CHUNGH 109
Yaukyenh Nyeis Soeu Lop
1 Mangso eh, ngos nvng lyis chungh lyis samlo vjenh nyeis.
2 Lhung bang yahge hwah bang ngos lyis zan los.
Nyamoq ngah cho hwah taiq.
3 Nyamoq ngos lyis hoeng cho taiq,
shohyos gungs mas ngos lyis tsain zan.
4 Ngos nyamoq lyis jyet laus eq nyamoq ngos lyis kauq:
ngos gas nyamoq lyis shvmanh dung dyei.
5 Ngos gis zis kuot laus eq nyamoq ngos lyis ma gis zis tauh dyei,
jyet laus eq tsain hoeng.
6 Ngah jeswus lyis kyink das zis ma jus soetuon bang lyis khyen,
nyah jeswus mas zis dvyuk nyang lyis kauq.
7 Nyang lyis kyink las yaunos nyvng bas jungh,
nyah shvmanh dung cho eq dius sat yobos khyvlyis nghamh dyei bas jungh.
8 Nyah kang lvnyap thank bas jungh,Ref 109.8: Lgy 1.20
nyah muh gohyuk yoeus loh bas jungh.
9 Nyah lo jens chauhlo bweh bas jungh,
nyah nyi eq chauhmuh muh bas jungh.
10 Nyah lo jens yhen ma bos, lvyon bweh bas jungh;
nyamoq nyeis dah dyoqbis yhen masyah khat tyamp zis xauh bas jungh.
11 Jyen kat toh bang nyah zisyos dvnganh yoeus loh bas jungh.
Nyang zwi toh zis dvnganh lvbaus jens xauh yoeus bas jungh.
12 Hank eq nyang lyis nhaiq ma bos bas jungh.
Nyang chauh toh khoq dah chauhlo jens lyis hank ma dyangh bas jungh.
13 Nyah vshih jens shei dom bas jungh.
Nyah nyings lyis thang caiq mas bang tohnyhik tyamp bas jungh.
14 Yhensain ka nyah phauh thyeih moq dah ma gis cho lhyi soh las
nyah ungwes dah yaunos lyis khanhamp eq ma tohnyhik dyei bas jungh.
15 Yhensain ka nyamoq dah yaunos lyis vjangh soh bas jungh,
nyamoq nyang lyis jyah tohnyhik tyamp bas jungh.
16 Hauh soeu ka nhaiqbos cho lhyi khanhamp eq ma nghamh yoeuh ku.
Nyang gas shohjyen bang, nyungs bang,
yahge mvshoh mvjyen bang lyis shoeuhshih zis yah sat.
17 Nyang gas nhoengh mes, nyang nhoengh zis xauh bas jungh.
Nyang shvmanh dyei cho lhyi hoeng, nyang lyis hank eq ma shvmanh dyei bas jungh.
18 Nyang gas nhoengh cho lhyi soenghchoenk dyi wuot toh teh nhoengh;
nyang nhoengh zis gas nyah gungs mas jeis shuk teh wvng bas jungh,
nyah shohyau mas coeu teh wvng bas jungh.
19 Hau nhoengh zis nyang lyis dyimis teh wuot toh las
nyah thyikdom mas dyichih teh vjangh dap joq bas jungh.
20 Ngos lyis ma gis zis sang bang ngah jeswus lyis
Yhensain ka housoeh yobos dyei bas jungh.
21 Ngah Yomzains Yhensain eh, nvng ngos lyis dangthoengh toh zis yah dvyhangteh jenh pangh aq.
Nah jyetdap sainhnos gvng mas ngos lyis khyuot kat aq.
22 Ngos shohjyen lha nyungs nyeis.
Ngah nhaiqlom khau mha nos nyeis.
23 Ngos gas nyenhthang lhyi dah siyet teh dyuk loh nyeis.
Ngos tungde teh muot tangh loh zis xauh.
24 Wom ma zo las ngah phvlukchvp yomnhuk;
ngos dye gyih loh goeus.
25 Dius jens ngos lyis nyvng lyis nyamoq yis;Ref 109.25: Mat 27.39; Mak 15.29
nyamoq lainkamh nocwih las ngos lyis jwangh.
26 Ngah Yhensain Mangso eh, ngos lyis pangh aq,
nah mathank magons jyetdap cho gvng mas ngos lyis khyuot yoeus aq.
27 Yhensain eh nvng gas ngos lyis khyuot yoeus soeu
nghuot zis ngah jeswus jens lyis seq nhang aq.
28 Nyamoq ngos lyis nhoengh das laus eq nvng ngos lyis shvmanh dyei das.
Ngos lyis shoeuhshih bang somh loh lyis,
ngos nah jyeidwis gas gaus das.
29 Ngah jeswus jens xoqphuh bas jungh, nyamoq dah xoqphuh zis gas
nyamoq dah dyixing teh khuk toh bas jungh.
30 Ngos Yhensain lhyi nhaiqshoqlang nyoshoq sang das,
dius jens huom yvmas ngos nyang lyis chungh das.
31 Khasoeh ge lyis nyang gas shohjyen soeu lhyi khom kat,
nyang lyis shei das nyhenshang thyet bang masyah khyuot yoeus.