6
Gideon
1 Israel jens gas Yhensain yah tyi dah yaunos dvlhain doms kuot. Housoeh las nyang gas Midian bang lyis yah, nyamoq lyis nyhet zvn los guon nhang.
2 Midian jens gas Israel jens thoq lyis yombos yvmvyah, Israel jens gas luk-uk mas, gohtoeu jing mas dah gau joqyos mas tsain phang tamh.
3 Israel jens nyamoq jyo khyoq toh khanghmuh, Midian jens gas Amalek jens yahge buisthuq pheh bang yah dvgeh nyamoq lyis los gyangh zan.
4 Nyamoq gas hauh mau mas dvp los thoeng lha mautyi pheh Gaza vyvm vwi mas jweh shoq jyo dvnganh mhont tyamp dyei. Nyamoq gas yvng, noeu, mauhlyihzoe dvnganh yoeus loh las Israel jens zo das zis cha eq ma nyhet toh dyei lo.
5 Nyamoq gas nyamoq dah zvng eq gaunyhauq eq janghgyik boms teh los. Nyamoq eq nyamoq dah gola-u eq sunk nyo las ma thoq suon lo. Nyamoq gas hauh mau lyis los mhont.
6 Israel gas Midian gvng mas svsoh shohjyen goeus.
7 Housoeh nyamoq gas Yhensain lhyi Midian jens lyis tyi das zis pangh das nyhenshang tsain kaiq lui.
8 Nyang gas nyamoq jyank mas Yhensain, Israel dah Mangso jyank masyah haih loeus chi loh dah dangcoq soeu dvyuk nhang kat. Nyang taiq zis gas, Ngos gas namoq Egutu mas jons duot nyeis masyah shwih los.
9 Ngos namoq lyis Egutu jens loq masyah eq, haih mau mas namoq lyis zan bang masyah eq khyuot kat. Namoq jweh los zis yah dvyhangteh ngos nyamoq lyis khat tyamp las nyamoq dah maunyeis namoq lyis dyei.
10 Ngos gas Yhensain, namoq dah Mangso nghuot las, gvshih namoq nyeis dah mau bang Amori jens dah mangso lhyi ma gis paiq oen taiq goeus. Nghuot laus eq namoq ngah dang ma gyo, ge.
11 Yhensain dah loeuswons soeu ka Ophra wukhau, Abiezer vhuh Yoash yah sen dah wons zains khyei mha los tsung toh. Nyah lo Gideon gas Midian jens ma nyvng shoq zvbiq nyhet zwvng mas sunghso gauh nang nyeis.
12 Yhensain dah loeuswons soeu houmha thuq xoeuq las taiq, womh dah Yombos soeu eh, Yhensain nvng yah nghuot, ge.
13 Gideon nyang lyis taiq zis gas, Zau phoq eh, Yhensain ngamoq yah nghuot lyis gas, ngamoq chamus hei iq shanghsenh nyeis lah? Ngamoq dah phauh thyeih moq taiq lyis Yhensain ka nyamoq lyis Egutu masyah shwih los las mauhphoh muhzoh kuot khoq, ge. Nghuot laus eq gvshih nyang ngamoq lyis tyamp las Midian lyis yah ngamoq lyis los ung nhang, ge.
14 Nyang lyis Yhensain vmingh dyei zis gas, Nah yomzains yom yah Israel jens lyis Midian loq masyah loh khyuot aq. Ngos nvng lyis nhang goeus, ge.
15 Gideon toeuh zis gas, Yhensain eh, ngos Israel lyis khasoeh yoh khyuot das? Ngah vhuh gas Manase vkoq mas yomnhuk thank dah vhuh nghuot. Ngos eq ngamoq yhenbang mas ma duot thank soeu nghuot, ge.
16 Yhensain nyang lyis taiq zis gas, Ngos nvng lyis pangh das yvmvyah nvng yoh kuot das. Nvng Midian lyis dius dvyuk kyingh lyis teh lwis lwis yoh thungh thyi das, ge.
17 Gideon taiq zis gas, Nvng ngos lyis nyoqzons doeus nghuot lyis gas, nvng Yhensain nghuot jyoeng cho ngos lyis kyink yoeuh nhang aq.
18 Ngos nvng lyis zonoms jyungshuk ma chi jweh los dvchank nvng hei mhayah vloh, ge.
Nyang taiq zis gas, Nvng tauh jweh los shoq ngos nyeis das, ge.
19 Housoeh Gideon nyah yhen mha loh las beqlo dvdoeu, sunghso mons dvpungh bicheih ma kat ohlhyoq tsain ba. Housoeh shoh lyis kyank mas kat, shohjeis lyis auh mas kat las wons zains khyei mha langh nhang toh dah loeuswons soeu lhyi dyei.
20 Loeuswons soeu nyang lyis taiq zis gas, Shoh yahge ohlhyoq yoeus las haih luk thoq mas kih aq, hauh thoq mas shohjeis huot kat aq, ge. Gideon eq kuot goeus.
21 Housoeh Yhensain dah loeuswons soeu ka nyah loq mas chi dah lhamloq thyoh yah hau shoh yahge ohlhyoq lyis tanh lho lhyi hau luk masyah nyidap las, shoh yahge ohlhyoq ngeh jom. Hauh thang lhyi loeuswons soeu eq dyuk loh.
22 Gideon nyvng soeu ka Yhensain dah loeuswons soeu nghuot zis seq lyis nyang gyuk dvn zoh lyis taiq zis gas, Yomzains Yhensain eh, ngos nah loeuswons soeu lhyi nyoqnho changh xauh nyvng goh goeus, ge.
23 Nghuot laus eq Yhensain nyang lyis taiq zis gas, Nyenstap bas jungh, vgyuk, nvng ma shei das, ge.
24 Gideon gas houmha Yhensain lhyi phon ci lha, Yhensain ka nyenstap cho nghuot, ge nyhink.note 6.24 Hauh zis Abiezer vhuh yah sen dah Ophra mas joq shih
25 Hauh nyens lyis Yhensain ka Gibeon lyis, Nah uwus dah noeulu dvdoeu, gohtoeu nyhet zvn bos dah zis dvdoeu yoeus aq. Lho lha nah uwus dah Bala phvra phon lhyi thyoq khyoq aq. Hauh vyvm mas Ashera gywes nyhiq dah gungslho eq jap khyoq aq.note 6.25 Noeulu, nyhet zvn bos vdoeu, noeulu aiq vdoeu, noeulu ge tsain bos.
26 Hau nyhang joqyos mas Yhensain, nah Mangso xiklyis phon jus jus vzoh yah ci aq. Hau nvng jap khyoq Ashera gungslho saiq yah thangh kuot las hau noeulu aiq vdoeu lyis ngheq phudyei khyvlyis doeu gonh ngheq dyei aq, ge.
27 Gideon eq nyah jyeidwis jens dvci yuk shwih las Yhensain taiq zis kuot. Nyang gas nyah yhenbang yahge wus mas bang lyis svsoh gyuk yvmvyah, nyeih lyis ma womh kuot las nyenh lyis kuot.
Gideon Bala Phon Thyoq
28 Nungsnvp noq yah wus mas bang toq los lyis, Bala phon yahge Ashera vlho thyoq khyoq toh; houmha phon ci lha hauh thoq mas noeulu aiq vdoeu ngheq phudyei toh yvlyis nyvng.
29 Haih zis hank kuot? ge nyamoq nyang changh nyei goh. Nyamoq nyei choq lyis, Yoash dah lo Gideon kuot ge yoh seq.
30 Nyamoq Yoash lyis taiq zis gas, Nah lo gas Bala phon lhyi thyoq khyoq, hauh vyvm mas dah Ashera vlho lhyi jap khyoq las nyang lyis sat chah, shwih thuq los aq, ge.
31 Yoash ka nyang lyis nhaiq los yo yap joq bang lyis taiq zis gas, Namoq Bala phvra shot pheh dap lah? Bala phvra lyis gos das lah? Bala shot pheh yap soeu ka khvnvp sat xauh das. Bala gas mangso nghuot lyis gas nyang zan bas jungh. Khasoeh ge lyis hau thyoq khyoq zis gas nyah phon nghuot, ge.
32 Hou mhayah Gideon gas Yerubalnote 6.32 Yerubal ge zis gas, Hebre mas, Bala nyang gos bas jungh ge vjyuk nghuot. ge nyings hoeuh loh. Khasoeh ge lyis Yoash gas, Hau thyoq khyoq dah phon ka Bala zis nghuot las nyang zan bas jungh, ge goeus.
33 Hauh thang lhyi Midian jens, Amalek jens yahge buisthuq mau mas bang dvgeh huom, Yodan lvng goeu los las Yezrel langhkhau mha dvp thoeng nyeis.
34 Yhensain dah Dyos gas Gideon jyank jweh bos las, nyang gas Abiezer vhuh jens nyah thang mha chank los das xiklyis lvbuh muot kat zis yah lui.
35 Manase aiq mau gonh mas eq loeuskyoh bang nhang lha nyah thang mha chank los das xiklyis khi. Asher, Zebulun yahge Napthali vkoq jens jyank mas eq loeuskyoh bang nhang lha, nyamoq eq nyang yah los tsain coq.
Yvng Mauh Vlho
36 Hauh thang lhyi Gideon Mangso lhyi taiq zis gas, Nvng taiq lyis nvng Israel lyis khyuot das zis ngos lyis yhung das cho nghamh thyet toh goeus, ge.
37 Ngos yvng mauh dvkhamh lyis than jang mas toh bah, nvpyo lyis hau yvng mauh mas kyingh jyweh gyoh las nyeisjvng gas ma jyweq lyis, houka nvng Israel lyis khyuot yvmas ngos lyis yhung das zis ngos yoh seq das, ge.
38 Hauh zis housoeh top nyang bweh los. Nungsnvp noq yah Gideon toq los las hau yvng mauh nyhet lyis jyweh jeis dvkhuq dyingh nghuot.
39 Tsai, Gideon Mangso lhyi taiq zis gas, Nhaiq vjenh yo, hai dvlhain taiq shih bah. Yvng mauh yah dvlhain jenh kyink yoeuh nhang shih aq. Haq lhain ka yvng mauh kyuk las nyeisjvng gas jyweq joq nhang aq, ge.
40 Hauh nyens lyis Mangso eq hauh zis kuot dyei las, nungsnvp yvng mauh gas kyuk las nyeisjvng gonh gas jyweh yah jyweq joq.