joqyos toeuq toh las nyamoq lyis houmha khyei khyoq nhang lha, nyamoq gas nyamoq nyang joqyos, gau joqyos mas ma lop ma loeh yoh nyeis das. Xikpheh teh lhung dah dius nyau jens nyamoq lyis ma zaiq lo das.
10 Ngah dius Israel mas ngos toh dyei dah soetuon bang zaih lyis teh nyamoq lyis ma zaiq lo das. Ngos nah jeswus dvnganh lyis eq khyoq tyamp dyei das.
Hauh thoq lyis ngos nvng lyis taiq dah Yhensain ka nah xiklyis yhen dvlomnote 17.10 Yhen dvlom ge dah vjyuk gas Hwankti vkoq, ge mes tsuk dyei das.
11 Housoeh nvng gas mang las shei loh chah uhlyis nvng mas yaus dah lo jens mas dvyuk lyis ngos toeu shap las nyah munghdan lyis yombos nhang toh das.
12 Nyang gas ngah yhenmuh lyis tsuk soeu nghuot das. Ngos nyah hwankti vkoq lyis vcaiq vto goeng toenk nhang das.
13 Ngos nyah uwus duot las nyang ngah lo duot das. Nvng hwankti yoh bweh los das xiklyis ngos nah xik mas dah soeu, Saulo jyank masyah ngah pangh thuk cho yoeus tyamp teh nyah jyank masyah ma yoeus tyamp das.Ref 17.13: 2Kr 6.18; Heb 1.5
14 Ngos nyang lyis ngah dius nyau, ngah munghdan lyis vcaiq vto guon nhang das, nyah hwankti vkoq gas vcaiq vto joq das, ge.
15 Nathan ka Mangso nyang lyis chixoeuq goeus cho dvnganh Dawi lyis taiq kyoh.
Dawi Nhaiqshoqlang Dung
(2Sa 7:18-29)
16 Hauh thang lhyi hwankti Dawi gas Yhensain nyeis dah zvng khau mha wvng tsung lha shvmanh dung zis gas, Yhensain Mangso eh, ngos eq ngah yhenbang eq nvng kuot dyei goeus cho yah mon yih bang ma nghuot.
17 Gvshih kuot dyei goeus thoq lyis ma goh, jweh los dah zvnlom jens lyis ngah vnyau vshih xiklyis Yhensain Mangso eh, nvng dangthoengh dyei toh goeus. Ngos lyis phunk bos soeunote 17.17 Phunk bos soeu ge zis Hebre mas ma bvng teh nghamh nyvng.
18 Ngos cha thoq yoh taiq das lah! Nvng ngos lyis vlhomuh seq, nghuot laus eq nah jyeidwis nghuot dah ngos lyis nvng nyoqnho ngelang dyei shih.
19 Ngah xiklyis haih zis kuot zis yahge thang pheh ngah kuhxing cho ngos lyis chixoeuq zis gas nvng o cho yahge nah toeuqkhom nghuot.
20 Yhensain eh, nvng yah doeus dah Mangso, nvng mas lai las gohtoeu ma bos lo. Nvng kyingh Mangso nghuot zis ngamoq vjangh seq nyeis.
21 Nyeisjvng thoq mas Israel mau yah doeus dah mau ma bos. Yhensain eh, nvng Israel dius nyau lyis eq nvnyang dah dius nyau kuot das xiklyis jons duot masyah khyuot yoeus goeus. Nvng nah dius jens lyis Egutu mau masyah khyuot kat zis yah nvng nah nyings kuhxing nhang. Nvng mauhphoh dah mauh loqmuh kuot las nyamoq loh cho mha pahkai dah dius nyau jens lyis khat tyamp dyei.
22 Nvng Israel vnyau lyis vcaiq vto nah dius kuot las Yhensain eh, nvng nyamoq dah Mangso duot.
23 Yhensain eh gvshih gas nvng nah jyeidwis yahge nyah yhenbang dah cho nvng taiq dang vjangh goeng joq bas jungh, nvng taiq dang vgus doengs nhang aq.
24 Nah nyings hoeuh cho ka kuhxing bas jungh. Maukhung Jesphung Yhensain ka Israel thoq mas guon dah Mangso nghuot ge dius jens vcaiq vto taiq das. Nvng ngah hwankti vkoqnote 17.24 Hwankti vkoq ge zis dius jangh caiq ge mes lyis vjangh goeng joq nhang das.
25 Ngah Mangso eh, Ngos nah vnyau vshih jens lyis hwankti kuot nhang das, ge nah jyeidwis lyis chixoeuq yvmvyah nah jyeidwis gas nah xikkhonh mas haih shvmanh womh dung.
26 Yhensain eh, nvng gas Mangso nghuot, nvng nah jyeidwis lyis haih mauhphoh dangthoengh toh goeus.
27 Ngah vnyau vshih jens lyis shvmanh dyei das xiklyis ngos nvng lyis dung, housoeh lyis nyamoq gas nah nhaiqdoeus cho mha tsoq las gausyis nyeis das. Yhensain eh, nvng ngah vnyau vshih jens thoq mas nah shvmanh vcaiq vto joq das ge nvng dangthoengh toh goeus.