22
1 Nyings gis yahge zisyos yoh cho mha nvng o zis khyen yoeus das lyis nyings gis khyen yoeus aq.
2 Dis soeu yahge nyungs soeu lhyi gvnkhanh toh zis gas Yhensain dvyuk kyingh nghuot. Houka nyah aiq yuk mas doeusgoh cho nghuot.
3 Dolhain bang gas jweh los das yaukyenh cho lhyi uhlhomh nyvng las hauh yvlyis jhank loh. Ma nghamh yoeuh soeu ka hauh yaukyenh yvmas wvng loh thang lhyi auhuiq nyeis.
4 Yhensain dah domsyos gyo nyeis aq, ehnyet nyhen mha gyoh aq, housoeh lyis zisyos nyoqnho ngelang yahge kang xing cho yoh das.
5 Nvng nah kang lhyi jyet nghuot lyis lhung soeu lhyi nyhik das nyhenshang cho chank yah thung toh dah lhyik masyah we loh aq.
6 Loshang jens lhyi nyamoq khasoeh chank gis cho mha jyauh aq, housoeh lyis nyamoq gas dvcaiq gonh cho ma whang das.
7 Shohjyen bang gas dis bang dah jons tsain nghuot. Jyeih yoeus soeu ka jyeih dyei soeu dah jons nghuot.
8 Nvng lyi ma jus dah jyo nyau khyoq lyis thyoqpi cho yuk thuq los das. Hauh uhlyis gohyhamh lyis nhiq zaiq zo cho thank tyamp das.
9 Magons magoh dyei gvm aq, nah zonoms shohjyen bang lyis gvm aq. Housoeh lyis hauh gvng mas nvng shvmanh jyehjuh xauh kham yoeus das.
10 Zes nghuot teh kuot soeu lhyi khat tyamp aq. Housoeh lyis houmha phyen-goh, dyoqgoh cho, chaxwe ma nhang nyings yoeus cho ma bos lo das.
11 Lhoqshang ehnyet yah noeuh nhamp dang lyis jyet nghuot lyis hwankti nah dyenschangh duot das.
12 Hwah bang dah dang lyis taiq thuq khyvlyis Yhensain ka jyoeng cho lhyi goeng joq nhang.
13 Lan bang gas yhen mha kyingh nyeis las, nyamoq nghe pheh thuq lyis, khangkhyi dyvm ngat das ge taiq.
14 Nyi shuot lvng shuot muh gas lhyik nghuot. Yhensain nhaiqlom tsoeu zis xauh bang hauh lhyik mas nyih joq.
15 Loshang jens gas soenghchoenk nyang masoh mathamh ma zaih dah muh tsain kuot laus eq wuseh yah lyuk las jyauh zis gas nyamoq lyis gis dah wotwu yoh nhang.
16 Nvng zisyos nyo los das nyhenshang nyungs bang lyis zaiq las dis bang lyis jyungshuk dyei lyis gas nvng nyungs loh das.
Joeui Sangkhyangh Somhci
17 Joeui bos bang taiq toh zis ngos nvng lyis jyauh bah gyo yoeus aq. Nyamoq jyauh toh dang xuq aq.
18 Hauh jyauh dang lyis nvng yoh comh las yoh yhung lhyi yoh gausyis das.
19 Ngos nvng lyis Yhensain mha loms toh nhang mes; housoeh las gvshih ngos nvng lyis taiq kyoh das.
20 Seq cho yahge gis dah joeui dyei dang somhci ngos nah xiklyis lhaih toh dyei.
21 Houka jyoeng dang dah cho lhyi top seqgyo shoq nvng lyis jyauh das. Housoeh hauh zis nvng lyis xo nhang lhyi, nvng gas jus cho yoh chi los das.
-1-
22 Nvng yoh kuot dah oen lha shohjyen soeu lhyi joeui yah vzaiq; soetuon jang mas yaukyenh shanghsenh xauh nyeis soeu lhyi vzaiq.
23 Yhensain ka nyamoq dah soe lyis bos taiq dyei das; nyamoq lyis kyuk tant bang lyis eq nyang kyuk tant das.
-2-
24 Nhaiqlom gywes las nhaiqlom tsoeu soeu yah dyenschangh vkuot.
25 Nvng nyamoq dah wotwu lyis xuq goeus ya, nah wotwu lyis ma yoh soq lo das.
-3-
26 Dvyuk yuk dah jyen lhyi kham das zis dangthoengh vtoh.
27 Nvng hauh jyen ma yoh cap lyis nah yhetyos lyis yangh nyamoq yoeus tyamp dyei das.
-4-
28 Nah phauh thyeih moq yoh sain toh las cuk toh dah yoskyoh zains vcheh.
-5-
29 Ngos lyis muh zwi yvmas kank kat soeu chixoeuq aq. Houlhyi hwankti jens dah buisnoms bweh mon zis yahge gohyhamh thoq lyis zes gis soeu ngos nvng lyis chixoeuq das.