CHUNGH 83
Jeswus lyis Tyi lha Dung
1 Mangso eh, tsingtsam vkuot,
samlo vnyeis, tsoeklo vkuot.
2 Yoeuh aq! nah jeswus hoeu lha,
nvng lyis hoeng bang nghank los.
3 Nah dius jens lyis tyi lha khaujei tsain gauh ni,
nvng gomh toh bang lyis tyi das zis tsain lhaink.
4 Nyamoq gas, Los geh, nyamoq vnyau lyis mhont tyamp goh;
Israel lyis vcaiq vto tohnyhik tyamp bas jungh, ge.
5 Nyamoq dah khaujeini yvlyis xamxonh las,
nvng lyis tyi lha buisnoms tsain toh.
6 Nyamoq gas Edom vnyau yahge Ishmael vnyau,
Moab vnyau, Hagri vnyau,
7 Gebal, Amon, Amalek vnyau,
Philisti vnyau yahge Taire wus mas bang nghuot.
8 Asiria dius jens eq nyamoq yah tsain xonh.
Yombos das xiklyis Lot vshih jens yah xonh. (Selah)
9 Nyamoq lyis Midian lyis teh kuot geh,Ref 83.9: Soe 4.6-22, 7.1-23
Kishon lvng yvm mas Sisera yahge Yabin lyis teh kuot geh.
10 Nvng nyamoq lyis Endor mas ung lha
nyamoq dah gungs gas nyeisjvng mas bop yuq tyamp.
11 Nyamoq dah uhshe bang lyis Oreb yahge Zeb lyis teh,
nyamoq dah guon bang dvnganh lyis ung lhaRef 83.11: Soe 7.25, 8.12Zeba yahge Zalmuna lyis teh kuot geh.
12 Nyamoq gas Mangso yah sen dah
mau lyis sain yoeus goh, tsain ge.
13 Mangso eh, nyamoq lyis lyeis muot tangh dah phvlhau teh,
lyeis muot tangh dah phihsan teh sanh tyamp aq.
14 Yoszanh nyi ngeh teh,
jing mas dainhjeis nyilhyam teh,
15 Nyamoq lyis nah lyeismuh jyang yah khat las,
nah uklyeis yah kyuk aq.
16 Yhensain eh, nyamoq lyis xoqphuh nhang aq;
nyamoq lhyi nah yomsoq lyis seq nhang aq.
17 Nyamoq vcaiq vto somh las gyuk bas jungh,
nyamoq xoqphuh zis yah shei loh bas jungh.
18 Nvng kyingh Yhensain nghuot cho,
nyeisjvng gonh lyis guon soeu nghuot cho nyamoq seq bas jungh.