7
Gideon Midian lyis Ung
1 Dvnyeih gas Gideon yahge nyah dius jens gas noq yah toq las Harod jeisthuq dwang vyvm mas dvp thoeng toh. Midian dvp gas nyamoq dah mautsung shot pheh More jing khyei, langhkhau mha thoeng toh.
2 Yhensain Gideon lyis taiq zis gas, Midian jens lyis ung das xiklyis nvng yah dvgeh bang dius sunk nyo. Israel jens, nyamoq nyang khyuot yoeus zo ge moengs das zis ngos ma o, ge.
3 Housoeh Gideon gas, Gyuk soeu hank laus eq yhen pheh tauh loh aq, ngamoq gas Gilead boms mas nyeis das, ge dius jens lyis kyoh kat. Housoeh las dius aiq mons aiq khyoengh gas yhen pheh loh lo laus eq dvmons gas nyeis khoq.Ref 7.3: Lyi 20.8
4 Yhensain Gideon lyis taiq zis gas, Dius sunk nyo shih. Nyamoq lyis jeislvng mas shwih lyih aq, ngos houmha nah nyhenshang dius khyen dyei bah. Ngos nvng lyis, Haq yuk gas nvng yah gis loh oen lhyi ka nvng yah loh das. Haq yuk gas nvng yah ma gis loh, oen lhyi ka nvng yah ma loh, ge.
5 Housoeh nyang dius jens lyis jeis mas shwih e. Yhensain Gideon lyis taiq zis gas, Lvkhuih jeis shuk teh lhyo yah lyoq shuk bang dvjoq, phvluk thuk las gop shuk bang dvjoq gvn toh aq, ge.
6 Loq yah jeis gaiq las lyoq shuk bang somhxo bos. Gohtoeu dvnganh gas phvluk thuk las tsain shuk.
7 Yhensain Gideon lyis taiq zis gas, Hau jeis lyoq shuk bang somhxo lhyi yah ngos nvng lyis khyuot las Midian jens thoq mas ung nhang das. Gohtoeu dvnganh lyis gas nyang yuk nyang toeu yhen pheh loh geh, oen taiq aq, ge.
8 Housoeh las Gideon gas nyamoq dah vyhang yahge lvbuh yoeus chi dah dius somhxo mha lai las gohtoeu Israel dvnganh lyis gas vsainnyang yhen pheh nhang kat. Midian jens gas nyamoq dah o pheh langhkhau mha thoeng toh.
9 Hauh nyens lyis Yhensain Gideon lyis vmingh dyei zis gas, Toq aq. Nvng hauh thoenggus lyis zan aq. Ngos nvng lyis ung cho dyei nyeis.
10 Nvng ma womh zan lyis gas, nah jyeidwis Pura yah hauh dvp mas gyoh e aq.
11 Nvng nyamoq cha taiq zis xauhgyo das. Hauh thang lhyi nvng nyamoq lyis zan das zis womh los das, ge. Housoeh las Gideon yahge nyah jyeidwis Pura gas jeswus jens dah thoenggus vthang pheh e.
12 Midian, Amalek yahge buisthuq mau mas bang dvnganh gas langhkhau mha janghgyik teh vlhyoq dom nyoh loh. Nyamoq dah gola-u jens eq thomh yvm mas sihsho teh nyo joq.
13 Gideon houmha jweh lyis, dius dvyuk nyah dyenschangh lyis yhetmoq taiq kyoh nyeis zis xauhgyo. Nyang taiq nyeis zis gas, Ngos yhetmoq moq: yah thoenggus mas yoh lhyoq dvlhyoq lains wvng los las zvng mas zangh goeus ya, hauh zis phanh loh las lains gyop tyamp, ge.
14 Nyah Dyenschangh phoq gas, Houka gohtoeu cha ma yoh nghuot, Israel dius Yoash lo Gideon dah sham dvnghuot. Mangso ka nyang lyis Midian jens yahge yah jes dvphung gonh thoq mas ung cho dyei goeus, ge pho dyei.
15 Gideon hau yhetmoq yahge nyah vjyuk cho xauhgyo lyis, nyang dupaiq lho lha Israel dvp mas tauh loh las taiq zis gas, Toq geh! Yhensain ka namoq lyis Midian jesphung thoq mas ung cho dyei goeus, ge.
16 Nyang nyah dius somhxo lhyi somh gvm khyoq las, yuk khanghmuh lyis lvbuh yahge nyiduk bos dah tsoh auh chi nhang.
17 Nyang nyamoq lyis taiq zis gas, Ngos dvp thang mha jweh lyis ngos lyis yoeuh las namoq ngos kuot teh kuot geh.
18 Ngos yahge ngah phung lvbuh muot lyis namoq eq dvp yvmlhaink yah muot lho lha Yhensain yahge Gideon xiklyis, oen kaiq geh, ge.
19 Housoeh Gideon yahge nyang yah dvgeh dah dvxo yuk gas, hauh dvp thang mha gungsgvm ma jweh shih, zungh bang thaiq dah shishenh lyis jweh las lvbuh muot, nyamoq loq mas chi dah auh lyis eq bat khwih nyhink kat.
20 Gohtoeu aiq phung eq houyah dvyhangteh kuot. Nyamoq dvnganhmoq gas nyiduk lyis loqwi pheh chi, loqyos pheh lvbuh chi lha, Yhensain yahge Gideon dah sham, ge kaiq kat.
21 Hau dvp yvmlhaink yah hank eq hank vvng dah joqyos mas yap joq las, jesphung dvp gonh yah kaiq kyi lha phang loh.
22 Gideon dah dius jens nyamoq dah lvbuh muot nyeis lyis, Yhensain ka hauh dvp mas jesphung lyis nyamoq sham yah nyang changh nyang zan-goh nhang. Nyamoq gas Zerera pheh Bethshita jweh shoq, Tabat nvm Abel Mehola wus jweh shoq phang loh.
23 Napthali vkoq, Asher vkoq yahge Manase vkoq aiq joq masyah dius jens lyis lui thuq kat las nyamoq gas Midian jens lyis chank khat.
24 Gideon eq Ephraim boms mau gonh mas loeuskyoh bang nhang lha taiq zis gas, Midian jens lyis los zan geh. Yodan lvng yahge jeislo lvng Bet Bara jweh shoq Midian jens goeu thyet yvmas yap geh, ge. Housoeh Ephraim dius jens dvgeh khi huom lha, Betbara jweh shoq Yodan lvng mas yap nyeis.
25 Nyamoq gas Oreb, Zeb ge Midian zau aiq yuk yoh nyhik las, Oreb lyis Oreb luk thoq mas, Zeb lyis Zeb zvbiq nyhet zwvng mas sat. Nyamoq gas Midian lyis tsoq chank khat uhjyangh, Oreb yahge Zeb dah uhloms lyis gvshih Yodan lvng buisthuq tvp pheh nyeis dah Gideon jyank mas chi loh.