15
Yuda jens Jom das
1 Hauh thang lhyi Yhensain ngos lyis taiq: Moshe yahge Samuel heimha yap las ngos lyis dung dyei lyis yangh ngos haih dius jens lyis nhaiqnyen cho ma chixoeuq das. Nyamoq lyis loh nhang geh. Nyamoq lyis ngah nyoqlvtjvng masyah khat thuq geh.Ref 15.1: Dyu 32.11-14; Gyu 14.13-19; 1Sa 7.5-9
2 Nyamoq khapheh loh chah ge nvng lyis nyei lyis, ngos taiq goeus oen nvng nyamoq lyis taiq aq:Ref 15.2: Nyoq 13.10
Dvyhamh gas noslom yah shei yvpheh loh das,
gohtoeu dvyhamh gas jes mas gyoh shei yvpheh loh das.
Dvyhamh gas yuot shei cho pheh loh das,
gohyhamh gas jonsdoeus loh das yvpheh loh das, ge.
3 Ngos Yhensain ka nyamoq mas gyukphoh zis nyei ja bweh das oen nghamh thyet toh goeus; nyamoq jes mas gyoh shei das. Nyamoq dah mvng lyis lvkhuih she zo loh das, nghoq jens zo das, nyet zis lyis yewus jens thonh das.
4 Hezekia lo Manase Yuda hwankti doq uhlyis nyang Yerusalem mas kuot cho gvng mas, ngos mungkvn dius jens dvnganh lyis gyuk dvn nhang das, ge.Ref 15.4: 2Hw 21.1-16; 2Ss 33.1-9
5 Yhensain taiq,
Yerusalem bang eh, namoq lyis nhaiq hank nyen das,
namoq xiklyis hank kuk das lah?
Nvng yanghzan nyeis lah, ge
yap las hank nyei das lah?
6 Dius jens namoq gas ngos lyis peq tyamp las nungs phuk loh.
Housoeh ngos namoq lyis nhaiqyo cho jhen nghoengh goeus yvmvyah
ngos namoq lyis thungh thyi.
7 Hauh mau wus khanghmuh mas
ngos namoq lyis lyeis mas huhyau lyis soeh doeuh lhank.
Ngah dius jens eh, namoq gas ma gis cho lhyi ma no tyamp yvmvyah
ngos namoq lyis mhont.
Namoq lo jens lyis sat.
8 Namoq mau mas chauhmuh jens gas thomh mas sihsho thoq lyis zes nyo.
Ngos namoq dah loyvm jens lyis
nyamoq dah loloeu bon lyis sat las
nyamoq dah ungwes moq lyis shoh nhang.
Ngos nyamoq lyis shanghsenh cho yahge
gyukphoh cho yah nyetlos nyettant zan.
9 Lo nyhet yuk chithyuk dah ungwes gas chuot las
soq ma yoh she lo.
Nyah xiklyis nyeih dah bvng zis gas chuot yvpheh lhaiq loh.
Nyang gas xoqphuh las nyah nhaiqlom mas nos.
Ngos namoq mas dwis nyeis shih bang lyis
namoq dah jeswus jens lyis sat nhang das.
Ngos Yhensain taiq goeus, ge.
Yeremia Yhensain lhyi Lop
10 Ngos gas kha iq ma pyo soeu nghuot lah! Chamus ngah ungwes ngos lyis mungkvn mas shwih los au? Ngos hauh mau mas yuk khanghmuh yah nyingh nyo goh, taiq phyen-goh chah. Ngos ngwis ma jyeih dyei, ma jyeih yoeus laus eq yuk khanghmuh ngos lyis nhoengh.
11 Yhensain eh, ngos nvng lyis gis gis ma phuqsoe, ngah jeswus nyamoq yaukyenh shanghsenh lyis, ngos nvng lyis nyamoq xiklyis ma dung dyei lyis gas, nyamoq nhoengh zis dvnganh bweh los bas jungh.
12 Thyeq lyis hank ma yoh khyauh, zes las mautsung pheh dah thyeq gas thunk yah lhoeuq toh.note 15.12 Sonzoh ngis zis 11, 12 gas Hebre mas bvng bvng ma nghuot.
13 Yhensain ngos lyis taiq: Dvmau gonh mas nyamoq kuot dah yaunos gvng mas nyamoq lyis joeng das zis ngos jeswus lyis nhang lha ngah dius jens dah dis cho zisyos yoeus loh das.
14 Ngos nyamoq cha ma seq dah mau mas nyamoq dah jeswus lyis phuqsoe nhang das. Khasoeh ge lyis ngah nhaiq yo cho ka nyi soeh vcaiq vto ngeh das.
15 Hauh thang lhyi ngos taiq zis gas, Yhensain eh, nvng seqgyo dyei. Ngos lyis soh las pangh aq. Ngos lyis shoeuhshih bang lyis lvto phuk nhang aq. Nyamoq ngos lyis sat cho yoh ung shoq nyamoq lyis vjhen dyei. Ngos laihwangh cho xauh zis gas nah xiklyis nghuot yvlyis soh aq.
16 Maukhung Jesphung Yhensain Mangso eh, nvng ngos lyis taiq las ngos eq nah dang khonh khanghmuh gyo goeus. Ngos nvng yah sen lha nah dang gas ngah nhaiqlom lyis gausyis cho yahge pyo cho yah tyink dyei.
17 Ngos ngah shishenh lyis gohyuk yah dvgeh yis las pyo cho mha ma yhung. Ngos nah vmingh lyis domsyos gyo zis yah ngvnyang kyingh nyeis las nhaiqyo cho dyingh los.
18 Ngos chamus tsoq kham das lah? Ngah dvm chamus ma yoh yhoh? Chamus ma gis los. Nvng ngos lyis buis gywes nyos lyis jeis kanh dyuk dah jeislo lvng teh yom gyau nhang mes lah?
19 Haih yvlyis Yhensain phuk taiq zis gas, Nvng tauh loh lyis ngos nvng lyis doms shwih tauh los las, nvng ngah jyeidwis doms duot das. Nvng vjyuk ma bos dang taiq das gungsthaiq vkyuh bos dah loeus taiq hoeuh aq, nvng ngah lvpe doms duot das. Dius jens nah jyank mas tauh los das, nvng nyamoq jyank mas ma loh noh.
20 Ngos namoq lyis haih dius jens xik mas goeng dah thunk ciank teh kuot das. Nyamoq gas namoq lyis zan das laus eq nyamoq namoq lyis ma ung das. Ngos namoq yah dvgeh nghuot las namoq lyis gos dyei das, jesluiq shoq gomh das.
21 Ngos nvng lyis lhung bang yahge lhuot zo bang dah yomsoq masyah khyuot das. Ngos, Yhensain taiq goeus, ge.