12
Benyamin vkoq
1 Dawi gas Hwankti Saulo jyank masyah phang lha Ziklag mas nyeis nyeis. Houmha nyah jyank los tsoq bang gas lyes las yoh loms dah jeslo jens nyoshoq nghuot.
2 Nyamoq gas Benyamin vkoq mas Saulo boekyis jens, loqwi loqyos nyo eq yoh baiq, luk eq yoh panh bang tsain nghuot.
3-7 Nyamoq dah uhjyung ka Gibea mas Shema dah loloeu tang Yoash yahge Ahiza nghuot.
Haih bang gas jeslo jens tsain nghuot:
Azmawet loloeu tang Yeziel yahge Pelet
Anathot mas Berakha yahge Yehu
Nyings hoeuh jeslo, Somhci yuk dah uhshe bang mas dvyuk nghuot soeu Gibeon mas soeu Ismaia
Gedera mas bang Yeremia, Yahaziel, Yohanan yahge Yozabad,
Harip mas bang Eluzai, Yerimot, Bealia, Shemaria yahge Shephatia
Kora mas bang Elkana, Ishia, Azarel, Yoezer yahge Yashobeam
Gedo mas Yeroham dah loloeu tang Yoela yahge Zebadia
Gad Vkoq mas
8 Haih zis gas, Dawi dah mhanhdyvp goengtoenk dah thoenkgus jesdvp mas nyeis uhlyis nyang yah los tsoq dah Gad vkoq mas nyings hoeuh, lyes dah jeslo jens dah nyings nghuot. Nyamoq gas gos lham chi cho mha lyes, khangkhyi jens teh yoeuh gyukphoh, boms mas dah lvlyo jens teh yvng bang nghuot.
9-13 Nyamoq dah zau vsoenk gas o mha dah nyings vzoh yah dvyhangteh nghuot: Eza, Obadia, Eliab, Mishmana, Yeremia, Atai, Eliel, Yohanan, Elzabad, Yeremia yahge Makbanai.
14 Gad vkoq mas haih bang mas dvyhamh gas dvkhyoengh guon zau jens nghuot las dvyhamh gas dvxo guon dah zau jens tsain nghuot.
15 Nyamoq gas Yodan lvng jeisje dah cangxeih vkhyvp lyis goeu las jeislvng yvm dah buisthuq buiswvng pa mha nyeis bang dvnganh lyis khat tyamp bang nghuot.
Benyamin yahge Yuda mas
16 Tsai, Dawi nyeis dah thoenkgus jesdvp mas Benyamin yahge Yuda dius jens gohtoeu dvphung doms tsain los.
17 Dawi nyamoq lyis zes das ge thuq los las taiq zis gas, Namoq ngos lyis pangh das ge nyenstap zis yah los lyis gas ngos lhom yoeus das; housoeh ma nghuot, namoq ngos lyis ngah jeswus loq mas kyauh das zis dvlos lyis gas, ngah loq mas cu zis cha ma bos yvmvyah, phauh thyeih moq dah Mangso ka hauh yvlyis seq las joeng das, ge.
18 Hauh uhlyis uhshe bang Somhci Yuk dah uhjyung duot los das soeu, Dawi jyank mas los bang mas dvyuk nghuot dah Amasai thoq mas Mangso dah Dyos jweh las taiq zis gas,
Yese lo Dawi eh, ngamoq nvng yah tsoq das.
Mangso nah shot pheh zan dyei yvmvyah
nvng eq nah thang chank bang eq vjangh ung los das, ge.
Housoeh las Dawi nyamoq lyis lhom yoeus zis yah nyamoq lyis jeszau jens toeuq toh.
Manase mas
19 Dawi gas Philisti jens yah dvgeh Hwankti Saulo lyis zan das zis jens loh nyeis lyis, Manase vkoq mas jeslo dvyhamh eq nyah jyank mas los. (Jyoengh oen lhyi nyang Philisti jens lyis ma pangh: khasoeh ge lyis Philisti hwankti jens gas nyang nyamoq lyis nyah dah yhensain cauh Saulo loq mas kyauh das ge chiq. Housoeh las nyamoq nyang lyis Ziklag pheh doms nhang kat.)
20 Dawi Ziklag pheh tauh loh lyis nyah thang mha chank los dah Manase jeslo jens gas, Adna, Yozabad, Yediael, Mikhael, Yozabad, Elihu yahge Zilethai nghuot. Nyamoq gas Manase vkoq mas khyoengh khyoengh guon bang nghuot.
21 Nyamoq gas khyanktau jesphung lyis khat tyamp zis yah Dawi lyis bos pangh, khasoeh ge lyis nyamoq gas womh dah jes thoeuqzoe jens tsain nghuot. Thang lhyi nyamoq Israel thoenkgus jesdvp mas jeszau jens bweh loh.
22 Nyeih yau nyeih shilo Dawi dah jesphung mha dius saiq wvng los las, ma nyangh lyis nyah jesphung ka, Mangso dah jesphung teh, jesphung zainsmuh bweh los.
Dawi Jesphung jens nyings
23-37 Heika Yhensain dah dangthoengh yah dvyhangteh, Dawi lyis Saulo dah joqyos mas hwankti kuot nhang das xiklyis, Hebron mas Dawi jyank jweh los, jeszan cho xuq toh goeus jeslo jens dah sonzoh nghuot:
Yuda: Jeszan das zis jesgungs gos lham chi jes thoeuqzoe jens 6,800 yuk;
Simon: jes muh mas vlhomuh xeik puot toh dius jens 7,100 yuk;
Lewi: 4,600 yuk;
Aron vkoq vshih, Yehoiada dah thang chank vbusbih jens: 3,700 yuk;
Jes womh zan loyvm, Zadok dah buisnoms jens: Uhshe vbusbih 22 yuk;
Benyamin (Saulo dah vhuh): vbusbih 3,000 yuk (Benyamin vkoq nyothyang ka Saulo lyis lomluk nyeis shih);
Ephraim: 20,800 yuk, nyamoq nyang vkoq mha nyings hoeuh lyih bang;
Buiswvng Manase: 18,000 yuk khyen zis xauh, Dawi lyis hwankti loh toh;
Isakha: 200 yuk uhjyung jens, yahge nyamoq dah vmingh o mha nyeis bang (haih uhshe bang gas vyoq shishenh lyis seqgyo las Israel jens khasoeh kuot vvng zis seq);
Zebulun: 50,000 yuk khamkhvv cho ma bos, jeszan lyes las jeszis toenk toenk bos dah loyangh jens;
Napthali: 1,000 yuk uhshe bang, yahge 37,000 yuk gos lham chi dah jeslo jens;
Dan: 28,600 yuk, jes muh seq wons bang;
Asher: 40,000 yuk, Jes muh seq las jes yoh zan bang;
Yodan lvng buisthuq pheh nyeis - Ruben, Gad yahge buisthuq Manase: 120,000 yuk, kyonhkhyi vja ja seq chi das xiklyis puot toh bang nghuot.
38 Hai jes yoh zan bang dvnganh gas Dawi lyis Israel hwankti toq das ge nhaiqlom dvlom kyingh yah xamxonh las Hebron wus mas tsain los. Nyet shih dah Israel dvnganh eq Dawi lyis hwankti toq das ge ehnyet dvyih dvyot bos.
39 Nyamoq dah boekyis jens gas nyamoq xiklyis cvvq toh goeus las nyamoq gas Dawi yah dvgeh somh nyeih zo shuk las nyeis.
40 Hauh thoq lyis vwi vyvm Isakha, Zebulun yahge Napthali jweh shoq mas nyeis bang gas mauhlyihzoe, gola-u, luzoe, noeu jens masyah zonoms - sunghso mons, lvhomp shih kyuk, zvbiq shih kyuk, zvbiq, tsanlun coeu thuq los. Nyamoq gas sat zo das xiklyis noeu phung eq yvng phung eq vbomsdom komp los. Haih zis dvnganh gas dvmau gonh, gausyis, ge chixoeuq cho nghuot.