11
Israel Yuda Hwankti
(2Sa 5:1-10)
1 Hauh thang lhyi Israel jens dvnganh gas Hebron wus, Dawi jyank mas los taiq zis gas, Ngamoq gas nah suih, nah shoh gyingh nghuot.
2 Lai loh goeus shishenh Saulo hwankti nghuot shih lyis yah nvng Israel jens lyis jeszan khyomp mas shwih goeus. Yhensain, nah Mangso eq, Nvng gas ngah dius Israel vnyau lyis shwih uhshe lha, nyamoq lyis guon soeu nghuot das, ge nvng lyis dangthoengh toh.
3 Housoeh Hebron wus mas Dawi gas Israel uhshe bang yah Yhensain xikkhonh mas thanghchvp toh. Samuel lyis yah Yhensain dangthoengh toh zis yah dvyhangteh, nyamoq gas Dawi lyis Israel hwankti kuot das xiklyis coeu juot dyei.
4 Dawi yahge Israel jens dvnganh gas Yebusi jens nyeis dah Yebu wus ge dah Yerusalem lyis loh zan.Ref 11.4: Yosh 15.63; Soe 1.21
5 Yebusi jens gas Dawi lyis, Nvng haih wus khau mha khanhamp eq ma yoh wvng das, ge. Nghuot laus eq Dawi gas nyamoq dah goengtoenk Zion wus lyis zan yoeus. Gvshih hauh wus lyis Dawi dah wus ge.
6 Dawi taiq zis gas, Yebusi jens lyis cangxeih zan soeu ka jeszau zains bweh das ge zis yah dvyhangteh, ungwes Zeruia dah loloeu Yoab gas shwih zan las jeszau zains muh bweh los.
7 Dawi gas hau goengtoenk dah wus mas loh nyeis. Housoeh las hauh wus lyis Dawi dah wus ge lui.
8 Nyang gas Milo masyah xi lha yvmlhaink yah yhen tsain tsuk toh. Yoab gas Yerusalem mas nyet shih zis lyis doms soq tsuk.
9 Dawi gas zes zes kuhxing los: khasoeh ge lyis Maukhung Jesphung Yhensain ka nyang yah nghuot.
Dawi Nyings Hoeuh Jeslo jens
(2Sa 23:8-39)
10 Haih zis gas Dawi dah nyings hoeuh jeslo jens dah nyings tsain nghuot. Nyamoq gas Yhensain dah dangthoengh yah dvyhangteh, Dawi hwankti bweh los das xiklyis Israel jens dvnganh yah dvgeh nyah jyank pheh bos chomp yomkat las hauh hwankti munghdan vjangh goengtoenk joq das xiklyis kuot.
11 Cangxeih vyuk gas "Somh Yuk" dah uhshe soeu, Hakmon vhuh mas dah Yashobeam nghuot. Nyang gas jeszan khyomp dvkoeuq mas nyah lham yah jeszan las vbusbih somh xo yuk lyis sat.
12 Nyings hoeuh dah "Somh Yuk" mas aiq vyuk gas Aho vhuh mas Dodo dah loloeu Eliaza nghuot.
13 Nyang gas Padamim jeszan khyomp mas Dawi shot pheh nyeis las Philisti jens lyis zan. Israel dius jens phang loh nyeis lyis nyang gas bali yos mas nghuot joq,
14 housoeh las nyang gas nyah dius jens yah dvgeh yos gungs mas thoenk yap las Philisti jens lyis zan. Yhensain ka nyang lyis ung cho zainsmuh dyei.
15 Uhshe dah jeslo jens Somhci mha somh yuk, dvnyeih gas Adulam luk-uk nvm, Dawi nyeis dah lukmuh lom mas loh. Philisti jes dvphung ka Rephaim langhkhau mha thoeng nyeis.
16 Hauh uhlyis Dawi gas thoenkgus jing mas nyeis las Philisti dvphung ka, Betlehem wus vkhau mha nyeis.
17 Dawi gas, Dvyuk yuk hau Betlehem wus khomh yvm mas joq dah jeisdwang mas jeis kham lha ngos lyis dyei phoh ya, ge nyah mau lhyi soh las taiq.
18 Housoeh hau somh yuk moq gas Philisti dvp cho Betlehem wus khomh yvm mas dah jeisdwang mas jeis kham lha Dawi lyis los dyei. Nghuot laus eq hauh jeis Dawi ma shuk, Yhensain lhyi jyungshuk khyvlyis dvhuot dyei.
19 Nyang taiq zis gas, Ngah Mangso eh, haih jeis lyis ngos ma shuk das. Vsainnyang kang lhyi ma yu, jeis loh kham bang dah suih lyis ngos shuk teh nghuot. Nyamoq gas nyamoq dah kang lhyi tang lha haih jeis kham los, ge. Housoeh las nyang ma shuk. Haih zis gas hau nyings hoeuh dah jeslo somh yuk kuot dah womh cho nghuot.
20 Yoab dah vnoeuh Abishai ka "Nyings Hoeuh dah Somh ci yuk" bang dah uhjyung nghuot. Nyang nyah lham chi lha dius somhxo lhyi zan las yoh sat yvmvyah "Somhci yuk" mas nyings yoh los.
21 Nyang gas Somhci yuk mas nyings zes hoeuh los las nyamoq dah uhshe soeu bweh los. Nghuot laus eq nyang gas "Somh Yuk" iq nyings ma hoeuh.
22 Yehoiada loloeu Benaia gas Kabzel mas dah nyings hoeuh dah jeslo nghuot; nyang gas, Moab jes thoeuqzoe kuh aiq yuk lyis sat, housoeh teh dah womh cho nyoshoq kuot goeus. Dvlhain gyu gyoh nyeis dah nyeih lyis khangkhyi khyung mha gyoh loh las khangkhyi dvdoeu lyis sat ku.
23 Nyhet pe nyet nyhang dah Egutu dius dvyuk lyis sat. Egutu dius dah loq mas Yoqmuh iq bos dah lham chi toh. Nyang gas lhamloq dvkoeuq chi lha, Egutu dius loq masyah lham lhyi dap lhuot yoeus las nyah lham yah nyang lyis sat.
24 Haih goeu gas Somhci yuk iq nyings hoeuh dah Benaia womh cho nghuot.
25 Nyang gas "Somhci Yuk" thoq lyis zes, laus eq "Somh Yuk" iq nyings ma hoeuh. Dawi gas nyang lyis nyah gungs zungh zau kuot.
26-47 Haih bang gas jesphung mas yombos vbusbih jens nghuot.
Yoab dah vnoeuh Asahel
Betlehem mas Dodo dah lo Elhanan
Harod mas soeu Shamot Pelet mas soeu Helez
Tekoa mas soeu
Ikesh loloeu Ira
Anathot mas soeu Abiezer
Hushat mas soeu Sibekhai
Aho mas soeu Ilai
Netopha mas soeu Maharai
Netopha mas soeu Bana loloeu Heled
Benyamin mau Gibea mas soeu Ribai loloeu Ithai
Pirathon mas soeu Benaia
Gash langhkhau mas soeu Hurai
Arba mas soeu Abiel
Bahurum mas soeu Azmawet
Sha Albon mas soeu Eliaba
Gizon mas soeu Hashem loloeu jens
Hara mas soeu Shage loloeu Yonathan
Hara mas soeu Sakha loloeu Ahiam
Ur loloeu Elipha
Mekera mas soeu Hepha
Pelon mas soeu Ahiya
Khamel mas soeu Hezro
Ezbai loloeu Narai
Nathan vnoeuh Yoel
Hagri loloeu Mibha
Amon mas soeu Zelek
Berot mas soeu Naharai (ungwes Zeruia dah loloeu Yoab dah kyonhkhyi wons soeu)
Yati mas vzomh Ira yahge Gareb
Hiti dius Uria
Ahlai loloeu Zabad
Shiza loloeu Adina (Ruben vkoq mas uhshe soeu yahge nyah dah jeslo somhci yuk)
Makha loloeu Hanan
Mithan mas soeu Yoshaphat,
Ashtera mas soeu Uzia
Aroer mas vzomh Hotham loloeu tang Shama yahge Yeiel
Tiz mas vzomh Shimri loloeu tang Yediael yahge nyah vnoeuh Yoha
Mahawi mas soeu Eliel
Elnam loloeu tang Yeribai yahge Yoshawia
Moab mas soeu Ithma
Zobah mas Eliel, Obed yahge Yasiel