23
-6-
1 Yhaugyen soeu yah wom tsung zo uhlyis nyang hank nghuot zis nah ehnyet mas soh nyeis aq.
2 Nvng zo nghamh lyis nah gungs lyis nvnyang joeu aq.
3 Nyang tsoh dah zogis shuklhoq lyis nyoq vnoq, nyang nvng lyis mhuih jyomh zis nghuot mvbeh.
-7-
4 Dis los shoq nah gungs lyis nvnyang ma doeus magoq vnyung vdaus nhang, houmha joeui bos nyeis aq.
5 Nah ngwis xing ka dungs dap los teh nghuot las zonsmuh teh dang loh das.
-8-
6 Chenh soeu dah womjus mas dah wom vyoeus zo, nyang daih dah zogis shuklhoq lyis nyoq vnoq nyeis.
7 Nyang gas, Los aq zoshuk goh, lung aq, ge laus eq nyang housoeh ma nghamh, nyah ehnyet mas bos zis yah dvyhangteh nyang gas housoeh teh soeu nghuot.
8 Nvng zo zis dvnganh yah duk tyamp das las, nvng Chungh Dang eq vyu vgeh bweh das.
-9-
9 Koh soeu lhyi joeui dang taiq kyoh das zis yom vkat, nyang hauh yvlyis phauh ma seq tap.
-10-
10 Gohlhain yah sain toh goeus dah yoskyoh zains lyis khanhamp eq vcheh. Chauhlo jens yoh sain toh goeus dah maunyeis lyis vyoeus tyamp dyei.
11 Yhensain ka nyamoq xiklyis yomsoq bos dah khomp toh Soeu nghuot. Nyang gas nyamoq dah soe lhyi namoq yah ma huq khyvlyis tuon dyei das.
-11-
12 Nah jyauh soeu dah dang vlhomuh gyo las nvng duot nyhoq dvnganh xuq aq.
-12-
13 Loshang lhyi jyauh das zis vsheq toh. Gis khyvlyis lyuk las jyauh zis gas nyang lyis ma yoh shei nhang.
14 Houka jyoengh nyah kang lhyi khyuot yoeus das.
-13-
15 Lo eh, nvng joeui bos soeu duot lyis ngos svsoh pyo das.
16 Ngos nvng taiq dah joeui dang xauhgyo lyis yoh khwank das.
-14-
17 Nvng yaunos kuot bang lyis vnoh. Yhensain lhyi nah dvcaiq gonh gyukwoms nyeis aq.
18 Housoeh kuot lyis jweh los das nah buisnyeis lyis ung cho yoh das.
-15-
19 Ngah lo eh, ngah dang gyo las joeui bos aq. Nah kang dwis cho lhyi vlhomuh nghamh yoeuh aq.
20 Zvbiq shuk lais bang yahge zonoms nyoqnoq bang yah vzomh.
21 Yhei pauhzoe jens yahge womlvm bang gas nyungs loh das. Nvng kuot zis dvnganh gas zo las yhet dvkuot lyis gas ma nyangh lyis nvng mistyang seh xauh wuot das.
-16-
22 Nah uwus dang gyo aq, nyah gvng mas ma nghuot lyis nvng nyeis lyih das zis ma nghuot. Nyenhkyi bos goeus dah nah ungwes lyis phauh nyang cho chixoeuq aq.
23 Jyoeng cho, joeui, xuq cho yahge seqgyo cho lhyi phauh dyei las wis yoeus gis laus eq hauh zis gas phauh nyo changh yvmvyah ungh das zis gas nah xiklyis svsoh vyu vgeh nghuot.
24 Dan soeu dah uwus gas gaus das xiklyis mon. Joeui bos dah lo mas nvng yoh khwank das.
25 Nah ungwes uwus nvng mas yoh gaus bas jungh, nah ungwes lyis hau gaus cho dyei aq.
-17-
26 Lo eh, vlhomuh gyo yoeus aq, ngah kang dwis cho ka nah xiklyis yikhyoh bweh bas jungh.
27 Nghe nyhiq jens yahge wotwu dyoq dah vmesbih jens gas yoh shei nhang dah lhyik tsain nghuot.
28 Nyamoq gas khyanktau teh nvng lyis gauh langh nyeis las yukgis nyoshoq lyis dang ma jings tsain bweh nhang.
-18-
29-30 Yhei shuk lais las shuk ja vja ja lyis chaq mes soeu dvyuk yuk ngos lyis chixoeuq aq. Housoeh lyis mvshoh jyen lha nyang gungs nyang nos zis soh zo soeu, vjangh yaukyenh cho lhoq thuq las vjangh lop nyeis soeu lhyi ngos nvng lyis chixoeuq das. Nyah nyoqjeih nes las yoh gis jhank yvlyis ma jhank tyamp goeus dah dvm nyang mas dap joq.
31 Kom mha nes nes vwot lhoq las, shuk lyis nghamh phoh teh dah zvbiq nghuot laus eq hauh zis yah nvng lyis vshiwu thyoq nhang.
32 Nungsnvp jweh lyis duk bos dah lhangnyis chweh teh nvng xauh kham das.
33 Nah nyoqjeih mas gyukphoh dah vlho thuq los las nvng hauh yvlyis bvng bvng ma yoh nghamh las ma seq taiq kyoh das.
34 Nvng gas nvmukdra mas thomh jeisphauq guons las vtauh vxoeu vphanh vphuk jeisphauq yah toeulhain zis xauh dah sangpho misseh mas lhwih nyeis soeu teh xauh kham das.
35 Nvng gas, Ngos batpop zis xauh soh bos goeus, ngos lyis bat zis xauh laus eq ngos hauh yvlyis ma soh, ngos chamus ma yoh soh au? Ngos shuk chah shih, ge das.