CHUNGH 108
Jeswus lyis Tyi das Pangh aq
(Chd 57.7-11; 60.5-12)
1 Mangso eh, ngos vlhomuh nghamhnywe nyeis,
ngos nvng lyis chunghthwe kat las chungh das.
2 Ngah dyos eh, soh los aq!
Toenk yahge khvlhank eq soh los aq, ngos buis lyis nhauh toq das.
3 Yhensain eh, ngos dius nyau jens mas nvng lyis nhaiqshoqlang sang das.
Dius jens mas ngos nvng lyis chungh das.
4 Nah mathank magons jyetdap cho ka maukhung nyhang mha duons;
nah wontang cho eq maukhung mha duons.
5 Mangso eh, maukhung mha nah kuhxing cho chixoeuq aq;
nyeisjvng gonh mas nah phunk chixoeuq aq.
6 Nvng jyetdap dah dius jens yoh luiq bas jungh,
nah yomzains yah ngamoq lyis khyuot yoeus aq;
ngos dung dang gyo dyei aq.
7 Mangso nyah gyingshang joqyos masyah taiq zis gas, Ung zis yah ngos Shekhem wus lyis khwih das.
ngah dius jens lyis Sukhot langhkhau gvm dyei das.
8 Gilead gas ngah zis, Manase eq ngah zis nghuot.
Ephraim ka mautsung pheh nyeis las ngah uhkyop teh nghuot.
Yuda gas guon soeu, ngah hwankti lhamloq nghuot.
9 Nghuot laus eq Moab lyis gas ngah cheihlang khyvlyis yhung das.
Edom lyis ngos sain dah vlho khyvlyis ngos houmha ngah thyvkoq doeuh toh das.
Ngos Philisti lyis ung cho kaiq das.
10 Mangso eh, ngos lyis goeng thoenkgus jesdvp bos dah wus mas hank shwih wvng das lah.
Edom wus mas ngos lyis cho hank she loh das lah.
11 Nvng ngamoq lyis jyoengh peq tyamp goeus lah.
Nvng ngamoq dah jesphung yah dvgeh ma jens loh das lah.
12 Jeswus lyis zan yvmas ngamoq lyis pangh aq.
Dius dah pangh cho vkom dvnghuot.
13 Mangso ngamoq shot pheh nghuot lyis ngamoq ung das;
Nyang ngamoq dah jeswus lyis ung das.