CHUNGH 22
Shanghsenh Soeu Dung Dang
1 Ngah Mangso eh, ngah Mangso eh, nvng ngos lyis chamus doeuh tyamp toh lah?Ref 22.1: Mat 27.46; Mak 15.34
Ngos noskyingh zis yah pangh das nyhenshang kaiq sang laus eq houka ma jweh los shih.
2 Ngah Mangso eh, nyeih lyis ngos kaiq laus eq nvng ma gyo dyei;
nyenh lyis kaiq laus eq ngos nyenstap cho ma yoh.
3 Nvng gas Israel jens chungh yvmas nyeis,
hwankti Gyingshang Soeu nghuot.
4 Ngamoq dah phauh thyeih moq nvng lyis loms.
Nyamoq loms las nvng nyamoq lyis khyuot yoeus.
5 Nyamoq nvng lyis lui las jesshoh masyah luiq.
Nvng lyis loms las yom ma gyau.
6 Ngos gas dius ma nghuot, tungde dvnghuot las
yuk khanghmuh yah jwangh, choqh.
7 Ngos lyis nyvng ya nyvng bang nyhap las,Ref 22.7: Mat 27.39; Mak 15.29; Luk 23.35
maphauh madanh nhuot yhont, lainkamh nocwih las taiq zis gas,
8 Nyang gas Yhensain lhyi loms lasRef 22.8: Mat 27.43
Mangso nyang lyis khyuot yoeus bas jungh,
Yhensain ka nyang lyis nhaiqdoeus yvmvyah
nyang lyis khyuot kat bas jungh, tsain ge.
9 Nghuot laus eq nvng gas ngos lyis ung masyah shwih thuq soeu nghuot.
Ngos ngah ungwes sainhkhonh mas dvnghuot shih lyis yah nvng ngos lyis gomh dyei.
10 Ngos gas khoeu los lyis yah nah loq mas nghuot.
Ngah ungwes ung masyah nvng ngah Mangso nghuot.
11 Chiqjyen zis gas ni los las,
pangh das soeu hank ma bos yvmvyah
12 Jeswus jens nyoshoq ngos lyis noeulu jens teh lhaink las,
nyamoq ngah vyvm vwi mas Bashan mha dah gyukphoh noeuphuk jens teh lhaink toh.
13 Ngat das ge nyings dah khangkhyi teh
nyamoq ngos lyis nhuot tsain haq toh.
14 Ngah yom gas jeis huot tyamp teh thank goeus, yaunyoq dvnganh lhaiq tyamp,
Ngah ehnyet dyomanh yaus teh nghuot tyamp goeus.
15 Ngah yom gas auhkhyamh teh kyuk las lhyo eq am mha dap goeus.
Nvng ngos lyis shei dah tsoh mas toh.
16 Ma gis dah dius phung jens ngos lyis lhaink toh.
Nyamoq Khuih lamh jensnote 22.16 Khuih lamh jens ge zis Hebre mas khangkhyi, ge. teh chomp las ngah khyei ngah loq lyis eq tsain ngat cwe.
17 Ngos ngah shohyau dvnganh lyis yoh suon.
Nyamoq ngos lyis nhaiq shei zis yah yoeuh tsuk toh.
18 Nyamoq ngah dyi gvmgoh.Ref 22.18: Mat 27.35; Mak 15.24; Luk 23.34; Yoh 19.24
19 Yhensain eh, nvng gas ngos yah vwe loh.
Ngah yom eh, nvng ngos lyis lvnyap los pangh aq.
20 Ngah kang lhyi sham mhayah,
ngah phauhdap kang lhyi lvkhuih yomsoq masyah khyuot kat aq.
21 Ngos lyis khangkhyi dah nhuot masyah,
noeuphuk khyau mhayah khyuot yoeus aq.
22 Ngos nvng kuot goeus cho lhyi ngah boekyis lyis kyoh das.Ref 22.22: Heb 2.12
Moqhuom mha ngos nvng lyis chungh das.
23 Yhensain dah jyeidwis jens eh, nyang lyis chungh geh;
Yakop vshih dvnganh eh, nyah nyoqnho ngelang lyis chungh geh;
Israel dius jens eh, nyang lyis paiq geh.
24 Nyang shohjyen bang lyis ma tyamp, nghuot ya nyamoq yaukyenh cho lhyi, ma doeuh tyamp toh;
nyamoq masyah ma tauh loh.
Pangh das xiklyis dung lyis nyang xauhgyo dyei.
25 Moqhuom zainsmuh mas nvng ngos lyis kuot dyei goeus cho chungh das.
Nvng lyis paiq bang dah xikkhonh mas ngos nvng lyis chungh das,
ngos nyhen toh lomhxangh lyis lainh das.
26 Nyungs bang jo shoq xauh zo das,
Yhensain lhyi xo bang nyang lyis tsain chungh das.
Nyamoq nhaiqlom vjangh yombos joq bas jungh.
27 Dius nyau dvnganh Yhensain lhyi soh das.
Mungkvn goms shoq bang nyah jyank pheh lhain los das.
Dius nyau jens dvnganh nyang lyis paiq das.
28 Yhensain ka hwankti nghuot las,
nyang dius nyau jens lyis guon nyeis.
29 Khwank bang dvnganh nyang lyis dupaiq das.
Daq shei loh bang dvnganh eq, nyah xikkhonh mas dupaiq das.
30 Jweh los das dius caiq eq nyang lyis phuqsoe das.
Jweh los thang caiq mas eq dius jens Yhensain dah cho nyamoq lyis taiq hoeuh das.
31 Yhensain ka nyah dius jens lyis khyuot yoeus cho,
ma khoeu los shih bang lyis eq xauh taiq kyoh das.