16
Yeremia xiklyis
1 Yhensain ngos lyis doms jis las taiq.
2 Nvng heisoeh teh joqyos mas nyi vyoeus, lo jens eq ma gis bos.
3 Heimha khoeu los dah lo jens yahge nyamoq dah nyhiphoq jens mas cha tsain bweh los das cho ngos taiq bah.
4 Nyamoq gas gyukphoh noslom yah shei das, nyamoq xiklyis hank ma kuk, nyhop eq hank ma nyhop das. Nyamoq mvng gas mhotkhyot boms teh nyeisjvng mas joq das. Nyamoq gas jes mas sat zis xauh das, yuot shei das las nyamoq dah mvng gas nghoq yahge yewus dah zokho duot das.
5 Housoeh las Yhensain taiq, Namoq kuk nyeis yhen mha ma gis wvng. Hank nyhenshang eq vkuk goh. Ngos ngah dius jens lyis nyenstap zis yah ma shvmanh dyei, jyetdap cho yahge nhaiqnyen cho ma chixoeuq das.
6 Haih mau mas dis bang eq nyungs bang eq shei das. Nghuot laus eq hank eq nyamoq lyis ma nyhop, hank eq nyamoq xiklyis ma kuk das. Namoq mas hank eq kuk cho chixoeuq khyvlyis vsainnyang gungs lyis lhyamh khangh, uhyuk cho eq ma gis kuot.
7 Jyetdap soeu shei uhlyis dvyuk yuk nhaiqtaink dyei soeu yah hank eq ma zo ma shuk das. Dvyuk yuk nyah uwus, ungwes chithyuk laus eq hank eq shohnos cho ma chixoeuq das.
8 Dius jens pwe kuot nyeis yhen mha vwvng loh. Nyamoq yah dvgeh zo shuk das zis vtsung.
9 Ngos Maukhung Jesphung Yhensain, Israel Mangso taiq chah yvlyis gyo geh. Ngos gauslaus thwe, gausyis thwe, nyihwank pwe dah pyo thwe lhyi tsing tsam kuot das. Hai bweh cho lhyi heimha nyeis das bang nyvng das.Ref 16.9: Yer 7.34, 25.10; Nyoq 18.23
10 Nvng haih dvnganh nyamoq lyis taiq kyoh uhlyis nyamoq nvng lyis nyei das zis gas, Ngos nyamoq lyis chamus hou iq than dah joeng cho nghamh thyet au! Nyamoq cha yobos bos? Yhensain, nyamoq dah Mangso lhyi tyi dah yaunos cha cu, ge nyei das.
11 Hauh uhlyis Yhensain taiq zis nyamoq lyis taiq kyoh aq. Namoq dah phauh thyeih moq ngos lyis nungs phuk las gohtoeu mangso jens lyis paiq phuqsoe loh. Nyamoq ngos lyis tyamp zis yah ngos jyauh cho lhyi domsyos ma gyo.
12 Namoq gas namoq dah phauh thyeih moq thoq lyis yangh zes ma gis shoq kuot. Namoq dvnganhmoq gas nhaiqlom than lha ma gis zis kuot, namoq ngah domsyos ma gyo.
13 Housoeh las ngos namoq lyis haih mau masyah namoq eq namoq phauh thyeih moq eq khanhamp eq ma seq dah mau mas doeuh lhank kat das. Namoq hauh mau mas gohtoeu mangso jens lyis nyeih nyenh phuqsoe das, ngos namoq lyis nhaiqnyen cho ma chixoeuq das.
Jonsdoeus masyah Tauh los
14 Yhensain taiq, Dius jens gas, Israel jens lyis Egutu masyah shwih los, dwis nyeis dah Mangso ge ngos lyis mau ma khi lo shishenh jweh los.
15 Hauh gungsthaiq Israel jens lyis mautsung mau ngos nyamoq lyis sanh tyo tyamp ku dah gohtoeu mau dvnganh masyah shwih los, dwis nyeis Mangso, ge ngos lyis maukhi das. Ngos nyamoq lyis nyamoq nyang mau, ngos nyamoq phauh thyeih moq lyis dyei toh mau mas doms shwih los das. Ngos Yhensain taiq goeus.
Jweh los nyeis Joeng cho
16 Yhensain taiq: Haih dius jens lyis los nyhik das nyhenshang, ngos oeng nhoh bang nyoshoq lyis tying toh. Hauh thang lhyi shoh khat bang nyoshoq lyis eq boms khanghmuh jing khanghmuh yahge luk uk mas dah lukkhyung mhayah nyamoq lyis khat thuq los das nyhenshang tying das.
17 Ngos nyamoq cha kuot zis dvnganh nyvng. Ngos masyah cha eq ma yoh shung toh. Nyamoq dah yaunos ngah nyoqlvtjvng mhayah ma yoh phang luiq.
18 Nyamoq gas ngah mau lyis mvng teh kang ma bos dah phvra yah vwot v-oeu kuot; nyamoq dah ma jus mangso jens yah dyingh nhang yvmvyah, ngos nyamoq dah yaunos yahge lhung cho gvng mas joeng cho aiq huon dyei das.
Yeremia Vkyuh Dung
19 Yhensain eh, nvng gas ngos lyis gos dyei soeu, ngos lyis yomdyei soeu nghuot. Nvng ngos yaukyenh shishenh lyis pangh. Dius nyau jens maunyeis vthang mhayah nah jyank mas los taiq das zis gas, Ngamoq dah phauh thyeih moq gas ma jus dah mangso, vkyuh ma bos dah phvra dvyoh.
20 Dius gas nyamoq nyang dah mangso jens yoh kuot lhyeh? Ma yoh kuot, nyamoq kuot lyis houka mangso jyoeng ma nghuot das.
21 Housoeh las Yhensain taiq: Dvlhain lhyi yah dvnganh xiklyis ngah yomsoq yahge ngos duot cho dius nyau jens lyis seq nhang das. Ngos Yhensain nghuot cho nyamoq seq das.