CHUNGH 84
Yhenmuh mas Nyeis Mes
1 Maukhung Jesphung Yhensain eh,
ngos nah yhenmuh lyis kha iq jyet!
2 Ngos houmha kha iq jweh mes lah!
Yhensain dah yhenmuh mas lvnyap nyeis mes.
Ngah nhaiqlom yahge gungsshoh dwis nyeis Mangso lhyi gauslaus chunghthwe kat nyeis.
3 Ngah hwankti, ngah Mangso,
Maukhung Jesphung Yhensain eh,
nah phon jens nvm mas jos gas nyeis joqyos kuot,
pilan gas lo whop das sot sot.
4 Nah yhenmuh mas nyeis bang kha iq pyo!
Nyamoq nvng lyis vjangh chunghthwe kat las chungh nyeis. (Selah)
5 Nah jyank mas yom yoeus soeu,
Zion boms pheh gyung suh loh mes soeu ka kha iq pyo!
6 Nyamoq kyuk dah Bakha langhkhau lai loh lyis,
houmha jeisthuq dwang bweh nhang,
mauxeih eq hauh thomhlo lyis bos tyink dyei.
7 Nyamoq loh nyeis lyis yombos los las Zion boms mas,
mangso jens dah Mangso lhyi loh nyvng.
8 Maukhung Jesphung Yhensain Mangso eh,
ngos dung dang lyis gyo dyei aq.
Yakop Mangso eh, kamp gyo aq. (Selah)
9 Mangso eh, nvng khyen toh,
ngamoq dah hwankti lyis shvmanh dyei aq.
10 Nah yhenmuh mas dvnyeih xauh nyeis zis gas
gohyos nyeis dah buisnyeis dvkhyoengh thoq lyis zes gis.
Lhung bang dah yhen mas xauh nyeis thoq lyis
ngah Mangso yhen khyam khomh mas xauh yap mes.
11 Yhensain ka yang lyis gos dyei soeu yahge
phunk bos hwankti nghuot.
Yang lyis jyehjuh yahge nyoqnho ngelang dyei.
Jus zis kuot bang lyis gis zis dyei das zis
nyang ma ngoek.
12 Maukhung Jesphung Yhensain eh,
nvng lyis loms khau bang gas ngelhoq.