CHUNGH 66
Nhaiqshoqlang Chungh
1 Nyeisjvng gonh Mangso lhyi gauslaus zis yah kaiq geh.
2 Nyah nyings dah phunk lyis chunghthwe kat geh,
chungh cho dah nyoqnho ngelang kuot dyei geh.
3 Mangso lhyi, Nah muh kha iq mauh chank bos lah!
Nah kuhxing yomsoq gvng mas Jeswus jens nah xikkhonh mas gyuk zis yah paiq das, oen taiq geh.
4 Nyeisjvng thoq dius yuk khanghmuh nvng lyis paiq las chunghthwe kat das.
Nyamoq nah nyings lyis chunghthwe kat das. (Selah)
5 Mangso dah loqmuh lyis los yoeuh geh,
cangsoeu lo jens mas nyah mauhphoh muh nghuot.
6 Nyang thomh lyis tungyos thaiq tyamp;Ref 66.6: Dyu 14.21; Yosh 3.14-17
Ngamoq dah phauh thyeih moq hau jeislvng lyis khyei cho suh lai;
houmha ngamoq nyang mas gauslaus.
7 Nyang nyah yomzains yah vcaiq vto guon nyeis;
nyah nyoqjeih dius nyau jens lyis yoeuh nyeis.
Nyang lyis tyi lha gomloeus hank ma toq nhang. (Selah)
8 Dius nyau jens dvnganh eh, yah Mangso lhyi chungh geh,
nah chungh cho lhyi xauhgyo bas jungh.
9 Nyang, yang lyis kang dwis nhang lha,
yang lyis ma lains loh nhang.
10 Mangso eh, ngwis lyis nyi yah cheihshang teh
nvng nyamoq lyis shi yoeuh goeus.
11 Nvng ngamoq lyis thung khyoq las,
ngamoq nunghkhung mha lyei dah yvwons kih dyei.
12 Nvng ngamoq lyis ngamoq dah jeswus yah ngamoq lyis nang nheh nhang.
Ngamoq jeis mas eq nyi mas eq lai loh.
Nghuot laus eq gvshih gas nvng ngamoq lyis jesluiq joqyos mas shwih los.
13 Ngos nah yhenmuh mas ngheq dyei jyungshuk chi los das:
ngos nyhen toh zis nvng lyis dyei das.
14 Hauh zis ngos chiqjyen xauh uhlyis
ngos nvng lyis dyei das oen nyhen toh.
15 Ngos phon thoq mas ngheq dyei das gaunyhauq coeu dyei das,
ngos noeu yahge shvbeq jens phudyei das las hauh nyikhauh mas doq loh das. (Selah)
16 Mangso lhyi gyukwoms bang dvnganhmoq eh, los gyo geh,
Nyang ngah xiklyis kuot dyei cho ngos namoq lyis taiq kyoh das.
17 Ngos lyis pangh das xiklyis nyang lyis dung.
Ngos nyang lyis chunghthwe yah chungh.
18 Ngos ngah yaunos ma rhen lhyi
Yhensain ma gyo yoeus dyei.
19 Nghuot laus eq Mangso ngos lyis jyoengh gyo dyei;
nyang ngos dung yvlyis gyo dyei.
20 Mangso ngos dung yvlyis ma peq tyamp,
nyah mathank magons jyetdap zis eq ngah jyank masyah
ma yoeus tyamp yvmvyah ngos nyang lyis chungh.